UPI Payment: ಈ ಹತ್ತು ದೇಶಗಳಲ್ಲಿರುವ ಅನಿವಾಸಿ ಭಾರತೀಯರಿಗೂ ಸಿಗಲಿದೆ ಯುಪಿಐ ಪಾವತಿ ಸೌಲಭ್ಯ; ಇಲ್ಲಿದೆ ಪಟ್ಟಿ

ನವದೆಹಲಿ: ದೇಶದ ಡಿಜಿಟಲ್ ಪಾವತಿ ಕ್ಷೇತ್ರದಲ್ಲಿ ಭಾರಿ ಯಶಸ್ಸು ಕಾಣುತ್ತಿರುವ ಯುಪಿಐ ಪಾವತಿ ವ್ಯವಸ್ಥೆ (UPI Payment) ಸೌಲಭ್ಯ ಇನ್ನು ಮುಂದೆ ಅನಿವಾಸಿ ಭಾರತೀಯರಿಗೂ (NRI) ಸಿಗಲಿದೆ. 10 ದೇಶಗಳಲ್ಲಿರುವ ಅನಿವಾಸಿ ಭಾರತೀಯರಿಗೆ ಯುಪಿಐ ಪಾವತಿ ಸೌಲಭ್ಯ ದೊರೆಯಲಿದೆ ಎಂದು ರಾಷ್ಟ್ರೀಯ ಪಾವತಿ ನಿಗಮ (NCPI) ತಿಳಿಸಿದೆ. ನಾನ್ ರೆಸಿಡೆಂಟ್ ರುಪೀ (NRE) ಅಥವಾ ನಾನ್ ರೆಸಿಡೆನ್ಸ್ ಆರ್ಡಿನರಿ (NRO) ಬ್ಯಾಂಕ್ ಖಾತೆಗಳ ಮೂಲಕ ಅನಿವಾಸಿ ಭಾರತೀಯರು ಯುಪಿಐ ಪಾವತಿ ಸೌಲಭ್ಯ ಪಡೆಯಬಹುದಾಗಿದೆ ಎಂದು ಎನ್​​ಸಿಪಿಐ ಹೇಳಿದೆ. ಭಾರತೀಯ ಮೊಬೈಲ್ ಸಂಖ್ಯೆ ಪಡೆಯದೆಯೇ ಅನಿವಾಸಿ ಭಾರತೀಯರಿಗೆ ಯುಪಿಐ ಪಾವತಿ ಸೌಲಭ್ಯ ಏಪ್ರಿಲ್ 30ರ ವೇಳೆಗೆ ದೊರೆಯಲಿದೆ ಎಂದು ಈ ಹಿಂದೆ ಎನ್​ಸಿಪಿಐ ಹೇಳಿತ್ತು.

ಪ್ರಾಯೋಗಿಕವಾಗಿ 10 ದೇಶಗಳಲ್ಲಿ ಅನಿವಾಸಿ ಭಾರತೀಯರಿಗೆ ಯುಪಿಐ ಸೌಲಭ್ಯ ಒದಗಿಸಲಾಗುತ್ತದೆ ಎಂದು ಎನ್​ಸಿಪಿಐ ಹೇಳಿದೆ. 10 ದೇಶಗಳ ಕೋಡ್ ಹೊಂದಿರುವ ಮೊಬೈಲ್ ಸಂಖ್ಯೆಗಳಲ್ಲಿ ಯುಪಿಐ ಸೌಲಭ್ಯ ದೊರೆಯಲಿದೆ. ಮುಂದಿನ ದಿನಗಳಲ್ಲಿ ಹೆಚ್ಚು ದೇಶಗಳನ್ನು ಈ ವ್ಯಾಪ್ತಿಗೆ ತರಲಾಗುವುದು ಎಂದು ಎನ್​ಸಿಪಿಐ ತಿಳಿಸಿದೆ.

ಈ ದೇಶಗಳಲ್ಲಿ ಸಿಗಲಿದೆ ಯುಪಿಐ ಸೌಲಭ್ಯ

ಅಮೆರಿಕ, ಯುಕೆ, ಸಿಂಗಾಪುರ, ಕೆನಡಾ, ಆಸ್ಟ್ರೇಲಿಯಾ, ಒಮಾನ್, ಕತಾರ್, ಯುಎಇ, ಸೌದಿ ಅರೇಬಿಯಾ ಮತ್ತು ಹಾಂಗ್​ಕಾಂಗ್​ನಲ್ಲಿ ಅನಿವಾಸಿ ಭಾರತೀಯರಿಗೆ ಯುಪಿಐ ಸೌಲಭ್ಯ ಸಿಗಲಿದೆ. ಈ ದೇಶಗಳಲ್ಲಿರುವ ಅನಿವಾಸಿ ಭಾರತೀಯರು ಅಥವಾ ಭಾರತೀಯ ಮೂಲದವರು ಎನ್​ಆರ್​ಇ ಖಾತೆಗಳ ಮೂಲಕ ಪಾವತಿ ಮಾಡಬಹುದು ಎಂದು ಎನ್​ಸಿಪಿಐ ಹೇಳಿದೆ.

ಇದನ್ನು ಓದಿ: UPI Payment: ಭಾರತದ ಯುಪಿಐ ಪೇಮೆಂಟ್ ವ್ಯವಸ್ಥೆ ಅಳವಡಿಕೆಗೆ ಹಲವು ದೇಶಗಳ ಒಲವು

ಹಲವು ದೇಶಗಳು ಯುಪಿಐ ಪಾವತಿ ವಿಧಾನ ಅಳವಡಿಸಿಕೊಳ್ಳಲು ಆಸಕ್ತಿ ವ್ಯಕ್ತಪಡಿಸಿವೆ ಎಂದು ಕೆಲವು ದಿನಗಳ ಹಿಂದೆ ವರದಿಯಾಗಿತ್ತು. ಈ ಕುರಿತು ಎನ್​ಸಿಪಿಐ ಸಿಇಒ ಮತ್ತು ಎಂಡಿ ದಿಲೀಪ್ ಆಸ್ಬೇ ಮಾಹಿತಿ ನೀಡಿದ್ದರು. ಯುಪಿಐ ವ್ಯವಸ್ಥೆ ಅಳವಡಿಸಿಕೊಳ್ಳಲು ಬಯಸುವ ದೇಶಗಳಿಗೆ ಭಾರತ ತಂತ್ರಾಂಶ ಮತ್ತಿತರ ತಂತ್ರಜ್ಞಾನ ನೆರವು ಒದಗಿಸುತ್ತದೆ ಎಂದೂ ಅವರು ಹೇಳಿದ್ದರು. ಸಿಂಗಾಪುರದ ಪೇ ನೌ ಮತ್ತು ಭಾರತದ ಯುಪಿಐ ನಡುವೆ ಸಮನ್ವಯತೆ ತರುವ ಕಾರ್ಯ ಶೀಘ್ರದಲ್ಲೇ ಆರಂಭವಾಗಲಿದೆ ಎಂಬ ಕುರಿತೂ ಇತ್ತೀಚೆಗೆ ವರದಿಯಾಗಿತ್ತು.

ವಾಣಿಜ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 11:19 am, Thu, 12 January 23