ಗೋಲ್ಡ್ ಇಟಿಎಫ್​ಗಳ ಮೇಲೆ ಹಣದ ಹೊಳೆ; ಭರಪೂರ ಲಾಭ ತರುವ ಇದರ ಮೇಲೆ ಹೂಡಿಕೆ ಹೇಗೆ?

ವಿಶ್ವಾದ್ಯಂತ ಚಿನ್ನ ಮತ್ತು ಬೆಳ್ಳಿ ಬೆಲೆಗಳು ಹೊಸ ಹೊಸದಾಗಿ ಸಾರ್ವಕಾಲಿಕ ದಾಖಲೆಗಳನ್ನು ಬರೆಯುತ್ತಲೇ ಇವೆ. ಸಾಕಷ್ಟು ಹೂಡಿಕೆದಾರರು ಚಿನ್ನದ ಖರೀದಿಗೆ ಮುಗಿಬಿದ್ದಿದ್ದಾರೆ. ಅದರಲ್ಲೂ ಗೋಲ್ಡ್ ಇಟಿಎಫ್​ಗಳ (Gold ETF) ಮೇಲೆ ಭರಪೂರ ಹೂಡಿಕೆ ಆಗುತ್ತಿದೆ. ಭಾರತದಲ್ಲಿ ಕಳೆದ ನಾಲ್ಕು ತಿಂಗಳಿಂದ ಸತತವಾಗಿ ಗೋಲ್ಡ್ ಇಟಿಎಫ್​ಗಳ ಮೇಲೆ ಹೂಡಿಕೆ ಹೆಚ್ಚುತ್ತಿದೆ. ಷೇರುಗಳಿಗಿಂತ ಗೋಲ್ಡ್ ಇಟಿಎಫ್​ಗಳು ಹೆಚ್ಚು ರಿಟರ್ನ್ಸ್ ತಂದುಕೊಡುತ್ತಿವೆ.

ಏನಿದು ಗೋಲ್ಡ್ ಇಟಿಎಫ್?

ಇಟಿಎಫ್ ಎಂದರೆ ಎಕ್ಸ್​ಚೇಂಜ್ ಟ್ರೇಡೆಡ್ ಫಂಡ್. ಒಂದು ರೀತಿಯ ಮ್ಯೂಚುವಲ್ ಫಂಡ್. ಇದು ನಿರ್ದಿಷ್ಟ ಷೇರು ಇಂಡೆಕ್ಸ್, ಚಿನ್ನ, ಬೆಳ್ಳಿ ಇತ್ಯಾದಿ ವಸ್ತುಗಳ ಮೇಲೆ ಹೂಡಿಕೆ ಮಾಡುವ ಫಂಡ್. ಗೋಲ್ಡ್ ಇಟಿಎಫ್ ಫಂಡ್​ಗಳು ಚಿನ್ನದ ಮೇಲೆ ಹೂಡಿಕೆ ಮಾಡುತ್ತವೆ. ಮ್ಯೂಚುವಲ್ ಫಂಡ್​ಗಳಿಗೆ ಹೋಲಿಸಿದರೆ ಇಟಿಎಫ್​ಗಳ ಎಕ್ಸ್​ಪೆನ್ಸ್ ರೇಶಿಯೋ ಬಹಳ ಕಡಿಮೆ. ಅಂದರೆ, ಹೂಡಿಕೆಗೆ ಹೆಚ್ಚು ಶುಲ್ಕ ಇರುವುದಿಲ್ಲ. ಹೀಗಾಗಿ, ಇಟಿಎಫ್​ಗಳು ಬಹಳ ಜನಪ್ರಿಯವಾಗಿವೆ.

ಗೋಲ್ಡ್ ಇಟಿಎಫ್​ಗಳಲ್ಲಿ ಹೇಗೆ ಹೂಡಿಕೆ ಮಾಡುವುದು?

ಇಟಿಎಫ್​ಗಳು ಷೇರು ವಿನಿಮಯ ಕೇಂದ್ರಗಳಲ್ಲಿ ವಹಿವಾಟು ಆಗುತ್ತವೆ. ಹೀಗಾಗಿ, ಇಟಿಎಫ್​ಗಳಲ್ಲಿ ಹೂಡಿಕೆ ಮಾಡಬೇಕೆಂದರೆ ಬ್ರೋಕರೇಜ್ ಸಂಸ್ಥೆಗಳಲ್ಲಿ ಡೀಮ್ಯಾಟ್ ಮತ್ತು ಟ್ರೇಡಿಂಟ್ ಅಕೌಂಟ್ ತೆರೆಯಬೇಕು.

ಇದನ್ನೂ ಓದಿ: ಷೇರು vs ಚಿನ್ನ vs ರಿಯಲ್ ಎಸ್ಟೇಟ್; ಕಳೆದ 20 ವರ್ಷದಲ್ಲಿ ಯಾವುದರಿಂದ ಸಿಕ್ಕಿದೆ ಹೆಚ್ಚು ಲಾಭ? ಇಲ್ಲಿದೆ ಡೀಟೇಲ್ಸ್

ಗೋಲ್ಡ್ ಇಟಿಎಫ್ ಹೂಡಿಕೆ ಸೇವೆ ನೀಡುವ ಹಲವು ಫಂಡ್​ಗಳಿವೆ. ಸ್ಟಾಕ್ ಎಕ್ಸ್​ಚೇಂಜ್ ಕಾರ್ಯಾವಧಿಯಲ್ಲಿ ಬ್ರೋಕರೇಜ್ ಪ್ಲಾಟ್​ಫಾರ್ಮ್ ತೆರೆದು, ಯಾವುದಾದರೂ ಗೋಲ್ಡ್ ಇಟಿಎಫ್ ಫಂಡ್ ಅನ್ನು ಆಯ್ದುಕೊಳ್ಳಿ. ನಿಮಗೆ ಬೇಕಷ್ಟು ಯೂನಿಟ್​ಗಳನ್ನು ಖರೀದಿಸಬಹುದು. ಒಂದು ಯುನಿಟ್ ಎಂದರೆ ಒಂದು ಗ್ರಾಮ್ ಚಿನ್ನ.

ನೀವು ನಿರ್ದಿಷ್ಟ ಮೊತ್ತದ ಹಣವನ್ನು ಗೋಲ್ಡ್ ಇಟಿಎಫ್​ನಲ್ಲಿ ಹೂಡಿಕೆ ಮಾಡಿದಾಗ, ಆ ಫಂಡ್ ಸಂಸ್ಥೆಯು ಅಷ್ಟು ಮೊತ್ತಕ್ಕೆ ಭೌತಿಕ ಚಿನ್ನವನ್ನು ಖರೀದಿಸಿ ಇಟ್ಟುಕೊಳ್ಳುತ್ತದೆ. ನೀವು ಹೂಡಿಕೆ ಹಿಂಪಡೆದಾಗ, ಅದು ಅಷ್ಟು ಚಿನ್ನವನ್ನು ಮಾರಿ ನಿಮಗೆ ಹಣ ವಾಪಸ್ ಕೊಡುತ್ತದೆ.

ಗೋಲ್ಡ್ ಇಟಿಎಫ್ ಅನುಕೂಲವೇನು?

ಭೌತಿಕ ಚಿನ್ನವಾಗಲೀ, ಡಿಜಿಟಲ್ ಗೋಲ್ಡ್ ಆಗಲೀ ನೀವು ಖರೀದಿಸಿದಾಗ ಜಿಎಸ್​ಟಿ ಅಥವಾ ಮೇಕಿಂಗ್ ಚಾರ್ಜ್ ಇತ್ಯಾದಿ ಪಾವತಿಸುತ್ತೀರಿ. ಆದರೆ, ಗೋಲ್ಡ್ ಇಟಿಎಫ್​ನಲ್ಲಿ ಎಕ್ಸ್​ಪೆನ್ಸ್ ರೇಶಿಯೋ ಬಿಟ್ಟರೆ ಬೇರೆ ವೆಚ್ಚ ಇರುವುದಿಲ್ಲ. ನೀವು ಯಾವಾಗ ಬೇಕಾದರೂ ಅದನ್ನು ಮಾರಿ ಹಣ ಪಡೆಯಬಹುದು. ಅಂದರೆ, ಷೇರು ವಿನಿಮಯ ಕೇಂದ್ರಗಳು ತೆರೆದಿರುವ ದಿನಗಳಲ್ಲಿ ಷೇರುಗಳ ರೀತಿ ಟ್ರೇಡಿಂಗ್ ಅವಧಿಯಲ್ಲಿ ಗೋಲ್ಡ್ ಇಟಿಎಫ್​ಗಳ ಖರೀದಿ, ಮಾರಾಟ ಮಾಡಲು ಅವಕಾಶ ಇದೆ.

ಇದನ್ನೂ ಓದಿ: ವಿವಿಧ ವಯಸ್ಸಲ್ಲಿ ಎಷ್ಟೆಷ್ಟು ಸೇವಿಂಗ್ಸ್ ಮಾಡಬೇಕು? ರಾಧಿಕಾ ಗುಪ್ತಾ 10-30-50 ನಿಯಮ

ಗೋಲ್ಡ್ ಇಟಿಎಫ್​ನ ಅನನುಕೂಲಗಳು

ನೀವು ಟ್ರೇಡಿಂಗ್ ಅವಧಿಯಲ್ಲಿ ಮಾತ್ರವೇ ಹೂಡಿಕೆ ಮಾಡಲು ಮತ್ತು ಮಾರಲು ಅವಕಾಶ ಇರುತ್ತದೆ. ಡಿಜಿಟಲ್ ಗೋಲ್ಡ್​ನಲ್ಲಿ ನೀವು ಯಾವಾಗ ಬೇಕಾದರೂ ವಹಿವಾಟು ನಡೆಸಬಹುದು.

ಗೋಲ್ಡ್ ಇಟಿಎಫ್​ನಲ್ಲಿ ಮತ್ತೊಂದು ಅನನುಕೂಲ ಎಂದರೆ ಹೂಡಿಕೆಯನ್ನು ಭೌತಿಕ ಚಿನ್ನವಾಗಿ ಪರಿವರ್ತಿಸಲು ಆಗುವುದಿಲ್ಲ. ನಿಮ್ಮ ಹೂಡಿಕೆ ತರುವ ಲಾಭವನ್ನು ಹಣದ ರೂಪದಲ್ಲೇ ಪಡೆಯಬೇಕು.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ