ಸೆಮಿಕಾನ್ ಇಂಡಿಯಾ 2026, ಮೂರು ದಿನಗಳ ಮಹಾಮೇಳಕ್ಕೆ ಸೆ. 17ರಂದು ಪ್ರಧಾನಿ ಮೋದಿ ಚಾಲನೆ; ಭಾರತದ ‘ಚಿಪ್’ ಕ್ರಾಂತಿ ಅನಾವರಣ

ನವದೆಹಲಿ, ಸೆಪ್ಟೆಂಬರ್ 15: ಪ್ರಧಾನಿ ನರೇಂದ್ರ ಮೋದಿ ಅವರು ನಾಳಿದ್ದು ಸೆಪ್ಟೆಂಬರ್ 17ರಂದು ಸೆಮಿಕಾನ್ ಇಂಡಿಯಾ 2026 ಕಾರ್ಯಕ್ರಮ ಉದ್ಘಾಟಿಸಲಿದ್ದಾರೆ. ಇಂಡಿಯಾ ಸೆಮಿಕಂಡಕ್ಟರ್ ಮಿಷನ್ (ISM), ಎಲೆಕ್ಟ್ರಾನಿಕ್ಸ್ ಮತ್ತು ಐಟಿ ಸಚಿವಾಲಯ, ಜಾಗತಿಕ ಸೆಮಿಕಂಡಕ್ಟರ್ ಡಿಸೈನ್ ಮತ್ತು ಮ್ಯಾನುಫ್ಯಾಕ್ಚರಿಂಗ್ ಉದ್ಯಮ ಪ್ರತಿನಿಧಿಸುವ ಸೆಮಿ (SEMI) ಸಂಘಟನೆ ಈ ಐದನೇ ಆವೃತ್ತಿಯ ಸೆಮಿಕಾನ್ ಇಂಡಿಯಾ ಕಾರ್ಯಕ್ರಮ (Semicon India 2026) ಆಯೋಜಿಸಿವೆ. ಸೆಪ್ಟೆಂಬರ್ 17ರಿಂದ 19ರವರೆಗೂ ಮೂರು ದಿನಗಳ ಕಾಲ ದೆಹಲಿಯ ಇಂಡಿಯಾ ಇಂಟರ್​ನ್ಯಾಷನಲ್ ಕನ್ವೆನ್ಷನ್ ಅಂಡ್ ಎಕ್ಸ್​ಪೋ ಸೆಂಟರ್​ನಲ್ಲಿ (ಯಶೋಭೂಮಿ) ಸೆಮಿಕಾನ್ ಕಾರ್ಯಕ್ರಮಗಳು ನಡೆಯಲಿವೆ.

15,000 ಚದರ ಮೀಟರ್​ಗಳಷ್ಟು ವಿಸ್ತೀರ್ಣದ ಈ ಪ್ರದರ್ಶನ ಜಾಗದಲ್ಲಿ ಆರು ದೇಶಗಳ ಪೆವಿಲಿಯನ್​ಗಳು, 12 ರಾಜ್ಯ ಸರ್ಕಾರಗಳ ಪೆವಿಲಿಯನ್​ಗಳನ್ನು ನಿರ್ಮಿಸಲಾಗಿದೆ. 600ಕ್ಕೂ ಅಧಿಕ ಪ್ರದರ್ಶಕರು ಪಾಲ್ಗೊಳ್ಳಲಿದ್ದಾರೆ. ಮೂರು ದಿನಗಳು ಸೆಮಿಕಂಡಕ್ಟರ್ ಮತ್ತು ಎಲೆಕ್ಟ್ರಾನಿಕ್ಸ್ ಸೆಕ್ಟರ್ ಕುರಿತು ಚರ್ಚೆಗಳು, ಪ್ರದರ್ಶನಗಳು ಇತ್ಯಾದಿ ಕಾರ್ಯಕ್ರಮಗಳು ನಡೆಯಲಿವೆ.

ಕೇಂದ್ರ ಸರ್ಕಾರದ ಸೆಮಿಕಂಡಕ್ಟರ್ ಮಿಷನ್​ನ ಯಶಸ್ಸು

ಮೋದಿ ಸರ್ಕಾರದ ‘ಮೇಕ್ ಇನ್ ಇಂಡಿಯಾ’ ಹಾಗೂ ‘ಸೆಮಿಕಂಡಕ್ಟರ್ ಮಿಷನ್’ ಯೋಜನೆಗಳು ಭಾರತದಲ್ಲಿ ಜಾಗತಿಕ ಮಟ್ಟದ ಚಿಪ್ ತಯಾರಿಕಾ ವಾತಾವರಣವನ್ನು ಯಶಸ್ವಿಯಾಗಿ ನಿರ್ಮಿಸುತ್ತಿವೆ. ಕೇವಲ ಇಲೆಕ್ಟ್ರಾನಿಕ್ಸ್ ಉಪಕರಣಗಳನ್ನು ಜೋಡಿಸುವುದರಿಂದ ಹಿಡಿದು, ಅವುಗಳ ಒಳಗಿರುವ ಸಂಕೀರ್ಣ ಚಿಪ್‌ಗಳನ್ನು ತಯಾರಿಸುವ ಹಂತಕ್ಕೆ ಭಾರತ ತಲುಪಿದೆ.

ಇದನ್ನೂ ಓದಿ: ರೀಟೇಲ್ ಹಣದುಬ್ಬರ 37 ಮೂಲಾಂಕಗಳಷ್ಟು ಏರಿಕೆ; ಆಗಸ್ಟ್​ನಲ್ಲಿ ಚಿಲ್ಲರೆ ಹಣದುಬ್ಬರ ದರ ಶೇ. 4.82 ದಾಖಲು

• ಉತ್ಪಾದನಾ ರಂಗದಲ್ಲಿ ಬೃಹತ್ ಜಿಗಿತ: ಭಾರತದ ಇಲೆಕ್ಟ್ರಾನಿಕ್ಸ್ ಉತ್ಪಾದನೆಯು 2014-15 ರಲ್ಲಿ ₹1.9 ಲಕ್ಷ ಕೋಟಿಯಷ್ಟಿತ್ತು. ಕಳೆದ ಒಂದು ದಶಕದಲ್ಲಿ ಇದು ಸುಮಾರು 7 ಪಟ್ಟು ಹೆಚ್ಚಾಗಿದ್ದು, 2025-26 ರ ವೇಳೆಗೆ ₹13.11 ಲಕ್ಷ ಕೋಟಿಗೆ ತಲುಪಿದೆ.
• ₹1.64 ಲಕ್ಷ ಕೋಟಿ ಮೌಲ್ಯದ ಯೋಜನೆಗಳು: ದೇಶದ 6 ರಾಜ್ಯಗಳಲ್ಲಿ ಒಟ್ಟು ₹1.64 ಲಕ್ಷ ಕೋಟಿ ಹೂಡಿಕೆಯ 12 ಸೆಮಿಕಂಡಕ್ಟರ್ ಯೋಜನೆಗಳಿಗೆ ಸರ್ಕಾರ ಅನುಮೋದನೆ ನೀಡಿದೆ. ಈ ಪೈಕಿ 3 ಪ್ರಮುಖ ಉತ್ಪಾದನಾ ಘಟಕಗಳು (Facilities) ಈಗಾಗಲೇ ವಾಣಿಜ್ಯಿಕವಾಗಿ ಚಿಪ್ ಉತ್ಪಾದನೆಯನ್ನು ಪ್ರಾರಂಭಿಸಿವೆ.
• ಸೆಮಿಕಂಡಕ್ಟರ್ ತಜ್ಞರ ತಯಾರಿ (Chip Talent): ‘ಚಿಪ್ಸ್ ಟು ಸ್ಟಾರ್ಟ್‌ಅಪ್’ (C2S) ಯೋಜನೆಯಡಿ ದೇಶಾದ್ಯಂತ 68,000 ಕ್ಕೂ ಹೆಚ್ಚು ವಿದ್ಯಾರ್ಥಿಗಳಿಗೆ ತರಬೇತಿ ನೀಡಲಾಗಿದೆ. ಏಪ್ರಿಲ್ 2026 ರ ವೇಳೆಗೆ 75 ಶಿಕ್ಷಣ ಮತ್ತು ಸಂಶೋಧನಾ ಸಂಸ್ಥೆಗಳಿಂದ 211 ಹೊಸ ಚಿಪ್ ವಿನ್ಯಾಸಗಳನ್ನು (Taped out chips) ಯಶಸ್ವಿಯಾಗಿ ಸಿದ್ಧಪಡಿಸಲಾಗಿದೆ.
• ಜಾಗತಿಕ ತಂತ್ರಜ್ಞಾನ ಕೇಂದ್ರವಾಗಿ ಭಾರತ: ಮೊಬೈಲ್, ಆಟೋಮೊಬೈಲ್, ಎಐ ಮತ್ತು ವೈದ್ಯಕೀಯ ಉಪಕರಣಗಳಿಗೆ ಅಗತ್ಯವಿರುವ ಚಿಪ್‌ಗಳಿಗಾಗಿ ಇತರ ದೇಶಗಳ ಮೇಲಿನ ಅವಲಂಬನೆಯನ್ನು ತಗ್ಗಿಸಿ, ಸ್ವಾವಲಂಬನೆ ಸಾಧಿಸುವುದು ಹಾಗೂ ಜಾಗತಿಕ ಪೂರೈಕೆ ಸರಪಳಿಯಲ್ಲಿ ಭಾರತವನ್ನು ಪ್ರಮುಖ ಕೇಂದ್ರವನ್ನಾಗಿ ಮಾಡುವುದು ಈ ಯೋಜನೆಯ ಮೂಲ ಉದ್ದೇಶವಾಗಿದೆ.

ಇದನ್ನೂ ಓದಿ: ಜಪಾನ್​ನಲ್ಲಿ ಮಾರುತಿ ಕಾರುಗಳಿಗೆ ಹೆಚ್ಚಿದ ಬೇಡಿಕೆ; ಮೇಡ್ ಇನ್ ಇಂಡಿಯಾ ಜಿಮ್ನಿ, ಫ್ರಾಂಕ್ಸ್, ಇ-ವಿಟಾರಾ ಕಾರುಗಳ ರಫ್ತು 1 ಲಕ್ಷಕ್ಕಿಂತ ಹೆಚ್ಚು

ಸೆ. 17, ಗುರುವಾರ ಆರಂಭವಾಗುವ ಸೆಮಿಕಂಡಕ್ಟರ್ ಸಮ್ಮೇಳನದಲ್ಲಿ ಪ್ರಧಾನಿ ಮೋದಿಯವರ ಭಾಷಣವು ದೇಶದ ಮುಂದಿನ ತಂತ್ರಜ್ಞಾನ ದೃಷ್ಟಿಕೋನಕ್ಕೆ ಹೊಸ ದಿಕ್ಸೂಚಿ ನೀಡಲಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ