ದಕ್ಷಿಣದ ಭಾರತದ ಮೂರು ಸಿನಿಮಾಗಳಲ್ಲಿ ನಟಿಸಿದ್ದ ನಾನಾ ಪಟೇಕರ್

ಭಾರತೀಯ ಚಿತ್ರರಂಗದ ಹಿರಿಯ ನಟ ನಾನಾ ಪಟೇಕರ್ ಅವರು ಗೋವಾದಲ್ಲಿ ಹೃದಯಾಘಾತದಿಂದ ನಿಧನರಾಗಿದ್ದಾರೆ. 1978ರಲ್ಲಿ ‘ಗಮನ್’ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದ ಅವರು, ಸುಮಾರು ಐದು ದಶಕಗಳ ಕಾಲ ಹಿಂದಿ ಹಾಗೂ ಮರಾಠಿ ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದು, ತಮ್ಮ ವಿಶಿಷ್ಟ ನಟನಾ ಶೈಲಿಯಿಂದ ಕೋಟ್ಯಂತರ ಅಭಿಮಾನಿಗಳನ್ನು ಸಂಪಾದಿಸಿದ್ದರು. ದಕ್ಷಿಣ ಭಾರತದ ಚಿತ್ರಗಳಲ್ಲಿ ನಟಿಸಲು ಆರಂಭದಲ್ಲಿ ಕೊಂಚ ಹಿಂಜರಿಯುತ್ತಿದ್ದ ನಾನಾ ಪಟೇಕರ್, ತಮ್ಮ ಇಡೀ ವೃತ್ತಿಜೀವನದಲ್ಲಿ ನಟಿಸಿದ್ದು ದಕ್ಷಿಣ ಭಾರತದ 3 ಸಿನಿಮಾಗಳಲ್ಲಿ ಮಾತ್ರ.

ಬೊಮ್ಮಲಾಟಮ್ (ತಮಿಳು): ಪ್ರಸಿದ್ಧ ನಿರ್ದೇಶಕ ಭಾರತಿರಾಜ ನಿರ್ದೇಶನದ ‘ಬೊಮ್ಮಲಾಟಮ್’ ಸಿನಿಮಾದಲ್ಲಿ ನಾನಾ ಪಟೇಕರ್ ಜೊತೆಗೆ ಅರ್ಜುನ್ ಸರ್ಜಾ ಪ್ರಮುಖ ಪಾತ್ರದಲ್ಲಿದ್ದರು. ರಹಸ್ಯ ಕೊಲೆಗಳು ಹಾಗೂ ಅಪಘಾತದ ಸುತ್ತ ಸಾಗುವ ಈ ಕಥೆಯಲ್ಲಿ ನಾನಾ ಅವರು ರಾಣಾ ಎಂಬ ವಿಲಕ್ಷಣ ನಿರ್ದೇಶಕನ ಪಾತ್ರ ಮಾಡಿದ್ದರು. ಈ ಸಿನಿಮಾ ತೆಲುಗಿನಲ್ಲಿ ‘ರಾಣಾ’ ಎಂಬ ಶೀರ್ಷಿಕೆಯಲ್ಲಿ ಬಿಡುಗಡೆಯಾಯಿತು. ಹಿಂದಿಯಲ್ಲಿ ‘ಫೈನಲ್ ಕಟ್ ಆಫ್ ಡೈರೆಕ್ಟರ್’ ಎಂಬ ಹೆಸರಿನಲ್ಲಿ ಬಿಡುಗಡೆಯಾದ ಈ ಚಿತ್ರ ಬಾಕ್ಸ್ ಆಫೀಸ್‌ನಲ್ಲಿ ಯಶಸ್ಸು ಕಾಣದಿದ್ದರೂ, ನಾನಾ ಅವರ ಅಭಿನಯಕ್ಕೆ ಮೆಚ್ಚುಗೆ ವ್ಯಕ್ತವಾಗಿತ್ತು.

ಯಕ್ಷ (ಕನ್ನಡ): ರಮೇಶ್ ಭಾಗವತರ್ ನಿರ್ದೇಶನದ ‘ಯಕ್ಷ’ ಚಿತ್ರದ ಮೂಲಕ ನಾನಾ ಪಟೇಕರ್ ಕನ್ನಡ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದರು. ಲೂಸ್ ಮಾದ ಯೋಗಿ ನಾಯಕನಾಗಿ ನಟಿಸಿದ್ದ ಈ ಚಿತ್ರದಲ್ಲಿ ಅವರು ಯಕ್ಷರಾಜ್ ಪುಲಿಕೇಶಿ ಎಂಬ ಖಡಕ್ ಪೋಲಿಸ್ ಅಧಿಕಾರಿಯ ಪಾತ್ರದಲ್ಲಿದ್ದರು. ವಿಶೇಷವೆಂದರೆ, ಡಬ್ಬಿಂಗ್ ಕಲಾವಿದರನ್ನು ಬಳಸಿಕೊಳ್ಳದೆ ನಾನಾ ಪಟೇಕರ್ ತಾವೇ ಸ್ವತಃ ಕನ್ನಡದಲ್ಲಿ ಡಬ್ ಮಾಡಿದ್ದರು. ಹಿಂದಿಯಲ್ಲಿ ಬರೆದುಕೊಂಡ ಸಂಭಾಷಣೆಗಳನ್ನು ಸಹನಟ ಗಿರೀಶ್ ಮಟ್ಟಣ್ಣವರ್ ಸಹಾಯದಿಂದ ಅಭ್ಯಾಸ ಮಾಡಿ ಡಬ್ಬಿಂಗ್ ಪೂರ್ಣಗೊಳಿಸಿದ್ದರು.

ಇದನ್ನೂ ಓದಿ: ಗಡಿಯಲ್ಲಿ ನಿಂತು ಶತ್ರುಗಳ ವಿರುದ್ಧ ಹೋರಾಡಿದ್ದ ನಾನಾ ಪಟೇಕರ್

ಕಾಲಾ (ತಮಿಳು): ಪ. ರಂಜಿತ್ ನಿರ್ದೇಶನದಲ್ಲಿ ಸೂಪರ್‌ಸ್ಟಾರ್ ರಜನಿಕಾಂತ್ ಅಭಿನಯದ ‘ಕಾಲಾ’ ಸಿನಿಮಾ ನಾನಾ ಪಟೇಕರ್ ಅವರ ದಕ್ಷಿಣ ಭಾರತದ ಸಿನಿಮಾಗಳಲ್ಲೇ ಅತ್ಯಂತ ಯಶಸ್ವಿ ಹಾಗೂ ಜನಪ್ರಿಯ ಸಿನಿಮಾ. ಹರಿದೇವ್ ಅಭಯಂಕರ್ ಎಂಬ ರಾಜಕಾರಣಿ ಹಾಗೂ ಗ್ಯಾಂಗ್‌ಸ್ಟರ್ ಪಾತ್ರದಲ್ಲಿ ರಜನಿಕಾಂತ್ ಎದುರು ಅವರು ನೀಡಿದ ಶಾಂತ ಮತ್ತು ಗಂಭೀರ ನಟನೆ ಸಿನಿಪ್ರಿಯರ ಮನಗೆದ್ದಿತ್ತು. ಆರಂಭದಲ್ಲಿ ಖಳನಾಯಕನ ಪಾತ್ರ ಮಾಡಲು ನಾನಾ ಹಿಂಜರಿದಿದ್ದರಾದರೂ, ರಜನಿಕಾಂತ್ ಅವರ ಒತ್ತಾಯದ ಮೇರೆಗೆ ಈ ಪಾತ್ರಕ್ಕೆ ಒಪ್ಪಿಕೊಂಡಿದ್ದರು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.