Snehalata Dixit: ಮಾಧುರಿ ದೀಕ್ಷಿತ್​ ತಾಯಿ ಸ್ನೇಹಲತಾ ನಿಧನ; 91ನೇ ವಯಸ್ಸಿಗೆ ಇಹಲೋಕ ತ್ಯಜಿಸಿದ ಹಿರಿಯ ಜೀವ

ಬಾಲಿವುಡ್​ನ ಖ್ಯಾತ ನಟಿ ಮಾಧುರಿ ದೀಕ್ಷಿತ್​ (Madhuri Dixit) ಅವರ ಮನೆಯಲ್ಲಿ ಶೋಕದ ವಾತಾವರಣ ಸೃಷ್ಟಿ ಆಗಿದೆ. ಮಾಧುರಿ ತಾಯಿ ಸ್ನೇಹಲತಾ ದೀಕ್ಷಿತ್​ (Snehalata Dixit) ಅವರು ನಿಧನರಾಗಿದ್ದಾರೆ. ಮಾಧುರಿ ದೀಕ್ಷಿತ್​ ವೃತ್ತಿಜೀವನಕ್ಕೆ ಅವರ ತಾಯಿ ನೀಡಿದ ಬೆಂಬಲ ಅಪಾರ. ಅಮ್ಮ ಕಲಿಸಿದ ಶಿಸ್ತಿನ ಪಾಠದ ಬಗ್ಗೆ ಮಾಧುರಿ ಅವರು ಅನೇಕ ಬಾರಿ ಹೇಳಿಕೊಂಡಿದ್ದರು. ಇಂದು (ಮಾರ್ಚ್​ 12) ಸ್ನೇಹಲತಾ ದೀಕ್ಷಿತ್​ ಅವರು ಮುಂಬೈನ ನಿವಾಸದಲ್ಲಿ ಕೊನೆಯುಸಿರು ಎಳೆದರು. ಅವರಿಗೆ 91 ವರ್ಷ ವಯಸ್ಸಾಗಿತ್ತು. ಮುಂಬೈನಲ್ಲೇ ಅವರ ಅಂತ್ಯಕ್ರಿಯೆ ನಡೆಯಲಿದೆ ಎಂದು ವರದಿ ಆಗಿದೆ. ತಾಯಿಯನ್ನು ಕಳೆದುಕೊಂಡ ಮಾಧುರಿ ದೀಕ್ಷಿತ್​ ಅವರಿಗೆ ಬಾಲಿವುಡ್​ನ (Bollywood) ಅನೇಕ ಗಣ್ಯರು ಸಂತಾಪ ಸೂಚಿಸುತ್ತಿದ್ದಾರೆ. ಸೋಶಿಯಲ್​ ಮೀಡಿಯಾ ಮೂಲಕ ಅಭಿಮಾನಿಗಳು ಕೂಡ ಸ್ನೇಹಲತಾ ದೀಕ್ಷಿತ್​ ಆತ್ಮಕ್ಕೆ ಶಾಂತಿ ಕೋರುತ್ತಿದ್ದಾರೆ.

ಗಾಯನದಲ್ಲಿ ಸ್ನೇಹಲತಾ ದೀಕ್ಷಿತ್​ ಅವರು ಆಸಕ್ತಿ ಹೊಂದಿದ್ದರು. 2013ರಲ್ಲಿ ಮಾಧುರಿ ದೀಕ್ಷಿತ್​ ನಟಿಸಿದ್ದ ‘ಗುಲಾಬ್​ ಗ್ಯಾಂಗ್​’ ಸಿನಿಮಾದ ಒಂದು ಹಾಡಿಗೆ ಸ್ನೇಹಲತಾ ಧ್ವನಿ ನೀಡಿದ್ದರು. ಆ ಘಟನೆಯನ್ನು ನಿರ್ದೇಶಕ ಅನುಭವ್​ ಸಿನ್ಹಾ ಅವರು ವಿವರಿಸಿದ್ದರು. ‘ಒಂದು ಹಾಡು ಹೇಳಬೇಕು ಅಂತ ನಾವು ಮಾಧರಿ ಅವರಿಗೆ ಕೇಳಿದೆವು. ರೆಕಾರ್ಡಿಂಗ್​ ದಿನ ಮಾಧುರಿ ಜೊತೆ ಸ್ನೇಹಲತಾ ಕೂಡ ಬಂದಿದ್ದರು. ಅವರ ಧ್ವನಿಯೂ ಮಧುರವಾಗಿದೆ ಅಂತ ಗೊತ್ತಾಯಿತು. ಹಾಗಾಗಿ ಅವರ ಬಳಿಯೂ ಹಾಡುವಂತೆ ಕೇಳಿಕೊಂಡೆವು. ಇಬ್ಬರೂ ಜೊತೆಯಾಗಿ ಆ ಹಾಡಿಗೆ ಧ್ವನಿ ನೀಡಿದರು’ ಎಂದು ಅನುಭವ್​ ಸಿನ್ಹಾ ಹೇಳಿದ್ದರು.

ಇದನ್ನೂ ಓದಿ: Madhuri Dixit: ಪಾಕಿಸ್ತಾನಿ ಹುಡುಗಿಯ ಡ್ಯಾನ್ಸ್​ ಕಾಪಿ ಮಾಡಿದ ಮಾಧುರಿ ದೀಕ್ಷಿತ್​; ನೆಟ್ಟಿಗರಿಂದ ಬುದ್ಧಿಮಾತು

ವೃತ್ತಿಜೀವನದಲ್ಲಿ ಎಷ್ಟೇ ಜನಪ್ರಿಯತೆ, ಯಶಸ್ಸು ಸಿಕ್ಕರೂ ಕೂಡ ವೈಯಕ್ತಿಕ ಬದುಕು ಹೇಗೆ ಇರಬೇಕು ಎಂದು ಮಾಧುರಿ ದೀಕ್ಷಿತ್​ಗೆ ಕಲಿಸಿದ್ದೇ ಅವರ ತಾಯಿ ಸ್ನೇಹಲತಾ. ಆ ಬಗ್ಗೆ ಕಳೆದ ವರ್ಷ ಸಂದರ್ಶನವೊಂದರಲ್ಲಿ ಮಾಧುರಿ ದೀಕ್ಷಿತ್​ ಹೇಳಿಕೊಂಡಿದ್ದರು.

‘ನಾನು ಸಿನಿಮಾ ನಟಿ ಆದ ನಂತರವೂ ಒಂದು ವೇಳೆ ನನ್ನ ರೂಮ್​ ಸರಿಯಾಗಿ ಇಟ್ಟುಕೊಳ್ಳದೇ ಇದ್ದರೆ ಅಮ್ಮ ಬೈಯ್ಯುತ್ತಿದ್ದರು. ಆ ರೀತಿ ಅವರು ನನ್ನನ್ನು ಬೆಳೆಸಿದರು. ಅದಕ್ಕಾಗಿಯೇ ನಾನು ಹೀಗೆ ಇದ್ದೇನೆ. ಮನೆಗೆ ಬಂದಾಗ ಗಂಡ ಮತ್ತು ಮಕ್ಕಳನ್ನು ನೋಡುತ್ತೇನೆ. ಕೆಲಸದ ವಿಚಾರವನ್ನು ಸ್ಟುಡಿಯೋದಲ್ಲಿ ಬಿಟ್ಟು ಬರುತ್ತೇನೆ’ ಎಂದು ಮಾಧುರಿ ದೀಕ್ಷಿತ್​ ಹೇಳಿದ್ದರು.

ಇದನ್ನೂ ಓದಿ: ಸಲಿಂಗಕಾಮಿ ಪಾತ್ರದಲ್ಲಿ ಮಾಧುರಿ ದೀಕ್ಷಿತ್​? ಹೊರಬಿತ್ತು ಫ್ಯಾನ್ಸ್​ ಅಚ್ಚರಿಪಡುವಂತಹ ಬ್ರೇಕಿಂಗ್​ ನ್ಯೂಸ್​

ಸ್ನೇಹಲತಾ ದೀಕ್ಷಿತ್​ ಅವರ 90ನೇ ವರ್ಷದ ಹುಟ್ಟುಹಬ್ಬಕ್ಕೆ ಮಾಧುರಿ ದೀಕ್ಷಿತ್​ ಭಾವುಕವಾಗಿ ಪೋಸ್ಟ್​ ಮಾಡಿದ್ದರು. ‘ನೀವು ಕಲಿಸಿದ ಪಾಠಗಳೇ ನನ್ನ ಬದುಕಿಗೆ ದೊಡ್ಡ ಉಡುಗೊರೆ’ ಎಂದು ಅವರು ಬರೆದುಕೊಂಡಿದ್ದರು.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.