ಒಂದೇ ವಾರಕ್ಕೆ ಚಿತ್ರಮಂದಿರದಿಂದ ಸಂಪೂರ್ಣವಾಗಿ ಕಾಲ್ಕಿತ್ತ ಕಂಗನಾ ಸಿನಿಮಾ; ‘ಧಾಕಡ್’ ಗಳಿಸಿದ್ದೆಷ್ಟು?

ಲೇಡಿ ಸೂಪರ್​ಸ್ಟಾರ್ ಎಂದು ಬಿಂಬಿಸಿಕೊಂಡು ಓಡಾಡುತ್ತಿದ್ದ ಕಂಗನಾ ರಣಾವತ್​ಗೆ (Kangana Ranaut) ತೀವ್ರ ಮುಖಭಂಗವಾಗಿದೆ. ದೊಡ್ಡ ಬಜೆಟ್​ನಲ್ಲಿ ಸಿದ್ಧವಾದ ‘ಧಾಕಡ್​’ ಸಿನಿಮಾ (Dhaakad Movie) ಮಕಾಡೆ ಮಲಗಿದೆ. ಇದರಿಂದ ಅವರು ಸೋಲಿನ ರುಚಿ ಉಂಡಿದ್ದಾರೆ. ಬಾಲಿವುಡ್​ ಸಿನಿಮಾಗಳು ಸತತವಾಗಿ ಸೋಲುತ್ತಿರುವ ಬಗ್ಗೆ ಅವರಿಗೆ ಬೇಸರ ಇತ್ತು. ‘ಧಾಕಡ್​’ ಮೂಲಕ ಕ್ರಾಂತಿ ಮಾಡುವ ಕನಸು ಕಂಡಿದ್ದರು. ಆದರೆ, ಆ ಕನಸು ನುಚ್ಚು ನೂರಾಗಿದೆ. ಈ ಸಿನಿಮಾದಿಂದ ನಿರ್ಮಾಪಕರಿಗೆ ದೊಡ್ಡ ಮಟ್ಟದಲ್ಲಿ ನಷ್ಟ ಉಂಟಾಗಿದೆ. ಕಂಗನಾ ವೃತ್ತಿ ಬದುಕಿಗೆ ಇದು ಕಪ್ಪು ಚುಕ್ಕಿ ಆಗಿದೆ.

‘ಧಾಕಡ್​’ ಬರೋಬ್ಬರಿ 100 ಕೋಟಿ ರೂಪಾಯಿ ವೆಚ್ಚದಲ್ಲಿ ಸಿದ್ಧವಾದ ಸಿನಿಮಾ. ದೊಡ್ಡ ಬಜೆಟ್ ಸಿನಿಮಾ ಎಂದರೆ ದೊಡ್ಡ ನಿರೀಕ್ಷೆ ಇರುತ್ತದೆ. ಈ ಚಿತ್ರ 100 ಕೋಟಿ ರೂಪಾಯಿಗೂ ಅಧಿಕ ಗಳಿಕೆ ಮಾಡಲಿದೆ ಎಂದು ಕನಸು ಕಂಡಿದ್ದರು ಕಂಗನಾ. ಆದರೆ, ಮೊದಲ ದಿನ ಈ ಚಿತ್ರಕ್ಕೆ ವಿಮರ್ಶಕರಿಂದ ನೆಗೆಟಿವ್ ಕಮೆಂಟ್​ಗಳು ಸಿಕ್ಕವು. ಅನೇಕ ಸಿನಿಮಾಗಳು ಋಣಾತ್ಮಕ ವಿಮರ್ಶೆ ಪಡೆದರೂ ಉತ್ತಮ ಗಳಿಕೆ ಮಾಡಿದ ಉದಾಹರಣೆ ಇದೆ. ಆದರೆ, ‘ಧಾಕಡ್​’ ಸಿನಿಮಾ ಮೊದಲ ದಿನ ಗಳಿಸಿದ್ದು ಕೇವಲ 50 ಲಕ್ಷ ರೂಪಾಯಿ. ಮೊದಲ ವೀಕೆಂಡ್ ಕಲೆಕ್ಷನ್​ 1.50 ಕೋಟಿ ರೂಪಾಯಿ ದಾಟಲಿಲ್ಲ. ಈ ಚಿತ್ರದ ಒಟ್ಟಾರೆ ಕಲೆಕ್ಷನ್ ಕೇವಲ 2.15 ಕೋಟಿ ರೂಪಾಯಿ. ಇದರಿಂದ ಕಂಗನಾಗೆ ಹಿನ್ನಡೆ ಉಂಟಾಗಿದೆ.

ಇದನ್ನೂ ಓದಿ: ಕಂಗನಾ ನಟನೆಯ ‘ಧಾಕಡ್​’ ಚಿತ್ರ ನೋಡಲು ಒಬ್ಬರೂ ಬರಲಿಲ್ಲ; ಹಲವು ಕಡೆಗಳಲ್ಲಿ ಶೋ ಕ್ಯಾನ್ಸಲ್​

ಇನ್ನು, ಕಂಗನಾಗೆ ಮತ್ತೊಂದು ಆಘಾತ ಎದುರಾಗಿದೆ. ಈ ಚಿತ್ರ ಮೊದಲ ದಿನ 300ಕ್ಕೂ ಅಧಿಕ ಸ್ಕ್ರೀನ್​ಗಳಲ್ಲಿ ತೆರೆಕಂಡಿತ್ತು. ಒಂದು ವಾರ ಕಳೆಯುವುದರೊಳಗೆ ಮುನ್ನೂರು ಚಿತ್ರಮಂದಿರಗಳಿಂದ ಸಿನಿಮಾ ಕಾಲ್ಕಿತ್ತಿದೆ. ಹೀಗಾಗಿ, ಎರಡೂವರೆ ಕೋಟಿ ರೂಪಾಯಿ ಒಳಗೆ ಸಿನಿಮಾ ಬಿಸ್ನೆಸ್ ಮುಗಿಸುತ್ತಿದೆ. ಈ ಬಗ್ಗೆ ಕಂಗನಾ ಹೇಗೆ ಪ್ರತಿಕ್ರಿಯಿಸುತ್ತಾರೆ ಎಂಬುದನ್ನು ಕಾದು ನೋಡಬೇಕಿದೆ.

ಕಂಗನಾ ನಟನೆಯ ‘ಧಾಕಡ್​’ ಸಿನಿಮಾ ಜತೆಗೆ ಕಾರ್ತಿಕ್ ಆರ್ಯನ್ ನಟನೆಯ ‘ಭೂಲ್​ ಭುಲಯ್ಯ 2’ ಸಿನಿಮಾ ಬಿಡುಗಡೆ ಆಯಿತು. ಈ ಚಿತ್ರದ ಕಲೆಕ್ಷನ್ 100 ಕೋಟಿ ರೂಪಾಯಿ ಸಮೀಪಿಸಿದೆ. ಅನೇಕ ಚಿತ್ರಮಂದಿರಗಳಲ್ಲಿ ‘ಧಾಕಡ್​’ ಬದಲಿಗೆ  ‘ಭೂಲ್​ ಭುಲಯ್ಯ 2’ ಸಿನಿಮಾ ಸ್ಕ್ರೀನಿಂಗ್ ಮಾಡಲಾಗುತ್ತಿದೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.