Yes Bank FD Rates: ಯೆಸ್ ಬ್ಯಾಂಕ್ ಎಫ್​ಡಿ ದರ ಪರಿಷ್ಕರಣೆ; ಹಿರಿಯ ನಾಗರಿಕರಿಗೆ ಶೇ 7.50ರ ವರೆಗೆ ಸಿಗಲಿದೆ ಬಡ್ಡಿ

ನವದೆಹಲಿ: 2 ಕೋಟಿ ರೂ.ಗಿಂತ ಕಡಿಮೆ ಮೊತ್ತದ ಸ್ಥಿರ ಠೇವಣಿ ದರವನ್ನು (FD Rates) ಯೆಸ್ ಬ್ಯಾಂಕ್ (Yes Bank) ಪರಿಷ್ಕರಣೆ ಮಾಡಿದ್ದು, ಡಿಸೆಂಬರ್ 5ರಿಂದಲೇ ಅಸ್ತಿತ್ವಕ್ಕೆ ಬಂದಿದೆ. ಇದರೊಂದಿಗೆ ಹಿರಿಯ ನಾಗರಿಕರು ಶೇಕಡಾ 7.50ರ ವರೆಗೂ ಬಡ್ಡಿ ಪಡೆಯಬಹುದಾಗಿದೆ. 7 ದಿನಗಳಿಂದ 10 ವರ್ಷಗಳ ಅವಧಿಯ ಎಫ್​​ಡಿ ಪರಿಷ್ಕೃತ ಬಡ್ಡಿ ದರ ಶೇಕಡಾ 3.25ರಿಂದ 7ರ ವರೆಗೆ ಇದೆ.

7ರಿಂದ 14 ದಿನಗಳ ಅವಧಿಯ ಎಫ್​ಡಿಗೆ ಬ್ಯಾಂಕ್ ಶೇಕಡಾ 3.25ರ ಬಡ್ಡಿ ನಿಗದಿಪಡಿಸಿದೆ. 15ರಿಂದ 45 ದಿನಗಳ ಅವಧಿಯ ಎಫ್​ಡಿ ಬಡ್ಡಿ ದರವನ್ನು ಶೇಕಡಾ 3.70ಕ್ಕೆ ಹೆಚ್ಚಿಸಿದೆ. 46ರಿಂದ 90 ದಿನಗಳ ಅವಧಿಯ ಎಫ್​ಡಿಗೆ ಶೇಕಡಾ 4.10 ಹಾಗೂ 91 ದಿನಗಳಿಂದ 180 ದಿನಗಳ ಅವಧಿಯ ಎಫ್​​ಡಿಗೆ ಶೇಕಡಾ 4.75ರ ಬಡ್ಡಿ ನಿಗದಿಪಡಿಸಿದೆ. 181ರಿಂದ 271 ದಿನಗಳ ಅವಧಿಯಲ್ಲಿ ಮೆಚ್ಯೂರ್ ಆಗುವ ಎಫ್​ಡಿಗೆ ಶೇಕಡಾ 5.50 ಹಾಗೂ 272 ದಿನಗಳಿಂದ ಒಂದು ವರ್ಷದ ಒಳಗಿನ ಅವಧಿಯ ಎಫ್​ಡಿಗೆ ಶೇಕಡಾ 5.75ರ ಬಡ್ಡಿ ನಿಗದಿಪಡಿಸಿದೆ.

1 ವರ್ಷದಿಂದ 20 ತಿಂಗಳ ನಡುವಣ ಅವಧಿಯ ಮತ್ತು 22 ತಿಂಗಳುಗಳಿಂದ 36 ತಿಂಗಳ ಒಳಗಿನ ಅವಧಿಯ ಎಫ್​ಡಿಗೆ ಶೇಕಡಾ 7ರ ಬಡ್ಡಿ ನಿಗದಿಪಡಿಸಿದೆ. 36 ತಿಂಗಳು ಮೇಲ್ಪಟ್ಟ ಹಾಗೂ 120 ತಿಂಗಳ ಒಳಗಿನ ಅವಧಿಯ ಎಫ್​ಡಿಗೆ ಶೇಕಡಾ 6.75ರ ಬಡ್ಡಿ ದೊರೆಯಲಿದೆ.

ಇದನ್ನೂ ಓದಿ: RBI MPC Meeting: ಆರ್​ಬಿಐ ಹಣಕಾಸು ನೀತಿ ಸಭೆ; ಸಾಲದ ಬಡ್ಡಿ ದರ ಹೆಚ್ಚಳದ ಆತಂಕದಲ್ಲಿ ಗ್ರಾಹಕರು

ಹಿರಿಯ ನಾಗರಿಕರ ವಿವಿಧ ಎಫ್​ಡಿಗೆ ಶೇಕಡಾ 3.75ರಿಂದ ತೊಡಗಿ ಶೇಕಡಾ 7.50 ವರೆಗೂ ಬಡ್ಡಿ ದೊರೆಯಲಿದೆ.

ಅಕ್ಟೋಬರ್​​ನಲ್ಲಿ ವಿಶೇಷ ಎಫ್​ಡಿ ಆರಂಭಿಸಿದ್ದ ಯೆಸ್ ಬ್ಯಾಂಕ್

20 ತಿಂಗಳುಗಳಿಂದ 22 ತಿಂಗಳ ಒಳಗಿನ ವಿಶೇಷ ಎಫ್​ಡಿ ಯೋಜನೆಯನ್ನು ಅಕ್ಟೋಬರ್​ನಲ್ಲಿ ಯೆಸ್ ಬ್ಯಾಂಕ್ ಆರಂಭಿಸಿತ್ತು. ಈ ಎಫ್​ಡಿಗೆ ಸಾಮಾನ್ಯ ಗ್ರಾಹಕರಿಗೆ ಶೇಕಡಾ 7.25 ಹಾಗೂ ಹಿರಿಯ ನಾಗರಿಕರಿಗೆ ಶೇಕಡಾ 7.75ರ ಬಡ್ಡಿ ನೀಡಲಾಗುತ್ತಿದೆ.

ಎಸ್​​ಬಿಐ, ಐಸಿಐಸಿಐ ಸೇರಿದಂತೆ ಅನೇಕ ಬ್ಯಾಂಕ್​ಗಳು ಇತ್ತೀಚೆಗೆ ಎಫ್​ಡಿ ಸೇರಿದಂತೆ ವಿವಿಧ ಠೇವಣಿಗಳು ಮತ್ತು ಸಾಲದ ಮೇಲಿನ ಬಡ್ಡಿ ದರವನ್ನು ಹೆಚ್ಚಿಸಿವೆ. ಆರ್​ಬಿಐ ರೆಪೊ ದರ ಮೇ ನಂತರ ಸೆಪ್ಟೆಂಬರ್ ವರೆಗೆ 190 ಮೂಲಾಂಶ ಹೆಚ್ಚಳವಾಗಿದ್ದು, ಅದರ ಪ್ರಯೋಜನವನ್ನು ತುಸು ಮಟ್ಟಿಗೆ ಬ್ಯಾಂಕ್​ಗಳು ಗ್ರಾಹಕರಿಗೆ ತಲುಪಿಸಲು ಮುಂದಾಗಿವೆ. ಆರ್​ಬಿಐ ಹಣಕಾಸು ನೀತಿ ಸಭೆ ಸೋಮವಾರದಿಂದ ಆರಂಭವಾಗಿದ್ದು, ಬುಧವಾರ ನೀತಿ ಪ್ರಕಟವಾಗಲಿದೆ. ಮತ್ತೆ ರೆಪೊ ದರ ಹೆಚ್ಚಿಸುವ ಸಾಧ್ಯತೆ ಇದೆ ಎನ್ನಲಾಗಿದ್ದು, ಒಂದು ವೇಳೆ ಹೆಚ್ಚಳವಾದಲ್ಲಿ ಮರಳಿ ಬ್ಯಾಂಕ್​​ಗಳು ಸಾಲ ಹಾಗೂ ಠೇವಣಿಗಳ ಬಡ್ಡಿ ದರ ಹೆಚ್ಚಿಸಬಹುದು.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ