ಐಸಿಸಿ ವಿಶ್ವಕಪ್ ಫೈನಲ್: ವಿಮಾನಗಳಿಗೆ ಸಿಕ್ಕಾಪಟ್ಟೆ ಡಿಮ್ಯಾಂಡ್; ಅಹ್ಮದಾಬಾದ್​ಗೆ ಫ್ಲೈಟ್ ಬೆಲೆ ಗಗನಕ್ಕೆ

ಬೆಂಗಳೂರು, ನವೆಂಬರ್ 17: ಭಾರತ ಕ್ರಿಕೆಟ್ ತಂಡ (India Cricket Team) ಒಂದೂ ಸೋಲಿಲ್ಲದೇ ಐಸಿಸಿ ವಿಶ್ವಕಪ್ ಫೈನಲ್ ಪ್ರವೇಶಿಸಿ ಹೊಸ ಇತಿಹಾಸ ಸೃಷ್ಟಿಸಿದೆ. ಈ ಮೂಲಕ ಭಾರತೀಯ ಕ್ರಿಕೆಟ್ ಅಭಿಮಾನಿಗಳಲ್ಲಿ ಭಾರೀ ನಿರೀಕ್ಷೆ ಹುಟ್ಟಿಸಿದೆ. ವಿಶ್ವಕಪ್ ಉದ್ಘಾಟನೆ ನಡೆದ ಅಹ್ಮದಾಬಾದ್​ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲೇ ಫೈನಲ್ ಪಂದ್ಯವೂ ನಡೆಯಲಿದೆ. ಭಾರತ ಮೂರನೇ ಬಾರಿ ಚಾಂಪಿಯನ್ ಆಗಲು ಪ್ರಯತ್ನಿಸಿದರೆ, ಆಸ್ಟ್ರೇಲಿಯಾ ದಾಖಲೆಯ ಆರನೇ ಬಾರಿ ಚಾಂಪಿಯನ್ ಪಟ್ಟಕ್ಕೆ ಕಣ್ಣಿಟ್ಟಿದೆ. 1.32 ಲಕ್ಷ ಪ್ರೇಕ್ಷಕರಿಗೆ ಸ್ಥಳಾವಕಾಶ ಈ ಸ್ಟೇಡಿಯಂನಲ್ಲಿದ್ದು, ಅಂತೆಯೇ ಸಾಕಷ್ಟು ಜನರು ದೇಶದ ವಿವಿಧೆಡೆಯಿಂದ ಅಹ್ಮದಾಬಾದ್​ಗೆ ಬರಲಿದ್ದಾರೆ. ವಿಮಾನ ಟಿಕೆಟ್​ಗಳಿಗೆ (flight ticket) ಹಿಂದೆಂದಿಗಿಂತಲೂ ಡಿಮ್ಯಾಂಡ್ ಏರ್ಪಟ್ಟಿದೆ.

ನವೆಂಬರ್ 19ಕ್ಕೆ ಫೈನಲ್ ಪಂದ್ಯ ಇದೆ. ವೀಕೆಂಡ್​ನಲ್ಲಿ ದೇಶದ ವಿವಿಧ ಭಾಗಗಳಿಂದ ಅಹ್ಮದಾಬಾದ್​ಗೆ ಹೆಚ್ಚುವರಿ ಫ್ಲೈಟ್​ಗಳನ್ನು (additional flight) ನಿಯೋಜಿಸಲಾಗಿದೆ. ಆದರೂ ಫ್ಲೈಟ್ ಬೆಲೆ ಗಗನಕ್ಕೇರಿದೆ. ಇಂದು ನವೆಂಬರ್ 17 ಮತ್ತು ನಾಳೆ ನವೆಂಬರ್ 18ಕ್ಕೆ ಅಹ್ಮದಾಬಾದ್​ಗೆ ಹೋಗುವ ಎಲ್ಲಾ ಫ್ಲೈಟ್​ಗಳಿಗೆ ಡಿಮ್ಯಾಂಡ್ ಬಹಳ ಹೆಚ್ಚಿದೆ.

ಇದನ್ನೂ ಓದಿ: ಮಿಂಚುತ್ತಿದೆ ‘ಬ್ರ್ಯಾಂಡ್’ ಶಮಿ; ಜಾಹೀರಾತಿಗಾಗಿ ಎಡೆತಾಕುತ್ತಿರುವ ಕಂಪನಿಗಳು; ಮೊಹಮ್ಮದ್ ಶಮಿಗೆ ಹರಿದುಬರುತ್ತಿದೆ ಹಣದ ಹೊಳೆ

ಮೇಕ್ ಮೈ ಟ್ರಿಪ್ ಪ್ಲಾಟ್​ಫಾರ್ಮ್​ನಲ್ಲಿರುವ ಮಾಹಿತಿ ಪ್ರಕಾರ ಇಂದು ನವೆಂಬರ್ 17ರಂದು ಬೆಂಗಳೂರಿನಿಂದ ಅಹ್ಮದಾಬಾದ್​ಗೆ ಫ್ಲೈಟ್ ಬೆಲೆ 20,577 ರೂನಿಂದ ಆರಂಭವಾಗುತ್ತದೆ. 80,000 ರೂವರೆಗೂ ಟಿಕೆಟ್ ಬೆಲೆ ಇದೆ.

ಇನ್ನು, ನವೆಂಬರ್ 18, ಶನಿವಾರದಂದು ಬೆಂಗಳೂರಿನಿಂದ ಅಹ್ಮದಾಬಾದ್​ಗೆ ಫ್ಲೈಟ್ ಟಿಕೆಟ್ ಬೆಲೆ 18,000 ರೂನಿಂದ ಆರಂಭವಾಗಿ 47,000 ರೂವರೆಗೂ ಇದೆ.

ಈ ಮೇಲಿನವು ಎಕನಾಮಿ ಕ್ಲಾಸ್​ನ ಫ್ಲೈಟ್ ಬೆಲೆ. ಬಿಸಿನೆಸ್ ಕ್ಲಾಸ್ ಟಿಕೆಟ್ ಬೇಕೆಂದರೆ ಇನ್ನೂ ಹೆಚ್ಚಿದೆ. ನವೆಂಬರ್ 18ರಂದು ಬೆಂಗಳೂರಿನಿಂದ ಅಹ್ಮದಾಬಾದ್​ಗೆ ಬಿಸಿನೆಸ್ ಕ್ಲಾಸ್ ಫ್ಲೈಟ್ ಟಿಕೆಟ್ ಬೆಲೆ 52,000 ರೂನಿಂದ ಆರಂಭವಾಗಿ 1,60,000 ರೂವರೆಗೂ ಇದೆ.

ಇದನ್ನೂ ಓದಿ: Explained: ಇಸ್ರೇಲ್ ಯುದ್ಧದ ಮಧ್ಯೆಯೂ ಕಚ್ಛಾ ತೈಲ ಬೆಲೆ ಇಳಿದಿರುವುದು ಯಾಕೆ? ಇಲ್ಲಿವೆ ಕಾರಣಗಳು

ಇನ್ನು, ಇವತ್ತು (ನ. 17) ಬೆಂಗಳೂರಿನಿಂದ ಅಹ್ಮದಾಬಾದ್​ಗೆ ಫ್ಲೈಟ್ ಹತ್ತುವುದಾದರೆ ಟಿಕೆಟ್ ಬೆಲೆ 1 ಲಕ್ಷ ರೂನಿಂದ ಆರಂಭವಾಗುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ