ಲಾಕ್​ಡೌನ್​ ಇದ್ದರೂ.. ಓಪನ್ ಥಿಯೇಟರ್​ನಲ್ಲಿ Drugs ಮಾರಾಟ: ಇದು A3 ಕೈಚಳಕ!

ಬೆಂಗಳೂರು: ಸ್ಯಾಂಡಲ್‌ವುಡ್‌ಗೆ ಡ್ರಗ್ಸ್ ಜಾಲದ ನಂಟು ಆರೋಪ ಕೇಸ್​ಗೆ ಸಂಬಂಧಿಸಿದಂತೆ ಪ್ರಕರಣದಲ್ಲಿ ಶಾಮೀಲಾಗಿದ್ದ ದೊಡ್ಡ ದೊಡ್ಡ ಕುಳಗಳ ಬಗ್ಗೆ ಮತ್ತಷ್ಟು ಮಾಹಿತಿ ಹೊರಬೀಳುತ್ತಿದೆ.

ಇದೀಗ, ಪ್ರಕರಣದಲ್ಲಿ A3 ಆರೋಪಿಯಾಗಿರುವ ವೀರೇನ್​ ಖನ್ನಾ ಡ್ರಗ್ಸ್​ ಸೇವಿಸಿ ಮಜಾ ಮಾಡಲು ಓಪನ್ ಏರ್ ಥಿಯೇಟರ್ ಪಾರ್ಟಿ ಸಹ ಆಯೋಜಿಸ್ತಿದ್ದ ಎಂದು ತಿಳಿದುಬಂದಿದೆ. ಅಚ್ಚರಿಯ ಸಂಗತಿಯೆಂದರೆ, ಕೊರೊನಾ ಲಾಕ್​ಡೌನ್​ ಸಮಯದಲ್ಲಿ ಎಲ್ಲಾ ಥಿಯೇಟರ್​ಗಳು ಬಂದ್​ ಆಗಿದ್ದರೂ ಈತ ಓಪನ್ ಥಿಯೇಟರ್ ಪಾರ್ಟಿ ಆಯೋಜನೆ ಮಾಡಿದ್ದನಂತೆ.

ಕಾರಿನಲ್ಲೇ ಕೂತು ಓಪನ್ ಥಿಯೇಟರ್​ನಲ್ಲಿ ಸಿನಿಮಾ ವೀಕ್ಷಣೆ ಮಾಡುವ ಅವಕಾಶ ಕಲ್ಪಿಸಿದ್ದ ವೀರೇನ್ ಖನ್ನಾ ಈ ವೇಳೆಯಲ್ಲಿ ಡ್ರಗ್ಸ್ ಸಪ್ಲೈ ಮಾಡಿರುವ ಗುಮಾನಿ ವ್ಯಕ್ತವಾಗಿದೆ. ಕಾರಲ್ಲೇ ಕೂತು ಬಾಲಿವುಡ್ ಮತ್ತು ಹಾಲಿವುಡ್ ಚಿತ್ರಗಳ ವೀಕ್ಷಣೆ ಮಾಡುವ ಕಾರ್ಯಕ್ರಮ ಆಯೋಜಿಸುತ್ತಿದ್ದ ವೀರೇನ್​ 369drivein.com ಅನ್ನೋ ವೆಬ್​ಸೈಟ್​ನಲ್ಲಿ ಜನರಿಗೆ ಗಾಳ ಹಾಕ್ತಿದ್ದ ಎಂಬ ಮಾಹಿತಿ ದೊರೆತಿದೆ.

ಜುಲೈ 9 ಮತ್ತು 11ರಂದು ಸರ್ಜಾಪುರದಲ್ಲಿ ಆಯೋಜನೆ ಮಾಡಿದ್ದ ಈ ಓಪನ್ ಏರ್ ಥಿಯೇಟರ್ ಪ್ರೋಗ್ರಾಮ್​ನಲ್ಲಿ ಟೇಕ್ ಯುವರ್ ಓನ್​ ಕಾರ್, ಓನ್​ ಡ್ರಿಂಕ್ ಕಾನ್ಸೆಪ್ಟ್ ಅಡಿಯಲ್ಲಿ ಕಾರ್ಯಕ್ರಮ ನಡೆಸಿದ್ದನಂತೆ. ಜೊತೆಗೆ, ಫ್ಯಾಮಿಲಿ ಪಾರ್ಟಿ ಹೆಸರಲ್ಲಿ Drugs ಪಾರ್ಟಿ ಸಹ ನಡೆದ ಬಗ್ಗೆ ಮಾಹಿತಿ ಲಭ್ಯವಾಗಿದೆ.

ವೀರೇನ್ ಖನ್ನಾ ವಿರುದ್ಧ ವಾಣಿಜ್ಯ ಮಂಡಳಿ ದೂರು ಹೀಗೆ, ಲಾಕ್​ಡೌನ್ ವೇಳೆ ಓಪನ್ ಏರ್ ಥಿಯೇಟರ್​ನಲ್ಲಿ ರಾಜಾರೋಷವಾಗಿ ಚಿತ್ರ ಪ್ರದರ್ಶನ ನಡೆಸಿದ್ದ ಹಿನ್ನೆಲೆಯಲ್ಲಿ ವೀರೇನ್ ಖನ್ನಾ ವಿರುದ್ಧ ಚಲನಚಿತ್ರ ವಾಣಿಜ್ಯ ಮಂಡಳಿ ದೂರು ದಾಖಲಿಸಿತ್ತು. ಬೆಂಗಳೂರು ಗ್ರಾಮೀಣ ವಿಭಾಗದ ಡಿಸಿ ಹಾಗೂ ಗೃಹ ಇಲಾಖೆಗೆ ಮಂಡಳಿ ಸದಸ್ಯರು ಮತ್ತು ಪ್ರದರ್ಶಕರ ವಲಯದಿಂದ ದೂರು ನೀಡಲಾಗಿತ್ತು.

ಸ್ಟಪಿನ್ ಸ್ಪೋರ್ಟ್ಸ್​ ಇವೆಂಟ್ ಕಂಪನಿಯಿಂದ ಈ ಕಾರ್ಯಕ್ರಮ ಆಯೋಜನೆ ಮಾಡಲಾಗಿತ್ತು ಎಂದು ತಿಳಿದುಬಂದಿದ್ದು ಥೀಯೇಟರ್ ನಡೆಸಲು ಅವಕಾಶ ಇರದಿದ್ರು ಕೂಡ ಈ ಆಯೋಜನೆ ಹೇಗೆ ನಡೆಯಿತು ಅನ್ನೋ ಪ್ರಶ್ನೆ ಇದೀಗ ಶುರುವಾಗಿದೆ. ಹೀಗಾಗಿ, ಪ್ರಭಾವಿಗಳ ಬೆಂಬಲದಿಂದಲೂ ವೀರೇನ್ ಖನ್ನಾ ಈ ರೀತಿ ಇವೆಂಟ್ ಆಯೋಜನೆ ಮಾಡ್ತಿದ್ರು ಅನ್ನೋ ಮಾಹಿತಿ ಬಹಿರಂಗವಾಗಿದೆ.

Published On - 2:53 pm, Mon, 7 September 20