3 ದಿನ ಕಳೆದರೂ 100 ಕೋಟಿ ರೂಪಾಯಿ ಗಡಿ ಮುಟ್ಟಲಿಲ್ಲ ‘ಫೈಟರ್​’ ಸಿನಿಮಾ ಕಲೆಕ್ಷನ್​

ಬಾಲಿವುಡ್​ನಲ್ಲಿ ‘ಫೈಟರ್​’ ಸಿನಿಮಾ (Fighter Movie) ಮೇಲೆ ಭಾರಿ ನಿರೀಕ್ಷೆ ಇಟ್ಟುಕೊಳ್ಳಲಾಗಿತ್ತು. ಈ ಸಿನಿಮಾದಲ್ಲಿ ಹೃತಿಕ್​ ರೋಷನ್​ (Hrithik Roshan) ಮತ್ತು ದೀಪಿಕಾ ಪಡುಕೋಣೆ ಅವರು ಜೋಡಿಯಾಗಿ ನಟಿಸಿದ್ದಾರೆ. ಗಣರಾಜ್ಯೋತ್ಸವದ ಪ್ರಯುಕ್ತ ಜನವರಿ 25ರಂದು ಈ ಸಿನಿಮಾ ಬಿಡುಗಡೆ ಆಯಿತು. ಮೊದಲ ದಿನ ಭರ್ಜರಿ ಓಪನಿಂಗ್​ ಪಡೆದುಕೊಳ್ಳಬಹುದು ಎಂಬುದು ಎಲ್ಲರ ನಿರೀಕ್ಷೆ ಆಗಿತ್ತು. ನಿರೀಕ್ಷಿತ ಮಟ್ಟದಲ್ಲಿ ಕಲೆಕ್ಷನ್​ ಮಾಡದಿದ್ದರೂ ಕೂಡ ನಿರ್ಮಾಪಕರು ಖುಷಿ ಆಗುವ ರೀತಿಯಲ್ಲಿ ‘ಫೈಟರ್​’ ಸಿನಿಮಾ ಗಳಿಕೆ ಮಾಡುತ್ತಿದೆ. ಗಲ್ಲಾ ಪೆಟ್ಟಿಗೆಯಲ್ಲಿ ಮೂರು ದಿನಕ್ಕೆ ಈ ಸಿನಿಮಾದ ಕಲೆಕ್ಷನ್​ (Fighter Movie Collection) 93.40 ಕೋಟಿ ರೂಪಾಯಿ ಆಗಿದೆ.

ಸಿದ್ದಾರ್ಥ್​ ಆನಂದ್​ ಅವರು ‘ಫೈಟರ್​’ ಸಿನಿಮಾಗೆ ನಿರ್ದೇಶನ ಮಾಡಿದ್ದಾರೆ. ಕಳೆದ ವರ್ಷ ಜನವರಿಯಲ್ಲಿ ಅವರು ನಿರ್ದೇಶನ ಮಾಡಿದ್ದ ‘ಪಠಾಣ್​’ ಸಿನಿಮಾ ಜಾಗತಿಕ ಬಾಕ್ಸ್​ ಆಫೀಸ್​ನಲ್ಲಿ ಸಾವಿರಾರು ಕೋಟಿ ರೂಪಾಯಿ ಗಳಿಸಿತ್ತು. ಆ ಸಿನಿಮಾಗೆ ಹೋಲಿಸಿದರೆ ‘ಫೈಟರ್​’ ಸಿನಿಮಾದ ಗಳಿಕೆ ಕೊಂಚ ಡಲ್​ ಆಗಿದೆ. ಹಾಗಿದ್ದರೂ ಕೂಡ ಪ್ರತಿ ದಿನ ಈ ಚಿತ್ರಕ್ಕೆ ಬಹುಕೋಟಿ ರೂಪಾಯಿ ಕಮಾಯಿ ಆಗುತ್ತಿದೆ.

ಇದನ್ನೂ ಓದಿ: ಹೃತಿಕ್-ದೀಪಿಕಾ ನಟನೆಯ ‘ಫೈಟರ್’ ಹೇಗಿದೆ? ನೆಟ್ಟಿಗರು ಹೇಳಿದ್ದು ಹೀಗೆ..

ಟ್ರೇಡ್​ ಅನಲಿಸ್ಟ್​ ತರಣ್​ ಆದರ್ಶ್​ ಅವರು ‘ಫೈಟರ್​’ ಸಿನಿಮಾದ ಕಲೆಕ್ಷನ್​ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದಾರೆ. ಮೊದಲ ದಿನ ಅಂದರೆ, ಜನವರಿ 25ರಂದು ಈ ಸಿನಿಮಾ ಗಳಿಸಿದ್ದು 24.60 ಕೋಟಿ ರೂಪಾಯಿ. ಎರಡನೇ ದಿನವಾದ ಶುಕ್ರವಾರ (ಜನವರಿ 26) ಈ ಚಿತ್ರ 41.20 ಕೋಟಿ ರೂಪಾಯಿ ಕಲೆಕ್ಷನ್​ ಮಾಡಿತು. ಇನ್ನೇನು ಇದೇ ರೀತಿಯಲ್ಲಿ ಕಲೆಕ್ಷನ್​ ಹೆಚ್ಚಲಿದೆ ಎಂದುಕೊಂಡರೆ, ಮೂರನೇ ದಿನಕ್ಕೆ ಸ್ವಲ್ಪ ಕುಸಿಯಿತು. ಶನಿವಾರ (ಜ.27) ‘ಫೈಟರ್​’ ಸಿನಿಮಾ 27.60 ಕೋಟಿ ರೂಪಾಯಿ ಗಳಿಸಿದೆ.

2ನೇ ದಿನದ ಏರಿಕೆಯನ್ನು ಗಮನದಲ್ಲಿ ಇಟ್ಟುಕೊಂಡು, ಮೂರು ದಿನದಲ್ಲಿ ‘ಫೈಟರ್​’ ಚಿತ್ರದ ಕಲೆಕ್ಷನ್​ 100 ಕೋಟಿ ರೂಪಾಯಿ ಮೀರಲಿದೆ ಎಂದು ಅಂದಾಜಿಸಲಾಗಿತ್ತು. ಆದರೆ ಶನಿವಾರ ವೀಕೆಂಡ್​ ಇದ್ದರೂ ಕೂಡ ಕಲೆಕ್ಷನ್​ ಇಳಿಮುಖ ಆಯಿತು. 100 ಕೋಟಿ ರೂಪಾಯಿ ಗಡಿ ಮುಟ್ಟಲು ಈ ಸಿನಿಮಾಗೆ ಇನ್ನೂ 6.60 ಕೋಟಿ ರೂಪಾಯಿ ಬೇಕು. ನಾಲ್ಕನೇ ದಿನವಾದ ಇಂದು (ಜನವರಿ 28) ಅನಾಯಾಸವಾಗಿ ಈ ಸಿನಿಮಾ ನೂರು ಕೋಟಿ ರೂಪಾಯಿ ಕ್ಲಬ್​ ಸೇರಲಿದೆ. ಅನಿಲ್​ ಕಪೂರ್​, ಕರಣ್​ ಸಿಂಗ್​ ಗ್ರೋವರ್​, ಅಕ್ಷಯ್​ ಒಬೆರಾಯ್​​ ಮುಂತಾದವರು ಈ ಸಿನಿಮಾದಲ್ಲಿ ನಟಿಸಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ