Inflation: ಫೆಬ್ರುವರಿಯಲ್ಲಿ ಭಾರತದ ಹಣದುಬ್ಬರ ಎಷ್ಟಿರಬಹುದು? ವಿವಿಧ ಆರ್ಥಿಕ ತಜ್ಞರು ಮಾಡಿರುವ ಅಂದಾಜು ಇದು
India Inflation Possibility In 2024 February: ಫೆಬ್ರುವರಿ ತಿಂಗಳಲ್ಲಿ ಹಣದುಬ್ಬರ ದರ ಶೇ. 5.1ರಷ್ಟು ಇರಬಹುದು ಎಂಬುದು 15 ವಿವಿಧ ಸಂಸ್ಥೆಗಳ ಆರ್ಥಿಕ ತಜ್ಞರ ಸರಾಸರಿ ಲೆಕ್ಕಾಚಾರವಾಗಿದೆ. ಜನವರಿ ತಿಂಗಳಲ್ಲೂ ಹಣದುಬ್ಬರ ಶೇ. 5.1ರಷ್ಟು ಇತ್ತು. ಆಹಾರ ವಸ್ತುಗಳ ಬೆಲೆ ಇಳಿಕೆ ಕಾಣದೇ ಇರುವುದು ಫೆಬ್ರುವರಿಯಲ್ಲಿ ಹಣದುಬ್ಬರ ಇಳಿಕೆ ಸಾಧ್ಯವಾಗದೇ ಹೋಗಿದ್ದಿರಬಹುದು ಎನ್ನಲಾಗಿದೆ. ಮಾರ್ಚ್ 12ರಂದು ಸರ್ಕಾರದಿಂದ ಅಧಿಕೃತವಾಗಿ ಹಣದುಬ್ಬರದ ದತ್ತಾಂಶ ಬಿಡುಗಡೆ ಆಗಲಿದೆ.
ನವದೆಹಲಿ, ಮಾರ್ಚ್ 11: ಜನವರಿಯಲ್ಲಿ ಶೇ. 5.1ರಷ್ಟಿರುವ ಹಣದುಬ್ಬರ ಫೆಬ್ರುವರಿಯಲ್ಲೂ ಮುಂದುವರಿದಿರುವ ಸಾಧ್ಯತೆ ಇದೆ ಎಂದು ವಿವಿಧ ಆರ್ಥಿಕ ತಜ್ಞರು (economists poll) ಅಭಿಪ್ರಾಯಪಟ್ಟಿದ್ದಾರೆ. ರಾಯ್ಟರ್ಸ್ ನಡೆಸಿದ 15 ಆರ್ಥಿಕ ತಜ್ಞರ ಸಮೀಕ್ಷೆ ಪ್ರಕಾರ ಫೆಬ್ರುವರಿ ತಿಂಗಳಲ್ಲಿ ಹಣದುಬ್ಬರ (India inflation) ಶೇ. 5.1ರಷ್ಟಿರಬಹುದು ಎನ್ನಲಾಗಿದೆ. ಇದು ನಿಜವೇ ಆದಲ್ಲಿ ಆರ್ಬಿಐ ನಿಗದಿ ಮಾಡಿರುವ ಹಣದುಬ್ಬರ ತಾಳಿಕೆ ಮಿತಿಯಾದ ( ಶೇ. 6ರ ಒಳಗೆ ಹಣದುಬ್ಬರ ಇರಲಿದೆ. ಮಾರ್ಚ್ 12, ಮಂಗಳವಾರ ಸಂಜೆ ಕೇಂದ್ರ ಸಾಂಖ್ಯಿಕ ಮತ್ತು ಯೋಜನಾ ಅನುಷ್ಠಾನ ಸಚಿವಾಲಯ ಫೆಬ್ರುವರಿ ತಿಂಗಳ ರೀಟೇಲ್ ಹಣದುಬ್ಬರ ಮತ್ತು ಐಐಪಿ ದತ್ತಾಂಶವನ್ನು ಬಿಡುಗಡೆ ಮಾಡಲಿದೆ. ಅದಕ್ಕೆ ಮುಂಚೆ ಆರ್ಥಿಕ ತಜ್ಞರು ದೇಶದ ವಿವಿಧ ಸೂಚಕಗಳನ್ನು ಆಧರಿಸಿ ಹಣದುಬ್ಬರ ಎಷ್ಟಿರಬಹುದು ಎಂದು ಅಂದಾಜು ಮಾಡಿದ್ದಾರೆ. ಮಾರ್ಚ್ 8ರಂದು ಈ ಸಮೀಕ್ಷೆ ನಡೆದಿದೆ.
ಆರ್ಥಿಕ ತಜ್ಞರ ಸಮೀಕ್ಷೆ ಪ್ರಕಾರ ಫೆಬ್ರುವರಿಯಲ್ಲಿ ರೀಟೇಲ್ ಹಣದುಬ್ಬರ, ಅಥವಾ ಗ್ರಾಹಕ ಬೆಲೆ ಅನುಸೂಚಿ ಆಧಾರಿತ ಹಣದುಬ್ಬರ ಶೇ. 5.1ರಲ್ಲಿ ಮುಂದುವರಿಯಬಹುದು. ಇಂಡಸ್ಟ್ರಿಯಲ್ ಪ್ರೊಡಕ್ಷನ್ ಅಥವಾ ಐಐಪಿ ದರ ಶೇ. 4.2ರಷ್ಟಾಗಬಹುದು ಎಂದಿದೆ. ಶೇ. 4.2ಎಂದರೆ ಕಳೆದ ಮೂರು ತಿಂಗಳಲ್ಲೇ ಗರಿಷ್ಠ ಮಟ್ಟವೆನಿಸುತ್ತದೆ.
ಇದನ್ನೂ ಓದಿ: ಉತ್ಕೃಷ್ಟ ಗುಣಮಟ್ಟದ ಸ್ವಿಸ್ ವಾಚು, ಚಾಕೊಲೇಟ್ಗಳು ಇನ್ಮುಂದೆ ಕಡಿಮೆ ಬೆಲೆಗೆ; ಭಾರತ-ಇಎಫ್ಟಿಎ ಒಪ್ಪಂದ ಪರಿಣಾಮ
ಆಹಾರ ವಸ್ತುಗಳ ಬೆಲೆ ಇಳಿಕೆ ಆಗಿಲ್ಲ…
ಜನವರಿಯಲ್ಲಿ ಹಣದುಬ್ಬರ ಶೇ 5.10ಕ್ಕೆ ಇಳಿಯಲು ಆಹಾರವಸ್ತುಗಳ ಬೆಲೆ ಇಳಿಕೆ ಪ್ರಮುಖ ಕಾರಣವಾಗಿತ್ತು. ಫೆಬ್ರುವರಿಯಲ್ಲಿ ಆಹಾರವಸ್ತುಗಳ ಬೆಲೆ ತುಸು ಹೆಚ್ಚಳ ಆಗಿರುವುದು ಹಣದುಬ್ಬರ ನಿಯಂತ್ರಣ ಕಷ್ಟಸಾಧ್ಯವಾಗಿದೆ. ಈರುಳ್ಳಿ, ಟೊಮೆಟೋ, ಆಲೂಗಡ್ಡೆ ಇತ್ಯಾದಿ ಸಾಮಾನ್ಯ ಬಳಕೆಯ ತರಕಾರಿಗಳ ಬೆಲೆಯಲ್ಲಿ ಜನವರಿಯಿಂದ ಫೆಬ್ರುವರಿಗೆ ಹೆಚ್ಚಿನ ವ್ಯತ್ಯಯವಾಗಿಲ್ಲ. ಆದರೆ, ಇತರ ತರಕಾರಿಗಳ ಬೆಲೆ ಏರಿಕೆ ಆಗಿದೆ. ಇದರಿಂದಾಗಿ ಫೆಬ್ರುವರಿಯಲ್ಲಿ ಹಣದುಬ್ಬರವು ಜನವರಿಯಲ್ಲಿನದಕ್ಕಿಂತ ಕಡಿಮೆಗೊಂಡಿರಲು ಸಾಧ್ಯವಿಲ್ಲ ಎನ್ನುವ ಅಭಿಪ್ರಾಯವನ್ನು ಆರ್ಥಿಕ ತಜ್ಞರು ವ್ಯಕ್ತಪಡಿಸಿದ್ದಾರೆ.
ಹಣದುಬ್ಬರ ಶೇ. 5.10ಕ್ಕಿಂತ ಕಡಿಮೆ ಇರಬಹುದು ಎಂದು 9 ಆರ್ಥಿಕ ತಜ್ಞರು ಅಂದಾಜು ಮಾಡಿದ್ದಾರೆ. ಹಣದುಬ್ಬರ ಶೇ. 5.10ಕ್ಕಿಂತ ಹೆಚ್ಚಿರಬಹುದು ಎಂಬುದು ಮೂವರು ಆರ್ಥಿಕ ತಜ್ಞರ ಅನಿಸಿಕೆ. ಬಾರ್ಕ್ಲೇಸ್ ಸಂಸ್ಥೆಯ ಆರ್ಥಿಕ ತಜ್ಞರು ಫೆಬ್ರುವರಿಯಲ್ಲಿ ಹಣದುಬ್ಬರ ಶೇ. 5.3ರಷ್ಟಿರಬಹುದು ಎಂದು ಅಭಿಪ್ರಾಯಪಟ್ಟಿದ್ದಾರೆ. ಎಚ್ಡಿಎಫ್ಸಿ ಬ್ಯಾಂಕ್ ಮತ್ತು ಪಿರಾಮಲ್ ಎಂಟರ್ಪ್ರೈಸಸ್ನ ಆರ್ಥಿಕ ತಜ್ಞರು ಹಣದುಬ್ಬರ ಶೇ. 5ಕ್ಕಿಂತ ಕಡಿಮೆ ಇರಬಹುದು ಎಂದಿದ್ದಾರೆ.
ಮಾರ್ಚ್ 12, ಮಂಗಳವಾರ ಸಂಜೆ ಸರ್ಕಾರದಿಂದ ಅಧಿಕೃತ ದತ್ತಾಂಶ ಬಿಡುಗಡೆ ಆಗಲಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
