ಬಾದ್‌ಶಾ ಮೋಸ ಮಾಡಿದ್ದರ ಬಗ್ಗೆ ಬಿಗ್ ಬಾಸ್ ಮನೆಯಲ್ಲಿ ಮಾತಾಡಿದ ಇಶಾ ರಿಖಿ

ರ್ಯಾಪರ್ ಬಾದ್‌ಶಾ ಹಾಗೂ ಪಂಜಾಬಿ ನಟಿ ಇಶಾ ರಿಖಿ ಅವರ ವೈವಾಹಿಕ ಜೀವನ ಮತ್ತೊಮ್ಮೆ ಸುದ್ದಿಯಲ್ಲಿದೆ. ಇತ್ತೀಚೆಗಷ್ಟೇ ಇಬ್ಬರೂ ಬೇರೆಯಾಗಿರುವುದಾಗಿ ಘೋಷಿಸಿಕೊಂಡಿದ್ದರು. ಆದರೆ, ಇದೀಗ ‘ಬಿಗ್ ಬಾಸ್ 20’ ಶೋನಲ್ಲಿ ಸ್ಪರ್ಧಿಯಾಗಿರುವ ಇಶಾ ರಿಖಿ, ಬಾದ್‌ಶಾ ತಮಗೆ ಮೋಸ ಮಾಡಿದ್ದರೇ ಎನ್ನುವ ಅನುಮಾನವನ್ನು ಹುಟ್ಟುಹಾಕಿದ್ದಾರೆ. ಬಿಗ್ ಬಾಸ್ ಮನೆಯಲ್ಲಿ ಸಹ ಸ್ಪರ್ಧಿಗಳೊಂದಿಗೆ ಮಾತನಾಡುತ್ತಾ ಇಶಾ ರಿಖಿ ಆಡಿದ ಮಾತುಗಳು, ಬಾದ್‌ಶಾ ತಮಗೆ ದ್ರೋಹ ಎಸಗಿದ್ದಾರೆ ಎಂಬುದರ ಪರೋಕ್ಷ ಸುಳಿವು ನೀಡುವಂತಿದೆ.

ಬಿಗ್ ಬಾಸ್ ಮನೆಯಲ್ಲಿ ಸ್ಪರ್ಧಿ ಗುಲ್ಲು ಅವರು ತಮ್ಮನ್ನು ರೆಡ್ ಫ್ಲ್ಯಾಗ್ ಎಂದು ಕರೆದಾಗ, ‘ನನ್ನ ಜೀವನದಲ್ಲಿ ಅತ್ಯಂತ ಒಳ್ಳೆಯ ರೆಡ್ ಫ್ಲ್ಯಾಗ್ ಅನ್ನು ನಾನು ಹತ್ತಿರದಿಂದ ನೋಡಿದ್ದೇನೆ’ ಎಂದು ಇಶಾ ರಿಖಿ ಪರೋಕ್ಷವಾಗಿ ತಮಗಾದ ಕಹಿ ಅನುಭವವನ್ನು ಹಂಚಿಕೊಂಡಿದ್ದಾರೆ. ಮುಂದುವರಿದು ಸ್ಪರ್ಧಿಗಳನ್ನು ಪ್ರಶ್ನಿಸಿದ ಇಶಾ, ‘ಇತರರಿಗೆ ಮೋಸ ಮಾಡುವ ವ್ಯಕ್ತಿಗಳಿಗೆ ತಪ್ಪಿತಸ್ಥ ಭಾವನೆ ಕಾಡುತ್ತದೆಯೇ? ಅದರಲ್ಲೂ ಪ್ಲೇಬಾಯ್ ಮಾದರಿಯ ಪುರುಷರಿಗೆ ತಾವು ಮಾಡಿದ್ದು ತಪ್ಪು ಎಂಬ ಅರಿವಾಗುತ್ತದೆಯೇ?’ ಎಂದು ಕೇಳಿದ್ದಾರೆ.

ಸೋಷಿಯಲ್ ಮೀಡಿಯಾದಲ್ಲಿ ಈ ವಿಡಿಯೋ ಹರಿದಾಡುತ್ತಿದ್ದಂತೆ, ಇಶಾ ರಿಖಿ ಪರೋಕ್ಷವಾಗಿ ಬಾದ್‌ಶಾ ಅವರನ್ನೇ ಪ್ಲೇಬಾಯ್ ಎಂದು ಕರೆದಿದ್ದಾರೆ ಹಾಗೂ ಬಾದ್‌ಶಾ ಮೋಸ ಮಾಡಿದ್ದರಿಂದಲೇ ಈ ಸಂಬಂಧ ಮುರಿದುಬಿದ್ದಿದೆ ಎಂದು ನೆಟ್ಟಿಗರು ಕಾಮೆಂಟ್ ಮಾಡುತ್ತಿದ್ದಾರೆ. 2026ರ ಮಾರ್ಚ್‌ನಲ್ಲಿ ಬಾದ್‌ಶಾ ಹಾಗೂ ಇಶಾ ರಿಖಿ ಅವರ ರಹಸ್ಯ ಮದುವೆಯ ಫೋಟೋಗಳು ವೈರಲ್ ಆಗಿದ್ದವು. ಆದರೆ, ಈ ಮದುವೆ ಹೆಚ್ಚು ದಿನ ಬಾಳಲಿಲ್ಲ. ಇದೀಗ ಇಶಾ ರಿಖಿ ಅವರ ಈ ಹೇಳಿಕೆಗಳು ಬಾಲಿವುಡ್ ಹಾಗೂ ಪಂಜಾಬಿ ಚಿತ್ರರಂಗದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿವೆ.

ಇದನ್ನೂ ಓದಿ: ಬಾದ್​ಶಾ -ಇಶಾ ರಿಖಿ ದಾಂಪತ್ಯ ಅಂತ್ಯ; ಅಧಿಕೃತವಾಗಿ ಘೋಷಣೆ ಮಾಡಿದ ರಾಪರ್

ಬಿಗ್ ಬಾಸ್ ಮೊದಲ ಸಂಚಿಕೆಯಲ್ಲಿ ತಮ್ಮ ವಿಚ್ಛೇದನದ ಬಗ್ಗೆ ಮಾತನಾಡಿದ್ದ ಇಶಾ, ‘ನಾನು ಅವರನ್ನು ಸಂಪೂರ್ಣ ನಂಬಿಕಸ್ಥ ವ್ಯಕ್ತಿ ಎಂದುಕೊಂಡಿದ್ದೆ. ಮದುವೆಯಾಗಿ ನೆಮ್ಮದಿಯಿಂದ ಇರಲು ಸಾಕಷ್ಟು ಪ್ರಯತ್ನಿಸಿದೆ. ಆದರೆ, ಒಮ್ಮೆ ನಂಬಿಕೆ ಮುರಿದುಬಿದ್ದಾಗ ನಾವೇ ನಮಗೇ ಪ್ರಶ್ನೆ ಮಾಡಿಕೊಳ್ಳುವ ಪರಿಸ್ಥಿತಿ ಬರುತ್ತದೆ. ಈ ಘಟನೆ ನನ್ನನ್ನು ಸಂಪೂರ್ಣವಾಗಿ ಒಡೆದುಹಾಕಿದೆ. ನನ್ನದೇ ಪ್ರೇಮಕಥೆಯಲ್ಲಿ ನಾನು ಯಾವಾಗ ಸೈಡ್ ಕ್ಯಾರೆಕ್ಟರ್ ಆದೆ ಎನ್ನುವುದೇ ನನಗೆ ತಿಳಿಯಲಿಲ್ಲ’ ಎಂದು ಭಾವುಕರಾಗಿದ್ದರು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.