ನಾಲ್ಕೇ ವರ್ಷಗಳಲ್ಲಿ 120 ಸಿನಿಮಾಗಳಲ್ಲಿ ನಟನೆ; ಇದು ಮಮ್ಮೂಟ್ಟಿ ಸಾಧನೆ
ಮಮ್ಮೂಟ್ಟಿ ಅವರು ಕೇವಲ ನಾಲ್ಕು ವರ್ಷಗಳಲ್ಲಿ 120 ಸಿನಿಮಾಗಳಲ್ಲಿ ನಟಿಸಿ ದಾಖಲೆ ನಿರ್ಮಿಸಿದ್ದಾರೆ. 1983 ರಿಂದ 1986ರವರೆಗೆ ಅವರು ವರ್ಷಕ್ಕೆ ಸರಾಸರಿ 30ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದಾರೆ. ಇದು ಬಹಳ ಅಪರೂಪದ ಸಾಧನೆ. ಇಂದಿನ ನಟರಿಗೆ ಇದು ಸಾಧ್ಯವಿಲ್ಲ ಎಂದು ಹಲವರು ಅಭಿಪ್ರಾಯಪಟ್ಟಿದ್ದಾರೆ. ಮಲಯಾಳಂ ಚಿತ್ರರಂಗದಲ್ಲಿ ಅವರ ಕೊಡುಗೆ ಅಪಾರ.
ಸ್ಟಾರ್ ಹೀರೋಗಳು ವರ್ಷಕ್ಕೆ ಒಂದು ಸಿನಿಮಾ ಕೊಟ್ಟರೆ ಸಾಕು ಎಂಬ ಪರಿಸ್ಥಿತಿ ಇದೆ. ಆದರೆ, ಆಗಿನ ಕಾಲದ ಹೀರೋಗಳು ಆ ರೀತಿ ಇರಲಿಲ್ಲ. ವರ್ಷಕ್ಕೆ ಅವರ ನಟನೆಯ ಸಾಕಷ್ಟು ಸಿನಿಮಾಗಳು ಬಿಡುಗಡೆ ಕಾಣುತ್ತಿದ್ದವು. ಇದಕ್ಕೆ ಮಮ್ಮೂಟ್ಟಿ (Mammootty) ಉತ್ತಮ ಉದಾಹರಣೆ ಎಂದೇ ಹೇಳಬಹುದು. ಅವರು ಕೇವಲ ನಾಲ್ಕು ವರ್ಷಗಳಲ್ಲಿ ಒಂದಲ್ಲ, ಎರಡಲ್ಲ ಬರೋಬ್ಬರಿ 120 ಸಿನಿಮಾಗಳಲ್ಲಿ ನಟಿಸಿದ್ದರು ಎಂಬುದು ವಿಶೇಷ. ಈ ಮೂಲಕ ಮಲಯಾಳಂನ ಬ್ಯುಸಿ ಕಲಾವಿದರಲ್ಲಿ ಒಬ್ಬರಾದರು.
ಮಮ್ಮೂಟ್ಟಿ ಅವರಿಗೆ ಇಂದು (ಸೆಪ್ಟೆಂಬರ್ 7) ಜನ್ಮದಿನ. ಅವರಿಗೆ ಎಲ್ಲ ಕಡೆಗಳಿಂದ ವಿಶ್ಗಳು ಬರುತ್ತಿವೆ. ಅವರಿಗೆ ಈಗ 74 ವರ್ಷ. ಈ ವಯಸ್ಸಿನಲ್ಲೂ ಸಿನಿಮಾ ಕೆಲಸಗಳನ್ನು ಮಾಡುತ್ತಿದ್ದಾರೆ. ಅವರು ಈಗ ಸಿನಿಮಾಗಳನ್ನು ಕಡಿಮೆ ಮಾಡಿದ್ದಾರೆ. ಹಾಗಂತ ನಟನೆಯಿಂದ ದೂರ ಇಲ್ಲ. ತಮಗೆ ಸರಿ ಹೊಂದುವ ಪಾತ್ರಗಳನ್ನು ಮಾಡುತ್ತಾ ನಟಿಸುತ್ತಿದ್ದಾರೆ.
ಮಮ್ಮೂಟ್ಟಿ ಅವರು 80ರ ದಶಕದಲ್ಲಿ ಸಾಕಷ್ಟು ಬ್ಯುಸಿ ಆದ ಹೀರೋ ಎನಿಸಿಕೊಂಡಿದ್ದರು. ಅವರು 1983ರಿಂದ 86ರ ಅವಧಿಯಲ್ಲಿ 120 ಸಿನಿಮಾಗಳನ್ನು ನೀಡಿದರು. 1983, 1984 ಹಾಗೂ 1985ರಲ್ಲಿ ಪ್ರತಿ ವರ್ಷ 34 ಸಿನಿಮಾಗಳು ರಿಲೀಸ್ ಆದವು. 1986ರಲ್ಲಿ ಬರೋಬ್ಬರಿ 35 ಚಿತ್ರಗಳು ತೆರೆಗೆ ಬಂದವು. ಈ ದಾಖಲೆಯನ್ನು ಈಗಲೂ ಯಾರಿಂದಲೂ ಮುರಿಯಲು ಸಾಧ್ಯವಿಲ್ಲ.
ಮಮ್ಮೂಟ್ಟಿ ಅವರು ಕನ್ನಡ ಸೇರಿದಂತೆ ಏಳು ಭಾಷೆಗಳಲ್ಲಿ ನಟಿಸಿದ್ದಾರೆ ಅನ್ನೋದು ವಿಶೇಷ. ಹೌದು, ಮಮ್ಮೂಟ್ಟಿ ಮಲಯಾಳಂ ನಟ ಆದರೂ, ತೆಲುಗು, ತಮಿಳು ಮೊದಲಾದ ಭಾಷೆಗಳಲ್ಲೂ ಬಣ್ಣ ಹಚ್ಚಿದ್ದಾರೆ. ಕನ್ನಡದಲ್ಲಿ ಅವರು ನಟಿಸಿದ ‘ಶಿಖಾರಿ’ ಸಿನಿಮಾ 2012ರಲ್ಲಿ ರಿಲೀಸ್ ಆಯಿತು.
ಇದನ್ನೂ ಓದಿ: ಮಮ್ಮೂಟ್ಟಿ ನಟನೆಯ ಈ ಕ್ರೈಮ್ ಥ್ರಿಲ್ಲರ್ ಸಿನಿಮಾ ವೀಕ್ಷಿಸಿದ್ದೀರಾ?
ಮಮ್ಮೂಟ್ಟಿ ಅವರು ಇತ್ತೀಚೆಗೆ ಬಣ್ಣದ ಲೋಕದಲ್ಲಿ ಮೊದಲಿನಷ್ಟು ಆ್ಯಕ್ಟೀವ್ ಆಗಿಲ್ಲ. ಅವರಿಗೆ ಕ್ಯಾನ್ಸರ್ ಇದೆ ಎಂಬ ಮಾತುಗಳು ಕೂಡ ಇವೆ. ಆದರೆ, ಈ ವಿಚಾರ ಇನ್ನೂ ಅಧಿಕೃತ ಆಗಿಲ್ಲ. ಅವರ ಮಗ ದುಲ್ಖರ್ ಸಲ್ಮಾನ್ ಅವರು ಚಿತ್ರರಂಗದಲ್ಲಿ ಮಿಂಚು ಹರಿಸುತ್ತಿದ್ದಾರೆ. ಸಿನಿಮಾ ನಿರ್ಮಾಣ ಹಾಗೂ ನಟನೆಯಲ್ಲಿ ಅವರು ಭೇಷ್ ಎನಿಸಿಕೊಂಡಿದ್ದಾರೆ. ದುಲ್ಖರ್ ನಿರ್ಮಾಣದ ‘ಲೋಕಃ’ ಚಿತ್ರ ಎಲ್ಲ ಕಡೆಗಳಿಂದ ಮೆಚ್ಚುಗೆ ಪಡೆದಿದೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.