NEET ಫಲಿತಾಂಶ 2021: ಕಟ್ ಆಫ್ ಮಾರ್ಕ್, ಲಿಂಗ ಮತ್ತು ಜಾತಿ ಆಧಾರಿತ ವರ್ಗೀಕರಣ ಹೇಗಿದೆ?

NEET Results 2021 | ಭಾರತದಾದ್ಯಂತ ಕಾಲೇಜುಗಳಲ್ಲಿ ಪದವಿಪೂರ್ವ ವೈದ್ಯಕೀಯ ಸೀಟುಗಳ ಹೆಬ್ಬಾಗಿಲು ರಾಷ್ಟ್ರೀಯ ಅರ್ಹತೆ ಮತ್ತು ಪ್ರವೇಶ ಪರೀಕ್ಷೆ (NEET) ಫಲಿತಾಂಶಗಳನ್ನು ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (NTA) ಸೋಮವಾರ ತಡರಾತ್ರಿ ಪ್ರಕಟಿಸಿದೆ. ಮರುಪರೀಕ್ಷೆಗಾಗಿ ಇಬ್ಬರು ವಿದ್ಯಾರ್ಥಿಗಳು ಸಲ್ಲಿಸಿದ ಅರ್ಜಿಯ ಆಧಾರದ ಮೇಲೆ ಬಾಂಬೆ ಹೈಕೋರ್ಟ್ ತಡೆಯಾಜ್ಞೆ ನೀಡಿದ ಕಾರಣ ಫಲಿತಾಂಶವು ವಿಳಂಬವಾಯಿತು. ಆದಾಗ್ಯೂ, ಸುಪ್ರೀಂ ಕೋರ್ಟ್ ಅಕ್ಟೋಬರ್ 28 ರಂದು ತಡೆಯಾಜ್ಞೆಯನ್ನು ತೆಗೆದುಹಾಕಿತು. ಇದು ಸೆಪ್ಟೆಂಬರ್ 12 ರಂದು ಪರೀಕ್ಷೆಯನ್ನು ತೆಗೆದುಕೊಂಡ 16 ಲಕ್ಷಕ್ಕೂ ಹೆಚ್ಚು ಆಕಾಂಕ್ಷಿಗಳ ದೀರ್ಘ ಕಾಯುವಿಕೆಯನ್ನು ಕೊನೆಗೊಳಿಸಿದೆ. ಇನ್ನು ತಮಿಳುನಾಡಿನ ವಿಚಾರಕ್ಕೆ ಬಂದರೆ ಮುಖ್ಯಮಂತ್ರಿ  ಎಂ.ಕೆ.ಸ್ಟಾಲಿನ್  ನೇತೃತ್ವದ ಸರ್ಕಾರ ನೀಟ್‌ ಅನ್ನು ತೆಗೆದು ಹಾಕುವ ಕಾಯ್ದೆಯನ್ನುಇತ್ತೀಚೆಗೆ  ವಿಧಾನಸಭೆಯಲ್ಲಿ ಮಂಡಿಸಿತ್ತು.

ತಮಿಳುನಾಡಿನಲ್ಲಿ ನೀಟ್‌ನ ಪರಿಣಾಮ ಕಂಡುಹಿಡಿಯಲು ಅಲ್ಲಿನ ಸರ್ಕಾರ ರಚಿಸಿದ್ದ ನ್ಯಾಯಮೂರ್ತಿ ಎ.ಕೆ. ರಾಜನ್ ಸಮಿತಿಯು ಜುಲೈನಲ್ಲಿ ವರದಿಯೊಂದನ್ನು ಸಲ್ಲಿಸಿತ್ತು. ನೀಟ್‌ ತಮಿಳುನಾಡನ್ನು ಸ್ವಾತಂತ್ರ್ಯ ಪೂರ್ವ ಕಾಲಕ್ಕೆ ಕೊಂಡೊಯ್ಯುವುದಾಗಿ  ಈ  ಸಮಿತಿ ಅಭಿಪ್ರಾಯ ಪಟ್ಟಿತ್ತು. ಅಗತ್ಯವಿರುವ ಕಾನೂನು ಮತ್ತು ಶಾಸಕಾಂಗ ಕಾರ್ಯವಿಧಾನಗಳನ್ನು ಅನುಸರಿಸಿ ಸರ್ಕಾರವು ಅದನ್ನು ಎಲ್ಲಾ ಹಂತಗಳಲ್ಲಿಯೂ ತೊಡೆದುಹಾಕಬೇಕು ಎಂದು ಸಲಹೆ ನೀಡಿತ್ತು. ಅಷ್ಟೇ ಅಲ್ಲದೆ  ನೀಟ್  ಅನ್ನು ತೆಗೆದುಹಾಕುವ ಅಗತ್ಯವನ್ನು ಸೂಚಿಸುವ ಒಂದು ಕಾಯಿದೆಯನ್ನು ಅಂಗೀಕರಿಸಬಹುದು, ಅದಕ್ಕೆ ರಾಷ್ಟ್ರಪತಿಗಳ ಒಪ್ಪಿಗೆ ಪಡೆಯಬಹುದು ಎಂದು ಸೂಚಿಸಿತ್ತು. ಈ ಆಧಾರದಲ್ಲಿ ತಮಿಳುನಾಡು  ಸರ್ಕಾರವು ನೀಟ್‌ ಅನ್ನು ತೆಗೆದು ಹಾಕುವ ಕಾಯ್ದೆಯನ್ನು  ಮಂಡಿಸಿತ್ತು. ಇದಾದ ನಂತರ, ನೀಟ್‌ ವಿರೋಧಿಸಲು  ಸ್ಟಾಲಿನ್ ಅವರು ಬಿಜೆಪಿಯೇತರ ಆಡಳಿತವಿರುವ 11 ರಾಜ್ಯಗಳು ಮತ್ತು ಗೋವಾದ ಮುಖ್ಯಮಂತ್ರಿಗಳಿಗೆ ಪತ್ರ ಬರೆದಿದ್ದರು.

ನೀಟ್ ಅನ್ನು ಪರಿಚಯಿಸುವ ಕೇಂದ್ರ ಸರ್ಕಾರದ ಕ್ರಮವು ಫೆಡರಲಿಸಂನ ಮನೋಭಾವಕ್ಕೆ ವಿರುದ್ಧವಾಗಿದೆ ಮತ್ತು ಸ್ಥಾಪಿಸಲಾದ ವೈದ್ಯಕೀಯ ಸಂಸ್ಥೆಗಳಲ್ಲಿ ಪ್ರವೇಶದ ವಿಧಾನವನ್ನು ನಿರ್ಧರಿಸುವ ರಾಜ್ಯ ಸರ್ಕಾರಗಳ ಹಕ್ಕುಗಳನ್ನು ನಿರ್ಬಂಧಿಸುವ ಮೂಲಕ ಸಂವಿಧಾನಾತ್ಮಕ ಅಧಿಕಾರದ ಸಮತೋಲನವನ್ನು ಉಲ್ಲಂಘಿಸುತ್ತದೆ.  ರಾಜ್ಯ ಸರ್ಕಾರಗಳು ತಮ್ಮ ಉನ್ನತ ಶಿಕ್ಷಣ ಸಂಸ್ಥೆಗಳಿಗೆ ಪ್ರವೇಶದ ವಿಧಾನವನ್ನು ನಿರ್ಧರಿಸುವಲ್ಲಿ ತಮ್ಮ ಸಾಂವಿಧಾನಿಕ ಹಕ್ಕು ಮತ್ತು ಸ್ಥಾನವನ್ನು ಪ್ರತಿಪಾದಿಸಬೇಕಾಗಿದೆ ಎಂದು ಸ್ಟಾಲಿನ್ ಹೇಳಿದ್ದರು.

ದೇಶದ ಅತ್ಯಂತ ಪ್ರತಿಷ್ಠಿತ ಪ್ರತ್ಯೇಕ ವೈದ್ಯಕೀಯ ಸಂಸ್ಥೆ AIIMS (ಅಖಿಲ ಭಾರತ ವೈದ್ಯಕೀಯ ವಿಜ್ಞಾನ ಸಂಸ್ಥೆ) ನಡೆಸುತ್ತಿದ್ದ ಅರ್ಹತಾ ಪರೀಕ್ಷೆ ಸೇರಿದಂತೆ, ಅಖಿಲ ಭಾರತ ಪೂರ್ವ ವೈದ್ಯಕೀಯ ಪರೀಕ್ಷೆ (AIPMT) ಮತ್ತು ಕೇಂದ್ರ ಮತ್ತು ರಾಜ್ಯ ಮಟ್ಟದಲ್ಲಿ ಈ ಹಿಂದೆ ನಡೆಸಲಾಗಿದ್ದ ಇತರ ಪ್ರವೇಶ ಪರೀಕ್ಷೆಗಳನ್ನು ನೀಟ್ ಬದಲಿಸಿದೆ.

ಈ ವರ್ಷ ಎಷ್ಟು ಅಭ್ಯರ್ಥಿಗಳು NEET-UG ಅರ್ಹತೆ ಪಡೆದಿದ್ದಾರೆ?
ಪದವಿಪೂರ್ವ ವೈದ್ಯಕೀಯ ಕೋರ್ಸ್‌ಗಳ ಪ್ರವೇಶಕ್ಕಾಗಿ ಒಟ್ಟು 8,70,074 ಅಭ್ಯರ್ಥಿಗಳು ತೇರ್ಗಡೆಯಾಗಿದ್ದಾರೆ. 1,614,777 ನೋಂದಾಯಿತ ಅಭ್ಯರ್ಥಿಗಳ ಪೈಕಿ 1,544,275 ವಿದ್ಯಾರ್ಥಿಗಳು ಪರೀಕ್ಷೆ ಬರೆದಿದ್ದಾರೆ. 2020 ಕ್ಕೆ ಹೋಲಿಸಿದರೆ, ಈ ವರ್ಷ 1.77 ಲಕ್ಷ ಹೆಚ್ಚು ಅಭ್ಯರ್ಥಿಗಳು ಪರೀಕ್ಷೆ ಬರೆದಿದ್ದಾರೆ. ಅಲ್ಲದೆ, 2019 ಮತ್ತು 2020 ಕ್ಕೆ ಹೋಲಿಸಿದರೆ ಈ ವರ್ಷ ಹೆಚ್ಚಿನ ಅಭ್ಯರ್ಥಿಗಳು ನೋಂದಾಯಿಸಿಕೊಂಡಿದ್ದಾರೆ. ಅಂದರೆ ಅನುಕ್ರಮವಾಗಿ 1,519,375 ಮತ್ತು 1,597,435 ಅಭ್ಯರ್ಥಿಗಳು ನೋಂದಾಯಿಸಿದ್ದರು. ತಪ್ಪು ಮಾರ್ಗ ಅನುಸರಿಸಿದ 15 ಅಭ್ಯರ್ಥಿಗಳ ಫಲಿತಾಂಶವನ್ನು ರದ್ದುಗೊಳಿಸಲಾಗಿದೆ.

ಲಿಂಗವಾರು ಮತ್ತು ಜಾತಿವಾರು ವರ್ಗೀಕರಣ
ಹಿಂದಿನ ವರ್ಷಗಳ ಟ್ರೆಂಡ್ ನೋಡಿದರೆ ಪುರುಷರಿಗಿಂತ ಹೆಚ್ಚಿನ ಮಹಿಳಾ ಅಭ್ಯರ್ಥಿಗಳು ನೀಟ್‌ಗೆ ಅರ್ಹತೆ ಪಡೆದಿದ್ದಾರೆ. ಒಟ್ಟು ಅರ್ಹತೆ ಪಡೆದ ಅಭ್ಯರ್ಥಿಗಳಲ್ಲಿ ಮಹಿಳೆಯರು ಶೇ 56.8 ರಷ್ಟಿದ್ದು, ಕಳೆದ ವರ್ಷ ಶೇ 55.46 ರಷ್ಟಿತ್ತು. ಯಶಸ್ವಿ ಅಭ್ಯರ್ಥಿಗಳಲ್ಲಿ ಮಹಿಳೆಯರ ಪಾಲು 2019 ರಲ್ಲಿ ಶೇಕಡಾ 57.11 ರಷ್ಟಿತ್ತು.
ಟಾಪ್ 20 ಅಭ್ಯರ್ಥಿಗಳ ಪೈಕಿ ಇಬ್ಬರು ಮಹಿಳೆಯರಿದ್ದಾರೆ. ಕಾರ್ತಿಕಾ ಜಿ ನಾಯರ್ ಮತ್ತು ಮಹಾರಾಷ್ಟ್ರದ ವೈಷ್ಣವಿ ಸರ್ದಾ. ಅರ್ಹತಾ ಅಭ್ಯರ್ಥಿಗಳ ವರ್ಗವಾರು ವರ್ಗೀಕರಣ 13.12 ಶೇಕಡಾ ಎಸ್‌ಸಿಗಳು, ಶೇಕಡಾ 45.6 ಒಬಿಸಿಗಳು ಮತ್ತು ಶೇಕಡಾ 4.61 ರಷ್ಟು ಎಸ್‌ಟಿಗಳು ಇದ್ದಾರೆ ಎಂದು ತೋರಿಸುತ್ತವೆ. ಕಳೆದ ವರ್ಷ ಇದು ಕ್ರಮವಾಗಿ ಶೇಕಡಾ 12.8, ಶೇಕಡಾ 46.59 ಮತ್ತು ಶೇಕಡಾ 4.38 ರಷ್ಟಿತ್ತು.

ಯಾವುದೇ ರಾಜ್ಯವಾರು ವ್ಯತ್ಯಾಸಗಳಿವೆಯೇ?
ಎನ್​​ಟಿಎ ಇನ್ನೂ ವಿವರವಾದ ರಾಜ್ಯವಾರು ವಿಂಗಡಣೆ ಬಿಡುಗಡೆ ಮಾಡಿಲ್ಲ. ಆದಾಗ್ಯೂ, ಟಾಪ್ 20 ಅಭ್ಯರ್ಥಿಗಳನ್ನು ನೋಡಿದರೆ ಉತ್ತರ ಪ್ರದೇಶ ಮತ್ತು ಮಹಾರಾಷ್ಟ್ರದಿಂದ ತಲಾ ಮೂವರು, ತೆಲಂಗಾಣ, ಆಂಧ್ರಪ್ರದೇಶ, ಕರ್ನಾಟಕ ಮತ್ತು ದೆಹಲಿಯಿಂದ ತಲಾ ಇಬ್ಬರು ಮತ್ತು ಕೇರಳ, ಪಶ್ಚಿಮ ಬಂಗಾಳ, ಬಿಹಾರ, ಹರಿಯಾಣ, ಪಂಜಾಬ್ ಮತ್ತು ಗುಜರಾತ್‌ನಿಂದ ತಲಾ ಒಬ್ಬರು ಬಂದಿದ್ದಾರೆ ಎಂದು ತೋರಿಸುತ್ತದೆ. ಮೊದಲ ಬಾರಿಗೆ ವಿದೇಶಿ ಕೇಂದ್ರಗಳಾದ ಕುವೈತ್ ಮತ್ತು ದುಬೈ ಸೇರಿದಂತೆ 3,858 ಕೇಂದ್ರಗಳಲ್ಲಿ 13 ಭಾಷೆಗಳಲ್ಲಿ ಪರೀಕ್ಷೆಯನ್ನು ನಡೆಸಲಾಯಿತು. ಕಳೆದ ವರ್ಷದ 878 ಮತ್ತು 2019 ರಲ್ಲಿ 687 ರಂತೆ 883 ವಿದೇಶಿ ಅಭ್ಯರ್ಥಿಗಳು ಅರ್ಹತೆ ಪಡೆದಿದ್ದಾರೆ.

ಅರ್ಹತಾ ಕಟ್ ಆಫ್‌ಗಳು
ಅಗ್ರ ಶ್ರೇಯಾಂಕವನ್ನು ಹಂಚಿಕೊಂಡ ಮೂವರು ಅಭ್ಯರ್ಥಿಗಳು – ಮೃಣಾಲ್ ಕುಟ್ಟೇರಿ (ತೆಲಂಗಾಣ), ತನ್ಮಯ್ ಗುಪ್ತಾ (ದೆಹಲಿ) ಮತ್ತು ಕಾರ್ತಿಕಾ ಜಿ ನಾಯರ್ (ಮಹಾರಾಷ್ಟ್ರ) – ತಲಾ 720 ಪೂರ್ಣ ಅಂಕಗಳನ್ನು ಗಳಿಸಿದ್ದಾರೆ. ಆದಾಗ್ಯೂ, ಒಟ್ಟಾರೆ ಅರ್ಹತಾ ಅಂಕಗಳು 2020 ಕ್ಕೆ ಹೋಲಿಸಿದರೆ ಈ ವರ್ಷ ಕುಸಿತವನ್ನು ತೋರಿಸಿದೆ. ಸಾಮಾನ್ಯ ವರ್ಗದಲ್ಲಿ ಕಟ್-ಆಫ್ ಅಂಕಗಳು ಈ ವರ್ಷ 138 ಆಗಿದೆ, 2020 ರಲ್ಲಿ 147 ಆಗಿತ್ತು. ಎಸ್ ಟಿ, ಎಸ್ ಸಿ ಮತ್ತು ಒಬಿಸಿ ವಿಭಾಗಗಳಲ್ಲಿ ಕಟ್-ಆಫ್ 108 ಆಗಿದೆ. ಕಳೆದ ವರ್ಷ ಇದು 113  ಆಗಿತ್ತು. ಸಾಮಾನ್ಯ/EWS PwD ಗಾಗಿ ಕಟ್ ಆಫ್‌ 2020 ರಲ್ಲಿ 129 ಇದ್ದದ್ದು ಈ ಬಾರಿ 122 ಆಗಿದೆ.

ಮುಂದೆ ಏನು?
ಶಿಕ್ಷಣ ಸಚಿವಾಲಯದ ಅಡಿಯಲ್ಲಿ ಬರುವ ನ್ಯಾಷನಲ್ ಟೆಸ್ಟಿಂಗ್ ಏಜೆನ್ಸಿ (NTA)  ತನ್ನ ಆದೇಶವು ಪರೀಕ್ಷೆಯನ್ನು ನಡೆಸಲು ಮತ್ತು ಫಲಿತಾಂಶಗಳನ್ನು ಘೋಷಿಸಲು ಸೀಮಿತವಾಗಿದೆ ಎಂದು ಸ್ಪಷ್ಟಪಡಿಸಿದೆ. ಆರೋಗ್ಯ ಸೇವೆಗಳ ಮಹಾನಿರ್ದೇಶನಾಲಯವು ಈಗ ಶೇ.15 ರಷ್ಟು ಕೌನ್ಸೆಲಿಂಗ್ ನಡೆಸಲಿದೆ. ಈ ಪೈಕಿ ಅಖಿಲ ಭಾರತ ಕೋಟಾದ ಸೀಟುಗಳು, ಡೀಮ್ಡ್ ವಿಶ್ವವಿದ್ಯಾನಿಲಯಗಳು, ಕೇಂದ್ರೀಯ ವಿಶ್ವವಿದ್ಯಾಲಯಗಳು ಮತ್ತು ಬಿಎಚ್ಯು ಮತ್ತು ಎಎಂಯು ನ ಸೀಟುಗಳಿವೆ. ಕೌನ್ಸೆಲಿಂಗ್‌ನ ವಿವರಗಳು ಮತ್ತು ವೇಳಾಪಟ್ಟಿ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯ ಮತ್ತು ರಾಜ್ಯಗಳ ವೈದ್ಯಕೀಯ ಶಿಕ್ಷಣ ನಿರ್ದೇಶನಾಲಯಗಳ ವೆಬ್‌ಸೈಟ್‌ಗಳಲ್ಲಿ ಲಭ್ಯವಿರುತ್ತದೆ.

ರಾಜ್ಯ ಕೋಟಾದ ಸೀಟುಗಳು ಮತ್ತು ರಾಜ್ಯಗಳ ವ್ಯಾಪ್ತಿಯಲ್ಲಿ ಬರುವ ಇತರ ಸೀಟುಗಳ ಸಂದರ್ಭದಲ್ಲಿ, ಅಭ್ಯರ್ಥಿಗಳು ತಾವು ವಾಸಿಸುವರಾಜ್ಯಗಳಿಗೆ ಮತ್ತು ರಾಜ್ಯದ ನಿಯಮಗಳ ಪ್ರಕಾರ ಮೆರಿಟ್ ಪಟ್ಟಿಗೆ ಅರ್ಜಿ ಸಲ್ಲಿಸಬೇಕಾಗುತ್ತದೆ. ಖಾಸಗಿ ವೈದ್ಯಕೀಯ ಕಾಲೇಜುಗಳ ಕೌನ್ಸೆಲಿಂಗ್ ಅನ್ನು ಸಹ ಸಂಬಂಧಿತ ರಾಜ್ಯ ಕೌನ್ಸೆಲಿಂಗ್ ಅಧಿಕಾರಿಗಳು ನಡೆಸುತ್ತಾರೆ.

NEET 2021 ಕಟ್-ಆಫ್ ಅನ್ನು ಹೇಗೆ ಪರಿಶೀಲಿಸುವುದು ಹೇಗೆ? 

ಸ್ಕೋರ್‌ಕಾರ್ಡ್‌ನಲ್ಲಿ NEET 2021 ಕಟ್-ಆಫ್ ಅನ್ನು ಪರಿಶೀಲಿಸಲು ಮತ್ತು ಡೌನ್‌ಲೋಡ್ ಮಾಡಲು ಬಯಸುವ ಅಭ್ಯರ್ಥಿಗಳು ಕೆಳಗಿನ ಹಂತಗಳನ್ನು ಅನುಸರಿಸಬಹುದು.

ಹಂತ 1: ಅಧಿಕೃತ ವೆಬ್‌ಸೈಟ್ neet.nta.nic.in ಗೆ ಹೋಗಿ.

ಹಂತ 2: ಫಲಿತಾಂಶಕ್ಕಾಗಿ ಲಿಂಕ್ ಅನ್ನು ಪತ್ತೆ ಮಾಡಿ ಮತ್ತು ಅದರ ಮೇಲೆ ಕ್ಲಿಕ್ ಮಾಡಿ.

ಹಂತ 3: ರೋಲ್ ಸಂಖ್ಯೆ ಮತ್ತು ಜನ್ಮ ದಿನಾಂಕವನ್ನು ನಮೂದಿಸುವ ಮೂಲಕ ಲಾಗಿನ್ ಆಗಿ

ಹಂತ 4: ಡ್ಯಾಶ್‌ಬೋರ್ಡ್‌ನಿಂದ NEET 2021 ಸ್ಕೋರ್‌ಕಾರ್ಡ್ ಅನ್ನು ಡೌನ್‌ಲೋಡ್ ಮಾಡಿ.

ಹಂತ 5: ಸ್ಕೋರ್‌ಕಾರ್ಡ್‌ನಲ್ಲಿ, “ಕಟ್ – ಆಫ್ ಪರ್ಸೆಂಟೈಲ್ ಮತ್ತು ಸ್ಕೋರ್ ಪ್ರಕಾರ MCI / DCI ರೆಗ್ಯುಲೇಷನ್” ಅನ್ನು ನೋಡಿ

ಹಂತ 6: ಈ ವಿಭಾಗದ ಅಡಿಯಲ್ಲಿ, ನಿಮ್ಮ ವರ್ಗದ ಕಟ್ ಆಫ್ ನೋಡಿ.

ಇದನ್ನೂ ಓದಿ: NEET Exam 2021 Result: ನೀಟ್ ಪರೀಕ್ಷೆ ಫಲಿತಾಂಶ ಪ್ರಕಟ; ಕರ್ನಾಟಕದ ಇಬ್ಬರಿಗೆ 5ನೇ ರ್ಯಾಂಕ್