Porsche Cayenne Electric: ಪೋರ್ಷೆ ಕಯೆನ್ನೆ ಎಲೆಕ್ಟ್ರಿಕ್ ಭಾರತದಲ್ಲಿ ಬಿಡುಗಡೆ: ಬೆಲೆ 1.77 ಕೋಟಿ
ಪೋರ್ಷೆ ಕಯೆನ್ನೆ ಎಲೆಕ್ಟ್ರಿಕ್ ಎಸ್‌ಯುವಿ ಭಾರತದಲ್ಲಿ ಎರಡು ರೂಪಾಂತರಗಳಲ್ಲಿ ಬಿಡುಗಡೆಯಾಗಿದೆ. ಆರಂಭಿಕ ಬೆಲೆ 1.77 ಕೋಟಿ ಇದ್ದರೆ, ಟರ್ಬೊ ಎಲೆಕ್ಟ್ರಿಕ್ ಬೆಲೆ 2.27 ಕೋಟಿ. 113 ಕಿಲೋವ್ಯಾಟ್‌ಅವರ್‌ ಬ್ಯಾಟರಿ, 642 ಕಿ.ಮೀವರೆಗೆ ರೇಂಜ್, 390 ಕಿಲೋವ್ಯಾಟ್ ಡಿಸಿ ಚಾರ್ಜಿಂಗ್ ಮತ್ತು 2.5 ಸೆಕೆಂಡ್‌ಗಳಲ್ಲಿ 100 ಕಿ.ಮೀ ವೇಗ ತಲುಪುವ ಸಾಮರ್ಥ್ಯ ಇದರ ಪ್ರಮುಖ ವಿಶೇಷತೆಗಳಾಗಿವೆ.
ಮುಖ್ಯಾಂಶಗಳು
- 1.77 ಕೋಟಿ ಬೆಲೆಯ ಪೋರ್ಷೆ ಕಯೆನ್ನೆ ಎಲೆಕ್ಟ್ರಿಕ್ ಭಾರತಕ್ಕೆ ಬಂದಿದೆ!
- ಕೇವಲ 2.5 ಸೆಕೆಂಡ್‌ನಲ್ಲಿ 100 ಕಿ.ಮೀ ವೇಗ
- ಒಂದೇ ಚಾರ್ಜ್‌ಗೆ 642 ಕಿ.ಮೀ ರೇಂಜ್
ಐಷಾರಾಮಿ ಕಾರು ತಯಾರಕ ಪೋರ್ಷೆ (Porsche) ತನ್ನ ಜನಪ್ರಿಯ ಕಯೆನ್ನೆ ಎಸ್‌ಯುವಿಯ ಸಂಪೂರ್ಣ ಎಲೆಕ್ಟ್ರಿಕ್ ಆವೃತ್ತಿಯನ್ನು ಭಾರತದಲ್ಲಿ ಬಿಡುಗಡೆ ಮಾಡಿದೆ. ಕಯೆನ್ನೆ ಎಲೆಕ್ಟ್ರಿಕ್ ಎರಡು ರೂಪಾಂತರಗಳಲ್ಲಿ ಲಭ್ಯವಿದ್ದು, ಆರಂಭಿಕ ಬೆಲೆ 1.77 ಕೋಟಿಯಿಂದ ಶುರುವಾಗುತ್ತದೆ. ಹೆಚ್ಚಿನ ಕಾರ್ಯಕ್ಷಮತೆಯ ಕಯೆನ್ನೆ ಟರ್ಬೊ ಎಲೆಕ್ಟ್ರಿಕ್ ಬೆಲೆ 2.27 ಕೋಟಿ. ಎರಡೂ ಬೆಲೆಗಳು ಎಕ್ಸ್‌-ಶೋರೂಂ ದರಗಳಾಗಿವೆ. ಈಗಾಗಲೇ ಗ್ರಾಹಕರಿಗೆ ಕಾರಿನ ವಿತರಣೆ ಆರಂಭವಾಗಿದೆ.
ಎರಡು ರೂಪಾಂತರಗಳಲ್ಲಿ ಲಭ್ಯ
ಕಯೆನ್ನೆ ಎಲೆಕ್ಟ್ರಿಕ್ ಮತ್ತು ಕಯೆನ್ನೆ ಟರ್ಬೊ ಎಲೆಕ್ಟ್ರಿಕ್ ಎಂಬ ಎರಡು ರೂಪಾಂತರಗಳನ್ನು ಪೋರ್ಷೆ ಭಾರತದಲ್ಲಿ ಪರಿಚಯಿಸಿದೆ. ಎರಡೂ ಕಾರುಗಳಲ್ಲಿ ಎರಡು ಎಲೆಕ್ಟ್ರಿಕ್ ಮೋಟಾರ್‌ಗಳು ಮತ್ತು 113 ಕಿಲೋವ್ಯಾಟ್‌ಅವರ್‌ ಸಾಮರ್ಥ್ಯದ ಬ್ಯಾಟರಿ ಪ್ಯಾಕ್ ನೀಡಲಾಗಿದೆ. ಸ್ಟ್ಯಾಂಡರ್ಡ್ ಕಯೆನ್ನೆ ಎಲೆಕ್ಟ್ರಿಕ್ 402 ಬಿಎಚ್‌ಪಿ ಶಕ್ತಿಯನ್ನು ಮತ್ತು 835 ಎನ್‌ಎಂ ಟಾರ್ಕ್‌ ಅನ್ನು ನೀಡುತ್ತದೆ. ಲಾಂಚ್ ಕಂಟ್ರೋಲ್ ಬಳಸಿದಾಗ ಇದರ ಶಕ್ತಿ 442 ಬಿಎಚ್‌ಪಿವರೆಗೆ ಹೆಚ್ಚುತ್ತದೆ. ಇದು ಕೇವಲ 4.8 ಸೆಕೆಂಡ್‌ಗಳಲ್ಲಿ ಗಂಟೆಗೆ 0ರಿಂದ 100 ಕಿ.ಮೀ ವೇಗವನ್ನು ತಲುಪುತ್ತದೆ. ಇದರ ಗರಿಷ್ಠ ವೇಗ ಗಂಟೆಗೆ 230 ಕಿ.ಮೀ.
ಇನ್ನು ಕಯೆನ್ನೆ ಟರ್ಬೊ ಎಲೆಕ್ಟ್ರಿಕ್ ಇನ್ನಷ್ಟು ಶಕ್ತಿಶಾಲಿಯಾಗಿದೆ. ಇದು 1,156 ಬಿಎಚ್‌ಪಿ ಶಕ್ತಿ ಮತ್ತು 1,150 ಎನ್‌ಎಂ ಟಾರ್ಕ್‌ ನೀಡುತ್ತದೆ. 0ರಿಂದ 100 ಕಿ.ಮೀ ವೇಗವನ್ನು ಕೇವಲ 2.5 ಸೆಕೆಂಡ್‌ಗಳಲ್ಲಿ ತಲುಪುವ ಸಾಮರ್ಥ್ಯ ಹೊಂದಿದೆ. ಇದರ ಗರಿಷ್ಠ ವೇಗ ಗಂಟೆಗೆ 260 ಕಿ.ಮೀಗೆ ಸೀಮಿತಗೊಳಿಸಲಾಗಿದೆ.
ಒಂದೇ ಚಾರ್ಜ್‌ಗೆ 642 ಕಿ.ಮೀ ರೇಂಜ್
ಬ್ಯಾಟರಿ ಸಾಮರ್ಥ್ಯ ದೊಡ್ಡದಾಗಿರುವುದರ ಜೊತೆಗೆ, ಚಾರ್ಜಿಂಗ್ ವೇಗವೂ ಕಯೆನ್ನೆ ಎಲೆಕ್ಟ್ರಿಕ್‌ನ ಪ್ರಮುಖ ವೈಶಿಷ್ಟ್ಯವಾಗಿದೆ. ಸ್ಟ್ಯಾಂಡರ್ಡ್ ಕಯೆನ್ನೆ ಎಲೆಕ್ಟ್ರಿಕ್ ಡಬ್ಲ್ಯುಎಲ್‌ಟಿಪಿ ಪರೀಕ್ಷಾ ಮಾನದಂಡದ ಪ್ರಕಾರ ಒಂದೇ ಚಾರ್ಜ್‌ನಲ್ಲಿ ಗರಿಷ್ಠ 642 ಕಿ.ಮೀ ಪ್ರಯಾಣಿಸಬಹುದು ಎಂದು ಕಂಪನಿ ತಿಳಿಸಿದೆ. ಟರ್ಬೊ ಎಲೆಕ್ಟ್ರಿಕ್ 623 ಕಿ.ಮೀ ರೇಂಜ್ ನೀಡುತ್ತದೆ.
Suzuki Hayabusa: ಭಾರತದಲ್ಲಿ ಸುಜುಕಿ ಹಯಾಬುಸಾ ಸ್ಪೆಷಲ್ ಎಡಿಷನ್ ಬಿಡುಗಡೆ; ಬೆಲೆ 19.90 ಲಕ್ಷ
ಕಾರಿನಲ್ಲಿ ಗರಿಷ್ಠ 390 ಕಿಲೋವ್ಯಾಟ್ ಡಿಸಿ ವೇಗದ ಚಾರ್ಜಿಂಗ್‌ಗೆ ಬೆಂಬಲವಿದೆ. ಸೂಕ್ತ ಚಾರ್ಜರ್ ಬಳಸಿದರೆ ಬ್ಯಾಟರಿಯನ್ನು ಶೇ.10ರಿಂದ ಶೇ.80ಕ್ಕೆ ಸುಮಾರು 16 ನಿಮಿಷಗಳಲ್ಲಿ ಚಾರ್ಜ್ ಮಾಡಬಹುದು. 11 ಕಿಲೋವ್ಯಾಟ್ ಸಾಮರ್ಥ್ಯದ ವೈರ್‌ಲೆಸ್ ಚಾರ್ಜಿಂಗ್ ವ್ಯವಸ್ಥೆಯನ್ನೂ ಆಯ್ಕೆಯಾಗಿ ನೀಡಲಾಗಿದೆ.
ಪೆಟ್ರೋಲ್ ಕಯೆನ್ನೆ ರೀತಿಯ ವಿನ್ಯಾಸ
ಎಲೆಕ್ಟ್ರಿಕ್ ಕಾರಾಗಿದ್ದರೂ ಕಯೆನ್ನೆಯ ಮೂಲ ವಿನ್ಯಾಸವನ್ನು ಪೋರ್ಷೆ ಉಳಿಸಿಕೊಂಡಿದೆ. ಪೆಟ್ರೋಲ್ ಆವೃತ್ತಿಯೊಂದಿಗೆ ಹೋಲಿಸಿದರೆ ಎಲೆಕ್ಟ್ರಿಕ್ ಮಾದರಿ ಸ್ವಲ್ಪ ಉದ್ದವಾಗಿದ್ದು, ಇದರ ವೀಲ್‌ಬೇಸ್‌ ಕೂಡ 130 ಮಿ.ಮೀ ಹೆಚ್ಚಾಗಿದೆ ಎಂದು Team-BHP ವರದಿ ತಿಳಿಸಿದೆ. ಮುಂಭಾಗದಲ್ಲಿ ಮುಚ್ಚಿದ ಗ್ರಿಲ್‌, ಸ್ಲಿಮ್‌ ಎಲ್‌ಇಡಿ ಹೆಡ್‌ಲ್ಯಾಂಪ್‌ಗಳು ಮತ್ತು ಸಕ್ರಿಯ ಏರೋಡೈನಾಮಿಕ್‌ ವಿನ್ಯಾಸದ ಅಂಶಗಳನ್ನು ಕಾಣಬಹುದು. ಹಿಂಭಾಗದಲ್ಲಿ ಎಲ್‌ಇಡಿ ಲೈಟ್‌ ಬಾರ್‌ನೊಂದಿಗೆ ಸಂಪರ್ಕಗೊಂಡಿರುವ ಟೈಲ್‌ಲ್ಯಾಂಪ್‌ಗಳು ಮತ್ತು ಪ್ರಕಾಶಮಾನವಾದ ಪೋರ್ಷೆ ಲೋಗೊ ನೀಡಲಾಗಿದೆ.
ಒಳಭಾಗದಲ್ಲಿ ದೊಡ್ಡ ಡಿಜಿಟಲ್ ಪರದೆ
ಕಯೆನ್ನೆ ಎಲೆಕ್ಟ್ರಿಕ್‌ನ ಒಳಭಾಗದಲ್ಲಿ ಡಿಜಿಟಲ್ ತಂತ್ರಜ್ಞಾನಕ್ಕೆ ಹೆಚ್ಚಿನ ಆದ್ಯತೆ ನೀಡಲಾಗಿದೆ. 14.5 ಇಂಚಿನ ಬಾಗಿದ ಕೇಂದ್ರ ಟಚ್‌ಸ್ಕ್ರೀನ್‌, ಡಿಜಿಟಲ್ ಇನ್‌ಸ್ಟ್ರುಮೆಂಟ್ ಕ್ಲಸ್ಟರ್‌ ಮತ್ತು ಆಯ್ಕೆಯಾಗಿ 14.9 ಇಂಚಿನ ಪ್ರಯಾಣಿಕರ ಡಿಸ್‌ಪ್ಲೇ ನೀಡಲಾಗಿದೆ. ಚಾಲಕನಿಗೆ ಆಗ್ಮೆಂಟೆಡ್ ರಿಯಾಲಿಟಿ ಆಧಾರಿತ ಹೆಡ್‌ಅಪ್ ಡಿಸ್‌ಪ್ಲೇ ಕೂಡ ಲಭ್ಯವಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ