FDI Inflow: ವಿದೇಶ ನೇರ ಬಂಡವಾಳ ಹರಿವಿನಲ್ಲಿ ಕರ್ನಾಟಕ್ಕೆ 3ನೇ ಸ್ಥಾನ; ದೇಶಕ್ಕೆ ಬಂದ ಎಫ್​ಡಿಐ 8172 ಕೋಟಿ ಯುಎಸ್​ಡಿ

2020- 21ನೇ ಸಾಲಿನಲ್ಲೂ ಸೇರಿ ಸತತ ನಾಲ್ಕನೇ ವರ್ಷ ಅತಿ ಹೆಚ್ಚು ವಿದೇಶ ನೇರ ಬಂಡವಾಳ (ಫಾರಿನ್ ಡೈರೆಕ್ಟ್ ಇನ್ವೆಸ್ಟ್​ಮೆಂಟ್- ಎಫ್​ಡಿಐ) ಹರಿದುಬಂದ ಟಾಪ್ ರಾಜ್ಯವಾಗಿ ಗುಜರಾತ್ ಸಾಧನೆ ಮಾಡಿದೆ ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ. ಇನ್ನು ಕರ್ನಾಟಕವು ಈ ಪಟ್ಟಿಯಲ್ಲಿ ದೇಶಕ್ಕೇ ಮೂರನೆ ಸ್ಥಾನದಲ್ಲಿದೆ. ಇಡೀ ದೇಶಕ್ಕೆ ಹರಿದುಬಂದಿರುವ ಶೇ 100ರಷ್ಟು ವಿದೇಶ ನೇರ ಬಂಡವಾಳದಲ್ಲಿ ಕರ್ನಾಟಕಕ್ಕೆ ಶೇ 13ರಷ್ಟು ಬಂದಿದೆ. 2020- 21ರಲ್ಲಿ ಭಾರತಕ್ಕೆ ಬಂದಿರುವ ಒಟ್ಟು ವಿದೇಶ ನೇರ ಬಂಡವಾಳ ಪೈಕಿ ಶೇಕಡಾ 37ರಷ್ಟು ಗುಜರಾತ್​ಗೆ, ಅಂದರೆ 3230 ಕೋಟಿ ಅಮೆರಿಕನ್ ಡಾಲರ್ ವಿದೇಶ ನೇರ ಬಂಡವಾಳ ಬಂದಿದೆ.

2020-21ನೇ ಸಾಲಿನಲ್ಲಿ ಭಾರತಕ್ಕೆ ಬಂದಿರುವ ಎಫ್​ಡಿಐ 8172 ಕೋಟಿ ಅಮೆರಿಕನ್ ಡಾಲರ್. ಅದರ ಹಿಂದಿನ ಹಣಕಾಸು ವರ್ಷಕ್ಕೆ ಹೋಲಿಸಿದರೆ ಶೇ 10ರಷ್ಟು ಏರಿಕೆ ಆಗಿದೆ ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ. ಅಂದಹಾಗೆ ಎಫ್​ಡಿಐ ಲೆಕ್ಕಾಚಾರದಲ್ಲಿ ಗುಜರಾತ್ ಮೊದಲ ಸ್ಥಾನದಲ್ಲಿ ಇದ್ದರೆ, ಎರಡನೇ ಸ್ಥಾನದಲ್ಲಿ ಮಹಾರಾಷ್ಟ್ರ ಇದ್ದು, ಶೇ 27ರಷ್ಟು ವಿದೇಶ ಬಂಡವಾಳ ಆ ರಾಜ್ಯಕ್ಕೆ ಬಂದಿದೆ. ಇನ್ನೊಂದು ಸಂಗತಿ ಏನೆಂದರೆ, ಗುಜರಾತ್​ಗೆ ಬಂದಿರುವ ಒಟ್ಟು ಬಂಡವಾಳದಲ್ಲಿ ಶೇ 94ರಷ್ಟು ಹೂಡಿಕೆ ಕಂಪ್ಯೂಟರ್ ಹಾರ್ಡ್​ವೇರ್ ಮತ್ತು ಸಾಫ್ಟ್​ವೇರ್ ವಲಯಕ್ಕೆ ಬಂದಿದೆ. ಅಂದಹಾಗೆ, ದೇಶದಲ್ಲಿ ಒಟ್ಟಾರೆಯಾಗಿ ಈ ವಲಯಕ್ಕೆ ಬಂದಿರುವ ಹೂಡಿಕೆ ಪೈಕಿ ಗುಜರಾತ್​ಗೆ ಶೇ 78ರಷ್ಟು ಇದೆ.

ಇನ್ನು ಕರ್ನಾಟಕವು ಶೇ 13ರಷ್ಟು ವಿದೇಶ ಬಂಡವಾಳವನ್ನು ಆಕರ್ಷಿಸುವ ಮೂಲಕ ಈ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದೆ. ಕೊರೊನಾ ಸಂದರ್ಭದಲ್ಲಿಯೂ ಹಿಂದಿನ ಹಣಕಾಸು ವರ್ಷಕ್ಕಿಂತ ಈ ಬಾರಿ ದೇಶದೊಳಗೆ ಶೇ 10ರಷ್ಟು ಹೆಚ್ಚು ಎಫ್​ಡಿಐ ಬಂದಿದೆ. ಜತೆಗೆ ನಾನಾ ರಾಜ್ಯಗಳು ಬಂಡವಾಳವನ್ನು ಸೆಳೆಯುವ ಉದ್ದೇಶಕ್ಕೆ ಪ್ರಯತ್ನಗಳು ಮಾಡಿದ್ದವು. ಅದರ ಫಲಿತಾಂಶಗಳು ಎಫ್​ಡಿಐ ಹರಿವಿನ ರೂಪದಲ್ಲಿ ಕಂಡುಬಂದಿದೆ. ಹೂಡಿಕೆ ಮಾಡಿದ ದೇಶಗಳ ಪೈಕಿ ಮೊದಲ ಸ್ಥಾನದಲ್ಲಿ ಇರುವುದು ಸಿಂಗಾಪೂರ್​. ಹೂಡಿಕೆ ಪಾಲು ಶೇ 29ರಷ್ಟು. ಆ ನಂತರದ ಸ್ಥಾನ ಅಮೆರಿಕ, ಶೇ 23ರಷ್ಟು ಮತ್ತು ಮಾರಿಷಿಯಸ್ ಶೇ 9ರಷ್ಟು ಪಾಲು ಹೊಂದಿದೆ.

ಇದನ್ನೂ ಓದಿ: ವಿಮೆ ವಲಯದಲ್ಲಿ ಶೇ 74ರ ತನಕ ಎಫ್​ಡಿಐ ಹೂಡಿಕೆಗೆ ಅವಕಾಶ ನೀಡುವ ಮಸೂದೆಗೆ ರಾಜ್ಯಸಭೆಯಲ್ಲಿ ಒಪ್ಪಿಗೆ

(Foreign Direct Investment (FDI) in to India for FY21 amounted to 81.72 billion USD. Here is the state wise details)