ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ಆರೋಪ, ರ್ಯಾಪರ್ ಬಾದ್​ಶಾ ವಿರುದ್ಧ ಪ್ರಕರಣ

ಭಾರತದಲ್ಲಿ ಇತ್ತೀಚೆಗೆ ಕಲಾವಿದರು ಒಂದಲ್ಲ ಒಂದು ವಿವಾದಕ್ಕೆ ಸಿಲುಕುತ್ತಲೇ ಇದ್ದಾರೆ. ಕಮಿಡಿಯನ್​ಗಳು, ನಟ-ನಟಿಯರು, ಇತ್ತೀಚೆಗೆ ಹಾಡುಗಾರರ ಮೇಲೂ ಸಹ ಪ್ರಕರಣಗಳು ದಾಖಲಾಗುತ್ತಿವೆ. ಭಾರತದ ಟಾಪ್ ರ್ಯಾಪರ್​ಗಳಲ್ಲಿ ಒಬ್ಬರಾಗಿರುವ ರ್ಯಾಪರ್ ಬಾದ್​ಶಾ (Badshah) ವಿರುದ್ಧ ಪಂಜಾಬ್​ನಲ್ಲಿ ದೂರು ದಾಖಲಾಗಿದೆ. ತಮ್ಮ ಹಾಡಿನ ಮೂಲಕ ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ನೀಡಿರುವ ಆರೋಪ ಅವರ ವಿರುದ್ಧ ಕೇಳಿ ಬಂದಿದೆ.

ರ್ಯಾಪರ್ ಬಾದ್​ಶಾ ಇತ್ತೀಚೆಗಷ್ಟೆ ‘ವೆಲ್ವೆಟ್ ಫ್ಲೋ’ ಹೆಸರಿನ ಹಾಡೊಂದನ್ನು ಬಿಡುಗಡೆ ಮಾಡಿದ್ದಾರೆ. ಈ ಹಾಡಿನಲ್ಲಿ ಚರ್ಚ್, ಬೈಬಲ್ ಪದಗಳ ಬಳಕೆ ಮಾಡಿರುವುದು ಕೆಲ ಕ್ರಿಶ್ಚಿಯನ್ನರನ್ನು ಕೆರಳಿಸಿದಂತಿದೆ. ಇದೇ ಕಾರಣಕ್ಕೆ ಇಮಾನ್ಯುಯೆಲ್ ಮಸಿಹ್ ಎಂಬುವರು ಪಂಜಾಬ್​​ನಲ್ಲಿ ದೂರು ದಾಖಲಿಸಿದ್ದಾರೆ. ಬಾದ್​ಶಾ ತಮ್ಮ ಹಾಡಿನ ಮೂಲಕ ಕ್ರಿಶ್ಚಿಯನ್ನರ ಭಾವನೆಗಳಿಗೆ ಧಕ್ಕೆ ತಂದಿದ್ದಾರೆ ಎಂದು ದೂರಿನಲ್ಲಿ ಆರೋಪ ಮಾಡಿದ್ದಾರೆ.

ಪಂಜಾಬ್​ನ ಗುರುದಾಸ್​ಪುರದ ಕಿಲಾ ಲಾಲ್ ಸಿಂಗ್ ಪೊಲೀಸ್ ಠಾಣೆಯಲ್ಲಿ ಬಾದ್​ಶಾ ವಿರುದ್ಧ ದೂರು ದಾಖಲಾಗಿದೆ. ಮಾತ್ರವಲ್ಲದೆ ಬಾಟ್ಲಾ ಹೌಸ್ ಬಳಿ ಕ್ರಿಶ್ಚಿಯನ್ ಸಮುದಾಯದವರು ಬಾದ್​ಶಾ ವಿರುದ್ಧ ಪ್ರತಿಭಟನೆ ಸಹ ಮಾಡಿದ್ದು, ಹಾಡನ್ನು ನಿಷೇಧಿಸಬೇಕು ಎಂದು ಒತ್ತಾಯಿಸಿದ್ದಾರೆ.

ಇದನ್ನೂ ಓದಿ:ಬಾಲಿವುಡ್ ಸಿನಿಮಾಕ್ಕಾಗಿ ಸಂಭಾವನೆ ತಗ್ಗಿಸಿಕೊಂಡರಾ ನಟಿ ಶ್ರೀಲೀಲಾ

ಬಾದ್​ಶಾ ಅವರ ‘ವೆಲ್ವೆಟ್ ಫ್ಲೋ’ ಹಾಡು ಏಪ್ರಿಲ್ 11 ರಂದು ಬಿಡುಗಡೆ ಆಗಿದೆ. ಯೂಟ್ಯೂಬ್​ನಲ್ಲಿ ಬಿಡುಗಡೆ ಆದ ಈ ಹಾಡು ಸಖತ್ ಟ್ರೆಂಡಿಂಗ್ ಆಗುತ್ತಿದೆ. ಹಾಡು ಈಗಾಗಲೇ 86 ಲಕ್ಷಕ್ಕೂ ಹೆಚ್ಚು ವೀವ್ಸ್ ಪಡೆದುಕೊಂಡಿದೆ. ‘ಮನೆ ಚರ್ಚ್​ನಂತೆ ಅನಿಸಲಿ, ಪಾಸ್​ಪೋರ್ಟ್ ಬೈಬಲ್ ರೀತಿ’ ಎಂಬ ಸಾಲು ಆ ಹಾಡಿನಲ್ಲಿದೆ. ಹಾಡಿನಲ್ಲಿ ತಮ್ಮ ಬಗ್ಗೆ ತಾವೇ ಹೇಳಿಕೊಂಡಂತಿದೆ ಬಾದ್​ಶಾ.

ರ್ಯಾಪರ್​ಗಳಾದ ಬಾದ್​ಶಾ ಮತ್ತು ಹನಿಸಿಂಗ್ ನಡುವೆ ವರ್ಷಗಳಿಂದಲೂ ದುಶ್ಮನಿ ಇದ್ದೇ ಇದೆ. ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ಹನಿ ಸಿಂಗ್, ಬಾದ್​ಶಾ ಅನ್ನು ಕ್ಲೈಂಟ್ ಎಂದು ಕರೆದಿದ್ದರು. ಅದಕ್ಕೆ ಹಾಡು ಮಾಡಿದ್ದ ಬಾದ್​ಶಾ ಮತ್ತು ರಫ್ತಾರ್, ‘ಓಯೋ ಆಂಟಿ ನಮ್ಮನ್ನು ಕ್ಲೈಂಟ್ ಎಂದು ಕರೆಯುತ್ತಾಳೆ’ ಎಂದಿದ್ದರು. ಈಗ ಬಾದ್​ ಶಾ ಮಾಡಿರುವ ‘ವೆಲ್ವೆಟ್ ಫ್ಲೋ’ ಹಾಡಿನಲ್ಲಿಯೂ ಸಹ ವಿರೋಧಿಗಳನ್ನು ಗುರಿ ಮಾಡಿಕೊಂಡೇ ಹಾಡು ಮಾಡಿದ್ದಾರೆ. ಅದರಲ್ಲಿ ಚರ್ಚ್ ಮತ್ತು ಬೈಬಲ್ ಪದಗಳನ್ನು ಬಳಸಿರುವುದು ಕ್ರಿಶ್ಚಿಯನ್ನರ ಅಸಮಾಧಾನಕ್ಕೆ ಕಾರಣವಾಗಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ