ಭಾರತದ ಸೆಮಿಕಂಡಕ್ಟರ್ ಮಹತ್ವಾಕಾಂಕ್ಷೆಗೆ ಇಸ್ರೇಲೀ ಶಕ್ತಿ; ಭಾರತದಲ್ಲಿ ಚಿಪ್ ಫ್ಯಾಕ್ಟರಿ ಸ್ಥಾಪಿಸಲು ಟವರ್ ಸೆಮಿಕಂಡಕ್ಟರ್ ಆಸಕ್ತಿ

ನವದೆಹಲಿ, ಅಕ್ಟೋಬರ್ 22: ಇಸ್ರೇಲೀ ಮೂಲದ ಟವರ್ ಸೆಮಿಕಂಡಕ್ಟರ್ ಕಂಪನಿ ಭಾರತದಲ್ಲಿ ಚಿಪ್ ತಯಾರಿಕಾ ಘಟಕ (semiconductor fab unit) ಸ್ಥಾಪಿಸಲು ಮತ್ತೆ ಆಸಕ್ತಿ ತೋರಿದೆ. ಭಾರತ ಸರ್ಕಾರ ಜಾರಿಗೆ ತಂದಿರುವ ಪಿಎಲ್​ಐ ಸ್ಕೀಮ್ ಅಡಿಯಲ್ಲಿ ಚಿಪ್ ತಯಾರಿಕೆಗೆ 10 ಬಿಲಿಯನ್ ಡಾಲರ್ ಮೀಸಲಿಡಲಾಗಿದೆ. ಈ ಸ್ಕೀಮ್ ಅನ್ನು ಬಳಸಲು ಟವರ್ ಸೆಮಿಕಂಡಕ್ಟರ್ ಆಸಕ್ತವಾಗಿದೆ. ಟವರ್ ಸೆಮಿಕಂಡಕ್ಟರ್ ಫ್ಯಾಬ್ರಿಕೇಶನ್ ತಯಾರಿಕೆಯಲ್ಲಿ ತೊಡಗಿರುವ ಕಂಪನಿ. ಭಾರತದಲ್ಲಿ ಅದರ ಪ್ರಸ್ತಾವಕ್ಕೆ ಅನುಮೋದನೆ ಸಿಕ್ಕಲ್ಲಿ ಭಾರತದಲ್ಲಿ ನಿಜವಾದ ಮೊದಲ ಸೆಮಿಕಂಡಕ್ಟರ್ ಫ್ಯಾಬ್ರಿಕೇಶನ್ ಘಟಕ ಸ್ಥಾಪನೆಯಾಗಲಿದೆ.

ಇಂಡಿಯನ್ ಎಕ್ಸ್​ಪ್ರೆಸ್ ಪತ್ರಿಕೆಯಲ್ಲಿ ಬಂದಿರುವ ವರದಿ ಪ್ರಕಾರ, ಭಾರತದ ಎಲೆಕ್ಟ್ರಾನಿಕ್ಸ್ ಮತ್ತು ಐಟಿ ಸಚಿವ ರಾಜೀವ್ ಚಂದ್ರಶೇಖರ್ ಅವರು ಟವರ್ ಸೆಮಿಕಂಡಕ್ಟರ್​ನ ಸಿಇಒ ರಸೆಲ್ ಸಿ ಎಲ್​ವ್ಯಾಂಗರ್ (Russel C Ellwanger) ಅವರನ್ನು ಮಾತುಕತೆಗೆ ಕರೆದಿರುವುದು ತಿಳಿದುಬಂದಿದೆ. ಕೆಲ ದಿನಗಳ ಹಿಂದಷ್ಟೇ ಇಸ್ರೇಲ್​ನ ರಾಯಭಾರಿ ನಾವೋರ್ ಗಿಲಾನ್ (Naor Gilon) ಮತ್ತು ರಸೆಲ್ ಎಲ್​ವ್ಯಾಂಗರ್ ಅವರಿಬ್ಬರನ್ನು ಸಚಿವರು ಭೇಟಿ ಮಾಡಿದ್ದರು. ಆಗ ನಡೆದ ಭೇಟಿಯ ನಂತರ ಮುಂದುವರಿದ ಭಾಗವಾಗಿ ಟವರ್ ಸೆಮಿಕಂಡಕ್ಟರ್ ಸಿಇಒ ಅವರನ್ನು ಸಚಿವ ರಾಜೀವ್ ಚಂದ್ರಶೇಖರ್ ಮಾತುಕತೆಗೆ ಆಹ್ವಾನಿಸಿರಬಹುದು ಎನ್ನಲಾಗಿದೆ.

ಇದನ್ನೂ ಓದಿ: Google Super App A: ಜನಸಾಮಾನ್ಯರಿಗಾಗಿ ಗೂಗಲ್ ಸೂಪರ್ ಆಪ್, ವಿಶೇಷತೆಗಳು ಹೀಗಿವೆ

ಅನಲಾಗ್ ಚಿಪ್​ಗಳನ್ನು ತಯಾರಿಸುವ ಟವರ್

ಇಸ್ರೇಲ್​ನ ಟವರ್ ಸೆಮಿಕಂಡಕ್ಟರ್ ವಿಶ್ವದ ಪ್ರಮುಖ ಸೆಮಿಕಂಡಕ್ಟರ್ ಮ್ಯಾನುಫ್ಯಾಕ್ಚರಿಂಗ್ ಕಂಪನಿಗಳಲ್ಲಿ ಒಂದು. ಹಳೆಯ ತಂತ್ರಜ್ಞಾನದಲ್ಲಿ ಅನಲಾಗ್ ಚಿಪ್​ಗಳನ್ನು ತಯಾರಿಸುವ ಒಂದು ಕಂಪನಿ. ಸೆಲ್ ಫೋನ್ ಮತ್ತಿತರ ಉತ್ಪನ್ನಗಳಿಗೆ ವಿದ್ಯುತ್ ನಿರ್ವಹಿಸುವ ಮತ್ತು ಸಿಗ್ನಲ್​ಗಳನ್ನು ಆ್ಯಂಪ್ಲಿಫೈ ಮಾಡುವಂತಹ ಕಾರ್ಯಗಳಿಗೆ ಈ ಅನಲಾಗ್ ಚಿಪ್​ಗಳನ್ನು ಬಳಸಲಾಗುತ್ತದೆ.

ಇಸ್ರೇಲ್, ಅಮೆರಿಕ ಮತ್ತು ಜಪಾನ್ ದೇಶಗಳಲ್ಲಿ ಟವರ್ ಸೆಮಿಕಂಡಕ್ಟರ್ ಕಂಪನಿ ಫ್ಯಾಬ್ ಘಟಕಗಳನ್ನು ಹೊಂದಿದೆ. ಭಾರತದಲ್ಲಿ ಇದು ಫ್ಯಾಕ್ಟರಿ ತೆರೆದರೆ ಬಹಳ ಗಮನಾರ್ಹ ಸಂಗತಿ ಎನಿಸಲಿದೆ.

ಇದನ್ನೂ ಓದಿ: Forex Reserves: ಅ. 13ರಂದು ಅಂತ್ಯಗೊಂಡ ವಾರದಲ್ಲಿ ಭಾರತದ ಫಾರೆಕ್ಸ್ ರಿಸರ್ವ್ಸ್ 585.89 ಬಿಲಿಯನ್ ಡಾಲರ್​ಗೆ ಏರಿಕೆ

ಭಾರತದಲ್ಲಿ ಇನ್ನೂ ಹೆಜ್ಜೆ ಊರದ ಸೆಮಿಕಂಡಕ್ಟರ್…!

ಡಿಜಿಟಲ್ ಜಗತ್ತಿನಲ್ಲಿ ಬಹಳ ಪ್ರಮುಖ ಪಾತ್ರ ಇರುವ ಸೆಮಿಕಂಡಕ್ಟರ್​ಗಳನ್ನು ತಯಾರಿಸಲು ಭಾರತ ಬಹಳ ಆಸಕ್ತವಾಗಿದೆ. ಚೀನಾ ಬಳಿಕ ವಿಶ್ವದ ಮ್ಯಾನುಫ್ಯಾಕ್ಚರಿಂಗ್ ಅಡ್ಡೆಯಾಗುವ ಆಸೆಯಲ್ಲಿರುವ ಭಾರತಕ್ಕೆ ಸೆಮಿಕಂಡಕ್ಟರ್ ತಯಾರಿಕಾ ಕ್ಷೇತ್ರ ಬಹಳ ಮುಖ್ಯ. ಫಾಕ್ಸ್​ಕಾನ್, ವೇದಾಂತ, ಮೈಕ್ರೋನ್, ಐಎಸ್​ಎಂಸಿ, ಟವರ್ ಮೊದಲಾದ ಕಂಪನಿಗಳು ಆಸಕ್ತಿ ತೋರಿವೆಯಾದರೂ ಇನ್ನೂ ಅದು ಸಾಕಾರಗೊಂಡಿಲ್ಲ. ಐಎಸ್​ಎಂಸಿ ಕರ್ನಾಟಕದಲ್ಲಿ ಸೆಮಿಕಂಡಕ್ಟರ್ ಫ್ಯಾಬ್ ಯೂನಿಟ್ ತೆರೆಯುವುದಾಗಿ ಹೇಳಿತ್ತು.

ಇವ್ಯಾವುವೂ ಕೂಡ ಸಾಕಾರಗೊಂಡಿಲ್ಲ. ಫಾಕ್ಸ್​ಕಾನ್ ಮತ್ತು ವೇದಾಂತ ಕಂಪನಿಗಳಿಗೆ ಫ್ಯಾಬ್ರಿಕೇಶನ್ ಅನುಭವ ಇಲ್ಲ. ಜಾಗತಿಕ ಸೆಮಿಕಂಡಕ್ಟರ್ ಫ್ಯಾಬ್ ಕಂಪನಿಗಳೊಂದಿಗೆ ಸಹಭಾಗಿತ್ವದಲ್ಲಿ ಭಾರತದಲ್ಲಿ ಸೆಮಿಕಂಡಕ್ಟರ್ ಫ್ಯಾಕ್ಟರಿ ಮಾಡಲು ಹೊರಟಿವೆ. ಆದರೆ, ಗ್ಲೋಬಲ್ ಪಾರ್ಟ್ನರ್​ಗಳು ಇನ್ನೂ ಸಿಕ್ಕಿಲ್ಲ.ಲ ಈ ಹಿನ್ನೆಲೆಯಲ್ಲಿ ಟವರ್ ಸೆಮಿಕಂಡಕ್ಟರ್ ಕಂಪನಿ ಭಾರತದಲ್ಲಿ ಫ್ಯಾಕ್ಟರಿ ಶುರು ಮಾಡಿದರೆ ಅದು ಪ್ರಮುಖ ಮೈಲಿಗಲ್ಲಾಗಲಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ