SBI Profit: ಎಸ್ಬಿಐ ಸಖತ್ ಲಾಭ; ಷೇರುದಾರರಿಗೆ ಡಿವಿಡೆಂಡ್ ಸುಗ್ಗಿ; ಐಟಿಸಿ, ಗೇಲ್ ಲಾಭ ಎಷ್ಟಿದೆ ನೋಡಿ?
SBI, ITC Show Big Profits: ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ 2023ರ ಜನವರಿಯಿಂದ ಮಾರ್ಚ್ವರೆಗಿನ ಕ್ವಾರ್ಟರ್ ಅವಧಿಯಲ್ಲಿ ಶೇ. 89ಕ್ಕಿಂತ ಹೆಚ್ಚು ಲಾಭ ಹೆಚ್ಚಳ ಕಂಡಿದೆ. ಐಟಿಸಿ ಲಾಭದಲ್ಲೂ ಶೇ. 23ರಷ್ಟು ಹೆಚ್ಚಳವಾಗಿದೆ. ಎಸ್ಬಿಐ ತನ್ನ ಷೇರುದಾರರಿಗೆ 11.30 ರೂಗಳ ಡಿವಿಡೆಂಡ್ ಘೋಷಿಸಿದೆ.
Updated on: May 18, 2023 | 4:54 PM
ನವದೆಹಲಿ: ಭಾರತದ ಅತಿದೊಡ್ಡ ಬ್ಯಾಂಕ್ ಎನಿಸಿರುವ ಎಸ್ಬಿಐ (SBI- State Bank of India) ವರ್ಷದ ಕೊನೆಯ ತ್ರೈಮಾಸಿಕ ಅವಧಿಯಲ್ಲಿ ಬರೋಬ್ಬರಿ 16,694.51 ಕೋಟಿ ರೂ ನಿವ್ವಳ ಲಾಭ ದಾಖಲಿಸಿದೆ. 2022ರ ಜನವರಿಯಿಂದ ಮಾರ್ಚ್ವರೆಗಿನ ಕ್ವಾರ್ಟರ್ನಲ್ಲಿ ಗಳಿಸಿದ್ದ 18,094 ಕೋಟಿ ರೂಗೆ ಹೋಲಿಸಿದರೆ ಈ ಬಾರಿ ನಿವ್ವಳ ಲಾಭದಲ್ಲಿ ಶೇ. 89.4ರಷ್ಟು ಹೆಚ್ಚಾಗಿದೆ. ಬಡ್ಡಿ ಮೂಲಕ ಗಳಿಸಿದ ಆದಾಯದಲ್ಲೂ ಶೇ. 31.4ರಷ್ಟು ಹೆಚ್ಚಾಗಿದೆ.
ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ನಾಲ್ಕನೇ ಕ್ವಾರ್ಟರ್ನಲ್ಲಿ ಭರ್ಜರಿ ಲಾಭದ ಹಿನ್ನೆಲೆಯಲ್ಲಿ ಬ್ಯಾಂಕ್ನ ಷೇರುದಾರರಿಗೆ ಭರ್ಜರಿ ಕೊಡುಗೆ ನೀಡಿದೆ. ಪ್ರತೀ ಈಕ್ವಿಟಿ ಷೇರಿಗೆ 11.30 ರೂ ಡಿವಿಡೆಂಡ್ ನೀಡಲು ಎಸ್ಬಿಐನ ನಿರ್ದೇಶಕರ ಮಂಡಳಿ ನಿರ್ದರಿಸಿದೆ. 2023 ಜೂನ್ 14ಕ್ಕೆ ಲಾಭಾಂಶ ನೀಡಲು ದಿನ ಫಿಕ್ಸ್ ಮಾಡಲಾಗಿದೆ.
ಎಸ್ಬಿಐ ಲಾಭ ಹೆಚ್ಚಾದರೂ ಷೇರುಬೆಲೆ ಕುಸಿತ
ಅಚ್ಚರಿಯ ಬೆಳವಣಿಗೆಯಲ್ಲಿ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಒಂದೆಡೆ ಅಭೂತಪೂರ್ವ ಲಾಭ ಗಳಿಸಿದರೆ, ಇನ್ನೊಂದೆಡೆ ಅದರ ಷೇರುಬೆಲೆ ಕುಸಿತ ಕಾಣುತ್ತಿದೆ. ಬಿಎಸ್ಇ ಸೆನ್ಸೆಕ್ಸ್ನಲ್ಲಿ ಎಸ್ಬಿಐನ ಷೇರುಬೆಲೆ ಹೆಚ್ಚೂಕಡಿಮೆ 10 ರುಪಾಯಿಯಷ್ಟು ಕುಸಿತ ಕಂಡಿದೆ. ಮೇ 18, ಗುರುವಾರ ಮಧ್ಯಾಹ್ನ ಎಸ್ಬಿಐ ಒಂದು ಷೇರಿಗೆ 576 ರೂ ಬೆಲೆಗೆ ಮಾರಾಟವಾಗುತ್ತಿತ್ತು. ಈ ಅನಿರೀಕ್ಷಿತ ಕುಸಿತಕ್ಕೆ ಕಾರಣ ಗೊತ್ತಾಗಿಲ್ಲ. ಆದರೆ, ಮುಂದಿನ ದಿನಗಳಲ್ಲಿ ಎಸ್ಬಿಐನ ಷೇರುಗಳಿಗೆ ಒಳ್ಳೆಯ ಬೇಡಿಕೆ ಬರುವ ಸಾಧ್ಯತೆ ಇದೆ. ಹಲವು ಬ್ರೋಕರೇಜ್ ಕಂಪನಿಗಳು ಎಸ್ಬಿಐನ ಷೇರಿಗೆ ಉತ್ತಮ ರೇಟಿಂಗ್ ಕೊಟ್ಟಿದ್ದಾರೆ.
ಐಟಿಸಿ ನಿವ್ವಳ ಆದಾಯ ಶೇ. 23 ರಷ್ಟು ಏರಿಕೆ
ಐಟಿಸಿ ಸಂಸ್ಥೆ 2023ರ ಜನವರಿಯಿಂದ ಮಾರ್ಚ್ವರೆಗಿನ ಕ್ವಾರ್ಟರ್ನಲ್ಲಿ 5,175.48 ಕೋಟಿ ರೂ ನಿವ್ವಳ ಲಾಭ ಗಳಿಸಿದೆ. ಹಿಂದಿನ ವರ್ಷದ ಇದೇ ಅವಧಿಗಿಂತ ಅದು ಶೇ. 23.3ರಷ್ಟು ಹೆಚ್ಚು ಲಾಭ ತೋರಿಸಿದೆ. ಇದೂ ಕೂಡ 6.75 ರೂಗಳ ಫೈನಲ್ ಡಿವಿಡೆಂಡ್ ಹಾಗು 2.75 ರೂಗಳ ಸ್ಪೆಷಲ್ ಡಿವಿಡೆಂಡ್ ಘೋಷಿಸಿದೆ. 2022-23ರ ಹಣಕಾಸು ವರ್ಷದಲ್ಲಿ ಐಟಿಸಿಯ ಷೇರಿಗೆ ಸಿಕ್ಕಿರುವ ಒಟ್ಟಾರೆ ಡಿವಿಡೆಂಡ್ 15.50 ರೂ ಆಗುತ್ತದೆ. ಈಗ ಘೋಷಣೆ ಮಾಡಿರುವ 6.75 ರೂ ಮತ್ತು 2.75 ರೂ ಲಾಭಾಂಶವನ್ನು ಆಗಸ್ಟ್ 14ರಿಂದ 17ರವರೆಗೆ ಷೇರುದಾರರಿಗೆ ನೀಡಲಾಗುತ್ತದೆ.
ಇದನ್ನೂ ಓದಿ: Super Rich: ಭಾರತದಲ್ಲಿ ನೂರಕ್ಕೊಬ್ಬ ಶ್ರೀಮಂತರ ಗುಂಪಿಗೆ ಸೇರಬೇಕಾ? ನಿಮಗೆಷ್ಟು ಕೋಟಿ ಹಣವಿರಬೇಕು? ಇಲ್ಲಿದೆ ಡೀಟೇಲ್ಸ್
ಗೇಲ್ ಇಂಡಿಯಾ (GAIL India) ಲಾಭದಲ್ಲಿ ಇಳಿಕೆ
ಭಾರತದ ಅತಿದೊಡ್ಡ ಗ್ಯಾಸ್ ಡಿಸ್ಟ್ರಿಬ್ಯೂಟರ್ ಕಂಪನಿ ಗೇಲ್ ಇಂಡಿಯಾದ (Gail India) ಲಾಭ ಮಾರ್ಚ್ ಅಂತ್ಯದ ಕ್ವಾರ್ಟರ್ನಲ್ಲಿ ಕಡಿಮೆ ಆಗಿದೆ. 2022ರ ಇದೇ ಅವಧಿಯಲ್ಲಿ 2,683 ಕೋಟಿ ರೂ ಇದ್ದ ಜಿಎಐಎಲ್ನ ನಿವ್ವಳ ಲಾಭ 2023ರ ಈ ಅವಧಿಯಲ್ಲಿ 604 ರುಪಾಯಿಗೆ ಇಳಿದಿದೆ. ಇದರ ನಿವ್ವಳ ಲಾಭ ಶೇ. 77ರಷ್ಟು ಕುಸಿತವಾಗಿದೆ.
