BIG FD Rates: ಬೆಂಗಳೂರಿನ ರಿಯಲ್ ಎಸ್ಟೇಟ್ ಅನ್ನೂ ಮೀರಿಸುತ್ತದೆ ಈ ಜನ ಬ್ಯಾಂಕ್​ನ ಎಫ್​ಡಿ ರಿಟರ್ನ್ಸ್

ಬೆಂಗಳೂರು: ನಿಶ್ಚಿತ ಠೇವಣಿಗಳಿಗೆ ಅಧಿಕ ಬಡ್ಡಿ ದರ (FD Interest Rates) ನೀಡುವುದರಲ್ಲಿ ಬ್ಯಾಂಕುಗಳು ಪೈಪೋಟಿಗೆ ಬಿದ್ದಿರುವಂತಿದೆ. ಬಹಳಷ್ಟು ಬ್ಯಾಂಕುಗಳು ಈಗ ಶೇ. 7ಕ್ಕಿಂತ ಹೆಚ್ಚು ಬಡ್ಡಿಯನ್ನು ಎಫ್​ಡಿಗಳಿಗೆ ನೀಡುತ್ತಿವೆ. ಕೆಲ ಬ್ಯಾಂಕುಗಳು ಶೇ. 8ಕ್ಕಿಂತಲೂ ಹೆಚ್ಚು ಬಡ್ಡಿ ಆಫರ್ ಮಾಡುತ್ತಿವೆ. ಆದರೆ, ಬೆಂಗಳೂರಿನ ಸಣ್ಣ ಬ್ಯಾಂಕೊಂದು ತನ್ನಲ್ಲಿನ ನಿಶ್ಚಿತ ಠೇವಣಿಗಳಿಗೆ (Fixed Deposits) ಶೇ. 8.85ರವರೆಗೆ ಬಡ್ಡಿ ಕೊಡುವುದಾಗಿ ಹೇಳಿದೆ. ಆದರೆ, ಇದು ಜನ ಸ್ಮಾಲ್ ಫೈನಾನ್ಸ್ ಬ್ಯಾಂಕ್​ನ ವಿಶೇಷ ಆಫರ್ ಆಗಿದ್ದು ಮಾರ್ಚ್ 31ರವರೆಗೆ ಮಾತ್ರ ಲಭ್ಯ ಇದೆ.

ಬೆಂಗಳೂರಿನ ಕೋರಮಂಗಲದಲ್ಲಿ ಮುಖ್ಯಕಚೇರಿ ಹೊಂದಿರುವ ಜನ ಫೈನಾನ್ಸ್ ಬ್ಯಾಂಕ್​ಗೆ ಇದು 5ನೇ ವಾರ್ಷಿಕೋತ್ಸವದ ಸಂಭ್ರಮ. ಈ ಹಿನ್ನೆಲೆಯಲ್ಲಿ ವಿಶೇಷ ಎಫ್​ಡಿ ಸ್ಕೀಮ್ ಪ್ರಕಟಿಸಿದೆ. ಮಾರ್ಚ್ 1ರಂದು ಶುರುವಾಗಿರುವ ಈ ಸ್ಕೀಮ್ ಮಾರ್ಚ್ 31ರವರೆಗೆ ಮಾತ್ರ ಇರಲಿದೆ. ಹಿರಿಯ ನಾಗರಿಕರಿಗೆ ಶೇ. 8.85ರವರೆಗೂ ಬಡ್ಡಿ ಕೊಡುತ್ತದೆ ಈ ಬ್ಯಾಂಕು. 60 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಇತರೆಲ್ಲಾ ಗ್ರಾಹಕರಿಗೂ ಸಿಗುವ ಬಡ್ಡಿ ಕಡಿಮೆ ಏನಿಲ್ಲ. ಇವರಿಗೆ ಶೇ. 8.15 ರವರೆಗೂ ಬಡ್ಡಿ ಸಿಗುತ್ತದೆ. ಈ ವಿಶೇಷ ಬಡ್ಡಿದರಗಳು ಮಾರ್ಚ್ 1ರಿಂದ ಮಾರ್ಚ್ 31ರೊಳಗೆ ಶುರುವಾಗುವ 500 ದಿನಗಳ ಅವಧಿ ಠೇವಣಿಗಳಿಗೆ ಅನ್ವಯ ಆಗುತ್ತದೆ.

2ರಿಂದ 3 ವರ್ಷ ಅವಧಿಯ ಠೇವಣಿಗಳಿಗೂ ಶೇ. 8ಕ್ಕಿಂತ ಹೆಚ್ಚು ಬಡ್ಡಿ ದರ ಅನ್ವಯ ಆಗುತ್ತದೆ. 5 ವರ್ಷಕ್ಕಿಂತ ಮೇಲ್ಪಟ್ಟ ಅವಧಿಯ ಠೇವಣಿಗಳಿಗೆ ಸಿಗುವ ಬಡ್ಡಿ ಕಡಿಮೆ ಆಗುತ್ತಾ ಹೋಗುತ್ತದೆ.

ಜನ ಸ್ಮಾಲ್ ಫೈನಾನ್ಸ್ ಬ್ಯಾಂಕ್​ನ ವಾರ್ಷಿಕೋತ್ಸವ ಆಫರ್: ಅತಿ ಹೆಚ್ಚು ಬಡ್ಡಿ ಸಿಗುವ ಠೇವಣಿಗಳು

500 ದಿನದ ಎಫ್​ಡಿ: ಹಿರಿಯ ನಾಗರಿಕರಿಗೆ ಶೇ. 8.85, ಇತರರಿಗೆ ಶೇ. 8.15 ಬಡ್ಡಿ

2-3 ವರ್ಷದ ಎಫ್​ಡಿ: ಹಿರಿಯ ನಾಗರಿಕರಿಗೆ ಶೇ. 8.80, ಇತರರಿಗೆ ಶೇ. 8.10 ಬಡ್ಡಿ

3-5 ವರ್ಷದ ಎಫ್​ಡಿ: ಹಿರಿಯ ನಾಗರಿಕರಿಗೆ ಶೇ. 8.05, ಇತರರಿಗೆ ಶೇ. 7.35 ಬಡ್ಡಿ

1-2 ವರ್ಷದ ಎಫ್​ಡಿ: ಹಿರಿಯ ನಾಗರಿಕರಿಗೆ ಶೇ. 7.95, ಇತರರಿಗೆ ಶೇ. 7.25 ಬಡ್ಡಿ

5 ವರ್ಷದ ಎಫ್​ಡಿ: ಹಿರಿಯ ನಾಗರಿಕರಿಗೆ ಶೇ. 7.95, ಇತರರಿಗೆ ಶೇ. 7.25 ಬಡ್ಡಿ

ಭಾರತದಲ್ಲಿ ಯಾವ ಬ್ಯಾಂಕುಗಳೂ ಶೇ. 8.85ರ ದರದಲ್ಲಿ ಎಫ್​ಡಿಗೆ ಬಡ್ಡಿ ಕೊಡುತ್ತಿಲ್ಲ ಸದ್ಯಕ್ಕೆ. ಶ್ರೀರಾಮ್ ಫೈನಾನ್ಸ್ ಸಂಸ್ಥೆ ಶೇ. 9.05ರ ಬಡ್ಡಿ ದರವನ್ನು ಕೊಡುತ್ತದೆ ಎಂದು ಹೇಳಲಾದರೂ ಅದಿನ್ನೂ ದೃಢಪಟ್ಟಿಲ್ಲ. ಹಣ ಬೆಳೆಸಲು ಈ ಬಡ್ಡಿ ದರ ಬಹಳ ಸಹಕಾರಿಯಾಗುತ್ತದೆ. ಬೆಂಗಳೂರಿನಲ್ಲಿ ಒಂದು ನಿವೇಶನದ ಮೌಲ್ಯ ಸರಾಸರಿಯಾಗಿ ಒಂದು ವರ್ಷದಲ್ಲಿ ಶೇ. 6-9ರಷ್ಟು ಬೆಳೆಯುತ್ತದೆ ಎಂಬ ಅಂದಾಜು ಇದೆ. ಕೆಲ ಕಡೆ ಗರಿಷ್ಠ ಶೇ. 12ರವರೆಗೂ ಭೂಮಿಯ ಬೆಲೆ ಬೆಳೆಯಬಹುದು. ಈ ಹಿನ್ನೆಲೆಯಲ್ಲಿ ಜನ ಸ್ಮಾಲ್ ಫೈನಾನ್ಸ್ ಬ್ಯಾಂಕ್​ನ ಎಫ್​ಡಿ ಬಡ್ಡಿದರಗಳು ಆಕರ್ಷಕ ಎನಿಸುತ್ತವೆ.

ಆರ್​ಡಿ ದರಗಳೂ ಉತ್ತಮ

ಜನ ಸ್ಮಾಲ್ ಫೈನಾನ್ಸ್ ಬ್ಯಾಂಕ್​ನ ಆರ್​ಡಿ ದರಗಳೂ ಉತ್ತಮವಾಗಿವೆ. ಹಿರಿಯ ನಾಗರಿಕರ ಠೇವಣಿಗಳಿಗೆ ಶೇ. 8.80ರವರೆಗೂ ಬಡ್ಡಿ ಕೊಡಲಾಗುತ್ತದೆ. ಇತರರಿಗೂ ಶೇ. 8.10ರವರೆಗೆ ಬಡ್ಡಿ ಸಿಗುತ್ತದೆ. 2-3 ವರ್ಷ ಅವಧಿಯ ಆರ್​ಡಿಗೆ ಗರಿಷ್ಠ ಬಡ್ಡಿ ಆಫರ್ ಇದೆ. 1-2 ವರ್ಷದ ಅವಧಿಯ ಆರ್​ಡಿಗೂ ಉತ್ತಮ ಬಡ್ಡಿ ದರ ಇದೆ. ಇಲ್ಲಿ ಗಮನಿಸಬೇಕಾದ ಅಂಶ ಎಂದರೆ ವಿಶೇಷ ಎಫ್​ಡಿ ಸ್ಕೀಮ್​ನಂತೆ ಆರ್​ಡಿ ದರಗಳು ವಾರ್ಷಿಕೋತ್ಸವ ಪ್ರಯುಕ್ತ ಮಾಡಿರುವ ಘೋಷಣೆಗಳಲ್ಲ. ಈ ಆರ್​ಡಿ ಬಡ್ಡಿ ದರಗಳು ಫೆಬ್ರುವರಿ 1ರಿಂದಲೇ ಜಾರಿಗೆ ಬಂದಿವೆ.

ಎಲ್ಲಿವೆ ಶಾಖೆಗಳು:

ಜನ ಸ್ಮಾಲ್ ಫೈನಾನ್ಸ್ ಬ್ಯಾಂಕ್ ಐದು ವರ್ಷದಲ್ಲಿ ಬಹಳ ವೇಗವಾಗಿ ಬೆಳೆದುಹೋಗಿದೆ. ಬಹುತೇಕ ಎಲ್ಲಾ ರಾಜ್ಯಗಳಲ್ಲೂ ಈ ಬ್ಯಾಂಕ್​ನ ಶಾಖೆಗಳಿವೆ. ಕರ್ನಾಟಕದ ಬಹುತೇಕ ಎಲ್ಲಾ ಜಿಲ್ಲೆಗಳಲ್ಲೂ ಶಾಖೆಗಳಿವೆ. ಬೆಂಗಳೂರಿನಲ್ಲಿ ಬನಶಂಕರಿ, ಬೊಮ್ಮನಹಳ್ಳಿ, ಕೋರಮಂಗಲ, ಅಮೃತಹಳ್ಳಿ, ಕೆಂಗೇರಿ, ಮಲ್ಲೇಶ್ವರಂ ಇತ್ಯಾದಿ ಹಲವು ಏರಿಯಾಗಳಲ್ಲಿ ಈ ಬ್ಯಾಂಕ್​ನ ಬ್ರ್ಯಾಂಚ್​ಗಳನ್ನು ತೆರೆಯಲಾಗಿದೆ.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

Published On - 4:42 pm, Thu, 9 March 23