ಬ್ಯಾಂಕುಗಳಿಗಿಂತ ಎನ್​ಬಿಎಫ್​ಸಿಗಳಲ್ಲಿ ಠೇವಣಿ ದರ ಯಾಕೆ ಹೆಚ್ಚು? ಬ್ಯಾಂಕೇತರ ಹಣಕಾಸು ಸಂಸ್ಥೆಗಳಲ್ಲಿ ಎಸ್​ಬಿ ಖಾತೆ ತೆರೆಯಲು ಯಾಕೆ ಸಾಧ್ಯವಿಲ್ಲ?

ಸಾಮಾನ್ಯ ಹೂಡಿಕೆ ಯೋಜನೆಗಳಲ್ಲಿ ಎಫ್​ಡಿ ಮುಂಚೂಣಿಯಲ್ಲಿದೆ. ಹೆಚ್ಚಿನ ಜನರು ಈಗಲೂ ನಿಶ್ಚಿತ ಠೇವಣಿಗಳಲ್ಲಿ (fixed deposits) ಹೂಡಿಕೆಗೆ ಆದ್ಯತೆ ಕೊಡುತ್ತಾರೆ. ಆರ್​ಬಿಐ ಬಿಡುಗಡೆ ಮಾಡಿರುವ ಮಾಹಿತಿ ಪ್ರಕಾರ ಭಾರತದ ವಿವಿಧ ಬ್ಯಾಂಕುಗಳಲ್ಲಿ 160 ಲಕ್ಷ ಕೋಟಿ ರೂಗೂ ಹೆಚ್ಚು ಮೊತ್ತದ ಹಣ ಎಫ್​ಡಿಗಳಲ್ಲಿ ಹೂಡಿಕೆ ಆಗಿವೆಯಂತೆ. ಈಗ ಎಫ್​ಡಿಗಳಿಗೆ ಬ್ಯಾಂಕುಗಳು ಶೇ. 6.2ರಿಂದ ಶೇ. 8ರವರೆಗೂ ಬಡ್ಡಿ ಕೊಡುತ್ತವೆ. ಆದರೆ, ಕೆಲ ಬ್ಯಾಂಕೇತರ ಹಣಕಾಸು ಸಂಸ್ಥೆಗಳು ಅಥವಾ ಎನ್​ಬಿಎಫ್​​ಸಿಗಳು (NBFCs) ಶೇ. 10ರವರೆಗೂ ಬಡ್ಡಿ ಆಫರ್ ಮಾಡುವುದನ್ನು ನೀವು ಗಮನಿಸಿರಬಹುದು. ಬ್ಯಾಂಕುಗಳಿಗಿಂತ ಎನ್​ಬಿಎಫ್​ಸಿಗಳಲ್ಲಿ ಠೇವಣಿ ದರ ಹೆಚ್ಚು ಇರುವುದು ಯಾಕೆ? ಈ ಪ್ರಶ್ನೆಗೆ ಉತ್ತರ ತಿಳಿಯಲು ಎನ್​ಬಿಎಫ್​ಸಿ ಮತ್ತು ಬ್ಯಾಂಕ್ ನಡುವಿನ ವ್ಯತ್ಯಾಸ ಏನು ಎಂಬುದು ಗೊತ್ತಿರಬೇಕು.

ಎನ್​ಬಿಎಫ್​ಸಿ ಮತ್ತು ಬ್ಯಾಂಕ್ ಮಧ್ಯೆ ಏನು ವ್ಯತ್ಯಾಸ?

ಕೆಲ ಬ್ಯಾಂಕಿಂಗ್ ಸೇವೆಗಳನ್ನು ಪರಿಣಾಮಕಾರಿಯಾಗಿ ನೀಡಲು ಅನುವಾಗಬೇಕೆನ್ನುವುದು ಎನ್​ಬಿಎಫ್​ಸಿಗಳ ಉಗಮಕ್ಕೆ ನಾಂದಿ ಹಾಡಿತ್ತು. ಬ್ಯಾಂಕುಗಳ ಹಲವು ಚಟುವಟಿಕೆಗಳನ್ನು ಎನ್​ಬಿಎಫ್​ಸಿಗಳು ನಡೆಸುತ್ತವೆ. ಗ್ರಾಹಕರಿಗೆ ಸಾಲ ಒದಗಿಸುತ್ತವೆ.

ಬ್ಯಾಂಕುಗಳು ಆರ್​ಬಿಐನ ಹಲವು ಕಟ್ಟುಪಾಡು ಮತ್ತು ಸೌಲಭ್ಯಗಳಿಗೆ ಒಳಪಟ್ಟಿರುತ್ತವೆ. ಆದರೆ, ಎನ್​ಬಿಎಫ್​ಸಿಗಳಿಗೆ ಅಷ್ಟು ಕಟ್ಟುಪಾಡು ಮತ್ತು ಸೌಲಭ್ಯಗಳು ಇರುವುದಿಲ್ಲ. ಉದಾಹರಣೆಗೆ, ಬ್ಯಾಂಕುಗಳು ಕಾಸಾ (CASA- Current Account and Savings Account) ಖಾತೆಗಳನ್ನು ಗ್ರಾಹಕರಿಗೆ ನೀಡಬಹುದು. ಅಂದರೆ, ಉಳಿತಾಯ ಖಾತೆ ಮತ್ತು ಚಾಲ್ತಿ ಖಾತೆಗಳನ್ನು ಆಫರ್ ಮಾಡಬಹುದು. ಬ್ಯಾಂಕುಗಳಿಗೆ ಕಡಿಮೆ ದರದಲ್ಲಿ ಬಂಡವಾಳ ಸಂಗ್ರಹಿಸಲು ಈ ಖಾತೆಗಳೇ ಮೂಲವಾಗಿರುತ್ತವೆ. ಯಾಕೆಂದರೆ ಚಾಲ್ತಿ ಖಾತೆಯಲ್ಲಿರುವ ಹಣಕ್ಕೆ ಬ್ಯಾಂಕ್ ಯಾವ ಬಡ್ಡಿ ಕೊಡುವುದಿಲ್ಲ. ಸೇವಿಂಗ್ಸ್ ಅಕೌಂಟ್​ನಲ್ಲಿರುವ ಹಣಕ್ಕೆ ಅಬ್ಬಬ್ಬಾ ಎಂದರೆ ಗರಿಷ್ಠ ಶೇ. 4ರವರೆಗೂ ಮಾತ್ರವೇ ಬಡ್ಡಿ ನೀಡಬಹುದು. ಜನರ ಉಳಿತಾಯ ಹಣದ ಹೆಚ್ಚಿನ ಭಾಗವು ಈ ಎಸ್​ಬಿ ಖಾತೆಗಳಲ್ಲಿ ಇರುತ್ತವೆ. ಹೀಗಾಗಿ ಬ್ಯಾಂಕುಗಳಿಗೆ ಸುಲಭವಾಗಿ ಬಂಡವಾಳ ಸಿಗುತ್ತದೆ.

ಇದನ್ನೂ ಓದಿ: ಹಬ್ಬದ ಸೀಸನ್​ನಲ್ಲಿ ಶಾಪಿಂಗ್ ಟಿಪ್ಸ್; ಡಿಸ್ಕೌಂಟ್, ಕ್ಯಾಶ್​ಬ್ಯಾಕ್, ಕೂಪನ್ ಇವೆಲ್ಲವನ್ನೂ ಸರಿಯಾಗಿ ಬಳಸುವುದು ಹೇಗೆ?

ಎನ್​​ಬಿಎಫ್​ಸಿಗಳಿಗೆ ಈ ಭಾಗ್ಯ ಇರುವುದಿಲ್ಲ. ಕರೆಂಟ್ ಅಕೌಂಟ್ ಆಗಲೀ ಸೇವಿಂಗ್ಸ್ ಅಕೌಂಟ್ ಆಗಲೀ ಎನ್​ಬಿಎಫ್​ಸಿಗಳು ತೆರೆಯಲು ಅವಕಾಶ ಇರುವುದಿಲ್ಲ. ಬಂಡವಾಳ ಸಂಗ್ರಹಿಸಲು ಇವು ಬೇರೆ ವಿಧಾನಗಳನ್ನು ಅನುಸರಿಸಬೇಕಾಗುತ್ತದೆ. ಸಾಲಪತ್ರಗಳು ಒಂದು ಪ್ರಮುಖ ವಿಧಾನ. ಹಾಗೆಯೇ ವಿದೇಶೀ ಬಂಡವಾಳ ಪಡೆಯುವ ಅವಕಾಶ ಇರುತ್ತದೆ. ಇವೆಲ್ಲವೂ ಕೂಡ ಅಧಿಕ ಬಡ್ಡಿ ಬೇಡುವ ವಿಧಾನಗಳು. ಇದರ ಜೊತೆಗೆ ಎನ್​ಬಿಎಫ್​ಸಿಗಳು ಫಿಕ್ಸೆಡ್ ಡೆಪಾಸಿಟ್ ಮೂಲಕವೂ ಬಂಡವಾಳ ಪಡೆಯುತ್ತವೆ. ಎಫ್​ಡಿಗಳನ್ನು ಆಕರ್ಷಿಸಲು ಬ್ಯಾಂಕುಗಳಿಗಿಂತ ಹೆಚ್ಚು ಬಡ್ಡಿ ಆಫರ್ ಮಾಡುವುದು ಎನ್​ಬಿಎಫ್​ಸಿಗಳಿಗೆ ಅನಿವಾರ್ಯ.

ಎನ್​ಬಿಎಫ್​ಸಿಗಳ ವಿಶ್ವಾಸಾರ್ಹತೆ ಪರಿಶೀಲಿಸುವುದು ಹೇಗೆ?

ಬ್ಯಾಂಕುಗಳಾದರೆ ಆರ್​ಬಿಐನ ಗ್ಯಾರಂಟಿ ಇದೆ. 5 ಲಕ್ಷ ರೂವರೆಗಿನ ಠೇವಣಿಗಳಿಗೆ ಆರ್​ಬಿಐ ಇನ್ಷೂರೆನ್ಸ್ ಒದಗಿಸುತ್ತದೆ. ಅಂದರೆ ನೀವು ಬ್ಯಾಂಕ್​ನಲ್ಲಿ ಇಡುವ 5 ಲಕ್ಷ ರೂ ಹಣಕ್ಕೆ ಗ್ಯಾರಂಟಿ ಇರುತ್ತದೆ. ಈ ಗ್ಯಾರಂಟಿಯು ಎನ್​ಬಿಎಫ್​ಸಿ ವಿಚಾರದಲ್ಲಿ ಇರುವುದಿಲ್ಲ.

ಇದನ್ನೂ ಓದಿ: ರೆಪೋ ದರ ಏರಿಕೆಗೆ ಅನುಗುಣವಾಗಿ ಬ್ಯಾಂಕ್ ಠೇವಣಿ ದರ ಏರಿಲ್ಲವಾ? ಪೋಸ್ಟ್ ಆಫೀಸ್ ಮತ್ತು ಬ್ಯಾಂಕ್​ಗಳಲ್ಲಿ ಹೆಚ್ಚು ಬಡ್ಡಿ ಎಲ್ಲಿ ಸಿಗುತ್ತದೆ?

ನೀವು ಅಧಿಕ ಮೊತ್ತದ ಹಣವನ್ನು ಎನ್​ಬಿಎಫ್​ಸಿಯಲ್ಲಿ ಹೂಡಿಕೆ ಮಾಡಬೇಕೆಂದಿದ್ದರೆ ಮೊದಲು ಆ ಸಂಸ್ಥೆಯ ಕ್ರೆಡಿಟ್ ರೇಟಿಂಗ್ ಪರಿಶೀಲಿಸಬೇಕಾಗುತ್ತದೆ. ವಿವಿಧ ಹಣಕಾಸು ಸಂಸ್ಥೆಗಳು ಎನ್​ಬಿಎಫ್​ಸಿಗಳಿಗೆ ರೇಟಿಂಗ್ ನೀಡುತ್ತವೆ. ಮೂಡೀಸ್ ಸಂಸ್ಥೆಯ ಕ್ರಿಸಿಲ್ ಸೇರಿದಂತೆ ವಿವಿಧ ರೇಟಿಂಗ್ ಏಜೆನ್ಸಿಗಳು ಈ ಸೇವೆ ಒದಗಿಸುತ್ತವೆ. ಆದಿತ್ಯ ಬಿರ್ಲಾ ಫೈನಾನ್ಸ್ ಇತ್ಯಾದಿ ಎನ್​ಬಿಎಫ್​ಸಿಗಳಿಗೆ ಟಾಪ್ ರೇಟಿಂಗ್ ಇದೆ. ಕಡಿಮೆ ರೇಟಿಂಗ್ ಇರುವ ಎನ್​ಬಿಎಫ್​ಸಿಗಳಲ್ಲಿ ನೀವು ಹಣ ಇರಿಸುವುದು ಸುರಕ್ಷಿತವಲ್ಲ ಎಂಬುದು ಮೇಲ್ನೋಟಕ್ಕೆಯೇ ಗೊತ್ತಾಗಿಹೋಗುತ್ತದೆ.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ