Urfi Javed: ಚಿಕ್ಕ ಹುಡುಗರ ವಿರುದ್ಧ ಪೊಲೀಸರಿಗೆ ದೂರು ನೀಡಲು ಮುಂದಾದ ಉರ್ಫಿ ಜಾವೇದ್; ಬಾಲಕರ ತಪ್ಪೇನು?
Urfi Javed Controversy: ಬಾಲಕರ ವರ್ತನೆ ಕಂಡು ಉರ್ಫಿ ಜಾವೇದ್ ಸಿಟ್ಟಾಗಿದ್ದಾರೆ. ‘ಈ ಹುಡುಗರ ಪಾಲಕರು ಯಾರೆಂದು ಗೊತ್ತಿದ್ದರೆ ನನಗೆ ತಿಳಿಸಿ’ ಎಂದು ಅವರು ಕೇಳಿಕೊಂಡಿದ್ದಾರೆ.
ನಟಿ ಉರ್ಫಿ ಜಾವೇದ್ (Urfi Javed) ಅವರು ಆಗಾಗ ಸುದ್ದಿ ಆಗುತ್ತಲೇ ಇರುತ್ತಾರೆ. ಅನೇಕ ಕಾರಣಗಳಿಂದ ಅವರು ಕಿರಿಕ್ ಮಾಡಿಕೊಳ್ಳುತ್ತಾರೆ. ಸಾಕಷ್ಟು ಫೇಮಸ್ ವ್ಯಕ್ತಿಗಳನ್ನು ಉರ್ಫಿ ಎದುರು ಹಾಕಿಕೊಂಡ ಉದಾಹರಣೆ ಇದೆ. ಅಚ್ಚರಿ ಎಂದರೆ, ಈಗ ಅವರು ಚಿಕ್ಕ ಹುಡುಗರ ವಿರುದ್ಧ ಗರಂ ಆಗಿದ್ದಾರೆ. 10 ಬಾಲಕರ ವಿರುದ್ಧ ಪೊಲೀಸರಿಗೆ ದೂರು (Police Complaint) ನೀಡಲು ಉರ್ಫಿ ಜಾವೇದ್ ಮುಂದಾಗಿದ್ದಾರೆ. ಈ ಬಗ್ಗೆ ಅವರು ಸೋಶಿಯಲ್ ಮೀಡಿಯಾದಲ್ಲಿ ಸ್ಪಷ್ಟವಾಗಿ ಮಾಹಿತಿ ಹಂಚಿಕೊಂಡಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲಿ ಟ್ರೋಲ್ ಆಗುವ ಈ ನಟಿಗೆ ಬಾಲಕರು ಕಿರುಕುಳ (Harassment) ನೀಡಿದ್ದಾರೆ. ಮುಂದಿನ ಪೀಳಿಗೆಯ ಮಕ್ಕಳು ಈ ರೀತಿ ಆಗಿದ್ದರ ಬಗ್ಗೆ ಅವರು ಕಳವಳ ವ್ಯಕ್ತಪಡಿಸಿದ್ದಾರೆ.
ಉರ್ಫಿ ಜಾವೇದ್ ಬಗ್ಗೆ ಹೊಸದಾಗಿ ಹೇಳುವಂಥದ್ದು ಏನೂ ಇಲ್ಲ. ಬಟ್ಟೆಗಳ ಕಾರಣದಿಂದಲೇ ಅವರು ಸಾಕಷ್ಟು ಖ್ಯಾತಿ-ಕುಖ್ಯಾತಿ ಗಳಿಸಿದ್ದಾರೆ. ಚಿತ್ರ-ವಿಚಿತ್ರ ಬಟ್ಟೆ ಧರಿಸಿ ಅವರು ಆಗಾಗ ಟ್ರೋಲ್ ಆಗುತ್ತಾರೆ. ಈ ನಟಿಗೆ 10 ಬಾಲಕರು ಪದೇ ಪದೇ ಫೋನ್ ಮಾಡಿ ಕಿರುಕುಳ ನೀಡಿದ್ದಾರೆ. ‘ಇವರಿಗೆ ನನ್ನ ನಂಬರ್ ಹೇಗೆ ಸಿಕ್ಕಿತೋ ತಿಳಿದಿಲ್ಲ. ಈ ಮಕ್ಕಳಿಗೆಲ್ಲ ಏನಾಗಿದೆ? ಕಾರಣ ಇಲ್ಲದೇ ಕಿರುಕುಳ ನೀಡುತ್ತಾ ಇದ್ದಾರೆ. ನಾನು ಪೊಲೀಸರಿಗೆ ದೂರು ನೀಡುತ್ತೇನೆ. ಈ ಹುಡುಗರ ಪಾಲಕರು ಯಾರೆಂದು ಗೊತ್ತಿದ್ದರೆ ನನಗೆ ತಿಳಿಸಿ, ನಾನು ನಿಮಗೆ ಬಹುಮಾನ ಕೊಡುತ್ತೇನೆ’ ಎಂದು ಉರ್ಫಿ ಜಾವೇದ್ ಬರೆದುಕೊಂಡಿದ್ದಾರೆ.
ತಮಗೆ ಕಿರುಕುಳ ನೀಡಿದ ಹುಡುಗನ ಇನ್ಸ್ಟಾಗ್ರಾಮ್ ಖಾತೆಯ ವಿವರನ್ನು ಉರ್ಫಿ ಜಾವೇದ್ ಅವರು ತಮ್ಮ ಸ್ಟೋರಿಯಲ್ಲಿ ಶೇರ್ ಮಾಡಿಕೊಂಡಿದ್ದಾರೆ. ಅದನ್ನು ಆ ಹುಡುಗ ತನ್ನ ಖಾತೆಯಲ್ಲಿ ಹೆಮ್ಮೆಯಿಂದ ಪೋಸ್ಟ್ ಮಾಡಿಕೊಂಡಿದ್ದಾನೆ. ಇದು ಉರ್ಫಿ ಜಾವೇದ್ ಅವರಿಗೆ ಅಚ್ಚರಿ ಮೂಡಿಸಿದೆ. ‘ಮುಂದಿನ ಪೀಳಿಗೆ ಕೆಟ್ಟು ಹೋಗಿದೆ’ ಎಂದು ಅವರು ಟೀಕಿಸಿದ್ದಾರೆ.
ಹಿಂದಿ ಕಿರುತೆರೆಯಲ್ಲಿ ಉರ್ಫಿ ಜಾವೇದ್ ಅವರು ಗುರುತಿಸಿಕೊಂಡಿದ್ದರು. ಆದರೆ ಅವರಿಗೆ ಹೆಚ್ಚು ಜನಪ್ರಿಯತೆ ಸಿಕ್ಕಿದ್ದು ‘ಬಿಗ್ ಬಾಸ್ ಒಟಿಟಿ’ ಮೊದಲ ಸೀಸನ್ ಮೂಲಕ. ಅಲ್ಲಿಂದ ಹೊರಬಂದ ಬಳಿಕ ಅವರು ಬೋಲ್ಡ್ ಆಗಿ ಬಟ್ಟೆ ಧರಿಸಿ ಫೋಟೋಶೂಟ್ ಮಾಡಿಸುವ ಮೂಲಕ ಫೇಮಸ್ ಆದರು. ಸೋಶಿಯಲ್ ಮೀಡಿಯಾದಲ್ಲಿ ಪ್ರತಿ ದಿನವೂ ಅವರನ್ನು ಟ್ರೋಲ್ ಮಾಡಲಾಗುತ್ತದೆ. ಅಶ್ಲೀಲವಾಗಿ ಬಟ್ಟೆ ಹಾಕಿಕೊಳ್ಳುತ್ತಾರೆ ಎಂಬ ಕಾರಣಕ್ಕೆ ಅನೇಕರು ದೂರು ನೀಡಿದ್ದೂ ಇದೆ. ಆದರೆ ಅದಕ್ಕೆಲ್ಲ ಉರ್ಫಿ ಜಾವೇದ್ ತಲೆ ಕೆಡಿಸಿಕೊಂಡಿಲ್ಲ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 9:11 am, Mon, 5 December 22