Mahesh Babu-Rajamouli: ರಾಜಮೌಳಿಗಾಗಿ ಎರಡು ತಿಂಗಳು ಮೀಸಲಿಟ್ಟ ಮಹೇಶ್ ಬಾಬು

ರಾಜಮೌಳಿ (Rajamouli) ಈಗ ಕೇವಲ ಪ್ಯಾನ್ ಇಂಡಿಯಾ ನಿರ್ದೇಶಕರು ಮಾತ್ರವಲ್ಲ ಅವರು ಪ್ಯಾನ್ ವರ್ಲ್ಡ್ ನಿರ್ದೇಶಕ. ಆರ್​ಆರ್​ಆರ್ ಸಿನಿಮಾ ದೊಡ್ಡ ಹಿಟ್ ಆದ ಬೆನ್ನಲ್ಲೆ ವಿಶ್ವದ ಸಿನಿಮಾ ಪ್ರಿಯರು, ರಾಜಮೌಳಿಯ ಮುಂದಿನ ಸಿನಿಮಾ ಯಾವಾಗ ಬರುತ್ತದೆಂಬ ಕುತೂಹಲದಲ್ಲಿದ್ದಾರೆ. ರಾಜಮೌಳಿ ಈಗಾಗಲೇ ಮಹೇಶ್ ಬಾಬು (Mahesh Babu) ಜೊತೆಗೆ ಹೊಸ ಸಿನಿಮಾ ಘೋಷಣೆ ಮಾಡಿದ್ದಾರಾದರೂ ಸಿನಿಮಾದ ಚಿತ್ರೀಕರಣ ಪ್ರಾರಂಭವಾಗಲು ಇನ್ನೂ ಸಮಯವಿದೆ.

ರಾಜಮೌಳಿ ನಿರ್ದೇಶನದ ಆರ್​ಆರ್​ಆರ್ ಸಿನಿಮಾ ವಿಶ್ವದಾದ್ಯಂತ ಪ್ರತಿಷ್ಠಿತ ಪ್ರಶಸ್ತಿಗಳನ್ನು ಬಾಚಿಕೊಳ್ಳುತ್ತಿರುವ ಕಾರಣ ರಾಜಮೌಳಿ ಸಹ ತುಸು ಬ್ಯುಸಿಯಾಗಿದ್ದಾರೆ. ಸಿನಿಮಾದ ಆರ್​ಆರ್​ಆರ್ ಹಾಡು ಆಸ್ಕರ್​ಗೆ ನಾಮಿನೇಟ್ ಆಗಿದ್ದು ಆ ಇವೆಂಟ್​ಗಾಗಿ ರಾಜಮೌಳಿ ಹಾಗೂ ಚಿತ್ರತಂಡ ಎದುರು ನೋಡುತ್ತಿದೆ.

ರಾಜಮೌಳಿ ಇನ್ನೂ ಆರ್​ಆರ್​ಆರ್​ ಅನ್ನು ವಿಶ್ವ ಸಿನಿಮಾದ ಪ್ರತಿಷ್ಠಿತ ವೇದಿಕೆಗಳಿಗೆ ತಲುಪಿಸುವಲ್ಲಿ ಬ್ಯುಸಿಯಾಗಿದ್ದಾರಾದರೂ ಅವರ ಹೊಸ ಸಿನಿಮಾದ ಕೆಲಸ ತೆರೆ ಮರೆಯಲ್ಲಿ ಜಾರಿಯಲ್ಲಿದೆ. ಕೆಲವೇ ದಿನಗಳಲ್ಲಿ ನಟ ಮಹೇಶ್ ಬಾಬು ಸಹ ಅಖಾಡಕ್ಕೆ ಇಳಿಯಲಿದ್ದಾರೆ. ಆದರೆ ಚಿತ್ರೀಕರಣಕ್ಕೆ ಅಲ್ಲ.

ಸಿನಿಮಾದ ಚಿತ್ರೀಕರಣ ಪ್ರಾರಂಭವಾಗುವ ಮುನ್ನ ಮಹೇಶ್ ಬಾಬು ಅವರಿಗಾಗಿ ವಿಶೇಷ ತರಬೇತಿ ಕಾರ್ಯಾಗಾರವನ್ನು ರಾಜಮೌಳಿ ಆಯೋಜಿಸಿದ್ದಾರೆ. ಸಿನಿಮಾವನ್ನು ನವೀನ ತಂತ್ರಜ್ಞಾನದ ಮೂಲಕ, ಭಿನ್ನ ಪರಿಸ್ಥಿತಿಗಳಲ್ಲಿ ಚಿತ್ರೀಕರಣ ಮಾಡಲಾಗುತ್ತದೆ. ಹಾಗಾಗಿ ಆ ಪರಸ್ಥಿತಿಗಳಿಗೆ ಮಹೇಶ್ ಬಾಬು ಅವರನ್ನು ಮುಂದಿಗೇ ತಯಾರು ಮಾಡಲೆಂದು ಹೀಗೆ ವಿಶೇಷ ತರಬೇತಿ ಕಾರ್ಯಾಗಾರವನ್ನು ರಾಜಮೌಳಿ ಹಮ್ಮಿಕೊಂಡಿದ್ದಾರೆ.

ಈ ತರಬೇತಿ ಕಾರ್ಯಾಗಾರವು ಎರಡು ತಿಂಗಳ ಕಾಲ ಇರಲಿದ್ದು, ಕಠಿಣವಾದ ಈ ತರಬೇತಿ ಕಾರ್ಯಕ್ಕಾಗಿ ಮಹೇಶ್ ಬಾಬು ತಯಾರಾಗಿದ್ದಾರೆ. ಪ್ರಸ್ತುತ ತ್ರಿವಿಕ್ರಮ್ ನಿರ್ದೇಶನದ ಸಿನಿಮಾ ಚಿತ್ರೀಕರಣದಲ್ಲಿ ಮಹೇಶ್ ಬಾಬು ತೊಡಗಿಕೊಂಡಿದ್ದು, ಆ ಸಿನಿಮಾ ಅಂತಿಮ ಹಂತದಲ್ಲಿದೆ. ಅದರ ಚಿತ್ರೀಕರಣ ಮುಗಿದ ಕೂಡಲೇ ಮಹೇಶ್ ಬಾಬು ತರಬೇತಿ ಕಾರ್ಯಾಗಾರಕ್ಕೆ ಹಾಜರಾಗಲಿದ್ದಾರೆ.

ರಾಜಮೌಳಿಯ ಈ ಹೊಸ ಸಿನಿಮಾಕ್ಕೆ ಹಲವು ಹೊಸ ತಂತ್ರಜ್ಞಾನಗಳನ್ನು ಬಳಸಿಕೊಳ್ಳಲಾಗಿದ್ದು, ಹಾಲಿವುಡ್ ನ ಜನಪ್ರಿಯ ಸ್ಟುಡಿಯೋ ಒಂದರ ಜೊತೆ ರಾಜಮೌಳಿ ಒಪ್ಪಂದ ಮಾಡಿಕೊಂಡಿದ್ದಾರೆ.

ರಾಜಮೌಳಿ-ಮಹೇಶ್ ಬಾಬು ಅವರ ಸಿನಿಮಾವು ಅರಣ್ಯದಲ್ಲಿ ನಡೆಯುವ ಸಾಹಸ ಕತೆಯನ್ನು ಹೊಂದಿರಲಿದ್ದು, ಹಲವು ದೇಶಗಳಲ್ಲಿ ಸಿನಿಮಾದ ಚಿತ್ರೀಕರಣ ನಡೆಯಲಿದೆ. ಭಾರಿ ದಟ್ಟ ಅರಣ್ಯದಲ್ಲಿ ಸಿನಿಮಾದ ಚಿತ್ರೀಕರಣ ಮಾಡಲು ರಾಜಮೌಳಿ ಇಚ್ಛಿಸಿದ್ದು, ಇದಕ್ಕಾಗಿ ಮಹೇಶ್ ಬಾಬು ಸೇರಿದಂತೆ ಇತರ ನಟರನ್ನೂ ತರಬೇತುಗೊಳಿಸಲಿದ್ದಾರೆ.