ನಕ್ಕು ನಗಿಸಲಿದೆ ‘ಕ್ರೂ’ ಸಿನಿಮಾ; ಫಸ್ಟ್​ ಶೋ ನೋಡಿ ಟ್ವಿಟರ್​ ವಿಮರ್ಶೆ ತಿಳಿಸಿದ ನೆಟ್ಟಿಗರು

ಟ್ರೇಲರ್​ ಮೂಲಕ ‘ಕ್ರೂ’ ಸಿನಿಮಾ (Crew Movie) ಸಖತ್​ ನಿರೀಕ್ಷೆ ಮೂಡಿಸಿತ್ತು. ಈ ಸಿನಿಮಾದಲ್ಲಿ ಗಗನ ಸಖಿಯರ ಕಥೆ ಇದೆ. ಕರೀನಾ ಕಪೂರ್​ ಖಾನ್​, ಟಬು, ಕೃತಿ ಸನೋನ್ (Kriti Sanon)​ ಅವರು ಈ ಸಿನಿಮಾದಲ್ಲಿ ಮುಖ್ಯ ಭೂಮಿಕೆ ನಿಭಾಯಿಸಿದ್ದಾರೆ. ವಿಮಾನದಲ್ಲಿ ಬಂಗಾರ ಕಳ್ಳತನ ಆಗುವ ಕಹಾನಿಯನ್ನು ಹಾಸ್ಯಮಯವಾಗಿ ವಿವರಿಸುವ ಈ ಸಿನಿಮಾ ಇಂದು (ಮಾರ್ಚ್​ 29) ಬಿಡುಗಡೆ ಆಗಿವೆ. ಮೊದಲ ದಿನ ಮೊದಲ ಶೋ ನೋಡಿದ ಪ್ರೇಕ್ಷಕರು ‘ಕ್ರೂ’ ಚಿತ್ರದ ಬಗ್ಗೆ ತಮ್ಮ ವಿಮರ್ಶೆ (Crew Twitter Review) ಹಂಚಿಕೊಂಡಿದ್ದಾರೆ. ಟ್ವಿಟರ್​ ಮೂಲಕ ನೆಟ್ಟಿಗರು ತಮ್ಮ ಅನಿಸಿಕೆ ತಿಳಿಸಿದ್ದಾರೆ. ಆ ಬಗ್ಗೆ ಇಲ್ಲಿದೆ ಮಾಹಿತಿ.

‘ಕ್ರೂ’ ಸಿನಿಮಾಗೆ ರಾಜೇಶ್​ ಕೃಷ್ಣನ್​ ಅವರು ನಿರ್ದೇಶನ ಮಾಡಿದ್ದಾರೆ. ಈ ಹಿಂದೆ ‘ಲೂಟ್​ಕೇಸ್​’ ಸಿನಿಮಾ ಮಾಡಿದ್ದ ಅವರು ಈಗ ‘ಕ್ರೂ’ ಚಿತ್ರವನ್ನು ಜನರ ಮುಂದೆ ತಂದಿದ್ದಾರೆ. ಟಬು, ಕೃತಿ ಸನೋನ್​, ಕರೀನಾ ಕಪೂರ್​ ಖಾನ್​ ಜೊತೆಗೆ ದಿಲ್ಜಿತ್​ ದೋಸಾಂಜ್​, ಕಪಿಲ್​ ಶರ್ಮಾ ಕೂಡ ಈ ಸಿನಿಮಾದಲ್ಲಿ ಅಭಿನಯಿಸಿದ್ದಾರೆ. ಎಲ್ಲರ ಕಾಂಬಿನೇಷನ್​ನಲ್ಲಿ ಕಾಮಿಡಿ ದೃಶ್ಯಗಳು ಚೆನ್ನಾಗಿ ಮೂಡಿಬಂದಿವೆ ಎಂದು ಅಭಿಮಾನಿಗಳು ಮೆಚ್ಚುಗೆ ಸೂಚಿಸಿದ್ದಾರೆ.

‘ಈ ಸಿನಿಮಾ ಸೂಪರ್​ ಫನ್​ ಆಗಿದೆ. ತುಂಬ ಎಂಜಾಯ್​ ಮಾಡಬಹುದಾದ ಸಿನಿಮಾ ಇದು. ಟಬು, ಕೃತಿ ಸನೋನ್​, ಕರೀನಾ ಕಪೂರ್​ ಖಾನ್​ ಇರುವುದರಿಂದ ನಿರೀಕ್ಷೆ ಜಾಸ್ತಿ ಇರುತ್ತದೆ. ಅದಕ್ಕೆ ತಕ್ಕಂತೆಯೇ ಈ ಸಿನಿಮಾ ಚೆನ್ನಾಗಿದೆ’ ಎಂದು ಪ್ರೇಕ್ಷಕರೊಬ್ಬರು ವಿಮರ್ಶೆ ಹಂಚಿಕೊಂಡಿದ್ದಾರೆ. ಭರಪೂರ ಕಾಮಿಡಿ ಬಯಸುವ ಪ್ರೇಕ್ಷಕರು ಈ ಸಿನಿಮಾವನ್ನು ಇಷ್ಟಪಡುತ್ತಿದ್ದಾರೆ.

ಕೆಲವರಿಗೆ ‘ಕ್ರೂ’ ಸಿನಿಮಾ ಇಷ್ಟ ಆಗಿಲ್ಲ. ‘ಕಲಾವಿದರ ನಟನೆ ಚೆನ್ನಾಗಿದೆ. ಆದರೆ ಪೂರ್ತಿ ಸಿನಿಮಾ ಚೆನ್ನಾಗಿಲ್ಲ. ಮೊದಲಾರ್ಥ ಸಾಧಾರಣವಾಗಿದೆ. ದ್ವಿತೀಯಾರ್ಧ ಕಳಪೆ ಆಗಿದೆ. ಇದೊಂದು ಭಯಾನಕ ಸಿನಿಮಾ. ನೋಡದೇ ಇರುವುದೇ ಉತ್ತಮ’ ಎಂಬ ಕಟುವಾದ ವಿಮರ್ಶೆ ಕೂಡ ಬಂದಿದೆ. ಇಂಥ ಮಿಶ್ರ ಪ್ರತಿಕ್ರಿಯೆ ನಡುವೆಯೂ ಅನೇಕ ಕಡೆಗಳಲ್ಲಿ ಈ ಸಿನಿಮಾ ಹೌಸ್​ಫುಲ್​ ಆಗಿದೆ.

ಇದನ್ನೂ ಓದಿ: ಪ್ರತಿ ರಾತ್ರಿ ಅಳುತ್ತಿದ್ದೆ, ತಿಂಗಳುಗಳ ಕಾಲ ನಿದ್ದೆ ಇರಲಿಲ್ಲ: ಕೆಟ್ಟ ದಿನ ನೆನೆದ ಕರೀನಾ

ಇದನ್ನು ಕೆಲವರು ಪೈಸಾ ವಸೂಲ್​ ಸಿನಿಮಾ ಎಂದು ಕೂಡ ಕರೆದಿದ್ದಾರೆ. ಕಥೆ ತುಂಬ ಲಘುವಾಗಿದೆ. ಸಿನಿಮಾ ಫನ್​ ಆಗಿದೆ. ಪ್ರಮುಖ ಪಾತ್ರಧಾರಿಗಳ ನಡುವಿನ ಕೆಮಿಸ್ಟ್ರೀ ಚೆನ್ನಾಗಿದೆ ಎಂಬ ವಿಮರ್ಶೆ ಕೂಡ ಸಿಕ್ಕಿದೆ. ‘ಈಗತಾನೇ ಸಿನಿಮಾ ನೋಡಿ ಹೊರಬಂದೆ. ಈಗಲೂ ನಗುತ್ತಿದ್ದೇನೆ. ಮತ್ತೊಮ್ಮೆ ಈ ಸಿನಿಮಾವನ್ನು ನೋಡುತ್ತೇನೆ ಎನಿಸುತ್ತದೆ’ ಎಂದು ನೆಟ್ಟಿಗರೊಬ್ಬರು ಟ್ವಿಟರ್​ನಲ್ಲಿ ಪೋಸ್ಟ್​ ಮಾಡಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.