ಹಿಂದಿ ‘ದೃಶ್ಯಂ 3’ ಮಲಯಾಳಂನ ರೀಮೇಕ್ ಅಲ್ಲ, ರಿಲೀಸ್ ಯಾವಾಗ?

ಮಲಯಾಳಂನ ‘ದೃಶ್ಯಂ’ (Drishyam) ಸಿನಿಮಾ (2013) ಬಿಡುಗಡೆ ಆದ ಬಳಿಕ ಭಾರತದ ಹಲವು ಭಾಷೆಗಳಿಗೆ ರೀಮೇಕ್ ಆಗಿತ್ತು. ಕನ್ನಡ, ಹಿಂದಿ, ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿ ಮಲಯಾಳಂನ ಮೊದಲ ‘ದೃಶ್ಯಂ’ ಸಿನಿಮಾ ರೀಮೇಕ್ ಆಗಿತ್ತು. ಅದಾದ ಬಳಿಕ ‘ದೃಶ್ಯಂ 2’ ಮತ್ತು ಇತ್ತೀಚೆಗಷ್ಟೆ ‘ದೃಶ್ಯಂ 3’ ಸಿನಿಮಾ ಸಹ ಮಲಯಾಳಂನಲ್ಲಿ ನಿರ್ಮಾಣಗೊಂಡವು. ಆದರೆ ಹಿಂದಿಯ ಹೊರತಾಗಿ ಇನ್ಯಾವ ಭಾಷೆಯವರೂ ‘ದೃಶ್ಯಂ’ ಸಿನಿಮಾದ ಸರಣಿಯನ್ನು ರೀಮೇಕ್ ಮಾಡಲಿಲ್ಲ. ಮಲಯಾಳಂ ರೀತಿಯಲ್ಲೇ ಹಿಂದಿಯಲ್ಲಿಯೂ ‘ದೃಶ್ಯಂ’ ಸಿನಿಮಾಕ್ಕೆ ಪ್ರತ್ಯೇಕ ಅಭಿಮಾನಿ ವರ್ಗವಿದ್ದು, ಮಲಯಾಳಂ ‘ದೃಶ್ಯಂ’ ಸರಣಿಯ ಎರಡು ಸಿನಿಮಾಗಳನ್ನು ಯಥಾವತ್ತು ರೀಮೇಕ್ ಮಾಡಲಾಗಿದೆ. ಇದೀಗ ‘ದೃಶ್ಯಂ 3’ ಸಿನಿಮಾ ಸಹ ಬರುತ್ತಿದೆ. ಆದರೆ ಈ ಸಿನಿಮಾ ಮಲಯಾಳಂ ಸಿನಿಮಾದ ರೀಮೇಕ್ ಆಗಿರುವುದಿಲ್ಲವಂತೆ.

ಅಜಯ್ ದೇವಗನ್, ಶ್ರೆಯಾ ಮತ್ತು ಟಬು ನಟಿಸಲಿರುವ ‘ದೃಶ್ಯಂ 3’ ಸಿನಿಮಾ ಇತ್ತೀಚೆಗೆ ಬಿಡುಗಡೆ ಆದ ಮಲಯಾಳಂ ‘ದೃಶ್ಯಂ 3’ ಸಿನಿಮಾದ ನೇರ ರೀಮೇಕ್ ಆಗಿರುವುದಿಲ್ಲ ಬದಲಿಗೆ ಆ ಸಿನಿಮಾದ ಸ್ಪೂರ್ತಿಯಿಂದ ಮಾಡಲಾದ ಭಿನ್ನ ಕತೆ ಮತ್ತು ಭಿನ್ನ ರೀತಿಯ ಟ್ವಿಸ್ಟ್​​ಗಳುಳ್ಳ ಕತೆಯನ್ನು ಈ ಸಿನಿಮಾ ಒಳಗೊಂಡಿರಲಿದೆಯಂತೆ. ಸಿನಿಮಾದ ಪೋಸ್ಟರ್ ಇತ್ತೀಚೆಗಷ್ಟೆ ಬಿಡುಗಡೆ ಆಗಿದ್ದು, ‘ದೃಶ್ಯಂ 3’ ಸಿನಿಮಾ ಅಕ್ಟೋಬರ್ 2ರ ಗಾಂಧಿ ಜಯಂತಿಯಂತು ಚಿತ್ರಮಂದಿರಗಳಲ್ಲಿ ರಿಲೀಸ್ ಆಗಲಿದೆ.

ಇತ್ತೀಚೆಗಷ್ಟೆ ಬಿಡುಗಡೆ ಆದ ಮಲಯಾಳಂನ ‘ದೃಶ್ಯಂ 3’ ಸಿನಿಮಾ ನಿರೀಕ್ಷಿತ ಮಟ್ಟದ ಪ್ರದರ್ಶನವನ್ನು ಬಾಕ್ಸ್ ಆಫೀಸ್​​ನಲ್ಲಿ ಕಾಣಲಿಲ್ಲ. ಸಿನಿಮಾದ ಕತೆಯ ಬಗ್ಗೆಯೂ ಸಾಕಷ್ಟು ಟೀಕೆ ವ್ಯಕ್ತವಾಗಿತ್ತು. ‘ದೃಶ್ಯಂ’ ಸಿನಿಮಾ ತನ್ನ ಥ್ರಿಲ್ಲರ್ ಗುಣವನ್ನು ಕಳೆದುಕೊಂಡಿದೆ ಎಂದು ಕೆಲವರು ವಿಮರ್ಶೆ ಮಾಡಿದ್ದರು. ಇದೇ ಕಾರಣಕ್ಕೆ ಹಿಂದಿ ತಂಡವು ‘ದೃಶ್ಯಂ 3’ ಸಿನಿಮಾವನ್ನು ಯಥಾವತ್ತು ರೀಮೇಕ್ ಮಾಡದೆ ತಮ್ಮದೇ ಆದ ಸ್ವಂತ ಟ್ವಿಸ್ಟು, ಟರ್ನುಗಳನ್ನು ಸಿನಿಮಾಕ್ಕೆ ಸೇರಿಸಲು ಮುಂದಾಗಿದೆ. ಅಲ್ಲದೆ, ‘ದೃಶ್ಯಂ 3’ ಸಿನಿಮಾ ಹಿಂದಿಯಲ್ಲಿ ಬರುವ ಕೊನೆಯ ‘ದೃಶ್ಯಂ’ ಸರಣಿಯ ಸಿನಿಮಾ ಎನ್ನಲಾಗಿದೆ.

ಇದನ್ನೂ ಓದಿ:ಬಿಗ್​​ಬಾಸ್​​ ಮನೆಯಲ್ಲಿ ದರ್ಶನ್ ಸಿನಿಮಾ ಹಾಡು ಹಾಕಲ್ಲ ಏಕೆ? ಸುದೀಪ್ ಕೊಟ್ಟರು ಕಾರಣ

ಮಲಯಾಳಂನಲ್ಲಿ ಇತ್ತೀಚೆಗಷ್ಟೆ ‘ದೃಶ್ಯಂ 4’ ಸಿನಿಮಾವನ್ನು ಸಹ ಘೋಷಣೆ ಮಾಡಲಾಗಿದೆ. ‘ದೃಶ್ಯಂ 3’ ಸಿನಿಮಾಕ್ಕೆ ಸಾಕಷ್ಟು ಟೀಕೆ, ವ್ಯಂಗ್ಯ ವ್ಯಕ್ತವಾಗಿದೆ. ಆದರೆ ಈಗ ನಿರ್ದೇಶಕರು ‘ದೃಶ್ಯಂ 4’ ಸಹ ಘೋಷಣೆ ಮಾಡಿರುವುದು ಮತ್ತಷ್ಟು ಟ್ರೋಲಿಂಗ್​​ಗೆ ಕಾರಣವಾಗಿದೆ. ಆದರೆ ಹಿಂದಿ ತಂಡ ‘ದೃಶ್ಯಂ 3’ ಸಿನಿಮಾದ ಮೂಲಕ ಈ ಸರಣಿಯನ್ನು ಮುಕ್ತಾಯ ಮಾಡಲಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ