Foxconn: ಕೊಂಗರಕಲಾನ್ನಲ್ಲಿ ಫಾಕ್ಸ್ಕಾನ್ ಘಟಕ ಫಿಕ್ಸ್; ತೆಲಂಗಾಣ ಸ್ಪೀಡ್ಗೆ ಬೆರಗಾದ ಛೇರ್ಮನ್ ಲಿಯು; ಮೊದಲ ಹಂತದಲ್ಲಿ 4,100 ಕೋಟಿ ರೂ ಹೋಡಿಕೆ; 25,000 ಉದ್ಯೋಗಸೃಷ್ಟಿ
Kongara Kalan To Have Foxconn Unit: ಹೈದರಾಬಾದ್ ಸಮೀಪದ ರಂಗಾರೆಡ್ಡಿ ಜಿಲ್ಲೆಗೆ ಸೇರಿದ ಕೊಂಗರಕಲಾನ್ನಲ್ಲಿ ಫಾಕ್ಸ್ಕಾನ್ ಘಟಕ ಸ್ಥಾಪನೆಯಾಗಲಿದೆ. ಮೊದಲ ಹಂತದಲ್ಲಿ 4,100 ಕೋಟಿ ರೂ ಹೂಡಿಕೆ ಆಗಲಿದ್ದು, 25,000 ಉದ್ಯೋಗ ಸೃಷ್ಟಿಯ ನಿರೀಕ್ಷೆ ಇದೆ.
ಹೈದರಾಬಾದ್: ಆ್ಯಪಲ್ ಐಫೋನ್ ತಯಾರಕ ಫಾಕ್ಸ್ಕಾನ್ ಸಂಸ್ಥೆ (Foxconn) ತೆಲಂಗಾಣ ಮತ್ತು ಕರ್ನಾಟಕದಲ್ಲಿ ಘಟಕಗಳನ್ನು ಸ್ಥಾಪಿಸುವುದು ದೃಢಪಟ್ಟಿದೆ. ಕರ್ನಾಟಕದಲ್ಲಿ ಈಗಾಗಲ್ಲೇ ಏರ್ಪೋರ್ಟ್ ಇರುವ ದೇವನಹಳ್ಳಿ ಬಳಿ ಒಂದು ದೊಡ್ಡ ಪ್ಲಾಟ್ ಖರೀದಿಸಿದೆ. ಇದೀಗ ತೆಲಂಗಾಣದ ರಂಗಾರೆಡ್ಡಿ ಜಿಲ್ಲೆಯ ಕೊಂಗರ್ ಕಲಾನ್ (Kongara Kalaan) ಎಂಬಲ್ಲಿ ಫಾಕ್ಸ್ಕಾನ್ನ ಘಟಕವೊಂದು ಆರಂಭವಾಗುವುದು ಖಚಿತವಾಗಿದೆ. ಹೈದರಾಬಾದ್ಗೆ ಸಮೀಪ ಇರುವ ಕೊಂಗರ ಕಲಾನ್ನಲ್ಲಿ ಫಾಕ್ಸ್ಕಾನ್ ಘಟಕ ಸ್ಥಾಪನೆ ಆಗುತ್ತಿರುವ ವಿಚಾರವನ್ನು ತೆಲಂಗಾಣದ ಐಟಿ ಸಚಿವ ಕೆಟಿ ರಾಮರಾವ್ ಟ್ವೀಟ್ ಮಾಡಿ ತಿಳಿಸಿದ್ದಾರೆ. ಫಾಕ್ಸ್ಕಾನ್ ಘಟಕ ಸ್ಥಾಪನೆಗೆ ತೆಲಂಗಾಣ ಮತ್ತು ಫಾಕ್ಸ್ಕಾನ್ ಮಧ್ಯೆ ಒಪ್ಪಂದಕ್ಕೆ ಸಹಿಬಿದ್ದಿದೆ.
ಈ ಘಟಕದಲ್ಲಿ ಫಾಕ್ಸ್ಕಾನ್ ಮೊದಲ ಹಂತದಲ್ಲಿ 500 ಮಿಲಿಯನ್ ಡಾಲರ್ (ಸುಮಾರು 4,100 ಕೋಟಿ ರೂ) ಹಣ ಹೂಡಿಕೆ ಮಾಡಲಿದೆ. ಇದರಿಂದ 25,000 ದಷ್ಟು ನೇರ ಉದ್ಯೋಗಗಳು ಸೃಷ್ಟಿಯಾಗುವ ನಿರೀಕ್ಷೆ ಇಟ್ಟುಕೊಳ್ಳಲಾಗಿದೆ. ತೆಲಂಗಾಣ ಮುಖ್ಯಮಂತ್ರಿ ಕೆ ಚಂದ್ರಶೇಖರ್ ರಾವ್ ಅವರ ಮಗನೂ ಆಗಿರುವ ಕೆಟಿ ರಾಮರಾವ್ ಮಾಡಿರುವ ಟ್ವೀಟ್ ಪ್ರಕಾರ ತೆಲಂಗಾಣದಲ್ಲಿ ಫಾಕ್ಸ್ಕಾನ್ನ ಇನ್ನಷ್ಟು ಘಟಕಗಳು ಸ್ಥಾಪನೆ ಆಗಬಹುದು.
ಇದನ್ನೂ ಓದಿ: Apple Phones: ಆ್ಯಪಲ್ ಫೋನ್ ಫ್ಯಾಕ್ಟರಿಗಾಗಿ ಬೆಂಗಳೂರಿನಲ್ಲಿ 303 ಕೋಟಿ ರೂ.ಗೆ ಭೂಮಿ ಖರೀದಿಸಿದ ಫಾಕ್ಸ್ಕಾನ್
ಇದೇ ವೇಳೆ ಫಾಕ್ಸ್ಕಾನ್ ಘಟಕ ಸ್ಥಾಪನೆ ಆಗುತ್ತಿರುವ ಬಗ್ಗೆ ತೆಲಂಗಾಣ ಸರ್ಕಾರ ಮತ್ತು ಫಾಕ್ಸ್ಕಾನ್ ಮಧ್ಯೆ ಜಂಟಿ ಹೇಳಿಕೆ ಬಿಡುಗಡೆ ಆಗಿದೆ. ವಿಶ್ವದರ್ಜೆ ಉತ್ಪನ್ನಗಳನ್ನು ಇಲ್ಲಿ ತಯಾರಿಸಿ ಮಾರುಕಟ್ಟೆಗೆ ಬಿಡುಗಡೆ ಮಾಡಲಾಗುವುದನ್ನು ತಿಳಿಸಲಾಗಿದೆ.
Demonstrating the “Telangana Speed”, I am happy to announce the groundbreaking of first of Foxconn’s plants in Telangana at Kongar Kalaan today
With an investment of over $500M it shall create 25,000 direct jobs in first Phase #Telangana #Foxconn pic.twitter.com/PHThJWxsfT
— KTR (@KTRBRS) May 15, 2023
ಫಾಕ್ಸ್ಕಾನ್ನ ಛೇರ್ಮನ್ ಯಂಗ್ ಲಿಯು ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದು, ತೆಲಂಗಾಣ ಸರ್ಕಾರದ ಧೋರಣೆಯನ್ನು ಪ್ರಶಂಸಿಸಿದ್ದಾರೆ. ತೆಲಂಗಾಣ ತನಗೆ ವಿಶ್ವಾಸ ನೀಡಿದೆ. ಫಾಕ್ಸ್ಕಾನ್ನ ಆದಾಯ ದ್ವಿಗುಣಗೊಳ್ಳುವ ಸಾಧ್ಯತೆ ಇದೆ. ವೇಗ ಇಲ್ಲದೇ ಇದು ಸಾಧ್ಯವಿಲ್ಲ. ತೆಲಂಗಾಣದ ವೇಗದಿಂದ ಇದು ಸಾಧ್ಯವಾಗಿದೆ ಎಂದು ಯಂಗ್ ಲಿಯು ಈ ಸಂದರ್ಭದಲ್ಲಿ ಹೇಳಿದ್ದನ್ನು ಕೆಟಿ ರಾಮರಾವ್ ಅವರು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ.
ಇದನ್ನೂ ಓದಿ: Doctors: ವೈದ್ಯರಿಗೆ ಯೂನಿಕ್ ಐಡಿ ಕಡ್ಡಾಯ; ದೇಶದ ಎಲ್ಲಾ ವೈದ್ಯರ ಹೆಸರು ನ್ಯಾಷನಲ್ ಮೆಡಿಕಲ್ ರಿಜಿಸ್ಟರ್ನಲ್ಲಿ
ಆ್ಯಪಲ್ ಕಂಪನಿಯ ಪ್ರಮುಖ ಮೂರ್ನಾಲ್ಕು ಸರಬರಾಜುದಾರ ಸಂಸ್ಥೆಗಳಲ್ಲಿ ಫಾಕ್ಸ್ಕಾನ್ ಅತಿದೊಡ್ಡದು. ಚೈನೀಸ್ ಥೈಪೆ ಅಥವಾ ತೈವಾನ್ ಮೂಲದ ಕಂಪನಿ ಇದು. ಆ್ಯಪಲ್ನ ಐಫೋನ್ ಸೇರಿದಂತೆ ವಿವಿಧ ಉತ್ಪನ್ನಗಳನ್ನು ಇದು ತಯಾರಿಸಿ ಸರಬರಾಜು ಮಾಡುತ್ತದೆ. ಚೀನಾದಲ್ಲಿ ಇದರ ಹೆಚ್ಚಿನ ಘಟಕಗಳು ಇರುವುದು. ಕೋವಿಡ್ ಸಂದರ್ಭದಲ್ಲಿ ಚೀನಾದಲ್ಲಿ ಘಟಕಗಳು ಮುಚ್ಚಿದ್ದರಿಂದ ಸಾಕಷ್ಟು ಸರಬರಾಜು ಸಮಸ್ಯೆಗಳು ಎದುರಾಗಿದ್ದವು. ಈ ಹಿನ್ನೆಲೆಯಲ್ಲಿ ಇತರ ದೇಶಗಳಿಗೆ ಐಫೋನ್ ತಯಾರಕ ಘಟಕಗಳನ್ನು ವರ್ಗಾಯಿಸಲಾಗುತ್ತಿದೆ. ಇದರ ಭಾಗವಾಗಿ ಭಾರತದಲ್ಲೂ ಫಾಕ್ಸ್ಕಾನ್ ವಿವಿಧ ಕಡೆ ಘಟಕಗಳನ್ನು ಸ್ಥಾಪಿಸುತ್ತಿದೆ.
ಬೆಂಗಳೂರು ಏರ್ಪೋರ್ಟ್ ಇರುವ ದೇವನಹಳ್ಳಿ ಸಮೀಪವೂ ಫಾಕ್ಸ್ಕಾನ್ ದೊಡ್ಡ ಜಮೀನು ಖರೀದಿಸಿದೆ. ಇಲ್ಲಿ ಐಫೋನ್ ತಯಾರಕ ಘಟಕ ಸ್ಥಾಪನೆ ಆಗುವ ಸಾಧ್ಯತೆ ಇದ್ದು, 1 ಲಕ್ಷ ಉದ್ಯೋಗಗಳು ಸೃಷ್ಟಿಯಾಗಬಹುದು ಎನ್ನಲಾಗುತ್ತಿದೆ.
