ರಜನೀಕಾಂತ್ ಬಳಿಕ ‘ಜೈಲರ್’ ನಿರ್ದೇಶಕನಿಗೂ ಕಾರು, ಹಣ ಉಡುಗೊರೆ ಕೊಟ್ಟ ನಿರ್ಮಾಪಕ

ರಜನೀಕಾಂತ್ (Rajinikanth) ನಟನೆಯ ‘ಜೈಲರ್‘ (Jailer) ಸಿನಿಮಾ ಭಾರಿ ದೊಡ್ಡ ಹಿಟ್ ಆಗಿದೆ. ‘ಜೈಲರ್’ ಸಿನಿಮಾ ಬಿಡುಗಡೆ ಆದ ಮೂರು ವಾರದಲ್ಲಿ 625 ಕೋಟಿಗೂ ಹೆಚ್ಚು ಮೊತ್ತ ಕಲೆ ಹಾಕಿದೆ. ಸಿನಿಮಾ ದೊಡ್ಡ ಹಿಟ್ ಆದ ಬೆನ್ನಲ್ಲೆ, ನಿರ್ಮಾಪಕ ಕಲಾನಿಧಿ ಮಾರನ್ ಅವರು, ಲಾಭಾಂಶದ ಭಾಗವನ್ನು ರಜನೀಕಾಂತ್ ಜೊತೆಗೆ ಹಂಚಿಕೊಂಡಿದ್ದಾರೆ. ಸಂಭಾವನೆ ಹೊರತಾಗಿ ಉಡುಗೊರೆಯಾಗಿ ದೊಡ್ಡ ಮೊತ್ತದ ಹಣವನ್ನೇ ರಜನೀಕಾಂತ್​ಗೆ ಕಲಾನಿಧಿ ಮಾರನ್ ನೀಡಿದ್ದಾರೆ. ಅದರ ಜೊತೆಗೆ ಎರಡು ಅತ್ಯಾಧುನಿಕ, ಹೊಚ್ಚ ಹೊಸ ಐಶಾರಾಮಿ ಬಿಎಂಡಬ್ಲು ಕಾರುಗಳನ್ನು ಸಹ ಉಡುಗೊರೆಯಾಗಿ ನೀಡಿದ್ದಾರೆ.

ರಜನೀಕಾಂತ್ ಅವರಿಗೆ ಉಡುಗೊರೆ ಬಳಿಕ ಇದೀಗ ‘ಜೈಲರ್’ ಸಿನಿಮಾದ ನಿರ್ದೇಶಕ ನೆಲ್ಸನ್ ಅವರಿಗೂ ಕಲಾನಿಧಿ ಮಾರನ್ ದಬಾರಿ ಉಡುಗೊರೆ ಹಾಗೂ ಚೆಕ್ ಮೂಲಕ ಹಣವನ್ನು ನೀಡಿದ್ದಾರೆ. ಇಂದು ನಿರ್ದೇಶಕ ನೆಲ್ಸನ್ ಅವರ ಭೇಟಿಯಾಗಿದ್ದ ಕಲಾನಿಧಿ ಮಾರನ್, ನೆಲ್ಸನ್​ಗೆ ಚೆಕ್ ಒಂದನ್ನು ನೀಡಿದ್ದಾರೆ. ಆ ಚೆಕ್​ನಲ್ಲಿ ಎಷ್ಟು ಮೊತ್ತ ನಮೂದಿಸಲಾಗಿತ್ತು ಎಂಬುದು ಬಹಿರಂಗಗೊಂಡಿಲ್ಲ. ಸುಮಾರು 10 ಕೋಟಿ ಹಣ ನೀಡಿದ್ದಾರೆ ಎನ್ನಲಾಗುತ್ತಿದೆ.

ಹಣದ ಜೊತೆಗೆ ಐಶಾರಾಮಿ ಕಾರನ್ನೂ ಸಹ ನೆಲ್ಸನ್​ಗೆ ಉಡುಗೊರೆಯನ್ನಾಗಿ ಕಲಾನಿಧಿ ಮಾರನ್ ನೀಡಿದ್ದಾರೆ. ಬಿಎಂಡಬ್ಲು, ಪೋರ್ಶೆ ಸೇರಿದಂತೆ ಇನ್ನೂ ಕೆಲವು ಐಶಾರಾಮಿ ಕಾರುಗಳಲ್ಲಿ ಒಂದನ್ನು ಆಯ್ಕೆ ಮಾಡಿಕೊಳ್ಳುವಂತೆ ನೆಲ್ಸನ್​ಗೆ ಅವಕಾಶ ನೀಡಿದ್ದರು ಕಲಾನಿಧಿ ಮಾರನ್. ಅಂತಿಮವಾಗಿ ಕಪ್ಪು ಬಣ್ಣದ ದುಬಾರಿ ಪೋರ್ಶೆ ಕಾರನ್ನು ಆರಿಸಿಕೊಂಡಿದ್ದಾರೆ. ಪ್ರಪಂಚದ ದುಬಾರಿ ಕಾರುಗಳಲ್ಲಿ ಇದು ಸಹ ಒಂದಾಗಿದೆ.

ನೆಲ್ಸನ್​ಗೆ ಕಾರು ಉಡುಗೊರೆ ಕೊಟ್ಟ ಕಲಾನಿಧಿ ಮಾರನ್

ಸಿನಿಮಾದಲ್ಲಿ ನಟಿಸಿರುವ ರಜನೀಕಾಂತ್, ನಿರ್ದೇಶಕ ನೆಲ್ಸನ್​ಗೆ ಉಡುಗೊರೆ ನೀಡಿರುವ ಕಲಾನಿಧಿ ಮಾರನ್, ಅದೇ ಸಿನಿಮಾದಲ್ಲಿ ನಟಿಸಿರುವ ಶಿವರಾಜ್ ಕುಮಾರ್, ಮೋಹನ್​ಲಾಲ್, ಸುನಿಲ್ ಅವರುಗಳಿಗೂ ಉಡುಗೊರೆ ನೀಡುತ್ತಾರಾ ಕಾದು ನೋಡಬೇಕಿದೆ. ಶಿವರಾಜ್ ಕುಮಾರ್ ಅವರ ಸಣ್ಣ ಅತಿಥಿ ಪಾತ್ರ ಭಾರಿ ಜನಮನ್ನಣೆಗೆ ಪಾತ್ರವಾಗಿದೆ.

‘ಜೈಲರ್’ ಸಿನಿಮಾ ಕೆಲವೇ ದಿನಗಳಲ್ಲಿ 625 ಕೋಟಿಗೂ ಹೆಚ್ಚು ಹಣ ಗಳಿಸಿದೆ. ಕೇರಳ, ಆಂಧ್ರ ಪ್ರದೇಶ, ಕರ್ನಾಟಕ, ತಮಿಳುನಾಡು, ಮಹಾರಾಷ್ಟ್ರ ಎಲ್ಲ ಭಾಷೆಗಳಲ್ಲಿಯೂ ಕನಿಷ್ಟ 50 ಕೋಟಿಗೂ ಹೆಚ್ಚು ಹಣ ಗಳಿಸಿದ ಕೆಲವೇ ಸಿನಿಮಾಗಳ ಪಟ್ಟಿಗೆ ‘ಜೈಲರ್’ ಸಹ ಸೇರಿಕೊಂಡಿದೆ. ನಿವೃತ್ತ ಜೈಲರ್ ಒಬ್ಬನ ಮಗನನ್ನು ವಿಲನ್ ಅಪಹರಣ ಮಾಡಿರುತ್ತಾನೆ, ಅವನನ್ನು ವಾಪಸ್ ಕರೆದುಕೊಂಡು ಬರಲು ಅಪ್ಪ, ತನ್ನ ಹಳೆಯ ಗೆಳೆಯರನ್ನು ಬಳಸಿಕೊಂಡು ಹೇಗೆ ವ್ಯೂಹ ಹೂಡುತ್ತಾನೆ ಎಂಬುದೇ ಸಿನಿಮಾದ ಕತೆ.