Stock in focus: ಡೆವಿಡೆಂಡ್ ಘೋಷಿಸಿದ ಎಲ್​ಐಸಿ, ಸತತ ಕುಸಿತ ಕಂಡಿದ್ದ ಷೇರು ಮೌಲ್ಯಕ್ಕೆ ತುಸು ಚೇತರಿಕೆ

ಮುಂಬೈ: ಭಾರತೀಯ ಜೀವ ವಿಮಾ ನಿಗಮದ (Life Insurance Corporation of India – LIC) ಷೇರು ವಹಿವಾಟು ಇಂದು ಷೇರುಪೇಟೆಯಲ್ಲಿ ಎದ್ದುಕಾಣುವಂತಿದೆ. ಸತತ ಇಳಿಕೆ ಕಂಡು ಕಳಾಹೀನವಾಗಿದ್ದ ಎಲ್​ಐಸಿ ಷೇರು ಮೌಲ್ಯವು ಲಾಭಾಂಶ (Dividend) ಘೋಷಣೆಯ ನಂತರ ತುಸು ಏರುಗತಿ ಕಂಡಿವೆ. ಲಾಭಾಂಶ ಹಂಚಿಕೆಗೆ ಪರಿಗಣಿಸುವ ದಿನಾಂಕವಾಗಿ ಆಗಸ್ಟ್ 25 (ಇಂದು) ನಿಗದಿಯಾಗಿದೆ. ಪ್ರತಿ ಷೇರಿಗೆ 2021-22ರ ಹಣಕಾಸು ವರ್ಷಕ್ಕಾಗಿ ₹ 1.50 ಲಾಭಾಂಶ ಹಂಚಿಕೆ ಮಾಡುವುದಾಗಿ ಎಲ್​ಐಸಿ ಷೇರುಪೇಟೆ ನಿಯಂತ್ರಕರಿಗೆ ಮಾಹಿತಿ ನೀಡಿದೆ. ಲಾಭಾಂಶ ಹಂಚಿಕೆಗೆ ನಾಳೆ (26ನೇ ಆಗಸ್ಟ್ 2022) ರೆಕಾರ್ಡ್​ ಡೇಟ್ ಎಂದು ನಿಗದಿಪಡಿಸಲಾಗಿದೆ.

ಲಾಭಾಂಶ ಹಂಚಿಕೆ ಕುರಿತು ಆಡಳಿತ ಮೇ 30ರಂದು ನಡೆದಿದ್ದ ಆಡಳಿತ ಮಂಡಳಿ ಸಭೆಯಲ್ಲಿ ಎಲ್​ಐಸಿ ನಿರ್ಧಾರ ತೆಗೆದುಕೊಂಡಿತ್ತು. ₹ 10 ಮುಖಬೆಲೆಯ ಎಲ್​ಐಸಿ ಷೇರುಗಳಿಗೆ ₹ 1.50 ಲಾಭಾಂಶ ನಿಗದಿಪಡಿಸಲಾಗಿದೆ. ಎಲ್​ಐಸಿ ಷೇರು ನಿನ್ನೆ (ಆಗಸ್ಟ್ 24) ₹ 675.90 ಗೆ ವಹಿವಾಟು ಮುಕ್ತಾಯಗೊಳಿಸಿತ್ತು. ಈ ಲೆಕ್ಕಾಚಾರದಲ್ಲಿ ಷೇರುದಾರರಿಗೆ ಸರಾಸರಿ ಶೇ 0.22 ಲಾಭಾಂಶ ಗಳಿಕೆ (Devidend Yield) ಸಿಕ್ಕಂತೆ ಆಗಿದೆ. ಸೌದಿ ಅರೇಬಿಯಾದ ಅರಾಮ್​ಕೊ (Aramco) ಮಾದರಿಯಲ್ಲಿ ಎಲ್​ಐಸಿ ಕೂಡ ದೊಡ್ಡಮಟ್ಟದ ಡಿವಿಡೆಂಡ್ ಘೋಷಿಸಬಹುದು ಎನ್ನುವ ಹೂಡಿಕೆದಾರರ ಆಸೆಯು ಹುಸಿಯಾಗಿದೆ.

ಎಲ್​ಐಸಿ ಐಪಿಒ ಕಳೆದ ಎರಡು ವರ್ಷಗಳಿಂದ ಸದ್ದು ಮಾಡುತ್ತಿತ್ತು. ಮೇ ತಿಂಗಳಲ್ಲಿ ₹ 902ರಿಂದ ₹ 949ರ ಪ್ರೈಸ್​ಬ್ಯಾಂಡ್​ನೊಂದಿಗೆ ಐಪಿಒ ಘೋಷಿಸಲಾಯಿತು. ಆದರೆ ಮಾರುಕಟ್ಟೆಗೆ ಬಂದ ಮೊದಲ ದಿನ ಹೂಡಿಕೆದಾರರಿಗೆ ನಷ್ಟ ಉಂಟು ಮಾಡುವಂತೆ ₹ 872ಕ್ಕೆ (ಎನ್​ಎಸ್​ಇ) ಲಿಸ್ಟ್ ಆಯಿತು. ನಂತರದ ದಿನಗಳಲ್ಲಿ ಸತತ ಕುಸಿತ ಕಂಡ ಷೇರುಗಳು ₹ 650ಕ್ಕೆ ಬಿದ್ದಿತ್ತು. ಐಪಿಒ ಮೂಲಕ ಷೇರು ಪಡೆದ ಹೂಡಿಕೆದಾರರು ಈವರೆಗೆ ಅಸಲನ್ನೂ ಕಂಡಿಲ್ಲ.

ಎಲ್​ಐಸಿ ಲಾಭಗಳಿಕೆ ಪ್ರಮಾಣ ಸುಧಾರಿಸಿರುವುದು ಹಾಗೂ ಭವಿಷ್ಯದ ವಹಿವಾಟು ಹೆಚ್ಚಾಗಬಹುದು ಎಂಬ ಆಶಯ ಇರುವುದರಿಂದ ಹಲವು ಬ್ರೋಕರೇಜ್ ಕಂಪನಿಗಳು ಎಲ್​ಐಸಿ ಮೇಲೆ ಆಸೆ ಇರಿಸಿಕೊಂಡಿವೆ. ‘ಹೂಡಿಕೆದಾರರು ತಾತ್ಕಾಲಿಕ ಏರಿಳಿತಗಳ ಕಡೆಗೆ ಗಮನ ಕೊಡದೆ, ದೀರ್ಘಾವಧಿ ದೃಷ್ಟಿ ಇರಿಸಿಕೊಳ್ಳಬೇಕು’ ಎಂದು ಸಲಹೆ ಮಾಡಿವೆ. ಪ್ರಸಕ್ತ ಹಣಕಾಸು ವರ್ಷದ ಮೊದಲ ತ್ರೈಮಾಸಿಕದಲ್ಲಿಯೂ ಎಲ್​ಐಸಿ ಕಂಪನಿಯು ವಿಮಾ ಕಂತು (ಪ್ರೀಮಿಯಂ) ಸಂಗ್ರಹ ಗಮನಾರ್ಹ ಪ್ರಗತಿ ಕಂಡಿದೆ. ಈ ಅವಧಿಯಲ್ಲಿ ಸುಮಾರು ₹ 1 ಲಕ್ಷ ಕೋಟಿಯಷ್ಟು ಪ್ರೀಮಿಯಂ ಸಂಗ್ರಹವಾಗಿದ್ದು, ಕಳೆದ ವರ್ಷದ ಇದೇ ತ್ರೈಮಾಸಿಕಕ್ಕೆ ಹೋಲಿಸಿದರೆ ಇದು ಶೇ 20.35ರಷ್ಟು ಪ್ರಗತಿ ಸಾಧಿಸಿದಂತೆ ಎಂದು ಕಂಪನಿ ಹೇಳಿಕೊಂಡಿದೆ.

Published On - 10:36 am, Thu, 25 August 22