ಗೇಮಿಂಗ್ ಕಂಪನಿಗಳಿಗೆ ಖುಷಿ ಸುದ್ದಿ; ಸರ್ಕಾರದ ಹೊಸ ಗೇಮಿಂಗ್ ನಿಯಮ ಜಾರಿ ಬಳಿಕ ಗೂಗಲ್ ಪ್ಲೇಸ್ಟೋರ್ನಲ್ಲಿ ಲಭ್ಯ ಇರಲಿವೆ ಗೇಮಿಂಗ್ ಆ್ಯಪ್ಗಳು
Google To Allow Real Money Games: ಶೇ. 28ರಷ್ಟು ಜಿಎಸ್ಟಿ ತೆರಿಗೆ ಹೇರಿಕೆಯಿಂದ ಕಳೆಗುಂದಿರುವ ಭಾರತದ ಗೇಮಿಂಗ್ ಉದ್ಯಮಕ್ಕೆ ಖುಷಿಯ ಸುದ್ದಿ ಸಿಕ್ಕಿದೆ. ಭಾರತದ ಹೊಸ ಗೇಮಿಂಗ್ ನಿಯಮ ಜಾರಿಗೆ ಬಂದ ಬಳಿಕ ಸ್ವಯಂನಿಯಂತ್ರಕ ಸಂಸ್ಥೆಗಳಿಂದ ಅನುಮೋದನೆ ಪಡೆದ ರಿಯಲ್ ಮನಿ ಗೇಮಿಂಗ್ ಆ್ಯಪ್ಗಳಿಗೆ ತನ್ನ ಪ್ಲೇಸ್ಟೋರ್ ವೇದಿಕೆಯಲ್ಲಿ ಅವಕಾಶ ಕೊಡುವುದಾಗಿ ಗೂಗಲ್ ಹೇಳಿದೆ.
ನವದೆಹಲಿ, ಸೆಪ್ಟೆಂಬರ್ 6: ಭಾರತದಲ್ಲಿ ಗೇಮಿಂಗ್ ಕ್ಷೇತ್ರಕ್ಕೆ ಹೊಸ ನಿಯಂತ್ರಕ ವ್ಯವಸ್ಥೆ ಜಾರಿಗೆ ಬಂದ ಬಳಿಕ ಗೂಗಲ್ ಪ್ಲೇ ಸ್ಟೋರ್ನಲ್ಲಿ ರಿಯಲ್ ಮನಿ ಗೇಮಿಂಗ್ ಆ್ಯಪ್ಗಳನ್ನು ಡೌನ್ಲೋಡ್ ಮಾಡಬಹುದಾಗಿದೆ. ಸ್ವಯಂ ನಿಯಂತ್ರಕ ಸಂಸ್ಥೆಗಳ (SRB- Self Regulatory Bodies) ಅನುಮೋದನೆ ಪಡೆದಿರುವ ಗೇಮ್ಗಳಿಗೆ ತನ್ನ ಪ್ಲೇಸ್ಟೋರ್ ಪ್ಲಾಟ್ಫಾರ್ಮ್ನಲ್ಲಿ ಅನುಮತಿಸಲು ಗೂಗಲ್ ಯೋಜಿಸಿದೆ. ಆದರೆ, ಇದಾಗ ಬೇಕಾದರೆ ಭಾರತದಲ್ಲಿ ಹೊಸ ಗೇಮಿಂಗ್ ನಿಯಮಗಳ ನಿಯಂತ್ರಕ ವ್ಯವಸ್ಥೆ (Gaming Regulatory Framework) ಜಾರಿಗೆ ಬರಬೇಕು.
ಗೂಗಲ್ ಪ್ಲೇಸ್ಟೋರ್ನಲ್ಲಿ ಅವಕಾಶ ಸಿಗಲಿರುವುದು ಗೇಮಿಂಗ್ ಆ್ಯಪ್ಗಳಿಗೆ ಸ್ವಾಗತಾರ್ಹ ಬೆಳವಣಿಗೆ ಎನಿಸುತ್ತದೆ. ಸರ್ಕಾರ ಈಗಾಗಲೇ ಶೇ. 28ರಷ್ಟು ಜಿಎಸ್ಟಿ ವಿಧಿಸಿರುವ ಹಿನ್ನೆಲೆಯಲ್ಲಿ ಕಳೆಗುಂದಿರುವ ಗೇಮಿಂಗ್ ಉದ್ಯಮಕ್ಕೆ ಇದು ಹೊಸ ಭರವಸೆ ನೀಡಬಹುದು.
ಇದನ್ನೂ ಓದಿ: ಜಾಂಬಿಯಾ ದೇಶದ ತಾಮ್ರ ಗಣಿಗಾರಿಕೆ ಅಧಿಕಾರ ಮತ್ತೆ ಭಾರತದ ವೇದಾಂತ ಸಂಸ್ಥೆಯ ತೆಕ್ಕೆಗೆ; 4 ವರ್ಷಗಳ ಕಾನೂನು ಸಮರ ಸುಖಾಂತ್ಯ
ಕೇಂದ್ರ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ ಕೆಲ ತಿಂಗಳ ಹಿಂದೆ ಆನ್ಲೈನ್ ಗೇಮಿಂಗ್ ನಿಯಮಗಳಲ್ಲಿ ಹೊಸ ಬದಲಾವಣೆಗಳನ್ನು ತರುವುದಾಗಿ ಅಧಿಸೂಚನೆ ಹೊರಡಿಸಿತ್ತು. ಅದರಂತೆ, ಆನ್ಲೈನ್ ಗೇಮಿಂಗ್ ಕ್ಷೇತ್ರದಲ್ಲಿ ವಿವಿಧ ಸ್ವಯಂ ನಿಯಂತ್ರಕ ಸಂಸ್ಥೆಗಳನ್ನು (ಸೆಲ್ಫ್ ರೆಗ್ಯುಲೇಟರಿ ಆರ್ಗನೈಸೇಶನ್ಸ್) ನಿಯೋಜಿಸುವ ಪ್ರಸ್ತಾಪ ಮಾಡಿದೆ. ಈ ವ್ಯವಸ್ಥೆ ಸದ್ಯದಲ್ಲೇ ಜಾರಿಗೆ ಬರುವ ಸಾಧ್ಯತೆ ಇದೆ.
ಆನ್ಲೈನ್ ರಿಯಲ್ ಮನಿ ಗೇಮ್ಗಳಿಂದ ದೇಶದ ಸಾರ್ವಭೌಮತೆಗೆ ಧಕ್ಕೆ ಆಗುತ್ತಿದೆಯಾ ಎಂಬಿತ್ಯಾದಿ ಅಂಶಗಳನ್ನು ಈ ಸ್ವಯಂ ನಿಯಂತ್ರಕ ಸಂಸ್ಥೆಗಳು ಪರಿಶೀಲಿಸಿ, ಅದಕ್ಕೆ ಅನುಗುಣವಾಗಿ ಕ್ರಮಗಳನ್ನು ಕೈಗೊಳ್ಳುತ್ತದೆ. ಆನ್ಲೈನ್ ಗೇಮಿಂಗ್ ಕಂಪನಿಗಳು ಕಾರ್ಯಾಚರಿಸಲು ಇಂಥ ಸ್ವಯಂ ನಿಯಂತ್ರಕ ಸಂಸ್ಥೆಗಳ ಅನುಮೋದನೆ ಪಡೆಯಬೇಕೆನ್ನುವ ನಿಯಮವನ್ನು ಸರ್ಕಾರ ತರಲಿದೆ.
ಇದನ್ನೂ ಓದಿ: UPI ATM: ಭಾರತದಲ್ಲಿ ವಿಶ್ವದ ಮೊದಲ ಯುಪಿಐ ಎಟಿಎಂ; ಕಳ್ಳಕಾಕರ ಭಯ ದೂರ ಮಾಡುವ ವಿನೂತನ ಟೆಕ್ನಾಲಜಿ
ಡ್ರೀಮ್ ಇಲವೆನ್, ರಮ್ಮಿ ಇತ್ಯಾದಿ ಗೇಮಿಂಗ್ಗಳು ರಿಯಲ್ ಮನಿ ಗೇಮ್ಗಳೆನಿಸುತ್ತವೆ. ಇಲ್ಲಿ ಗೇಮ್ನಲ್ಲಿ ಪಾಲ್ಗೊಳ್ಳುವ ಆಟಗಾರನಿಗೆ ಗೆಲುವಾದರೆ ನೈಜ ಹಣ ರವಾನೆಯಾದರೆ ಅದು ರಿಯಲ್ ಮನಿ ಗೇಮ್ಗಳೆನಿಸುತ್ತವೆ. ಗೂಗಲ್ ಸಂಸ್ಥೆ ಕಳೆದ ಒಂದು ವರ್ಷದಿಂದ ಭಾರತದ ಫ್ಯಾಂಟಸಿ ಸ್ಪೋರ್ಟ್ಸ್ ಮತ್ತು ರಮ್ಮಿ ಆ್ಯಪ್ಗಳನ್ನು ಪ್ರಾಯೋಗಿಕವಾಗಿ ತನ್ನ ಪ್ಲೇ ಸ್ಟೋರ್ನಲ್ಲಿ ಒಳಗೊಂಡಿದೆ. ಈ ಪ್ರಯೋಗ ಒಂದು ವರ್ಷಕ್ಕೆ ಮಾತ್ರವಾದ್ದರಿಂದ ಈ ತಿಂಗಳೇ ಇದು ಅಂತ್ಯಗೋಳ್ಳುತ್ತದೆ. ಆದರೆ, 2024ರ ಜನವರಿ 15ರವರೆಗೂ ಆ ಆ್ಯಪ್ಗಳಿಗೆ ಗ್ರೇಸ್ ಪೀರಿಯಡ್ ಕೊಡಲಾಗಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ