ಹೃತಿಕ್​ ರೋಷನ್​ ಮನೆಯವರ ಜೊತೆ ಪ್ರೇಯಸಿ ಸಬಾ ಆಜಾದ್​​ ದೀಪಾವಳಿ; ಈಗ ಎಲ್ಲವೂ ಅಧಿಕೃತ

ಎಲ್ಲೆಲ್ಲೂ ದೀಪಾವಳಿ (Deepavali 2023) ಹಬ್ಬದ ಸಂಭ್ರಮ ಮನೆ ಮಾಡಿದೆ. ಜನಸಾಮಾನ್ಯರಿಂದ ಹಿಡಿದು ಸೆಲೆಬ್ರಿಟಿಗಳವರೆಗೆ ಎಲ್ಲರೂ ಸಡಗರದಿಂದ ಹಬ್ಬ ಆಚರಿಸುತ್ತಿದ್ದಾರೆ. ನಟ ಹೃತಿಕ್​ ರೋಷನ್​ (Hrithik Roshan) ಕೂಡ ಎಲ್ಲ ಹಬ್ಬವನ್ನು ಖುಷಿಯಿಂದ ಆಚರಿಸುತ್ತಾರೆ. ಈಗ ಅವರ ಮನೆಯಲ್ಲಿ ದೀಪಾವಳಿಯ ಸಂಭ್ರಮ ತುಂಬಿ ತುಳುಕುತ್ತಿದೆ. ಈ ಖುಷಿಯನ್ನು ಇನ್ನಷ್ಟು ಹೆಚ್ಚಿಸಿರುವುದು ಅವರ ಪ್ರೇಯಸಿ ಸಬಾ ಆಜಾದ್​. ಹೌದು, ಹೃತಿಕ್​ ರೋಷನ್​ ಅವರ ಕುಟುಂಬದ ಜೊತೆ ಸಬಾ ಆಜಾದ್​ (Saba Azad) ಕೂಡ ಸೇರಿಕೊಂಡಿದ್ದಾರೆ. ದೀಪಾವಳಿಯ ಖುಷಿಯಲ್ಲಿ ಅವರು ಫ್ಯಾಮಿಲಿ ಜೊತೆ ಪೋಸ್​ ನೀಡಿದ್ದಾರೆ. ಆ ಫೋಟೋ ವೈರಲ್​ ಆಗಿದೆ.

ಹಲವು ತಿಂಗಳಿಂದ ಹೃತಿಕ್​ ರೋಷನ್​ ಮತ್ತು ಸಬಾ ಆಜಾದ್​ ಅವರು ಡೇಟಿಂಗ್​ ಮಾಡುತ್ತಿದ್ದಾರೆ. ಶೀಘ್ರದಲ್ಲೇ ಅವರು ಮದುವೆ ಆಗಲಿ ಎಂಬುದು ಫ್ಯಾನ್ಸ್​ ಆಸೆ. ಸಬಾ ಆಜಾದ್​ ಅವರು ಹೃತಿಕ್​ ರೋಷನ್​ ಫ್ಯಾಮಿಲಿಗೆ ತುಂಬ ಹತ್ತಿರ ಆಗಿದ್ದಾರೆ. ಪ್ರತಿ ಹಬ್ಬದಲ್ಲೂ ಅವರು ಜೊತೆಯಾಗಿ ಸಂಭ್ರಮಿಸುತ್ತಾರೆ. ಆ ಮೂಲಕ ಅವರಿಬ್ಬರ ಸಂಬಂಧ ಅಧಿಕೃತವಾಗಿದೆ. ಹೃತಿಕ್​ ರೋಷನ್​ ಮತ್ತು ಸಬಾ ಆಜಾದ್​ ಅವರು ಜೊತೆಯಾಗಿರುವ ಅನೇಕ ಫೋಟೋಗಳು ಹರಿದಾಡುತ್ತಿವೆ.

ಈ ಬಾರಿಯ ದೀಪಾವಳಿ ಹಬ್ಬದ ಪ್ರಯುಕ್ತ ಹೃತಿಕ್ ರೋಷನ್​ ಅವರು ಕಪ್ಪು ಬಣ್ಣದ ಕುರ್ತಾ ಧರಿಸಿದ್ದಾರೆ. ಸಬಾ ಆಜಾದ್​ ಅವರು ನೀಲಿ ಮತ್ತು ಕೆಂಪು ಬಣ್ಣದ ಲೆಹಂಗಾ ಧರಿಸಿ ಮಿಂಚಿದ್ದಾರೆ. ಫ್ಯಾಮಿಲಿ ಜೊತೆ ಅವರು ಖುಷಿಯಿಂದ ದೀಪಾವಳಿ ಹಬ್ಬ ಆಚರಿಸಿದ್ದಾರೆ. ಸೋಶಿಯಲ್​ ಮೀಡಿಯಾದಲ್ಲಿ ಫ್ಯಾಮಿಲಿ ಫೋಟೋ ಶೇರ್​ ಮಾಡಿಕೊಳ್ಳುವ ಮೂಲಕ ಹೃತಿಕ್​ ರೋಷನ್​ ಅವರು ಅಭಿಮಾನಿಗಳಿಗೆ ಹಬ್ಬದ ಶುಭಾಶಯ ತಿಳಿಸಿದ್ದಾರೆ. ಈ ಮೊದಲು ಸುಸಾನೆ ಖಾನ್​ ಜೊತೆ ಹೃತಿಕ್​ ಮದುವೆ ಆಗಿದ್ದರು. ಕೆಲವು ವರ್ಷಗಳ ಹಿಂದೆ ಅವರು ವಿಚ್ಛೇದನ ಪಡೆದುಕೊಂಡರು.

ಇದನ್ನೂ ಓದಿ: ಐದೇ ವಾರದಲ್ಲಿ ಸಿಕ್ಸ್ ಪ್ಯಾಕ್ ಮಾಡಿದ ಹೃತಿಕ್; ಇದಕ್ಕೆಲ್ಲಾ ಗರ್ಲ್​​ಫ್ರೆಂಡ್ ಕಾರಣ

ಇತ್ತೀಚೆಗೆ ರಿಲೀಸ್​ ಆದ ‘ಟೈಗರ್​ 3’ ಸಿನಿಮಾದಲ್ಲಿ ಹೃತಿಕ್​ ರೋಷನ್​ ಅತಿಥಿ ಪಾತ್ರ ಮಾಡಿದ್ದಾರೆ. ಸಿದ್ದಾರ್ಥ್​ ಆನಂದ್​ ನಿರ್ದೇಶನ ಮಾಡುತ್ತಿರುವ ‘ಫೈಟರ್​’ ಸಿನಿಮಾದಲ್ಲಿ ಹೃತಿಕ್​ ನಟಿಸುತ್ತಿದ್ದಾರೆ. 2024ರ ಜನವರಿ 25ರಂದು ಆ ಸಿನಿಮಾ ಬಿಡುಗಡೆ ಆಗಲಿದೆ. ಅದರ ಜೊತೆಗೆ ಅಯಾನ್​ ಮುಖರ್ಜಿ ನಿರ್ದೇಶನದ ‘ವಾರ್​ 2’ ಸಿನಿಮಾದಲ್ಲಿ ಅವರು ಜೂನಿಯರ್​ ಎನ್​ಟಿಆರ್​ ಜೊತೆ ತೆರೆ ಹಂಚಿಕೊಳ್ಳಲಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.