ಯೂರೋಪಿಯನ್ ದೇಶಗಳೊಂದಿಗೆ ಮುಕ್ತ ವ್ಯಾಪಾರ ಒಪ್ಪಂದಕ್ಕೆ ಭಾರತದಿಂದ ಸಹಿ; ಇದು ಎಲ್ಲರಿಗೂ ಗೆಲುವು ತರುವಂಥದ್ದು ಎಂದ ಪ್ರಧಾನಿ ಮೋದಿ

ನವದೆಹಲಿ, ಮಾರ್ಚ್ 10: ನಾಲ್ಕು ದೇಶಗಳ ಯೂರೋಪಿಯನ್ ಮುಕ್ತ ವ್ಯಾಪಾರ ಸಂಘಟನೆಯೊಂದಿಗೆ (EFTA- European Free Trade Association) ಭಾರತ ಫ್ರೀ ಟ್ರೇಡ್ ಒಪ್ಪಂದಕ್ಕೆ (FTA) ಸಹಿ ಹಾಕಿದ ಕ್ರಮವನ್ನು ಪ್ರಧಾನಿ ನರೇಂದ್ರ ಮೋದಿ (Narendra Modi) ಐತಿಹಾಸಿಕ ಎಂದು ಬಣ್ಣಿಸಿದ್ದಾರೆ. ಈ ಒಪ್ಪಂದವು ಎಲ್ಲರಿಗೂ ಒಳಿತು ತರುವಂಥದ್ದು ಎಂದು ಅವರು ಹೇಳಿದ್ದಾರೆ. ಹಲವು ಅಂಶಗಳಲ್ಲಿ ರಚನಾತ್ಮಕ ಭಿನ್ನತೆ ಇದ್ದರೂ ಎಲ್ಲಾ ದೇಶಗಳಿಗೂ ಒಳಿತಾಗಬಲ್ಲ ವಾತಾವರಣವನ್ನು ನಮ್ಮ ಆರ್ಥಿಕತೆಗಳು ಹೊಂದಿವೆ. ನಮ್ಮ ಮುಕ್ತ, ನ್ಯಾಯಯುತ ಮತ್ತು ಸಮಾನ ವ್ಯಾಪಾರಕ್ಕೆ ನಮಗಿರುವ ಬದ್ಧತೆಯನ್ನು ಈ ವ್ಯಾಪಾರ ಒಪ್ಪಂದವು ದ್ಯೋತಕವಾಗಿದೆ ಎಂದೂ ಪ್ರಧಾನಿಗಳು ವರ್ಣಿಸಿದ್ದಾರೆ.

ಯೂರೋಪಿಯನ್ ಫ್ರೀ ಟ್ರೇಡ್ ಅಸೋಸಿಯೇಶನ್​ನಲ್ಲಿ ಸ್ವಿಟ್ಜರ್​ಲ್ಯಾಂಡ್, ನಾರ್ವೇ, ಐಸ್​ಲ್ಯಾಂಡ್ ಮತ್ತು ಲೇಶ್ಟೆನ್​ಸ್ಟೀನ್ ಈ ನಾಲ್ಕು ದೇಶಗಳಿವೆ. ಭಾರತವಲ್ಲದೇ ವಿಶ್ವದ ಇತರ 40 ದೇಶಗಳೊಂದಿಗೆ ಈ ಐರೋಪ್ಯ ಗುಂಪು ಮುಕ್ತ ವ್ಯಾಪಾರ ಒಪ್ಪಂದ ಮಾಡಿಕೊಂಡಿದೆ. 2008ರಿಂದಲೂ ಭಾರತದ ಜೊತೆ ಎಫ್​ಟಿಎ ಮಾಡಿಕೊಳ್ಳುವ ಅದರ ಪ್ರಯತ್ನ ಈಗ ಫಲಪ್ರದವಾಗಿದೆ. ಭಾರತ ಕಳೆದ 10 ವರ್ಷದಲ್ಲಿ ಫ್ರೀ ಟ್ರೇಡ್ ಒಪ್ಪಂದ ಮಾಡಿಕೊಂಡಿರುವುದು ಇದು ನಾಲ್ಕನೇ ಬಾರಿ. ಈ ಹಿಂದೆ ಮಾರಿಷಸ್, ಯುಎಇ ಮತ್ತು ಆಸ್ಟ್ರೇಲಿಯಾದ ಜೊತೆ ಎಫ್​ಟಿಎ ಮಾಡಿಕೊಂಡಿತ್ತು. ಇದರೊಂದಿಗೆ ಒಟ್ಟಾರೆ 14 ಮುಕ್ತ ವ್ಯಾಪಾರ ಒಪ್ಪಂದಗಳಿಗೆ ಭಾರತ ಈವರೆಗೆ ಸಹಿಹಾಕಿದೆ. ಇದಲ್ಲದೇ ಆರು ಆದ್ಯತಾ ಒಪ್ಪಂದಗಳಿಗೂ ಭಾರತ ಸಹಿ ಹಾಕಿದೆ. ಭಾರತ ಒಟ್ಟಾರೆ 94 ದೇಶಗಳೊಂದಿಗೆ ಆದ್ಯತಾ ವ್ಯಾಪಾರ ಸಂಬಂಧಗಳನ್ನು ಹೊಂದಿದಂತಾಗಿದೆ. ಮುಂದಿನ ದಿನಗಳಲ್ಲಿ ಈ ರೀತಿ ಆದ್ಯತಾ ಸಂಬಂಧ ಇರುವ ದೇಶಗಳ ಸಂಖ್ಯೆ 120ಕ್ಕೂ ಹೆಚ್ಚಾಗಬಹುದು.

ಇದನ್ನೂ ಓದಿ: ನಾಲ್ಕು ಐರೋಪ್ಯ ದೇಶಗಳ ಗುಂಪಿನೊಂದಿಗೆ ಭಾರತದಿಂದ ವ್ಯಾಪಾರ ಒಪ್ಪಂದ; 15 ವರ್ಷಗಳ ಬಳಿಕ ಯಶಸ್ವಿ; 100 ಬಿಲಿಯನ್ ಡಾಲರ್ ಹೂಡಿಕೆ ನಿರೀಕ್ಷೆ

ಇಎಫ್​ಟಿಎ ದೇಶಗಳನ್ನು ಶ್ಲಾಘಿಸಿದ ಪ್ರಧಾನಿ ನರೇಂದ್ರ ಮೋದಿ

ಇವತ್ತು ಭಾರತ ಮುಕ್ತ ವ್ಯಾಪಾರ ಒಪ್ಪಂದ ಮಾಡಿಕೊಂಡಿರುವ ಯೂರೋಪಿಯನ್ ಫ್ರೀ ಟ್ರೇಡ್ ಅಸೋಸಿಯೇಶನ್​ನ ದೇಶಗಳು ಡಿಜಿಟಲ್ ಟ್ರೇಡ್, ಬ್ಯಾಂಕಿಂಗ್, ಹಣಕಾಸು ಸೇವೆ, ಸಾರಿಗೆ, ಕೈಗಾರಿಕ ಯಂತ್ರೋಪಕರಣ, ಬಯೋಟೆಕ್ನಾಲಜಿ, ಔಷಧ, ರಾಸಾಯನಿಕ, ಆಹಾರ ಸಂಸ್ಕರಣೆ, ಸ್ವಚ್ಛ ಇಂಧನ ಇತ್ಯಾದಿ ವಿವಿಧ ಕ್ಷೇತ್ರಗಳಲ್ಲಿ ಸಂಶೋಧನೆ ಮತ್ತು ನಾವೀನ್ಯತೆಗೆ ಜಾಗತಿಕ ಮನ್ನಣೆ ಪಡೆದಿವೆ ಎಂದು ಪ್ರಧಾನಿ ನರೇಂದ್ರ ಮೋದಿ ಈ ಗುಂಪಿನ ಜೊತೆಗಿನ ಎಫ್​ಟಿಎಯ ಮಹತ್ವವನ್ನು ಜಾಹೀರುಗೊಳಿಸಿದ್ದಾರೆ.

ನರೇಂದ್ರ ಮೋದಿ ಹೇಳಿಕೆ

A message by Prime Minister Narendra Modi as India signs Trade and Economic Participation Agreement (TEPA) with EFTA. pic.twitter.com/lwZDuvVAAC

— ANI (@ANI) March 10, 2024

ಕಳೆದ 10 ವರ್ಷದಲ್ಲಿ ಭಾರತದ ಆರ್ಥಿಕತೆ ಸಾಕಷ್ಟು ಜಿಗಿತ ಕಂಡಿದೆ. ವಿಶ್ವದ 11ನೇ ಅತಿದೊಡ್ಡ ಆರ್ಥಿಕತೆಯಿಂದ ಈಗ 5ನೇ ಸ್ಥಾನಕ್ಕೆ ಹೋಗಿದೆ. ತಮ್ಮ ಮುಂದಿನ ಗುರಿ ಮೂರನೇ ಸ್ಥಾನಕ್ಕೆ ಹೋಗುವುದು ಎಂದ ಅವರು, ಇಎಫ್​ಟಿಎ ದೇಶಗಳೊಂದಿಗಿನ ಈ ಒಪ್ಪಂದವು ಎಲ್ಲರಿಗೂ ಸಂಪದ್ಭರಿತ ಭವಿಷ್ಯದತ್ತ ಪ್ರಯಾಣದಲ್ಲಿ ಹೊಸ ಅಧ್ಯಾಯದ ಮುನ್ನುಡಿಯಾಗಿದೆ ಎಂದಿದ್ದಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ