ಭಾರತದ ಫಾರೆಕ್ಸ್ ಮೀಸಲು ನಿಧಿ 638 ಬಿಲಿಯನ್ ಡಾಲರ್; ಸತತ ಮೂರನೇ ವಾರ ಏರಿಕೆ

ನವದೆಹಲಿ, ಫೆಬ್ರುವರಿ 16: ಭಾರತದ ವಿದೇಶೀ ವಿನಿಮಯ ಮೀಸಲು ನಿಧಿ ಸತತ ಮೂರನೇ ವಾರ ಏರಿಕೆ ಆಗಿದೆ. ಫೆಬ್ರುವರಿ 7ರಂದು ಅಂತ್ಯಗೊಂಡ ವಾರದಲ್ಲಿ ಫಾರೆಕ್ಸ್ ರಿಸರ್ವ್ಸ್ 7.6 ಬಿಲಿಯನ್ ಡಾಲರ್​ನಷ್ಟು ಏರಿಕೆ ಆಗಿದೆ. ಆರ್​ಬಿಐ ಶುಕ್ರವಾರ ಬಿಡುಗಡೆ ಮಾಡಿದ ದತ್ತಾಂಶದ ಪ್ರಕಾರ ಭಾರತದ ಫಾರೆಕ್ಸ್ ರಿಸರ್ವ್ಸ್ ಮೊತ್ತ 638.2 ಬಿಲಿಯನ್ ಡಾಲರ್​ನಷ್ಟಿದೆ.

ಫೆ. 2ರಿಂದ 7ರವರೆಗಿನ ವಾರದಲ್ಲಿ ಏರಿಕೆಯಾದ 7.6 ಬಿಲಿಯನ್​ನ ಫಾರೆಕ್ಸ್ ರಿಸರ್ವ್ಸ್​​ನಲ್ಲಿ ಗೋಲ್ಡ್ ರಿಸರ್ವ್ಸ್ 1.2 ಬಿಲಿಯನ್ ಡಾಲರ್​ನಷ್ಟು ಹೆಚ್ಚಳವಾಗಿದೆ. ವಿದೇಶೀ ಕರೆನ್ಸಿ ಆಸ್ತಿಯಲ್ಲಿ 6.4 ಬಿಲಿಯನ್ ಡಾಲರ್ ಹೆಚ್ಚಳವಾಗಿದೆ. ಆದರೆ, ಫಾರೆಕ್ಸ್​ನ ಇತರ ಸಣ್ಣ ಭಾಗಗಳಾದ ಎಸ್​ಡಿಆರ್ ಅಥವಾ ಸ್ಪೆಷಲ್ ಡ್ರಾಯಿಂಗ್ ರೈಟ್ಸ್ ಮತ್ತು ಐಎಂಎಫ್​ನಲ್ಲಿನ ಆಸ್ತಿಗಳಲ್ಲಿ ಇಳಿಕೆ ಆಗಿದೆ. ಎಸ್​ಡಿಆರ್ 11 ಮಿಲಿಯನ್ ಮತ್ತು ಐಎಂಎಫ್​ನೊಂದಿಗಿನ ನಿಧಿ 71 ಮಿಲಿಯನ್ ಡಾಲರ್​ನಷ್ಟು ಕಡಿಮೆ ಆಗಿದೆ. ಆದರೆ, ವಿದೇಶೀ ಕರೆನ್ಸಿ ಆಸ್ತಿ ಗಣನೀಯವಾಗಿ ಏರಿಕೆ ಆಗಿದ್ದು ಒಟ್ಟಾರೆ ಫಾರೆಕ್ಸ್ ನಿಧಿ ಏರಿಕೆಗೆ ಸಹಾಯಕವಾಗಿದೆ.

ಇದನ್ನೂ ಓದಿ: HSBC Mutual Fund: ಎಚ್​ಎಸ್​ಬಿಸಿ ಫೈನಾನ್ಷಿಯಲ್ ಸರ್ವಿಸಸ್ ಫಂಡ್ ಎನ್​​ಎಫ್​ಒ ಆಫರ್ ಫೆಬ್ರುವರಿ 20ಕ್ಕೆ ಮುಕ್ತಾಯ

ಭಾರತದ ಫಾರೆಕ್ಸ್ ಮೀಸಲು ನಿಧಿ, ಫೆ. 7ಕ್ಕೆ

ಒಟ್ಟು ಫಾರೆಕ್ಸ್ ರಿಸರ್ವ್ಸ್: 638 ಬಿಲಿಯನ್ ಡಾಲರ್

• ಫಾರೀನ್ ಕರೆನ್ಸಿ ಅಸೆಟ್: 544.11 ಬಿಲಿಯನ್ ಡಾಲರ್
• ಗೋಲ್ಡ್ ರಿಸರ್ವ್ಸ್: 1.3 ಬಿಲಿಯನ್ ಡಾಲರ್
• ಎಸ್​ಡಿಆರ್: 17.87 ಬಿಲಿಯನ್ ಡಾಲರ್
• ಐಎಂಎಫ್ ನಿಧಿ: 71 ಮಿಲಿಯನ್ ಡಾಲರ್.

ಸೆಪ್ಟೆಂಬರ್ ತಿಂಗಳಲ್ಲಿ ಭಾರತದ ಫಾರೆಕ್ಸ್ 704 ಬಿಲಿಯನ್ ಡಾಲರ್ ಮಟ್ಟ ಮುಟ್ಟಿತ್ತು. ಅದು ಸಾರ್ವಕಾಲಿಕ ಗರಿಷ್ಠ ಮಟ್ಟ ಎನಿಸಿದೆ. ಅದಾದ ಬಳಿಕ ನಿಧಿಯಲ್ಲಿ ಸತತ ಇಳಿಕೆ ಆಗುತ್ತಾ ಬಂದಿದೆ. ಆದರೆ, ಕಳೆದ ಮೂರು ವಾರಗಳಿಂದ ಸತತ ಏರಿಕೆ ಆಗಿದೆ. ಹಿಂದಿನ ವಾರ, ಅಂದರೆ ಜನವರಿ 31ರಂದು ಅಂತ್ಯಗೊಂಡ ವಾರದಲ್ಲಿ ಫಾರೆಕ್ಸ್ ಮೀಸಲು ನಿಧಿ 1.05 ಬಿಲಿಯನ್ ಡಾಲರ್​ನಷ್ಟು ಹೆಚ್ಚಳವಾಗಿತ್ತು.

ಇದನ್ನೂ ಓದಿ: BSNL: 17 ವರ್ಷಗಳ ಬಳಿಕ ನಷ್ಟದಿಂದ ಮೇಲೆದ್ದ ಬಿಎಸ್​ಎನ್​ಎಲ್; ಈ ಬಾರಿ 262 ಕೋಟಿ ರೂ. ಲಾಭ

ಫಾರೆಕ್ಸ್ ಸಂಪತ್ತಿನಲ್ಲಿ ಭಾರತ ನಾಲ್ಕನೇ ಸ್ಥಾನ

ವಿದೇಶ ವಿನಿಮಯ ಮೀಸಲು ನಿಧಿಯಲ್ಲಿ ಭಾರತ ನಾಲ್ಕನೇ ಸ್ಥಾನದಲ್ಲಿದೆ. ಐದನೇ ಸ್ಥಾನದಲ್ಲಿರುವ ರಷ್ಯಾ ಮತ್ತು ಭಾರತದ ಮಧ್ಯೆ ನಿಧಿಯಲ್ಲಿ ಹೆಚ್ಚಿನ ಅಂತರ ಇಲ್ಲ. ಚೀನಾ 3.5 ಟ್ರಿಲಿಯನ್ ಡಾಲರ್​ನೊಂದಿಗೆ ಅಗ್ರಸ್ಥಾನದಲ್ಲಿದೆ. ಜಪಾನ್ ಬಳಿ 1.2 ಟ್ರಿಲಿಯನ್ ಡಾಲರ್ ಫಾರೆಕ್ಸ್ ಸಂಪತ್ತಿದೆ. ಮೂರನೇ ಸ್ಥಾನದಲ್ಲಿ ಸ್ವಿಟ್ಜರ್​ಲ್ಯಾಂಡ್ ದೇಶ ಇದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ