ನಜಾರ ಟೆಕ್ನಾಲಜೀಸ್ ಮೇಲೆ ನಿಖಿಲ್ ಕಾಮತ್ 100 ಕೋಟಿ ರೂ ಹೂಡಿಕೆ; ಗೇಮಿಂಗ್ ಕಂಪನಿ ಬಗ್ಗೆ ಕಾಮತ್​ಗೆ ಯಾಕೆ ಒಲವು?

ಭಾರತದ ಗೇಮಿಂಗ್ ಕಂಪನಿ ನಜಾರ ಟೆಕ್ನಾಲಜೀಸ್​ಗೆ ನಿಖಿಲ್ ಕಾಮತ್ ಮತ್ತು ನಿತಿನ್ ಕಾಮತ್ ಒಡೆತನ ಕಂಪನಿಗಳಿಂದ 100 ಕೋಟಿ ರೂ ಹೂಡಿಕೆ ಆಗಿದೆ. ಕಾಮತ್ ಸಹೋದರರ ಒಡೆತನದ ಕಾಮತ್ ಅಸೋಸಿಯೇಟ್ಸ್ (Kamath Associates) ಮತ್ತು ಎನ್​ಕೆಸ್ಕ್ವಯರ್ಡ್ (NKSquared) ಕಂಪನಿಗಳಿಗೆ 100 ಕೋಟಿ ರೂ ಮೌಲ್ಯದ ಷೇರುಗಳನ್ನು ಮಾರಿರುವುದಾಗಿ ಸೆಬಿಗೆ ಸಲ್ಲಿಸಿದ ಫೈಲಿಂಗ್​ನಲ್ಲಿ ನಜಾರ ಟೆಕ್ನಾಲಜೀಸ್ ತಿಳಿಸಿದೆ. ಅದು ನೀಡಿದ ಮಾಹಿತಿ ಪ್ರಕಾರ, ನಜಾರ ಟೆಕ್ನಾಲಜೀಸ್ ಕಂಪನಿಯ 14,00,560 ಷೇರುಗಳನ್ನು 714 ರೂನಂತೆ 99,99,99,840 ರುಪಾಯಿಗೆ ನೀಡಲು ಕಂಪನಿಯ ಮಂಡಳಿ ಅನುಮೋದನೆ ನೀಡಿದೆ.

ಈ 100 ಕೋಟಿ ರೂ ಹೂಡಿಕೆಯೊಂದಿಗೆ ನಜಾರ ಟೆಕ್ನಾಲಜೀಸ್​ನಲ್ಲಿ ನಿಖಿಲ್ ಕಾಮತ್ ಅವರ ವೈಯಕ್ತಿ ಹೂಡಿಕೆ ಪ್ರಮಾಣ ಶೇ. 1ರಿಂದ ಶೇ. 3.50ಗೆ ಹೆಚ್ಚಾಗಿದೆ. ಝೀರೋಧ ಕಂಪನಿಯ ಸಹ-ಸಂಸ್ಥಾಪಕ ನಿಖಿಲ್ ಕಾಮತ್ ಅವರು ಮುಂದಿನ ದಿನಗಳಲ್ಲಿ ನಜಾರ ಟೆಕ್ನಾಲಜೀಸ್ ಮೇಲಿನ ಹೂಡಿಕೆಯನ್ನು ಇನ್ನಷ್ಟು ಹೆಚ್ಚಿಸಲಿದ್ದಾರೆ ಎಂದು ಹೇಳಲಾಗುತ್ತಿದೆ.

ನಿಖಿಲ್ ಕಾಮತ್ ಅವರಿಗೆ ನೀಡಲಾಗಿರುವ ನಜಾರ ಟೆಕ್ನಾಲಜೀಸ್​ನ ಷೇರುಗಳಿಗೆ ಆರು ತಿಂಗಳ ಲಾಕ್ ಇನ್ ಪೀರಿಯಡ್ ಇರುತ್ತದೆ. ಅಂದರೆ, ಈ ಷೇರುಗಳನ್ನು 6 ತಿಂಗಳ ಕಾಲ ಮಾರಾಟ ಮಾಡುವಂತಿರುವುದಿಲ್ಲ.

ಇದನ್ನೂ ಓದಿ: ಫುಯೆಲ್ ಕ್ರೆಡಿಟ್ ಕಾರ್ಡ್​ನಿಂದ ಏನು ಪ್ರಯೋಜನ? ಸೂಕ್ತ ಎನಿಸುವ ಕಾರ್ಡ್​ಗಳನ್ನು ಆಯ್ಕೆ ಮಾಡಿಕೊಳ್ಳುವುದು ಹೇಗೆ?

ಇನ್ನತ್ತು ವರ್ಷದಲ್ಲಿ ಭಾರತದಲ್ಲಿ ಗೇಮಿಂಗ್ ಉದ್ಯಮ ಅಗಾಧವಾಗಿ ಬೆಳೆಯುತ್ತದೆ: ನಿಖಿಲ್ ಕಾಮತ್

ಭಾರತದ ಪ್ರಬಲ ಮೊಬೈಲ್ ಕಂಪನಿಗಳಲ್ಲಿ ಒಂದಾದ ನಜಾರ ಟೆಕ್ನಾಲಜೀಸ್ ಹಲವು ಗೇಮ್​ಗಳನ್ನು ಬಿಡುಗಡೆ ಮಾಡಿದೆ. ಮಕ್ಕಳಿಗಾಗಿ ಖ್ಯಾತ ಕಾರ್ಟೂನ್ ಸೀರಿಯಲ್​ಗಳ ಹೆಸರಿನಲ್ಲಿ ವಿವಿಧ ರೇಸಿಂಗ್, ಅಡ್ವೆಂಚರ್ ಗೇಮ್​ಗಳನ್ನು ತಯಾರಿಸಿದೆ. ವಿವಿಧ ಕ್ರಿಕೆಟ್, ಕೇರಂ, ಟೇಬಲ್ ಟೆನಿಸ್ ಇತ್ಯಾದಿ ಕ್ರೀಡೆಗಳ ಆಧರಿತ ಮೊಬೈಲ್ ಗೇಮ್​ಗಳನ್ನು ನಜಾರ ಟೆಕ್ನಾಲಜೀಸ್ ತಯಾರಿಸಿದೆ.

ನಿಖಿಲ್ ಕಾಮತ್ ಪ್ರಕಾರ ವಿಶ್ವಾದ್ಯಂತದಂತೆ ಭಾರತದಲ್ಲೂ ಗೇಮಿಂಗ್ ಕ್ಷೇತ್ರ ಅಮೋಘವಾಗಿ ಬೆಳೆಯುತ್ತದೆ. ನಜಾರ ಟೆಕ್ನಾಲಜೀಸ್ ಇ-ಸ್ಪೋರ್ಟ್ಸ್ ಮತ್ತು ಗೇಮಿಂಗ್​ನಲ್ಲಿ ವಿನೂತನ ಎನಿಸುವ ಗೇಮ್​ಗಳನ್ನು ರೂಪಿಸಿದ್ದು, ಮುಂದೊಂದು ದಿನ ಬೇರೆ ಅಂತಾರಾಷ್ಟ್ರೀಯ ಗೇಮಿಂಗ್ ಕಂಪನಿಗಳ ಜೊತೆ ಅದು ಸ್ಪರ್ಧೆ ಮಾಡುವ ಸಾಮರ್ಥ್ಯ ಹೊಂದಿದೆ ಎಂದು ನಿಖಿಲ್ ಕಾಮತ್ ಹೇಳುತ್ತಾರೆ.

ಇದನ್ನೂ ಓದಿ: ಸಿನಿಮೀಯ ಘಟನೆ; ಉದ್ಯೋಗಿಯಾಗಿ ಸೇರಿಕೊಂಡು ಪ್ರಾಜೆಕ್ಟ್ ಲಪಟಾಯಿಸುತ್ತಿದ್ದ ಬೆಂಗಳೂರಿನ ಬಿಸಿನೆಸ್​ಮ್ಯಾನ್

ಭಾರತದಲ್ಲಿ ಗೇಮಿಂಗ್ ಉದ್ಯಮ ಎಷ್ಟು ದೊಡ್ಡದು?

2020-21ರ ಹಣಕಾಸು ವರ್ಷದಲ್ಲಿ ಭಾರತದ ಆನ್​ಲೈನ್ ಗೇಮಿಂಗ್ ಉದ್ಯಮದ ಆದಾಯ 2 ಬಿಲಿಯನ್ ಡಾಲರ್ ಇತ್ತು. 2021-22ರಲ್ಲಿ ಅದು 2.6 ಬಿಲಿಯನ್ ಡಾಲರ್​ಗೆ ಏರಿತು. ತದನಂತರದಿಂದ ಈ ಉದ್ಯಮ ವಾರ್ಷಿಕವಾಗಿ ಶೇ. 27ರ ದರದಲ್ಲಿ ಬೆಳೆಯುತ್ತಾ ಹೋಗಬಹುದು. 2026-27ರಲ್ಲಿ ಭಾರತದಲ್ಲಿ ಗೇಮಿಂಗ್ ಉದ್ಯಮ 8.6 ಬಿಲಿಯನ್ ಡಾಲರ್ ಮಟ್ಟಕ್ಕೆ ಹೋಗಬಹುದು ಎಂದು ಅಂದಾಜಿಸಲಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ