ಡಿಸೆಂಬರ್​​ನಲ್ಲಿ ರಿಲೀಸ್ ಆಗಲಿದೆ ‘ಕಿಂಗ್’ ಸಿನಿಮಾ; ದೊಡ್ಡ ಸಿನಿಮಾಗಳ ಜೊತೆ ಕಾಂಪಿಟೇಷನ್

ಬಾಲಿವುಡ್ ಬಾದ್‌ಷಾ ಶಾರುಖ್ ಖಾನ್ ಅವರ ಬಹುನಿರೀಕ್ಷಿತ ‘ಕಿಂಗ್’ ಸಿನಿಮಾದ ಬಿಡುಗಡೆ ದಿನಾಂಕ ಕೊನೆಗೂ ಅಧಿಕೃತವಾಗಿದೆ. ಸಿದ್ದಾರ್ಥ್ ಆನಂದ್ ನಿರ್ದೇಶನದ ಈ ಆಕ್ಷನ್ ಅಡ್ವೆಂಚರ್ ಚಿತ್ರಕ್ಕಾಗಿ ಪ್ರಪಂಚದಾದ್ಯಂತ ಇರುವ ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ. ಡಿಸೆಂಬರ್ 24ರಂದು ಸಿನಿಮಾ ವಿಶ್ವದಾದ್ಯಂತ ತೆರೆಕಾಣಲಿದೆ. ಈ ಮೂಲಕ ಶಾರೂಖ್ ಖಾನ್ ವರ್ಷಾಂತ್ಯಕ್ಕೆ ಬಿಗ್ ಧಮಾಕಾ ಮಾಡಲು ಸಜ್ಜಾಗಿದ್ದಾರೆ.

ತಮ್ಮ ಎಕ್ಸ್ ಖಾತೆಯಲ್ಲಿ ನಡೆಸಿದ ಅಭಿಮಾನಿಗಳೊಂದಿಗಿನ ಸಂವಾದದಲ್ಲಿ ಶಾರುಖ್ ಈ ವಿಚಾರವನ್ನು ಖಚಿತಪಡಿಸಿದ್ದಾರೆ. ಸಿನಿಮಾ ಯಾವಾಗ ಬರಲಿದೆ ಎಂದು ಕೇಳಿದ ಅಭಿಮಾನಿಗೆ ಶಾರುಖ್ ಅತ್ಯಂತ ಸ್ವಾರಸ್ಯಕರವಾಗಿ ಉತ್ತರಿಸಿದ್ದಾರೆ. ‘ಈಗಲೇ ಹೆಚ್ಚು ಕಾಯಿಸುವುದಿಲ್ಲ. ಅತ್ಯುತ್ತಮವಾದ ಸಿನಿಮಾವನ್ನು ನಿಮಗಾಗಿ ಸಿದ್ಧಪಡಿಸುತ್ತಿದ್ದೇನೆ. ನಿಮ್ಮ ಮನಸ್ಸಿಗೆ ತೃಪ್ತಿ ಸಿಗುವಂತಹ ಚಿತ್ರ ಇದಾಗಲಿದೆ. ಡಿಸೆಂಬರ್ 24ರೊಳಗೆ ಎಲ್ಲವೂ ನಿಮ್ಮ ಮುಂದೆ ಬರಲಿದೆ’ ಎಂದು ಶಾರುಖ್ ಖಾನ್ ಬರೆದುಕೊಂಡಿದ್ದಾರೆ.

ಸಿನಿಮಾದ ಟ್ರೇಲರ್ ಬಿಡುಗಡೆ ಮಾಡುವಂತೆ ಅಭಿಮಾನಿಯೊಬ್ಬರು ಮನವಿ ಮಾಡಿಕೊಂಡಿದ್ದರು. ಅದಕ್ಕೂ ಶಾರೂಖ್ ತಮ್ಮದೇ ಶೈಲಿಯಲ್ಲಿ ಪ್ರತಿಕ್ರಿಯೆ ನೀಡಿದ್ದಾರೆ. ‘ಈಗಲೇ ಕೇವಲ ಮಾತುಕತೆ ಮಾತ್ರ. ಟ್ರೇಲರ್ ಆಮೇಲೆ ಬರಲಿದೆ. ಚಿತ್ರ ಬಿಡುಗಡೆಗೆ ಇನ್ನೂ ನೂರು ದಿನಗಳ ಸಮಯವಿದೆ. ಡಿಸೆಂಬರ್ 24ಕ್ಕೆ ಸಿನಿಮಾ ಬರಲಿದೆ. ಸ್ವಲ್ಪ ತಾಳ್ಮೆಯಿಂದಿರಿ’ ಎಂದು ಕಿಂಗ್ ಖಾನ್ ವಿನಂತಿಸಿದ್ದಾರೆ.

ವಿಶೇಷವೆಂದರೆ ಈ ಬಾರಿ ಹಾಲಿವುಡ್‌ನ ಬೃಹತ್ ಸಿನಿಮಾಗಳ ಜೊತೆ ‘ಕಿಂಗ್’ ಮುಖಾಮುಖಿಯಾಗಲಿದೆ. ಡಿಸೆಂಬರ್ 18ರಂದು ‘ಅವೆಂಜರ್ಸ್: ಡೂಮ್ಸ್‌ಡೇ’ ಮತ್ತು ‘ಡ್ಯೂನ್: ಪಾರ್ಟ್ 3’ ಚಿತ್ರಗಳು ತೆರೆಗೆ ಬರಲಿವೆ. ಭಾರತೀಯ ಬಾಕ್ಸ್ ಆಫೀಸ್‌ನಲ್ಲಿ ಮಾರ್ವೆಲ್ ಸಿನಿಮಾಗಳಿಗೆ ಭಾರಿ ಬೇಡಿಕೆ ಇದೆ. ಹೀಗಾಗಿ ಹಾಲಿವುಡ್ ಸಿನಿಮಾಗಳ ನಡುವೆಯೂ ಶಾರೂಖ್ ತಮ್ಮ ಚಿತ್ರವನ್ನು ಧೈರ್ಯವಾಗಿ ಕಣಕ್ಕಿಳಿಸುತ್ತಿದ್ದಾರೆ.

ಇದನ್ನೂ ಓದಿ: ಶಾರುಖ್ ಖಾನ್‌ಗೆ ಇರುವ ಒಂದೇ ಒಂದು ಲೋಪ ಏನೆಂದು ಬಹಿರಂಗಪಡಿಸಿದ ಪಲಾಶ್ ಸೇನ್

ಹಾಲಿವುಡ್ ಚಿತ್ರಗಳ ಅಬ್ಬರದ ನಡುವೆಯೂ ಶಾರೂಖ್ ಸಿನಿಮಾ ರಿಲೀಸ್ ಆಗುತ್ತಿರುವುದು ಕುತೂಹಲ ಮೂಡಿಸಿದೆ. ಪ್ರಮುಖ ಹಬ್ಬದ ರಜಾದಿನಗಳನ್ನು ಗುರಿಯಾಗಿಸಿಕೊಂಡು ಚಿತ್ರತಂಡ ಈ ನಿರ್ಧಾರ ತೆಗೆದುಕೊಂಡಿದೆ. ದೊಡ್ಡ ಮಟ್ಟದ ಪೋಟಿ ಇದ್ದರೂ ಶಾರೂಖ್ ಖಾನ್ ಕಲೆಕ್ಷನ್ ಧೂಳೆಬ್ಬಿಸುವುದು ಖಚಿತ ಎನ್ನಲಾಗುತ್ತಿದೆ. ಈ ಬಿಗ್ ಕ್ರಿಸ್‌ಮಸ್ ಕ್ಲಾಶ್‌ಗಾಗಿ ಈಗಿನಿಂದಲೇ ಕೌಂಟ್‌ಡೌನ್ ಶುರುವಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.

Published On - 11:18 am, Wed, 16 September 26