ಭಾರತದಲ್ಲಿ ಎಚ್​ಪಿಯಿಂದ ಗೂಗಲ್ ಕ್ರೋಮ್​ಬುಕ್​ಗಳ ತಯಾರಿಕೆ; ಬಹಳ ಕಡಿಮೆಬೆಲೆಗೆ ಸಿಗಲಿವೆ ಲ್ಯಾಪ್​ಟಾಪ್

ನವದೆಹಲಿ, ಅಕ್ಟೋಬರ್ 3: ಗೂಗಲ್ ಕಂಪನಿಯ ಕ್ರೋಮ್​ಬುಕ್ ಲ್ಯಾಪ್​ಟಾಪ್​ಗಳು (Google chromebook laptops) ಭಾರತದಲ್ಲೇ ತಯಾರಾಗುತ್ತಿವೆ. ಮೇಕ್ ಇನ್ ಇಂಡಿಯಾ ಯೋಜನೆಯ ಭಾಗವಾಗಿ ಕೇಂದ್ರ ತಂದಿರುವ ಪಿಎಲ್​ಐ ಸ್ಕೀಮ್ ಅಡಿಯಲ್ಲಿ ಈ ಲ್ಯಾಪ್​ಟಾಪ್​ಗಳನ್ನು ತಯಾರಿಸಲಾಗುತ್ತಿದೆ. ಈ ಕಾರ್ಯಕ್ಕಾಗಿ ಹೆಚ್​ಪಿ ಸಂಸ್ಥೆ ಜೊತೆ ಗೂಗಲ್ ಒಪ್ಪಂದ (google and hp partnership) ಮಾಡಿಕೊಂಡಿದೆ. ಚೆನ್ನೈನಲ್ಲಿರುವ ಎಚ್​ಪಿ ಘಟಕದಲ್ಲಿ ಗೂಗಲ್​ನ ಕ್ರೋಮ್​ಬುಕ್ ಲ್ಯಾಪ್​ಟಾಪ್​ಗಳು ಸಿದ್ಧಗೊಳ್ಳಲಿವೆ. ಇದರೊಂದಿಗೆ ಭಾರತದಲ್ಲಿ ಕ್ರೋಮ್​ಬುಕ್ ಲ್ಯಾಪ್​ಟಾಪ್​ಗಳು ಬಹಳ ಕಡಿಮೆ ಬೆಲೆಗೆ ಸಿಗಲಿವೆ.

‘ಭಾರತದಲ್ಲಿ ಕ್ರೋಮ್​ಬುಕ್​ಗಳನ್ನು ತಯಾರಿಸಲು ಎಚ್​ಪಿ ಜೊತೆ ನಾವು ಪಾಲುದಾರಿಕೆಯಲ್ಲಿದ್ದೇವೆ. ಭಾರತದಲ್ಲಿ ನಿರ್ಮಾಣವಾಗಿರುವ ಮೊದಲ ಕ್ರೋಮ್​ಬುಕ್​ಗಳಿವು. ಭಾರತೀಯ ವಿದ್ಯಾರ್ಥಿಗಳಿಗೆ ಬಹಳ ಅಗ್ಗದ ಮತ್ತು ಸುರಕ್ಷಿತ ಕಂಟ್ಯೂಟಿಂಗ್ ಸಾಧನೆ ಸಿಗುತ್ತದೆ,’ ಎಂದು ಗೂಗಲ್ ಸಿಇಒ ಸುಂದರ್ ಪಿಚೈ ತಮ್ಮ ಎಕ್ಸ್ ಖಾತೆಯಲ್ಲಿ ತಿಳಿಸಿದ್ದಾರೆ.

We’re partnering with HP to manufacture Chromebooks in India – These are the first Chromebooks to be made in India and will make it easier for Indian students to have access to affordable and secure computing. https://t.co/PuzZnck1wo

— Sundar Pichai (@sundarpichai) October 2, 2023

ಇದನ್ನೂ ಓದಿ: ಸರ್ಕಾರಿ ನೌಕರರಿಗೆ ಈ ಬಾರಿಯ ಡಿಎ ಹೆಚ್ಚಳ ಶೇ. 3 ಅಲ್ಲ, ಇನ್ನೂ ಹೆಚ್ಚು? ಯಾವ ದಿನ ಪ್ರಕಟವಾಗುತ್ತೆ ತುಟ್ಟಿಭತ್ಯೆ ಏರಿಕೆ ನಿರ್ಧಾರ?

ವರದಿಗಳ ಪ್ರಕಾರ ಭಾರತದಲ್ಲಿ ತಯಾರಾಗುತ್ತಿರುವ ಗೂಗಲ್ ಕ್ರೋಮ್​ಬುಕ್ ಲ್ಯಾಪ್​ಟಾಪ್ ಬೆಲೆ 15,990 ರೂನಿಂದ ಶುರುವಾಗುತ್ತದೆ. ಭಾರತದ ಕಂಪ್ಯೂಟರ್ ಮಾರುಕಟ್ಟೆಯಲ್ಲಿ ಪ್ರಾಬಲ್ಯ ಹೊಂದಿರುವ ಡೆಲ್, ಏಸಸ್ ಮೊದಲಾದ ಕಂಪನಿಗಳೊಂದಿಗೆ ಗೂಗಲ್ ಪೈಪೋಟಿ ನಡೆಸಲು ಕ್ರೋಮ್​ಬುಕ್ ಸಹಾಯವಾಗಬಹುದು.

ಗೂಗಲ್​ನ ಕ್ರೋಮ್​ಬುಕ್​ಗಳು ಶಿಕ್ಷಣ ಕ್ಷೇತ್ರದಲ್ಲಿ ಮುಂಚೂಣಿಯಲ್ಲಿವೆ. ವಿಶ್ವಾದ್ಯಂತ 5 ಕೋಟಿಗೂ ಹೆಚ್ಚು ವಿದ್ಯಾರ್ಥಿಗಳು ಮತ್ತು ಶಿಕ್ಷಕರು ಕ್ರೋಮ್​ಬುಕ್ ಲ್ಯಾಪ್​ಟಾಪ್​ಗಳನ್ನು ಬಳಸುತ್ತಾರೆ.

ಇದನ್ನೂ ಓದಿ: ನಿಮ್ಮ ಮ್ಯುಚುವಲ್ ಫಂಡ್ ಅಕೌಂಟ್​ಗೆ ನಾಮಿನಿ ಅಪ್​ಡೇಟ್ ಮಾಡುವುದು ಹೇಗೆ? ಇಲ್ಲಿದೆ ಡೀಟೇಲ್ಸ್

ಮ್ಯಾನುಫ್ಯಾಕ್ಚರಿಂಗ್ ಕ್ಷೇತ್ರದಲ್ಲಿ ಎಚ್​ಪಿ ಹೆಜ್ಜೆಗುರುತು ಇನ್ನೂ ದಟ್ಟ

ಹ್ಯೂಲೆಟ್ ಪ್ಯಾಕಾರ್ಡ್ (ಎಚ್​ಪಿ) ಮೂರು ವರ್ಷಗಳಿಂದ ಭಾರತದಲ್ಲಿ ತನ್ನ ಉತ್ಪನ್ನಗಳನ್ನು ತಯಾರಿಸುವ ಕೆಲಸ ಮಾಡುತ್ತಿದೆ. ಇಲೈಟ್ ಬುಕ್ಸ್, ಪ್ರೋಬುಕ್ಸ್, ಜಿ8 ಸೀರೀಸ್ ನೋಟ್​ಬುಕ್ ಸೇರಿದಂತೆ ವಿವಿಧ ರೀತಿಯ ಲ್ಯಾಪ್​ಟಾಪ್​ಗಳನ್ನು ಭಾರತದಲ್ಲಿ ತಯಾರಿಸುತ್ತಿದೆ. ವಿವಿಧ ಡೆಸ್ಕ್​ಟಾಪ್ ಕಂಪ್ಯೂಟರ್​ಗಳನ್ನೂ (ಪಿಸಿ) ಅದು ಭಾರತದಲ್ಲಿ ತಯಾರಿಸುತ್ತಿದೆ. ಚೆನ್ನೈನಲ್ಲಿರುವ ತನ್ನ ಫ್ಲೆಕ್ಸ್ ಫೆಸಿಲಿಟಿಯಲ್ಲಿ ಅದರ ಘಟಕಗಳಿವೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ