ಸಿನಿಮಾ ಆಗಲಿದೆ ‘ಗೇಮ್ ಆಫ್ ಥ್ರೋನ್ಸ್’ ಆದರೆ ಯಾವ ಅಧ್ಯಾಯ?

‘ಗೇಮ್ ಆಫ್ ಥ್ರೋನ್ಸ್’ ವಿಶ್ವದ ಅತ್ಯಂತ ಜನಪ್ರಿಯ ವೆಬ್ ಸರಣಿ. ಆರ್​ ಆರ್ ಮಾರ್ಟಿನ್ ಬರೆದಿರುವ ‘ಸಾಂಗ್ ಆಫ್ ಐಸ್ ಆಂಡ್ ಫೈರ್’ ಹೆಸರಿನ ಹಲವು ಕಾದಂಬರಿ ಸರಣಿಗಳಲ್ಲಿ ಒಂದು ಅಧ್ಯಾಯದಿಂದ ನಿರ್ಮಿಸಿದ ಈ ವೆಬ್ ಸರಣಿ ವಿಶ್ವದ ಅತ್ಯಂತ ಜನಪ್ರಿಯ ವೆಬ್ ಸರಣಿ ಆಗಿದೆ. ‘ಗೇಮ್ ಆಫ್ ಥ್ರೋನ್ಸ್’ ಬಳಿಕ ಅದೇ ‘ಸಾಂಗ್ ಆಫ್ ಐಸ್ ಆಂಡ್ ಫೈರ್’ನ ಇನ್ನೂ ಬೇರೆ ಬೇರೆ ಅಧ್ಯಾಯಗಳನ್ನು ಆಧರಿಸಿ ವೆಬ್ ಸರಣಿಗಳನ್ನು ನಿರ್ಮಿಸಲಾಗಿದೆ. ಆದರೆ ಈ ವರೆಗೆ ಯಾವುದೇ ಸಿನಿಮಾವನ್ನು ಈ ಕತೆಯನ್ನು ಆಧರಿಸಿ ನಿರ್ಮಿಸಿರಲಿಲ್ಲ. ಆದರೆ ಇದೇ ಮೊದಲ ಬಾರಿಗೆ ಸಿನಿಮಾ ಸಹ ನಿರ್ಮಾಣಗೊಳ್ಳುತ್ತಿದೆ.

‘ಸಾಂಗ್ ಆಫ್ ಐಸ್ ಆಂಡ್ ಫೈರ್’ ಬೃಹತ್ ಕಾದಂಬರಿಯ ಮೊದಲ ಭಾಗಗಳಲ್ಲಿ ಬರುವ ಏಗಾನ್ ಪಾತ್ರವನ್ನು ಆಧರಿಸಿ ಸಿನಿಮಾ ನಿರ್ಮಾಣ ಮಾಡಲು ಎಚ್​​​ಬಿಓ ಮುಂದಾಗಿದ್ದು, ಈಗಾಗಲೇ ಚಿತ್ರಕತೆಯನ್ನು ಸಹ ಬರೆಸಿದೆ. ಮತ್ತೊಂದು ಬಲು ಜನಪ್ರಿಯ ವೆಬ್ ಸರಣಿ ‘ಹೌಸ್ ಆಫ್ ಕಾರ್ಡ್ಸ್’ಗೆ ಚಿತ್ರಕತೆ ಬರೆದಿರುವ ಬಿಯೂ ವಿಲಿಯಮ್ ಅವರು ಇದೀಗ ‘ಏಗಾನ್’ ಪಾತ್ರ ಆಧರಿಸಿದ ಸಿನಿಮಾಕ್ಕೆ ಚಿತ್ರಕತೆ ಬರೆದಿದ್ದು, ಚಿತ್ರಕತೆಯನ್ನು ಎಚ್​​ಬಿಓ ಸುಪರ್ಧಿಗೆ ನೀಡಿದ್ದಾರೆ. ಇದೀಗ ಎಚ್​​ಬಿಓ ನಿರ್ದೇಶಕನ ಹುಡುಕಾಟದಲ್ಲಿದೆ

ಕೆಲ ಸುದ್ದಿಗಳ ಪ್ರಕಾರ, ವಿಶ್ವ ಸಿನಿಮಾರಂಗ ಪ್ರಸ್ತುತ ನಂಬರ್ 1 ನಿರ್ದೇಶಕ ಎನಿಸಿಕೊಂಡಿರುವ ಕ್ರಿಸ್ಟೊಫರ್ ನೋಲನ್ ಅವರಿಂದ ಸಿನಿಮಾ ನಿರ್ದೇಶಿಸಬೇಕು ಎಂಬ ಪ್ರಯತ್ನದಲ್ಲಿ ಎಚ್​​ಬಿಓ ಇದ್ದು, ಕ್ರಿಸ್ಟೊಫರ್ ನೋಲನ್ ಅವರೊಟ್ಟಿಗೆ ಚರ್ಚೆ ಜಾರಿಯಲ್ಲಿದೆ. ಆದರೆ ನೋಲನ್ ಅವರು ಇತ್ತೀಚೆಗಷ್ಟೆ ‘ದಿ ಆಡಸ್ಸಿ’ ಸಿನಿಮಾ ನಿರ್ದೇಶಿಸಿದ್ದು, ಮತ್ತೊಮ್ಮೆ ಅದೇ ಮಾದರಿಯ ಸಿನಿಮಾ ನಿರ್ದೇಶನ ಮಾಡುತ್ತಾರಾ ಎಂಬ ಅನುಮಾನವಿದೆ.

ಇದನ್ನೂ ಓದಿ:ಹಾಲಿವುಡ್ ಸ್ಟಾರ್ ನಟನೆದುರು ಕತ್ತಿ ಬೀಸಿದ ವಿಜಯ್ ದೇವರಕೊಂಡ

ಏಗಾನ್ ಪಾತ್ರ ಆಧರಿಸಿದ ಸಿನಿಮಾ ಇದಾಗಲಿದ್ದು, ಪೂರ್ಣ ಸಾಂಗ್ ಆಫ್ ಐಸ್ ಆಂಡ್ ಫೈರ್ ಅಥವಾ ‘ಗೇಮ್ ಆಫ್ ಥ್ರೋನ್ಸ್’ನಲ್ಲಿ ಬಹಳ ಪ್ರಮುಖವಾಗಿರುವ ಟಾಗೇರಿಯನ್ ವಂಶದ ಸಂಸ್ಥಾಪಕ ಈ ಏಗಾನ್. ಏಳು ಕಿಂಗ್​​ಡಮ್​​​ಗಳಲ್ಲಿ ಆರನ್ನು ವಶಕ್ಕೆ ತೆಗೆದುಕೊಂಡು ಅವುಗಳನ್ನು ಒಂದು ಮಾಡಿ ಆಡಳಿತ ನಡೆಸಿದಾತ ಏಗಾನ್. ಆತನ ಸಹೋದರಿ (ಪತ್ನಿಯರು) ವಿಸೇನ್ಯಾ ಮತ್ತು ರೇನೀಸ್ ಅವರೊಡನೆ ಸೇರಿ ಡ್ರ್ಯಾಗನ್​​ಗಳನ್ನು ಪಳಗಿಸಿ ಅವನ್ನು ವಾಹನವಾಗಿ ಬಳಸಿದಾತ ಏಗಾನ್. ‘ಹೀರೋಯಿಕ್’ ಗುಣಗಳುಳ್ಳ ಈ ಪಾತ್ರದ ಕುರಿತಾಗಿ ಸಿನಿಮಾ ಮಾಡಲು ಇದೀಗ ಎಚ್​​ಬಿಓ ಮುಂದಾಗಿದೆ. ಒಂದೊಮ್ಮೆ ಕ್ರಿಸ್ಟೊಫರ್ ನೋಲನ್ ಈ ಸಿನಿಮಾ ನಿರ್ದೇಶಿಸಲು ಒಪ್ಪಿಕೊಂಡಲ್ಲಿ, ಹಲವಾರು ದಾಖಲೆಗಳನ್ನು ಮುರಿಯುವ ಸಿನಿಮಾ ಇದಾಗಲಿದೆ.

ಆರ್​​ಆರ್ ಮಾರ್ಟಿನ್ ಅವರ ಕತೆ ಆಧರಿಸಿ ಈಗಾಗಲೇ ‘ಗೇಮ್ ಆಫ್ ಥ್ರೋನ್ಸ್’ ವೆಬ್ ಸರಣಿ ನಿರ್ಮಾಣವಾಗಿ ವಿಶ್ವದಾದ್ಯಂತ ದೊಡ್ಡ ಹಿಟ್ ಆಗಿದೆ. ಅದರ ಪ್ರೀಕ್ವೆಲ್​​ಗಳಾದ ‘ಹೌಸ್​​ ಆಫ್ ದಿ ಡ್ರ್ಯಾಗನ್ಸ್’ ಮೂರು ಸೀಸನ್ ಈಗಾಗಲೇ ಪ್ರಸಾರ ಆಗಿದೆ. ‘ನೈಟ್ ಆಫ್ ದಿ ಸೆವೆನ್ ಕಿಂಗ್​​ಡಮ್ಸ್’ ಹೆಸರಿನ ಮತ್ತೊಂದು ವೆಬ್ ಸರಣಿ ಒಂದು ಸೀಸನ್ ಪ್ರಸಾರ ಆಗಿದೆ. ಇದೀಗ ಮೊದಲ ಬಾರಿಗೆ ಈ ಬೃಹತ್ ಕಾದಂಬರಿ ಆಧರಿಸಿದ ಸಿನಿಮಾ ನಿರ್ಮಾಣ ಆಗಲಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ