Rakhi Sawant: ಬೀದಿಗೆ ಬಂತು ಆದಿಲ್ ಖಾನ್-ರಾಖಿ ಸಾವಂತ್ ಮದುವೆ ಗಲಾಟೆ; ಪತಿ ಮೇಲೆ ಅನೈತಿಕ ಸಂಬಂಧದ ಆರೋಪ
Rakhi Sawant Viral Video: ‘ಮೊದಲಿಗೆ ನನ್ನ ಜೊತೆ ಮದುವೆ ಆಗಿದ್ದನ್ನು ಆದಿಲ್ ಖಾನ್ ಒಪ್ಪಿಕೊಳ್ಳಲಿಲ್ಲ. ನಂತರ ಮಾಧ್ಯಮದ ಭಯದಿಂದ ಒಪ್ಪಿಕೊಂಡ’ ಎಂದು ರಾಖಿ ಸಾವಂತ್ ಹೇಳಿದ್ದಾರೆ.
ವಿವಾದಗಳಿಂದಲೇ ಪ್ರಚಾರ ಪಡೆದ ನಟಿ ರಾಖಿ ಸಾವಂತ್ (Rakhi Sawant) ಅವರು ಪ್ರತಿ ದಿನ ಕಣ್ಣೀರು ಹಾಕುತ್ತಿದ್ದಾರೆ. ಮದುವೆ ಕಾರಣದಿಂದ ಅವರು ನೋವು ಅನುಭವಿಸುವಂತಾಗಿದೆ. ಈ ಹಿಂದೆ ರಿತೇಶ್ ಎಂಬುವವರ ಜೊತೆ ರಾಖಿ ಸಾವಂತ್ ವಿವಾಹ ನೆರವೇರಿತ್ತು. ಆದರೆ ಅದು ಮುರಿದು ಬಿತ್ತು. ಕಳೆದ ವರ್ಷ ಆದಿಲ್ ಖಾನ್ (Adil Khan) ಜೊತೆ ರಾಖಿ ಸಾವಂತ್ ಅವರು ಸೀಕ್ರೆಟ್ ಆಗಿ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದರು. ಆ ವಿಚಾರ ಇತ್ತೀಚೆಗೆ ಬೆಳಕಿಗೆ ಬಂದಿತ್ತು. ಆದರೆ ಈಗ ಆ ಮದುವೆ (Rakhi Sawant Wedding) ಕೂಡ ಮುರಿದು ಬೀಳುವ ಸಾಧ್ಯತೆ ದಟ್ಟವಾಗಿದೆ. ಪತಿ ಆದಿಲ್ ಖಾನ್ ವಿರುದ್ಧ ಅನೈತಿಕ ಸಂಬಂಧದ ಆರೋಪ ಮಾಡಿದ್ದಾರೆ ರಾಖಿ ಸಾವಂತ್. ಅವರು ಕಣ್ಣೀರು ಹಾಕುತ್ತ ಮಾತನಾಡಿರುವ ವಿಡಿಯೋ ವೈರಲ್ ಆಗಿದೆ.
ಪಾಪರಾಜಿಗಳು ರಾಖಿ ಸಾವಂತ್ ಅವರ ಹಿಂದೆ ಬಿದ್ದಿದ್ದಾರೆ. ಹೋದಲ್ಲಿ ಬಂದಲ್ಲಿ ಅವರ ಸಂಸಾರದ ಗಲಾಟೆಯ ವಿಚಾರವನ್ನೇ ಕೇಳಲಾಗುತ್ತಿದೆ. ಈ ವೇಳೆ ಪತಿ ಆದಿಲ್ ಖಾನ್ ಬಗೆಗಿನ ಹಲವು ವಿಷಯಗಳನ್ನು ರಾಖಿ ಸಾವಂತ್ ಬಹಿರಂಗ ಪಡಿಸಿದ್ದಾರೆ. ಇತ್ತೀಚೆಗಷ್ಟೇ ರಾಖಿ ತಾಯಿ ನಿಧನರಾದರು. ಆ ದುಃಖ ಮರೆಯುವುದಕ್ಕೂ ಮುನ್ನವೇ ಅವರ ಸಂಸಾರದ ಗಲಾಟೆ ಬೀದಿಗೆ ಬಂದಿದೆ.
ಇದನ್ನೂ ಓದಿ: Rakhi Sawant: ತಾಯಿ ಸತ್ತು ಎರಡೇ ದಿನಕ್ಕೆ ಮದುವೆ ಮುರಿದು ಬೀಳುತ್ತೆ ಅಂತ ರಸ್ತೆಯಲ್ಲಿ ಗಳಗಳನೆ ಅತ್ತ ರಾಖಿ ಸಾವಂತ್
ಕಳೆದ ವರ್ಷ ರಾಖಿ ಸಾವಂತ್ ಅವರು ಮರಾಠಿ ಬಿಗ್ ಬಾಸ್ ಶೋಗೆ ಹೋಗಿದ್ದರು. ಆ ಸಂದರ್ಭದಲ್ಲಿ ಅವರ ಪತಿ ಆದಿಲ್ ಖಾನ್ ಬೇರೊಬ್ಬ ಯುವತಿಯ ಜೊತೆ ಅನೈತಿಕ ಸಂಬಂಧ ಬೆಳೆಸಿಕೊಂಡರು ಎಂದು ಹೇಳಲಾಗುತ್ತಿದೆ. ಆ ಯುವತಿಗೆ ಈಗ ರಾಖಿ ಸಾವಂತ್ ಎಚ್ಚರಿಕೆ ನೀಡುತ್ತಿದ್ದಾರೆ. ಹೇಗಾದರೂ ಮಾಡಿ ತಮ್ಮ ಸಂಸಾರವನ್ನು ಉಳಿಸಿಕೊಳ್ಳಬೇಕು ಎಂದು ಅವರು ಪ್ರಯತ್ನಿಸುತ್ತಿದ್ದಾರೆ.
‘ಈಗ ನಾನು ಆ ಹುಡುಗಿಯ ಹೆಸರು ಹೇಳಲ್ಲ. ಸಮಯ ಬಂದಾಗ ಎಲ್ಲ ಫೋಟೋಗಳನ್ನು ಬಹಿರಂಗಪಡಿಸುತ್ತೇನೆ. ಆಕೆಯ ಜೊತೆಗಿನ ಸಂಬಂಧದ ಕಾರಣದಿಂದಾಗಿ ನಾನು ಮದುವೆ ಬಗ್ಗೆ ಮೌನವಾಗಿರುವಂತೆ ಆದಿಲ್ ಖಾನ್ ಒತ್ತಾಯಿಸಿದ. ಅಲ್ಲಿಯವರೆಗೆ ನಾನು ಸೈಲೆಂಟ್ ಆಗಿದ್ದೆ. ಮೊದಲಿಗೆ ನನ್ನ ಜೊತೆ ಮದುವೆ ಆಗಿದ್ದನ್ನೇ ಆತ ಒಪ್ಪಿಕೊಳ್ಳಲಿಲ್ಲ. ನಂತರ ಮಾಧ್ಯಮದ ಭಯದಿಂದ ಒಪ್ಪಿಕೊಂಡ’ ಎಂದು ರಾಖಿ ಸಾವಂತ್ ಹೇಳಿದ್ದಾರೆ.
ಆ ಯುವತಿಯ ಕಾರಣದಿಂದ ಆದಿಲ್ ಖಾನ್ ವಿಚ್ಚೇದನ ನೀಡಿದರೆ ಅದನ್ನು ತಾವು ಒಪ್ಪುವುದಿಲ್ಲ ಎಂದು ರಾಖಿ ಸಾವಂತ್ ಹೇಳಿದ್ದಾರೆ. ‘ಬೇರೆ ಹುಡುಗಿಯರ ರೀತಿ ನಾನು ಸುಮ್ಮನೆ ಇರುವುದಿಲ್ಲ. ನೀನು ಬೆದರಿಕೆ ಹಾಕಿದರೆ ನಾನು ಅದನ್ನು ಸಹಿಸುವುದಿಲ್ಲ’ ಎಂದು ರಾಖಿ ಸಾವಂತ್ ಅವರು ಆ ಯುವತಿಗೆ ಎಚ್ಚರಿಕೆ ನೀಡಿದ್ದಾರೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.