Crime News: ಕುಡಿದ ಮತ್ತಿನಲ್ಲಿ ವಾಹನ ಕದಿಯುತ್ತಿದ್ದವರ ಬಂಧನ, ಕರೆಂಟ್ ಶಾಕ್ಗೆ ದಂಪತಿ ಸಾವು
ಮನೆಗೆ ವಿದ್ಯುತ್ ಪೂರೈಸುವ ವೈರ್ ಗ್ರೌಂಡ್ ಆಗಿದ್ದರಿಂದ ದುರಂತ ಸಂಭವಿಸಿದೆ. ಪತಿಯನ್ನು ಉಳಿಸಲು ಹೋದ ಪತ್ನಿಯೂ ಸ್ಥಳದಲ್ಲಿಯೇ ಮೃತಪಟ್ಟಿದ್ದಾರೆ.
Updated on:Aug 14, 2022 | 10:35 AM
ಚಾಮರಾಜನಗರ: ದೇವಾಲಯ ಹುಂಡಿ ಕಳವು ಮಾಡಲು ಯತ್ನಿಸಿದ ಇಬ್ಬರು ಕಳ್ಳರನ್ನು ಗ್ರಾಮಸ್ಥರೇ ಹಿಡಿದು ಪೊಲೀಸರಿಗೆ ಒಪ್ಪಿಸಿದ ಘಟನೆ ಹನೂರು ತಾಲ್ಲೂಕಿನ ಎಂ.ಜಿ.ದೊಡ್ಡಿ ಗ್ರಾಮದಲ್ಲಿ ನಡೆದಿದೆ. ಗ್ರಾಮದ ಬಾಲಮುರುಗ ದೇವಾಲಯದ ಹುಂಡಿ ಒಡೆಯಲು ಯತ್ನಿಸುತ್ತಿದ್ದ ವಲ್ಲರಸು ಹಾಗೂ ಲೋಕೇಶ್ ಎಂಬುವರರನ್ನು ಗ್ರಾಮಸ್ಥರು ಹಿಡಿದು ಪೊಲೀಸರಿಗೆ ಒಪ್ಪಿಸಿದ್ದಾರೆ. ವಾರದ ಹಿಂದೆ ಸಮೀಪದ ಕೌದಳ್ಳಿಯ ದೇವಾಲಯದಲ್ಲಿ ಕಳ್ಳತನವಾಗಿತ್ತು. ಇದೀಗ ಅದೇ ಮಾದರಿಯಲ್ಲಿ ಎಂ.ಜಿ.ದೊಡ್ಡಿ ಗ್ರಾಮದಲ್ಲಿಯೂ ಕಳುವು ಮಾಡುವ ಪ್ರಯತ್ನ ನಡೆಯುತ್ತಿತ್ತು. ರಾಮಾಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಉರುಸ್ ವೇಳೆ ಕ್ಷುಲ್ಲಕ ಕಾರಣಕ್ಕೆ ಹಲ್ಲೆ ಮಾಡಿದ್ದವರ ಬಂಧನ
ತುಮಕೂರು: ಕ್ಷುಲ್ಲಕ ವಿಚಾರಕ್ಕೆ ನಾಲ್ವರ ಮೇಲೆ ಹಲ್ಲೆಗೈದಿದ್ದ ಆರೋಪಿಗಳಾದ ಎಜಾಜ್, ಅರಬಾಜ್, ನೂರ್ ಮೊಹಮ್ಮದ್, ತೌಫಿಕ್ ಖಾನ್, ನಯಾಜ್ ಖಾನ್ ಅವರನ್ನು ಕೊರಟಗೆರೆ ಪೊಲೀಸರು ಬಂಧಿಸಿದ್ದರು. ಅಕ್ಕಿರಾಂಪುರದಲ್ಲಿ ಉರುಸ್ ನಡೆಯುತ್ತಿದ್ದ ವೇಳೆ ಕುಡಿದ ಮತ್ತಿನಲ್ಲಿ ಸ್ಥಳೀಯರ ಜೊತೆ ಇವರು ಗಲಾಟೆ ಮಾಡಿಕೊಂಡಿದ್ದರು. ಬಂಧಿತರೆಲ್ಲರೂ ಗೌರಿಬಿದನೂರು ಮೂಲದವರು. ಕೊರಟಗೆರೆ ನಿವಾಸಿಗಳಾದ ಹಂಜಾ, ಸಿದ್ದಿಕ್, ಫಕ್ರುದ್ದಿನ್, ರೆಹಮಾನ್ ಪಾಷಾ ಅವರ ಮೇಲೆ ಮಾರಕಾಸ್ತ್ರಗಳಿಂದ ಹಲ್ಲೆಗೈದಿದ್ದರು. ಈ ಸಂಬಂಧ ಕೊರಟಗೆರೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.
ಕುಡಿದು ಕದಿಯುತ್ತಿದ್ದವರ ಬಂಧನ
ಬೆಂಗಳೂರು: ಕುಡಿದ ಮತ್ತಿನಲ್ಲಿ ಬೈಕು, ಕಾರು, ಆಟೊ ಸೇರಿದಂತೆ ಹಲವಾರು ಬಗೆಯ ವಾಹನಗಳನ್ನು ಕ್ಷಣಮಾತ್ರದಲ್ಲಿ ಕದ್ದು ಪರಾರಿಯಾಗುತ್ತಿದ್ದವರನ್ನು ಹುಳಿಮಾವು ಪೊಲೀಸರು ಬಂಧಿಸಿದ್ದಾರೆ. ಕದ್ದ ವಾಹನದ ನಂಬರ್ ಪ್ಲೇಟ್ ಬದಲಿಸುತ್ತಿದ್ದ ಆರೋಪಿಗಳು ಸಿಕ್ಕಷ್ಟು ಹಣಕ್ಕೆ ಮಾರುತ್ತಿದ್ದರು. ನದೀಂ ಅಹಮದ್ ಹಾಗೂ ಗುಲಾಂ ಹುಸೇನ್ ಬಂಧಿತ ಆರೋಪಿಗಳು. ಮದ್ಯದ ನಶೆಯಲ್ಲಿ ಯಾವ ವಾಹನ ಕಂಡರೂ ಕ್ಷಣಮಾತ್ರದಲ್ಲಿ ಎಗರಿಸುತ್ತಿದ್ದರು. ಎಲೆಕ್ಟ್ರಾನಿಕ್ ಸಿಟಿ, ಬನ್ನೇರುಘಟ್ಟ, ಹುಳಿಮಾವು, ಚಂದ್ರಾಲೇಔಟ್ ವ್ಯಾಪ್ತಿಯಲ್ಲಿ ಇವರು ಕಳ್ಳತನ ಮಾಡಿದ್ದರು. ಬಂಧಿತರಿಂದ 2 ಆಟೊ, ಒಂದು ಕಾರು ಮತ್ತು 6 ಬೈಕ್ಗಳನ್ನು ವಶಪಡಿಸಿಕೊಂಡಿದ್ದಾರೆ. ಹಿಂದೊಮ್ಮೆ ಇವರು ಜೈಲಿಗೆ ಹೋಗಿ ಬಂದಿದ್ದರು. ಆದರೆ ಹಿಂದುರುಗಿದ ನಂತರ ಮತ್ತೆ ಅದೇ ಕೃತ್ಯ ಮುಂದುವರೆಸಿದ್ದರು. ಮತ್ತೋರ್ವ ಆರೋಪಿಗಾಗಿ ಪೊಲೀಸರು ಶೋಧ ಮುಂದುವರಿಸಿದ್ದಾರೆ.
ಕರೆಂಟ್ ಶಾಕ್: ದಂಪತಿ ಸಾವು
ದಾವಣಗೆರೆ: ಕರೆಂಟ್ ಶಾಕ್ನಿಂದ ದಂಪತಿ ಸ್ಥಳದಲ್ಲಿಯೇ ಮೃತಪಟ್ಟಿರುವ ಘಟನೆ ದಾವಣಗೆರೆ ತಾಲೂಕಿನ ಬಾವಿಯಾಳು ಗ್ರಾಮದಲ್ಲಿ ನಡೆದಿದೆ. ರವಿಶಂಕರ್ (40) ಮತ್ತು ವೀಣಾ (28) ಮೃತರು. ಮನೆಗೆ ವಿದ್ಯುತ್ ಪೂರೈಸುವ ವೈರ್ ಗ್ರೌಂಡ್ ಆಗಿದ್ದರಿಂದ ದುರಂತ ಸಂಭವಿಸಿದೆ. ತಂತಿ ಮೇಲೆ ಒಣ ಹಾಕಿದ್ದ ಬಟ್ಟೆ ತೆಗೆಯುತ್ತಿದ್ದಾಗ ರವಿಶಂಕರ್ ಅವರಿಗೆ ಕರೆಂಟ್ ಶಾಕ್ ಹೊಡೆದಿದೆ. ಪತಿಯನ್ನು ಕಾಪಾಡಲು ಹೋದ ಪತ್ನಿ ವೀಣಾ ಕೂಡ ಮೃತಪಟ್ಟರು. ಘಟನಾ ಸ್ಥಳಕ್ಕೆ ಮಾಯಕೊಂಡ ಪೊಲೀಸರ ಭೇಟಿ ನೀಡಿ, ಪರಿಶೀಲಿಸಿದರು.
Published On - 10:35 am, Sun, 14 August 22
