KYC Update: ಕೆವೈಸಿ ಅಪ್​ಡೇಟ್​ಗೆ ಬ್ಯಾಂಕ್ ಶಾಖೆಗೆ ತೆರಳಬೇಕಿಲ್ಲ; ಆರ್​ಬಿಐ

ನವದೆಹಲಿ: ಕೆವೈಸಿ (KYC) ಅಪ್​ಡೇಟ್ ಮಾಡುವುದಕ್ಕಾಗಿ ಗ್ರಾಹಕರು ಬ್ಯಾಂಕ್ ಶಾಖೆಗೆ ತೆರಳುವ ಅಗತ್ಯವಿಲ್ಲ ಎಂದು ಆರ್​ಬಿಐ (RBI) ಹೇಳಿದೆ. ಈಗಾಗಲೇ ಬ್ಯಾಂಕ್​ಗೆ ಅಗತ್ಯ ದಾಖಲೆಗಳನ್ನು ನೀಡಿದ್ದಲ್ಲಿ, ವಿಳಾಸ ಬದಲಾವಣೆ ಆಗಿರದಿದ್ದಲ್ಲಿ ಕೆವೈಸಿ ಅಪ್​​ಡೇಟ್​​ಗೆಂದು ಬ್ಯಾಂಕ್ ಶಾಖೆಗೆ ತೆರಳಬೇಕಾಗಿಲ್ಲ ಎಂದು ಆರ್​ಬಿಐ ಹೇಳಿದೆ. ಈ ಮೂಲಕ, ಅನವಶ್ಯಕ ಗ್ರಾಹಕರ ಸಮಯ ವ್ಯರ್ಥವಾಗುವುದನ್ನು ತಪ್ಪಿಸಿದೆ. ಆರಂಭದಲ್ಲಿ ಬ್ಯಾಂಕ್​ಗೆ ಸಲ್ಲಿಸಿದ್ದ ಕೆವೈಸಿ ಮಾಹಿತಿಯಲ್ಲಿ ಯಾವುದೇ ಬದಲಾವಣೆ ಇಲ್ಲದಿದ್ದಲ್ಲಿ ನೋಂದಾಯಿತ ಮೊಬೈಲ್ ಸಂಖ್ಯೆ, ಇ-ಮೇಲ್ ಐಡಿ ಅಥವಾ ಇತರ ಯಾವುದೇ ವಿಧಾನದ ಮೂಲಕ ಸ್ವ ದೃಢೀಕರಣ ಮಾಡಬಹುದು ಎಂದು ಆರ್​​ಬಿಐ ಹೇಳಿದೆ.

ಕೆವೈಸಿ ಅಪ್​ಡೇಟ್; ಹೊಸ ಮಾರ್ಗಸೂಚಿಯಲ್ಲೇನಿದೆ?

ಕೆವೈಸಿ ಅಪ್​ಡೇಟ್​ ವಿಚಾರವಾಗಿ ಆರ್​ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಹೇಳಿಕೆಯ ಬೆನ್ನಲ್ಲೇ ಆರ್​​ಬಿಐ ಮಾರ್ಗಸೂಚಿ ಬಿಡುಗಡೆ ಮಾಡಿದೆ. ಮಾರ್ಗಸೂಚಿ ಪ್ರಕಾರ, ಕೆವೈಸಿಯಲ್ಲಿ ಯಾವುದೇ ಬದಲಾವಣೆ ಇಲ್ಲದಿದ್ದಲ್ಲಿ ಗ್ರಾಹಕರು ಸ್ವ ದೃಢೀಕರಣದ ಮಾಡಿದರೆ ಸಾಕು. ಇ-ಮೇಲ್ ಐಡಿ, ಮೊಬೈಲ್ ಸಂಖ್ಯೆ, ಎಟಿಎಂಗಳು, ಇಂಟರ್​​ನೆಟ್ ಬ್ಯಾಂಕಿಂಗ್​​ನಂಥ ಡಿಜಿಟಲ್ ವಿಧಾನಗಳ ಮೂಲಕ ಬ್ಯಾಂಕ್​ಗಳು ಗ್ರಾಹಕರು ಸ್ವ-ದೃಢೀಕರಣ ಮಾಡಿರುವುದನ್ನು ಪರಿಶೀಲಿಸಬೇಕು. ಗ್ರಾಹಕರ ಜತೆ ಮುಖಾಮುಖಿ ಸಂವಹನ ಅಗತ್ಯವಿಲ್ಲ. ಅವರನ್ನು ಶಾಖೆಗಳಿಗೆ ಕರೆಸಿಕೊಳ್ಳುವ ಅತ್ಯವೂ ಇಲ್ಲ ಎಂದು ಮಾರ್ಗಸೂಚಿಯಲ್ಲಿ ತಿಳಿಸಲಾಗಿದೆ.

ಇದನ್ನೂ ಓದಿ: Bank Locker Rules: ಲಾಕರ್ ವಸ್ತುಗಳಿಗೆ ಹಾನಿಯಾದರೆ ಬ್ಯಾಂಕ್​ಗಳು ನೀಡಬೇಕು ಭಾರೀ ಪರಿಹಾರ; ಹೊಸ ನಿಯಮದ ಪೂರ್ಣ ವಿವರ ಇಲ್ಲಿದೆ

ಬ್ಯಾಂಕ್​ಗಳು ನಿಯಮಿತವಾಗಿ ಗ್ರಾಹಕರ ದಾಖಲೆಗಳನ್ನು ಪರಿಶೀಲಿಸಿ ಸುಸ್ಥಿತಿಯಲ್ಲಿ ಇಟ್ಟುಕೊಂಡಿರಬೇಕು. ದಾಖಲೆಗಳನ್ನು ಅಕ್ರಮ ಹಣಕಾಸು ವರ್ಗಾವಣೆ ಕಾಯ್ದೆ ಅನ್ವಯ ಪರಾಮರ್ಶಿಸಿ, ಅಪ್​ಡೇಟ್ ಮಾಡಿಕೊಳ್ಳುತ್ತಾ ಇರಬೇಕು ಎಂದು ಮಾರ್ಗಸೂಚಿಯಲ್ಲಿ ತಿಳಿಸಲಾಗಿದೆ.

ಈಗಾಗಲೇ ಗ್ರಾಹಕರು ಸಲ್ಲಿಸಿದ್ದ ಕೆವೈಸಿ ದಾಖಲೆಗಳ ಸಿಂಧುತ್ವವು ಅವಧಿ ಮೀರಿರುವ ಸಂದರ್ಭಗಳಲ್ಲಿ ಕೂಡ ದಾಖಲೆಗಳನ್ನು ಸಮರ್ಪಕವಾಗಿ ಕಾಪಿಡುವುದು ಅಗತ್ಯ. ಇಂಥ ಸಂದರ್ಭಗಳಲ್ಲಿ, ಗ್ರಾಹಕರು ಸಲ್ಲಿಸಿದ ಕೆವೈಸಿ ದಾಖಲೆಗಳು / ಸ್ವಯಂ-ದೃಢೀಕರಣದ ಸ್ವೀಕೃತಿಯನ್ನು ಬ್ಯಾಂಕ್‌ಗಳು ಒದಗಿಸಬೇಕಾಗುತ್ತದೆ ಎಂದು ಆರ್‌ಬಿಐ ಹೇಳಿದೆ.

ವಾಣಿಜ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ