Sovereign Gold Bond Scheme 2021- 22: ಸವರನ್ ಗೋಲ್ಡ್ ಬಾಂಡ್ ಮೇ 17ರಿಂದ ಸಬ್​ಸ್ಕ್ರಿಪ್ಷನ್, ಬೆಲೆ ರೂ. 4777

ಸವರನ್ ಗೋಲ್ಡ್ ಬಾಂಡ್​ಗಳ 2021-22ನೇ ಸಾಲಿನ ಮೊದಲ ಕಂತಿನ ಬಿಡುಗಡೆ ಮೇ 17ನೇ ತಾರೀಕಿನಂದು ಆಗಲಿದೆ. ಗ್ರಾಮ್​ಗೆ ಎಷ್ಟು ಮೊತ್ತ, ಎಲ್ಲಿ ಖರೀದಿಸಬಹುದು ಎಂಬಿತ್ಯಾದಿ ವಿವರಗಳು ಇಲ್ಲಿವೆ.

Sovereign Gold Bond Scheme 2021- 22: ಸವರನ್ ಗೋಲ್ಡ್ ಬಾಂಡ್ ಮೇ 17ರಿಂದ ಸಬ್​ಸ್ಕ್ರಿಪ್ಷನ್, ಬೆಲೆ ರೂ. 4777
ಸಾಂದರ್ಭಿಕ ಚಿತ್ರ

ಸವರನ್ ಗೋಲ್ಡ್ ಬಾಂಡ್ ಸ್ಕೀಮ್ 2021- 22: ಭಾರತದ ಸರ್ಕಾರವು ಸವರನ್ ಗೋಲ್ಡ್ ಬಾಂಡ್ ಸ್ಕೀಮ್ 2021- 22 (SGB) ವಿತರಣೆ ಬೆಲೆಯನ್ನು ಗ್ರಾಮ್​ಗೆ 4,777 ರೂಪಾಯಿಗೆ ನಿಗದಿ ಮಾಡಿದೆ. ಈ ವಿತರಣೆಯ ಸಬ್​ಸ್ಕ್ರಿಪ್ಷನ್ ಮೇ 17ಕ್ಕೆ ಆರಂಭವಾಗುತ್ತದೆ. 5 ದಿನಗಳ ಕಾಲ ಅವಕಾಶ ಇರುತ್ತದೆ. ಕೋವಿಡ್​-19 ಇರುವುದರಿಂದ ಮುಂದೆ ಯಾವಾಗಲಾದರೂ ಸವರನ್ ಗೋಲ್ಡ್ ಬಾಂಡ್ ಖರೀದಿಸೋಣ ಅಂತ ನೀವು ಅಂದುಕೊಳ್ಳುವುದಾದರೆ, ಈ ವರ್ಷ ಇನ್ನೂ 5 ಕಂತುಗಳಲ್ಲಿ ಬಿಡುಗಡೆ ಮಾಡಲಾಗುತ್ತದೆ. ಅಧಿಕೃತ ಹೇಳಿಕೆಯಲ್ಲಿ ಆರ್ಥಿಕ ವ್ಯವಹಾರಗಳ ಇಲಾಖೆ ತಿಳಿಸಿರುವ ಪ್ರಕಾರ, ರಿಸರ್ವ್ ಜತೆಗೆ ಚರ್ಚಿ ನಡೆಸಿ, ಸವರನ್ ಗೋಲ್ಡ್ ಬಾಂಡ್ಸ್ ವಿತರಣೆಗೆ ನಿರ್ಧರಿಸಿದೆ. 2021ರ ಮೇ ತಿಂಗಳಿಂದ 2021ರ ಸೆಪ್ಟೆಂಬರ್ ಮಧ್ಯೆ ಆರು ಕಂತುಗಳಲ್ಲಿ ಸವರನ್ ಗೋಲ್ಡ್ ಬಾಂಡ್​ಗಳನ್ನು ವಿತರಿಸಲಾಗುತ್ತದೆ.

ಭಾರತ ಸರ್ಕಾರದ ಪರವಾಗಿ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಸವರನ್ ಗೋಲ್ಡ್ ಬಾಂಡ್​ಗಳನ್ನು ವಿತರಣೆ ಮಾಡುತ್ತದೆ. ಅಧಿಕೃತ ಹೇಳಿಕೆ ಪ್ರಕಾರ, ಸವರನ್ ಗೋಲ್ಡ್ ಬಾಂಡ್ ಸ್ಕೀಮ್ 2021- 22 ಸಿರೀಸ್- I ಅಥವಾ ಮೊದಲನೇ ಕಂತು ಮೇ 17, 2021ರಿಂದ ಮೇ 21, 2021ರ ಮಧ್ಯೆ ಸಬ್​ಸ್ಕ್ರಿಪ್ಷನ್​ಗೆ ಲಭ್ಯ ಇರುತ್ತದೆ. ಬಾಂಡ್​ಗಳನ್ನು ಮೇ 25ನೇ ತಾರೀಕು ವಿತರಿಸಲಾಗುತ್ತದೆ.

ಸವರನ್ ಗೋಲ್ಡ್ ಬಾಂಡ್ ಎಲ್ಲಿ ಖರೀದಿಸಬಹುದು?
ಶೆಡ್ಯೂಲ್ಡ್ ವಾಣಿಜ್ಯ ಬ್ಯಾಂಕ್​ಗಳು (ಸಣ್ಣ ಫೈನಾನ್ಸ್ ಬ್ಯಾಂಕ್​ಗಳು, ಪೇಮೆಂಟ್ಸ್​ ಬ್ಯಾಂಕ್​ಗಳನ್ನು ಹೊರತುಪಡಿಸಿ), ಸ್ಟಾಕ್ ಹೋಲ್ಡಿಂಗ್ ಕಾರ್ಪೊರೇಷನ್ ಆಫ್ ಇಂಡಿಯಾ ಲಿಮಿಟೆಡ್ (SHCIL), ನಿರ್ದಿಷ್ಟ ಅಂಚೆ ಕಚೇರಿಗಳು, ನ್ಯಾಷನಲ್ ಸ್ಟಾಕ್​ ಎಕ್ಸ್​ಚೇಂಜ್ ಆಫ್ ಇಂಡಿಯಾ ಮತ್ತು ಬಾಂಬೆ ಸ್ಟಾಕ್​ ಎಕ್ಸ್​ಚೇಂಜ್​ನಂಥ ಅಧಿಕೃತ ಸ್ಟಾಕ್​ ಎಕ್ಸ್​ಚೇಂಜ್​ಗಳಲ್ಲಿ ಖರೀದಿ ಮಾಡಬಹುದು.

ಸವರನ್ ಗೋಲ್ಡ್ ಬಾಂಡ್ ವೈಶಿಷ್ಟ್ಯಗಳು
ಸವರನ್ ಗೋಲ್ಡ್ ಬಾಂಡ್ ದರ: ಸಬ್​ಸ್ಕ್ರಿಪ್ಷನ್​ಗೆ ಮುಂಚಿನ ವಾರದ ಮೂರು ದಿನಗಳ 999ರಷ್ಟು ಶುದ್ಧತೆಯ ಬಂಗಾರದ ಸರಳ ಸರಾಸರಿ ಕ್ಲೋಸಿಂಗ್ ಬೆಲೆಯನ್ನು ಗಣನೆಗೆ ತೆಗೆದುಕೊಳ್ಳಲಾಗುತ್ತದೆ. ಅಂದಹಾಗೆ ಇದಕ್ಕಾಗಿ ಇಂಡಿಯನ್ ಬುಲಿಯನ್ ಅಂಡ್ ಜ್ಯುವೆಲ್ಲರ್ಸ್ ಅಸೋಸಿಯೇಷನ್ ಲಿಮಿಟೆಡ್ ಪ್ರಕಟಿಸುವ ದರವನ್ನೇ ಗಣನೆಗೆ ತೆಗೆದುಕೊಳ್ಳಲಾಗುತ್ತದೆ.

SGB ವಿತರಣೆಗೆ ಆಧಾರ: ಸವರನ್​ ಗೋಲ್ಡ್ ಬಾಂಡ್​ಗಳನ್ನು ಚಿನ್ನದ ಗ್ರಾಮ್​ ಆಧಾರದಲ್ಲಿ ವಿತರಿಸಲಾಗುತ್ತದೆ. ಕನಿಷ್ಠ 1 ಗ್ರಾಮ್​ನೊಂದಿಗೆ ಶುರುವಾಗಿ, ಅದರ ಮೇಲೆ 1 ಗ್ರಾಮ್​ ಗುಣಕದಲ್ಲಿ ಹೆಚ್ಚುತ್ತಾ ಹೋಗುತ್ತದೆ.

SGB ಅವಧಿ: ಸವರನ್ ಗೋಲ್ಡ್ ಬಾಂಡ್ ಅವಧಿ 8 ವರ್ಷಗಳು. 5 ವರ್ಷಗಳ ನಂತರ ಮುಂದಿನ ಬಡ್ಡಿ ಪಾವತಿಯ ದಿನಾಂಕದ ಸಂದರ್ಭದಲ್ಲಿ ಹೊರ ಬರಬಹುದು.

ಕನಿಷ್ಠ ಹಾಗೂ ಗರಿಷ್ಠ ಮಿತಿ: ಕನಿಷ್ಠ ಹೂಡಿಕೆ 1 ಗ್ರಾಮ್ ಚಿನ್ನವಾದರೆ, ಗರಿಷ್ಠ ಮಿತಿ 4 ಕೇಜಿ. ಇದು ವೈಯಕ್ತಿಕ ಹೂಡಿಕೆದಾರರಿಗೆ ಇರುವ ಮಿತಿ.
ಹಿಂದೂ ಅವಿಭಕ್ತ ಕುಟುಂಬ- 4 ಕೇಜಿ
ಟ್ರಸ್ಟ್ ಮತ್ತು ಅದೇ ರೀತಿ ಸಂಸ್ಥೆಗಳಿಗೆ- 20 ಕೇಜಿ.
ಈ ಮಿತಿಯಲ್ಲಿ ಪ್ರಾಥಮಿಕವಾಗಿ ವಿವಿಧ ಕಂತಿನಲ್ಲಿ ವಿತರಿಸಿದ್ದು ಹಾಗೂ ಸೆಕೆಂಡರಿ ಮಾರುಕಟ್ಟೆಯಲ್ಲಿನ ಖರೀದಿ ಎರಡೂ ಒಳಗೊಂಡಿರುತ್ತದೆ.

ಇದನ್ನೂ ಓದಿ: Airtel Payments Bank: ಚಿನ್ನ ಖರೀದಿಗೆ ಡಿಜಿಗೋಲ್ಡ್ ಎಂಬ ಹೊಸ ಪ್ರಾಡಕ್ಟ್ ಆರಂಭಿಸಿದ ಏರ್​ಟೆಲ್​ ಪೇಮೆಂಟ್ ಬ್ಯಾಂಕ್