Aishwarya Rai: ಮದುವೆಯ ದಿನ 75 ಲಕ್ಷ ರೂಪಾಯಿ ಬೆಲೆಯ ಸೀರೆ ಧರಿಸಿದ್ದ ಐಶ್ವರ್ಯಾ ರೈ? ಇದರ ಅಸಲಿಯತ್ತು ಇಲ್ಲಿದೆ..

ಸೆಲೆಬ್ರಿಟಿಗಳ ಮದುವೆ ಸಖತ್​ ಅದ್ದೂರಿಯಾಗಿ ನಡೆಯುತ್ತದೆ. ಮದುವೆಯ ದಿನ ಅವರು ಧರಿಸಿದ ಬಟ್ಟೆ ಬಗ್ಗೆ ಸದಾ ಕಾಲ ಚರ್ಚೆ ಆಗುತ್ತಲೇ ಇರುತ್ತದೆ. ನಟಿ ಐಶ್ವರ್ಯಾ ರೈ (Aishwarya Rai) ಅವರ ಮದುವೆ ಸೀರೆ ಕೂಡ ಇಂದಿಗೂ ಹಾಟ್​ ಟಾಪಿಕ್​ ಆಗಿಯೇ ಉಳಿದುಕೊಂಡಿದೆ. ಬಾಲಿವುಡ್​ನ ಖ್ಯಾತ ನಟ ಅಭಿಷೇಕ್​ ಬಚ್ಚನ್​ (Abhishek Bachchan) ಜೊತೆ ಐಶ್ವರ್ಯಾ ರೈ ಅವರು ಹಸೆಮಣೆ ಏರಿದ್ದು 2007ರಲ್ಲಿ. ಅದಾಗಿ 16 ವರ್ಷ ಕಳೆದರೂ ಕೂಡ ಆ ಗ್ರ್ಯಾಂಡ್​ ವಿವಾಹದ ವಿವರಗಳ ಬಗ್ಗೆ ಗಾಸಿಪ್​ ಓಡಾಡುತ್ತಲೇ ಇವೆ. ಈಗಾಗಲೇ ವರದಿ ಆಗಿರುವಂತೆ, ಅಂದು ಐಶ್ವರ್ಯಾ ರೈ ಅವರು ಧರಿಸಿದ್ದ ಸೀರೆಯ (Aishwarya Rai Marriage Saree) ಬೆಲೆ ಬರೋಬ್ಬರಿ 75 ಲಕ್ಷ ರೂಪಾಯಿ! ಬಂಗಾರದ‌ ಎಳೆಗಳ ಕಸೂತಿಯಿಂದ ಈ ಸೀರೆ ಮಿರಿಮಿರಿ ಮಿಂಚುತ್ತಿತ್ತು ಅಂತ ಕೂಡ ಸುದ್ದಿ ಆಗಿತ್ತು. ಈ ಬಗ್ಗೆ ಅಧಿಕೃತವಾಗಿ ಅವರ ಕುಟುಂಬದವರು ಯಾರೂ ಮಾತನಾಡಿಲ್ಲ. ಹಾಗಿದ್ದರೂ ಕೂಡ ಆ ಗಾಸಿಪ್​ ಈಗಲೂ ಚಾಲ್ತಿಯಲ್ಲಿದೆ.

ಭಾರತೀಯ ಚಿತ್ರರಂಗದ ಬಹುಬೇಡಿಕೆಯ ನಟಿಯರ ಪಟ್ಟಿಯಲ್ಲಿ ಐಶ್ವರ್ಯಾ ರೈ ಬಚ್ಚನ್​ ಅವರ ಹೆಸರು ಕೂಡ ಇದೆ. ಪ್ರತಿ ಚಿತ್ರಕ್ಕೆ ಅವರು ಹತ್ತಾರು ಕೋಟಿ ರೂಪಾಯಿ ಸಂಭಾವನೆ ಪಡೆದುಕೊಳ್ಳುತ್ತಾರೆ. ಆ ಶ್ರೀಮಂತಿಕೆಗೆ ತಕ್ಕಂತೆಯೇ ಅವರ ಲೈಫ್​ ಸ್ಟೈಲ್​ ಇದೆ. ಹಲವು ಕಡೆಗಳಲ್ಲಿ ಪ್ರಾಪರ್ಟಿ ಹೊಂದಿದ್ದಾರೆ. ಒಂದು ಮೂಲದ ಪ್ರಕಾರ ಅವರ ಒಟ್ಟು ಆಸ್ತಿ ಮೌಲ್ಯ 770 ಕೋಟಿ ರೂಪಾಯಿಗೂ ಅಧಿಕ. ಈ ಪರಿ ಶ್ರೀಮಂತಿಕೆ ಇರುವ ಅವರು 75 ಲಕ್ಷ ರೂಪಾಯಿ ಬೆಲೆಯ ಸೀರೆ ಧರಿಸಿದ್ದರಲ್ಲಿ ಅಚ್ಚರಿ ಏನಿಲ್ಲ ಎಂದುಕೊಳ್ಳುತ್ತಾರೆ ಅಭಿಮಾನಿಗಳು. ಆದರೆ ಟ್ವಿಸ್ಟ್​ ಬೇರೆಯೇ ಇದೆ.

ಇದನ್ನೂ ಓದಿ: 50ನೇ ವಯಸ್ಸಿನಲ್ಲೂ ಹದಿಹರೆಯದ ಯುವತಿಯಂತೆ ಮಿಂಚುವ ಐಶ್ವರ್ಯಾ ರೈ

ಮದುವೆಯ ದಿನ ಐಶ್ವರ್ಯಾ ರೈ ಧರಿಸಿದ್ದ ಸೀರೆಯನ್ನು ನೀತಾ ಲುಲ್ಲ ವಿನ್ಯಾಸ ಮಾಡಿದ್ದರು. ಈ ಹಿಂದೆ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಅವರು ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ್ದರು. ಹಸೆಮಣೆ ಏರುವಾಗ ಐಶ್ವರ್ಯಾ ರೈ ಅವರು ಧರಿಸಿದ್ದು ಕಾಂಜಿವರಂ ಸೀರೆ. ಎಷ್ಟೇ ಅದ್ದೂರಿಯಾಗಿ ಇದ್ದರೂ ಕೂಡ ಆ ಸೀರೆಯ ಬೆಲೆ ಒಂದು ಕೋಟಿ ರೂಪಾಯಿ ಅಥವಾ 75 ಲಕ್ಷ ರೂಪಾಯಿ ಆಗಿರಲು ಸಾಧ್ಯವಿಲ್ಲ ಎಂದು ನೀತಾ ಲುಲ್ಲ ಹೇಳಿದ್ದರು. ಹಾಗಿದ್ದರೂ ಕೂಡ ಆ ಸೀರೆಯ ಬೆಲೆ ಎಷ್ಟು ಎಂಬುದನ್ನು ಅವರು ರಿವೀಲ್​ ಮಾಡಿಲ್ಲ.

ಇದನ್ನೂ ಓದಿ: ಭುಜದ ಎತ್ತರಕ್ಕೆ ಬೆಳೆದು ನಿಂತ ಪುತ್ರಿ ಆರಾಧ್ಯಾ ಮಾತು ಕೇಳಿ ಅಚ್ಚರಿಪಟ್ಟ ಐಶ್ವರ್ಯಾ ರೈ; ವಿಡಿಯೋ ವೈರಲ್​

ಐಶ್ವರ್ಯಾ ರೈ ಅವರು 1994ರಲ್ಲಿ ಮಿಸ್​ ಇಂಡಿಯಾ ಕಿರೀಟ ಗೆದ್ದರು. 1997ರಲ್ಲಿ ಅವರು ಚಿತ್ರರಂಗಕ್ಕೆ ಕಾಲಿಟ್ಟರು. ಬಣ್ಣದ ಲೋಕದಲ್ಲಿ ಅವರಿಗೆ ಎರಡೂವರೆ ದಶಕಕ್ಕೂ ಹೆಚ್ಚು ಅನುಭವ ಇದೆ. ಈ ಪಯಣದಲ್ಲಿ ಅವರು ಸಾಕಷ್ಟು ಯಶಸ್ಸು ಕಂಡರು. ವರ್ಷದಿಂದ ವರ್ಷಕ್ಕೆ ಅವರ ಶ್ರೀಮಂತಿಕೆ ಕೂಡ ಹೆಚ್ಚುತ್ತಾ ಹೋಯಿತು. 21 ಕೋಟಿ ರೂ. ಬೆಲೆಬಾಳುವ ಬಂಗಲೆಯನ್ನು ಮುಂಬೈನಲ್ಲಿ ಅವರು ಹೊಂದಿದ್ದಾರೆ. 7 ಕೋಟಿ ರೂ. ಬೆಲೆಯ ರೋಲ್ಸ್ ರಾಯ್ಸ್ ಕಾರಿಗೂ ಅವರು ಒಡತಿ. ಜಾಗತಿಕ ಮಟ್ಟದ ಅನೇಕ ಪ್ರತಿಷ್ಠಿತ ಬ್ರ್ಯಾಂಡ್​ಗಳಿಗೆ ಅವರು ಪ್ರಚಾರ ರಾಯಭಾರಿ ಆಗಿದ್ದಾರೆ. ಅದರಿಂದಲೂ ಅವರಿಗೆ ಕೈ ತುಂಬ ಸಂಭಾವನೆ ಸಿಗುತ್ತಿದೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.