Kangana Ranaut: ಕಂಗನಾ ರಣಾವತ್ರ ಭದ್ರತಾ ಸಿಬ್ಬಂದಿ ಜೊತೆ ನಟಿ ಸೋಫಿ ಚೌಧರಿ ವಾಗ್ವಾದ
ನಟಿ ಸೋಫಿ ಚೌಧರಿ, ಕಂಗನಾ ರಣಾವತ್ರ ಭದ್ರತಾ ಸಿಬ್ಬಂದಿಯೊಬ್ಬರ ಜೊತೆಗೆ ವಾಗ್ವಾದ ನಡೆಸುತ್ತಿರುವ ವಿಡಿಯೋ ವೈರಲ್ ಆಗಿದ್ದು. ಕಂಗನಾರ ಭದ್ರತಾ ಸಿಬ್ಬಂದಿಯನ್ನು ಅಪಾರ್ಟ್ಮೆಂಟ್ನಿಂದ ಹೊರಗೆ ಹೋಗುವಂತೆ ಸೋಫಿ ಸೂಚಿಸಿದ್ದಾರೆ.
ನಟಿ ಕಂಗನಾ ರಣಾವತ್ (Kangana Ranaut) ನಟನೆ ಜೊತೆಗೆ ಕಟು ಮಾತುಗಳಿಗೂ ಪ್ರಖ್ಯಾತರು. ಬಿಜೆಪಿಯೇತರ ರಾಜಕಾರಣಿಗಳು, ಬಾಲಿವುಡ್ನ ಕೆಲವು ಸೆಲೆಬ್ರಿಟಿಗಳ ಮೇಲೆ ಸರಣಿ ಆರೋಪಗಳನ್ನು ಮಾಡಿ ವಿವಾದಕ್ಕೆ ಸಿಲುಕಿದ ಬಳಿಕ ನಟಿಗೆ ಗೃಹ ಇಲಾಖೆಯು ಭದ್ರತೆ ಹೆಚ್ಚಿಸಿತ್ತು. ಆದರೆ ಈಗ ನಟಿಯೊಬ್ಬರು ಕಂಗನಾ ರಣಾವತ್ರ ಭದ್ರತಾ ಸಿಬ್ಬಂದಿ ಜೊತೆ ಜಗಳವಾಡಿರುವುದು ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಕಾರಣವಾಗಿದೆ.
ನಟಿ, ಸೋಷಿಯಲ್ ಮೀಡಿಯಾ ಇನ್ಫ್ಲುಯೆನ್ಸರ್ ಸೋಫಿ ಚೌಧರಿ (Sophie Choudry), ಕಂಗನಾ ರಣಾವತ್ರ ಭದ್ರತಾ ಸಿಬ್ಬಂದಿಯೊಬ್ಬರ ಜೊತೆಗೆ ವಾಗ್ವಾದ ನಡೆಸುತ್ತಿರುವ ವಿಡಿಯೋ ವೈರಲ್ ಆಗಿದ್ದು. ಕಂಗನಾರ ಭದ್ರತಾ ಸಿಬ್ಬಂದಿಯನ್ನು ಅಪಾರ್ಟ್ಮೆಂಟ್ನಿಂದ ಹೊರಗೆ ಹೋಗುವಂತೆ ಸೋಫಿ ಸೂಚಿಸಿದ್ದಾರೆ.
ಕಂಗನಾ ರಣಾವತ್ ಡ್ಯಾನ್ಸ್ ಕ್ಲಾಸ್ಗೆ ಸೇರಿಕೊಂಡಿದ್ದು, ಆ ಡ್ಯಾನ್ಸ್ ಕ್ಲಾಸ್ ಮುಂಬೈನ ಐಶಾರಾಮಿ ಅಪಾರ್ಟ್ಮೆಂಟ್ ಒಳಗೆ ಇದೆ. ಡ್ಯಾನ್ಸ್ ಕ್ಲಾಸ್ ಇರುವ ಅದೇ ಅಪಾರ್ಟ್ಮೆಂಟ್ನಲ್ಲಿ ನಟಿ ಸೋಫಿ ವಾಸಿಸುತ್ತಿದ್ದಾರೆ. ನಟಿ ಮಲೈಕಾ ಅರೋರಾ ಸಹ ಅದೇ ಅಪಾರ್ಟ್ಮೆಂಟ್ನ ವಾಸಿಯಾಗಿದ್ದಾರೆ.
ಇಂದು (ಫೆಬ್ರವರಿ 27) ಎಂದಿನಂತೆ ನಟಿ ಕಂಗನಾ ನೃತ್ಯ ತರಬೇತಿಗೆ ಡ್ಯಾನ್ಸ್ ಕ್ಲಾಸ್ಗೆ ಹೋದಾಗ ಅವರ ಭದ್ರತಾ ಸಿಬ್ಬಂದಿ ಹೊರಗೆ ಅಪಾರ್ಟ್ಮೆಂಟ್ನ ಲಾಬಿ ಏರಿಯಾದಲ್ಲಿ ನಿಂತಿದ್ದರು. ಆಗ ಅಲ್ಲಿಗೆ ಬಂದ ನಟಿ ಸೋಫಿ ಚೌಧರಿ, ”ನೀವು ಒಂದೋ ಬಿಲ್ಡಿಂಗ್ನ ಹೊರಗೆ ನಿಲ್ಲಿ ಅಥವಾ ನಿಮಗೆ ಕಂಗನಾರನ್ನು ಫಾಲೋ ಮಾಡಲೇ ಬೇಕು ಎಂದಾದರೆ ನೀವು ಸಹ ಡ್ಯಾನ್ಸ್ ಕ್ಲಾಸ್ ಒಳಗೆ ಹೋಗಿ” ಎಂದಿದ್ದಾರೆ.
ಅದಕ್ಕೆ ಉತ್ತರಿಸಿರುವ ಕಂಗನಾ ಭದ್ರತೆಗೆ ನಿಯೋಜಿಸಲಾಗಿರುವ ಸಿಆರ್ಪಿಎಫ್ ಯೋಧ, ”ನಾವು ಅಪಾರ್ಟ್ಮೆಂಟ್ ಒಳಗೆ ಹೋಗಲು ಅನುಮತಿ ಕೇಳಿದ್ದೇವೆ. ಅನುಮತಿ ಬಂದ ಬಳಿಕ ನಾವು ಒಳಗೆ ಹೋಗುತ್ತೇವೆ” ಎಂದಿದ್ದಾರೆ. ಅದಕ್ಕೆ ಸೋಫಿ, ”ಸರಿ ನಾನು ಈ ವಿಷಯವಾಗಿ ಕಂಗನಾ ಬಳಿ ಮಾತನಾಡುತ್ತೇನೆ” ಎಂದಿದ್ದಾರೆ. ಆಗ ಆ ಯೋಧ, ”ಬೇಡ, ನೀವು ಅವರೊಟ್ಟಿಗೆ ಮಾತನಾಡುವ ಅವಶ್ಯಕತೆ ಏನೂ ಇಲ್ಲ” ಎಂದಿದ್ದಾರೆ.
ನಟಿ ಕಂಗನಾ ರಣಾವತ್ಗೆ ವೈ ಪ್ಲಸ್ ಭದ್ರತೆ ಒದಗಿಸಲಾಗಿದ್ದು, ಕೆಲವು ಸಿಆರ್ಪಿಎಫ್ ಯೋಧರನ್ನು ಕಂಗನಾರ ಭದ್ರತೆಗೆ ನಿಯೋಜಿಸಲಾಗಿದೆ. ಕಂಗನಾ ಹೋದಲ್ಲೆಲ್ಲ ಭದ್ರತಾ ಸಿಬ್ಬಂದಿ ಅವರ ಹಿಂದಿರುತ್ತಾರೆ. ಮಹರಾಷ್ಟ್ರ ಸರ್ಕಾರವನ್ನು, ಸಿಎಂ, ಸಚಿವರನ್ನು ಹಿಗ್ಗಾ ಮುಗ್ಗ ಟೀಕಿಸಿ ಶಿವಸೇನಾ ಕಾರ್ಯಕರ್ತರನ್ನು ಎದುರು ಹಾಕಿಕೊಂಡಿದ್ದ ಕಂಗನಾಗೆ ಕೇಂದ್ರ ಗೃಹ ಇಲಾಖೆ ಭದ್ರತೆ ಹೆಚ್ಚಿಸಿತ್ತು.
ಸಿನಿಮಾ ವಿಷಯಕ್ಕೆ ಮರಳುವುದಾದರೆ ಕಂಗನಾ ರಣಾವತ್, ತುರ್ತು ಪರಿಸ್ಥಿತಿ ಆಧರಿಸಿದ ‘ಎಮರ್ಜೆನ್ಸಿ ‘ಸಿನಿಮಾದಲ್ಲಿ ನಟಿಸಿದ್ದಾರೆ. ಈ ಸಿನಿಮಾದ ನಿರ್ಮಾಣವೂ ಅವರದ್ದೇ. ಅದರ ಹೊರತಾಗಿ ನವಾಜುದ್ದೀನ್ ಸಿದ್ಧಿಕಿ ಜೊತೆಗೆ ‘ಟೀಕು ವೆಡ್ಸ್ ಶೇರು’, ‘ಸೀತಾ’ ಹಾಗೂ ‘ತೇಜಸ್’ ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ.