Forex: ಮಾರ್ಚ್ 15ಕ್ಕೆ ಸಾರ್ವಕಾಲಿಕ ಗರಿಷ್ಠ ಮಟ್ಟಕ್ಕೆ ಸಮೀಪಿಸಿದ ಭಾರತದ ಫಾರೆಕ್ಸ್ ಮೀಸಲು ಸಂಪತ್ತು
India's Foreign Exchange Reserves on March 15th: ಭಾರತದ ಫಾರೀನ್ ಎಕ್ಸ್ಚೇಂಜ್ ರಿಸರ್ವ್ಸ್ ಮಾರ್ಚ್ 15ಕ್ಕೆ ಅಂತ್ಯಗೊಂಡ ವಾರದಲ್ಲಿ 642.492 ಬಿಲಿಯನ್ ಡಾಲರ್ಗೆ ಏರಿದೆ. 2021ರ ಅಕ್ಟೋಬರ್ನಲ್ಲಿ ವಿದೇಶೀ ವಿನಿಮಯ ಮೀಸಲು ಸಂಪತ್ತು 645 ಬಿಲಿಯನ್ ಡಾಲರ್ನಷ್ಟಿತ್ತು. ಅದು ಈವರೆಗಿನ ಗರಿಷ್ಠ ನಿಧಿ ಎನಿಸಿದೆ. ಇದೀಗ ಆ ಮಟ್ಟದ ಸಮೀಪಕ್ಕೆ ಹೋಗಿದೆ. ಚೀನಾ, ಜಪಾನ್ ಮತ್ತು ಸ್ವಿಟ್ಜರ್ಲ್ಯಾಂಡ್ ಬಿಟ್ಟರೆ ಭಾರತವೇ ಅತಿಹೆಚ್ಚು ಫಾರೆಕ್ಸ್ ಮೀಸಲು ಸಂಪತ್ತು ಹೊದಿರುವುದು.
Updated on: Mar 24, 2024 | 10:18 AM
ನವದೆಹಲಿ, ಮಾರ್ಚ್ 24: ಭಾರತದ ವಿದೇಶ ವಿನಿಮಯ ಮೀಸಲು ನಿಧಿ (Forex reserves) ಕಳೆದ ಕೆಲ ವಾರಗಳಿಂದ ಕಾಣುತ್ತಿರುವ ಏರಿಕೆ ಮುಂದುವರಿದಿದೆ. ಮೊನ್ನೆ ಆರ್ಬಿಐ ಬಿಡುಗಡೆ ಮಾಡಿದ ದತ್ತಾಂಶದ ಪ್ರಕಾರ ಫಾರೆಕ್ಸ್ ರಿಸರ್ವ್ಸ್ 642.492 ಬಿಲಿಯನ್ ಡಾಲರ್ಗೆ ಇದು. ಇದು ಸಾರ್ವಕಾಲಿಕ ಗರಿಷ್ಠ ಮಟ್ಟವಾದ 645 ಬಿಲಿಯನ್ ಡಾಲರ್ಗೆ ಹತ್ತಿರ ಇದೆ. ಮಾರ್ಚ್ 15ರಂದು ಅಂತ್ಯಗೊಂಡ ವಾರದಲ್ಲಿ 6.396 ಬಿಲಿಯನ್ ಡಾಲರ್ನಷ್ಟು ನಿಧಿ ಹೆಚ್ಚಳವಾಗಿದೆ. ಅದಕ್ಕೆ ಹಿಂದಿನ ವಾರದಲ್ಲಿ 10.47 ಬಿಲಿಯನ್ ಡಾಲರ್ನಷ್ಟು ಹೆಚ್ಚಾಗಿತ್ತು. ಸತತ ನಾಲ್ಕೈದು ವಾರಗಳ ಫಾರೆಕ್ಸ್ ಸಂಪತ್ತು ಹೆಚ್ಚಳ ಗಳಿಸುತ್ತಾ ಬಂದಿದೆ.
ಆರ್ಬಿಐ ದತ್ತಾಂಶದ ಪ್ರಕಾರ ವಿದೇಶೀ ವಿನಿಮಯ ಮೀಸಲು ನಿಧಿ ಪೈಕಿ ಪ್ರಮುಖ ಭಾಗವಾಗಿರುವ ಕರೆನ್ಸಿ ಆಸ್ತಿಯೇ 6.034 ಬಿಲಿಯನ್ ಡಾಲರ್ನಷ್ಟು ಏರಿಕೆ ಆಗಿದೆ. ಗೋಲ್ಡ್ ರಿಸರ್ವ್ಸ್ 425 ಮಿಲಿಯನ್ ಡಾಲರ್, ಎಸ್ಡಿಆರ್ 65 ಮಿಲಿಯನ್ ಡಾಲರ್ ಮತ್ತು ಐಎಂಎಫ್ನಲ್ಲಿನ ನಿಧಿ 129 ಮಿಲಿಯನ್ ಡಾಲರ್ನಷ್ಟು ಹೆಚ್ಚಳವಾಗಿರುವುದು ತಿಳಿದುಬಂದಿದೆ.
ಇಲ್ಲಿ ಫಾರೀನ್ ಕರೆನ್ಸಿ ಅಸೆಟ್ನಲ್ಲಿ ಭಾರತದ ಫಾರೆಕ್ಸ್ ಮೀಸಲು ಸಂಪತ್ತಿನಲ್ಲಿರುವ ಯೂರೋ, ಪೌಂಡ್, ಯೆನ್ ಇತ್ಯಾದಿ ಡಾಲರೇತರ ಕರೆನ್ಸಿಗಳ ಮೌಲ್ಯವೂ ಒಳಗೊಂಡಿರುತ್ತದೆ.
ಇದನ್ನೂ ಓದಿ: 50 ಸಾವಿರ ರೂ.ಗಿಂತ ಹೆಚ್ಚಿನ ಹಣ ಠೇವಣಿ, ವಿತ್ಡ್ರಾ ಮಾಡುವುದಿದ್ದರೆ ಗಮನಿಸಿ
ಎಸ್ಡಿಆರ್ ಅಥವಾ ಸ್ಪೆಷಲ್ ಡ್ರಾಯಿಂಗ್ ರೈಟ್ಸ್ ಎಂಬುದು ಅಂತರರಾಷ್ಟ್ರೀಯ ಮೀಸಲು ಸಂಪತ್ತು. ಅದು ಕರೆನ್ಸಿ ಅಲ್ಲವಾದರೂ ವಿಶ್ವದ ಪ್ರಮುಖ ಐದು ಕರೆನ್ಸಿಗಳಾದ ಅಮೆರಿಕನ್ ಡಾಲರ್, ಯೂರೋ, ಚೀನಾದ ರೆನ್ಮಿನ್ಬಿ, ಜಪಾನ್ನ ಯೆನ್, ಬ್ರಿಟನ್ನ ಪೌಂಡ್ ಸ್ಟರ್ಲಿಂಗ್ ಇವುಗಳ ಒಂದು ಗುಂಪಿನ ಮೌಲ್ಯವಾಗಿರುತ್ತದೆ.
ಭಾರತದ ಫಾರೆಕ್ಸ್ ಮೀಸಲು ನಿಧಿ ಮಾರ್ಚ್ 15ಕ್ಕೆ
ಒಟ್ಟಾರೆ ಫಾರೆಕ್ಸ್ ರಿಸರ್ವ್ಸ್: 642.492 ಬಿಲಿಯನ್ ಡಾಲರ್
- ಫಾರೀನ್ ಕರೆನ್ಸಿ ಅಸೆಟ್: 568.386 ಬಿಲಿಯನ್ ಡಾಲರ್
- ಗೋಲ್ಡ್ ರಿಸರ್ವ್ಸ್: 51.14 ಬಿಲಿಯನ್ ಡಾಲರ್
- ಎಸ್ಡಿಆರ್: 18.276 ಬಿಲಿಯನ್ ಡಾಲರ್
- ಐಎಂಎಫ್ನೊಂದಿಗಿನ ಮೀಸಲು: 4.689 ಬಿಲಿಯನ್ ಡಾಲರ್
ಒಂದು ದೇಶವು ಎಷ್ಟು ವಿದೇಶೀ ಕರೆನ್ಸಿಗಳನ್ನು ಹೊಂದಿದೆ ಎಂಬುದು ಫಾರೆಕ್ಸ್ ರಿಸರ್ವ್ಸ್ ಆಗುತ್ತದೆ. ಇದರ ಜೊತೆಗೆ ಚಿನ್ನ, ಎಸ್ಡಿಆರ್ ಇತ್ಯಾದಿ ಆಸ್ತಿಗಳನ್ನೂ ಇದರಲ್ಲಿ ಒಳಗೊಳ್ಳಲಾಗಿರಬಹುದು. ಆದರೆ, ಸಾಮಾನ್ಯವಾಗಿ ವಿದೇಶೀ ಕರೆನ್ಸಿ ಆಸ್ತಿ ಫಾರೆಕ್ಸ್ ಮೀಸಲು ಸಂಪತ್ತಿನಲ್ಲಿ ಪ್ರಮುಖ ಭಾಗವಾಗಿರುತ್ತದೆ. ಅದರಲ್ಲೂ ಹೆಚ್ಚು ಟ್ರೇಡಿಂಗ್ ಮಾಡುವ ವಿದೇಶಗಳ ಕರೆನ್ಸಿ ಸಂಗ್ರಹ ಇದು. ಆ ದೇಶದ ಕರೆನ್ಸಿ ಮೌಲ್ಯವನ್ನು ರಕ್ಷಿಸಲು ಸಹಾಯಕವಾಗುತ್ತದೆ.
ಇದನ್ನೂ ಓದಿ: ಹಣದುಬ್ಬರದ ತಲೆನೋವು ಬಿಟ್ಟರೆ, ಭಾರತದ ಆರ್ಥಿಕತೆಯ ಸದ್ಯೋಭವಿಷ್ಯ ಉತ್ತಮ: ಸರ್ಕಾರದ ವರದಿ
2021ರ ಅಕ್ಟೋಬರ್ ತಿಂಗಳಲ್ಲಿ ಭಾರತದ ಫಾರೆಕ್ಸ್ ರಿಸರ್ವ್ಸ್ 645 ಬಿಲಿಯನ್ ಡಾಲರ್ಗೆ ಹೋಗಿತ್ತು. ಈಗ ಅದಕ್ಕೆ ಸಮೀಪಕ್ಕೆ ಹೋಗಿದೆ. ಆದರೆ, ಇದೇ ವೇಳೆ ರುಪಾಯಿ ಕರೆನ್ಸಿ ಮೌಲ್ಯ ಕುಸಿಯುತ್ತಲೇ ಇದೆ. ಒಂದು ಯುಎಸ್ ಡಾಲರ್ಗೆ ರುಪಾಯಿ ಮೌಲ್ಯ 83.59 ಆಗಿದೆ. ಮೊನ್ನೆ ಅದು 84ರ ಸಮೀಪಕ್ಕೆ ಕುಸಿದುಹೋಗಿತ್ತು.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
