ಬ್ಯಾಂಕಲ್ಲಿ ಪರ್ಸನಲ್ ಲೋನ್ ಸಿಗುತ್ತಿಲ್ಲವಾ? ಬೇರೆಡೆ ಸಾಲ ಮಾಡುವಾಗ ಗಮನಿಸಬೇಕಾದ 3 ಸಂಗತಿಗಳು
Loan from fintech platforms: ನಮ್ಮ ಸಾಲ ತೀರಿಸುವಿಕೆಯ ಇತಿಹಾಸದ ಆಧಾರದ ಮೇಲೆ ವೈಯಕ್ತಿಕ ಸಾಲವನ್ನು ಬ್ಯಾಂಕುಗಳು ನೀಡುತ್ತವೆ. ಕ್ರೆಡಿಟ್ ಸ್ಕೋರ್ ಕಡಿಮೆ ಇದ್ದರೆ ಬ್ಯಾಂಕುಗಳು ಸಾಲ ಕೊಡದೇ ಹೋಗಬಹುದು. ಈ ಸಂದರ್ಭದಲ್ಲಿ ಫಿನ್ಟೆಕ್ ಪ್ಲಾಟ್ಫಾರ್ಮ್ ಮೂಲಕ ಸಾಲ ಪಡೆಯಲು ಯತ್ನಿಸಬಹುದು. ಅದಕ್ಕೆ ಮುನ್ನ ಕೆಲವಿಷ್ಟು ಮುನ್ನೆಚ್ಚರಿಕೆ ವಹಿಸುವುದು ಉತ್ತಮ.
ಯಾವುದೇ ಅಡಮಾನ ಇಲ್ಲದೇ ಸಿಗುವ ಸಾಲವೆಂದರೆ ಪರ್ಸನಲ್ ಲೋನ್. ನಮ್ಮ ಹಿಂದಿನ ಹಣಕಾಸು ಶಿಸ್ತು ಪಾಲನೆಯ ಆಧಾರದ ಮೇಲೆ ಮತ್ತು ನಮ್ಮ ಆದಾಯದ ಆಧಾರದ ಮೇಲೆ ಬ್ಯಾಂಕುಗಳು ಮತ್ತು ಎನ್ಬಿಎಫ್ಸಿಗಳು ಸಾಲಗಳನ್ನು ನೀಡುತ್ತವೆ. ಇದೆಲ್ಲದಕ್ಕೂ ಕ್ರೆಡಿಟ್ ಸ್ಕೋರ್ ಆಧಾರವಾಗಿರುತ್ತದೆ. ಒಂದು ವೇಳೆ ಬೇರೆ ಬೇರೆ ಕಾರಣಗಳಿಗೆ ನಿಮ್ಮ ಕ್ರೆಡಿಟ್ ಸ್ಕೋರ್ ತೀರಾ ಕಡಿಮೆ ಇದ್ದರೆ ಪರ್ಸನಲ್ ಲೋನ್ ಸಿಗುವುದು ಬಹಳ ಕಷ್ಟವಾಗುತ್ತದೆ. ಸಿಕ್ಕರೂ ಕೂಡ ಬಡ್ಡಿದರ ದುಬಾರಿಯಾಗಿರುತ್ತದೆ. ಚಿನ್ನ ಇದ್ದರೆ ತುರ್ತಾಗಿ ಯಾವುದೇ ಸೆಕ್ಯೂರಿಟಿ ಇಲ್ಲದೇ ಸಾಲ ಪಡೆಯಬಹುದು. ಅದೂ ಇಲ್ಲದೇ ಇದ್ದ ಪಕ್ಷದಲ್ಲಿ ಬೇರೆ ಖಾಸಗಿ ಹಣಕಾಸು ಸಂಸ್ಥೆಗಳು ಅಥವಾ ಫಿನ್ಟೆಕ್ ಕಂಪನಿಗಳ ಮುಖಾಂತರ ಸಾಲ ಪಡೆಯಬಹುದು.
ಆನ್ಲೈನ್ನಲ್ಲಿ ಸುಲಭವಾಗಿ ಸಾಲ ನೀಡುತ್ತೇವೆ ಎಂದು ಹಲವು ಲೋನ್ ಆ್ಯಪ್ಗಳು ಆಫರ್ ಮಾಡುವುದನ್ನು ನೋಡಿರಬಹುದು. ಆದರೆ, ಇವುಗಳ ಬಗ್ಗೆ ಬಹಳ ಎಚ್ಚರಿಕೆಯಿಂದ ಇರಬೇಕು. ಅದರ ಬದಲು ಹೆಚ್ಚು ವಿಶ್ವಾಸಾರ್ಹವಾದ ಶ್ರೀರಾಮ್ ಫೈನಾನ್ಸ್, ಬಜಾಜ್ ಫೈನಾನ್ಸ್, ಪೇಟಿಎಂ, ಫೋನ್ಪೆ, ಗ್ರೋ, ಕ್ರೆಡಿಟ್ಬೀ, ಲೆಂಡಿಂಗ್ಕಾರ್ಟ್ ಇತ್ಯಾದಿ ಫಿನ್ಟೆಕ್ ಪ್ಲಾಟ್ಫಾರ್ಮ್ಗಳಲ್ಲಿ ಪ್ರಯತ್ನಿಸಬಹುದು.
ಇದನ್ನೂ ಓದಿ: ಸುಕನ್ಯಾ ಸಮೃದ್ಧಿ ಯೋಜನೆ: ಅ. 1ರಿಂದ ಬದಲಾಗಲಿವೆ 2 ನಿಯಮಗಳು, ಗಮನಿಸಿ
ಫಿನ್ಟೆಕ್ ಪ್ಲಾಟ್ಫಾರ್ಮ್ನಲ್ಲಿ ಸಾಲ ಪಡೆಯುವ ಮುನ್ನ ಈ ವಿಷಯ ಗಮನದಲ್ಲಿರಲಿ
- ನೀವು ಸಾಲ ಪಡೆಯಲಿರುವ ಸಂಸ್ಥೆ ಆರ್ಬಿಐ ಜೊತೆ ನೊಂದಾಯಿತವಾಗಿದೆಯಾ ಗಮನಿಸಿ. ಫಿನ್ಟೆಕ್ ಕಂಪನಿಗಳು ಸಾಲ ಕೊಡಲು ಪರವಾನಿಗೆ ಹೊಂದಿರುವುದಿಲ್ಲ. ಆದರೆ, ಎನ್ಬಿಎಫ್ಸಿಗಳ ಜೊತೆ ಹೊಂದಾಣಿಕೆ ಮಾಡಿಕೊಂಡು ಸಾಲದ ಆಫರ್ ಮಾಡಬಹುದು. ನೊಂದಾಯಿತವಾಗಿರುವ ಎನ್ಬಿಎಫ್ಸಿಗಳ ಪಟ್ಟಿಯನ್ನು ಆರ್ಬಿಐ ವೆಬ್ಸೈಟ್ನಲ್ಲಿ ಕಾಣಬಹುದು. ಫಿನ್ಟೆಕ್ ಕಂಪನಿಯು ಸಾಲ ನೀಡಲು ನೊಂದಾಯಿತವಾದ ಎನ್ಬಿಎಫ್ಸಿ ಜೊತೆ ಟೈ ಅಪ್ ಆಗಿದೆಯಾ ಎಂದು ಖಚಿತಪಡಿಸಿಕೊಳ್ಳಿ.
- ಪ್ಲೇಸ್ಟೋರ್ನಲ್ಲಿ ಬಹಳಷ್ಟು ಲೋನ್ ಆ್ಯಪ್ಗಳನ್ನು ಕಾಣುತ್ತೇವೆ. ಸಾಕಷ್ಟು ಜನರು ಅತಿಹೆಚ್ಚು ಡೌನ್ಲೋಡ್ ಆದ ಆ್ಯಪ್ಗಳು ಹೆಚ್ಚು ವಿಶ್ವಾಸಾರ್ಹ ಎಂದು ಭಾವಿಸುವುದುಂಟು. ಇದು ತಪ್ಪು. ಕಳೆದ ಎರಡು ವರ್ಷದಲ್ಲಿ 4,700 ಅನಧಿಕೃತ ಲೋನ್ ಆ್ಯಪ್ಗಳನ್ನು ಪ್ಲೇಸ್ಟೋರ್ನಿಂದ ತೆಗೆದುಹಾಕಲಾಗಿದೆ. ಹತ್ತಕ್ಕೂ ಹೆಚ್ಚು ಆ್ಯಪ್ಗಳಂತೂ ಒಂದು ಲಕ್ಷಕ್ಕಿಂತ ಹೆಚ್ಚು ಡೌನ್ಲೋಡ್ಸ್ ಆಗಿದ್ದವು.
ಇದನ್ನೂ ಓದಿ: ಎಸ್ಐಪಿಯತ್ತ ಜನ ಮುಗಿಬೀಳಲು ಏನು ಕಾರಣ? ಈ ಸಿಸ್ಟಮ್ಯಾಟಿಕ್ ಇನ್ವೆಸ್ಟ್ಮೆಂಟ್ ಪ್ಲಾನ್ ಹೊಂದುವ ಮುನ್ನ ನೀವು ತಿಳಿಯಬೇಕಾದ್ದೇನು?
- ನೀವು ಸಾಲ ಪಡೆಯಲಿರುವ ಫಿನ್ಟೆಕ್ ಕಂಪನಿಯು ಪ್ರಮುಖ ನಗರದಲ್ಲಿ ನೊಂದಾಯಿತ ಕಚೇರಿ ಹೊಂದಿದೆಯಾ ಎಂದು ಖಚಿತಪಡಿಸಿಕೊಳ್ಳಿ. ಕಸ್ಟಮರ್ ಕೇರ್ ನಂಬರ್ ಅಸ್ತಿತ್ವದಲ್ಲಿದ್ದು, ಅದರ ನಿರ್ವಹಣೆಗೆ ಸಿಬ್ಬಂದಿ ಇದ್ದಾರಾ ಎಂದೂ ಖಚಿತಪಡಿಸಿಕೊಳ್ಳಿ.
ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ