Toyota Vellfire: ದುಬಾರಿ ಕಾರು ಖರೀದಿಸಿದ ಚಿರಂಜೀವಿ; 1111 ನಂಬರ್ ಪ್ಲೇಟ್ ಪಡೆಯಲು ನೀಡಿದ ಹಣ ಎಷ್ಟು?
Megastar Chiranjeevi Car Number: ‘ಮೆಗಾ ಸ್ಟಾರ್’ ಚಿರಂಜೀವಿ ಅವರ ‘ಟೊಯೊಟಾ ವೆಲ್ಫೈರ್’ ಕಾರಿನ ನೋಂದಣಿ ಸಂಖ್ಯೆ TS 09 GB 1111. ಇದೇ ನಂಬರ್ ಇರಬೇಕು ಎಂಬುದು ಅವರ ಬಯಕೆ ಆಗಿತ್ತು.
ಸೆಲೆಬ್ರಿಟಿಗಳಿಗೆ ಕಾರಿನ ಬಗ್ಗೆ ವಿಶೇಷ ಕ್ರೇಜ್ ಇರುತ್ತದೆ. ಕೋಟ್ಯಂತರ ರೂಪಾಯಿ ಸಂಭಾವನೆ ಪಡೆಯುವ ನಟ-ನಟಿಯರು ಐಷಾರಾಮಿ ಕಾರುಗಳನ್ನು ಖರೀದಿಸುತ್ತಾರೆ. ಮಾರುಕಟ್ಟೆಗೆ ಬರುವ ಹೊಸ ಕಾರುಗಳನ್ನು ತಮ್ಮದಾಗಿಸಿಕೊಳ್ಳಬೇಕು ಎಂಬ ಆಸೆ ಬಹುತೇಕ ಎಲ್ಲ ಸೆಲೆಬ್ರಿಟಿಗಳಿಗೆ ಇರುತ್ತದೆ. ಈ ವಿಚಾರದಲ್ಲಿ ಟಾಲಿವುಡ್ ನಟ ‘ಮೆಗಾ ಸ್ಟಾರ್’ ಚಿರಂಜೀವಿ (Megastar Chiranjeevi) ಕೂಡ ಹೊರತಾಗಿಲ್ಲ. ಅವರ ಬಳಿ ಅನೇಕ ಐಷಾರಾಮಿ ಕಾರುಗಳಿವೆ. ಅದರ ಜೊತೆಗೆ ಈಗ ಟೊಯೊಟಾ ಕಂಪನಿಯ ‘ವೆಲ್ಫೈರ್’ (Toyota Vellfire) ಕಾರು ಕೂಡ ಅವರ ಒಡೆತನಕ್ಕೆ ಸೇರಿದೆ. ಈ ಐಷಾರಾಮಿ ವಾಹನದ ಆನ್ ರೋಡ್ ಬೆಲೆ 1.2 ಕೋಟಿ ರೂಪಾಯಿ! ವಿಶೇಷ ಏನೆಂದರೆ, ಚಿರಂಜೀವಿ ಅವರು ಈ ಕಾರಿಗೆ 1111 ನಂಬರ್ ಪಡೆದಿದ್ದಾರೆ. ಇದಕ್ಕಾಗಿ ಅವರು ಲಕ್ಷಾಂತರ ರೂಪಾಯಿ ಖರ್ಚು ಮಾಡಿದ್ದಾರೆ. ಮೂಲಗಳ ಪ್ರಕಾರ ಬರೋಬ್ಬರಿ 4.7 ಲಕ್ಷ ರೂಪಾಯಿ ಕೊಟ್ಟು ಈ ರಿಜಿಸ್ಟ್ರೇಷನ್ ನಂಬರ್ (Chiranjeevi Car Number) ಪಡೆದಿದ್ದಾರೆ. ಈ ಸುದ್ದಿ ಕೇಳಿ ಚಿರಂಜೀವಿ ಅಭಿಮಾನಿಗಳು ಹುಬ್ಬೇರಿಸಿದ್ದಾರೆ.
ಸೆಲೆಬ್ರಿಟಿಗಳ ವಲಯದಲ್ಲಿ ‘ಟೊಯೊಟಾ ವೆಲ್ಫೈರ್’ ಕಾರು ಈಗ ಟ್ರೆಂಡ್ ಆಗುತ್ತಿದೆ. ಕೆಲವೇ ದಿನಗಳ ಹಿಂದೆ ನಟ ಡಾಲಿ ಧನಂಜಯ್ ಅವರಿಗೆ ಕೆಆರ್ಜಿ ಸ್ಟುಡಿಯೋಸ್ನ ಯೋಗಿ ರಾಜ್ ಹಾಗೂ ಕಾರ್ತಿಕ್ ಗೌಡ ಅವರು ಉಡುಗೊರೆಯಾಗಿ ಈ ಕಾರನ್ನು ನೀಡಿದರು. ಟಾಲಿವುಡ್ ನಟ ಜೂನಿಯರ್ ಎನ್ಟಿಆರ್ ಕೂಡ ಇತ್ತೀಚೆಗೆ ‘ಟೊಯೊಟಾ ವೆಲ್ಫೈರ್’ ಓಡಿಸಿ ಖುಷಿಪಟ್ಟಿದ್ದು ಸುದ್ದಿ ಆಯಿತು. ಈ ಕಾರಿಗೆ ಚಿರು ಕೂಡ ಮನ ಸೋತಿದ್ದಾರೆ.
ಇದನ್ನೂ ಓದಿ: ಚಿರಂಜೀವಿ ಮನೆಮಗಳ ಸಂಸಾರದಲ್ಲಿ ಬಿರುಗಾಳಿ; ಡಿವೋರ್ಸ್ ಸುದ್ದಿಗೆ ಸಿಕ್ತು ಬಲವಾದ ಸಾಕ್ಷಿ
ಚಿರಂಜೀವಿ ಅವರ ‘ಟೊಯೊಟಾ ವೆಲ್ಫೈರ್’ ಕಾರಿನ ನೋಂದಣಿ ಸಂಖ್ಯೆ TS 09 GB 1111. ಇದೇ ನಂಬರ್ ಇರಬೇಕು ಎಂಬುದು ಅವರ ಬಯಕೆ ಆಗಿತ್ತು. ಅದಕ್ಕಾಗಿ ಅವರು ತೆಲಂಗಾಣದ ಖೈರತಾಬಾದ್ನಲ್ಲಿ ರಿಜಿಸ್ಟ್ರೇಷನ್ ಮಾಡಿಸಿದ್ದಾರೆ. ಚಿರಂಜೀವಿ ಅವರಿಗೆ 1111 ಸಂಖ್ಯೆ ಬಗ್ಗೆ ವಿಶೇಷ ಒಲವು ಇದೆ. ಹಾಗಾಗಿ ಅವರ ಎಲ್ಲ ಕಾರುಗಳಿಗೆ ಇದೇ ಸಂಖ್ಯೆಯನ್ನೇ ಪಡೆದುಕೊಂಡಿದ್ದಾರೆ. ‘ಟೊಯೊಟಾ ವೆಲ್ಫೈರ್’ ವಿಚಾರದಲ್ಲೂ ಇದು ಮುಂದುವರಿದಿದೆ.
ಇದನ್ನೂ ಓದಿ: ‘ಹೊಯ್ಸಳ’ ನಿರ್ಮಾಪಕರಿಂದ ಧನಂಜಯ್ಗೆ ಕಾರು ಗಿಫ್ಟ್; ಈ ಕಾರಿನ ಬೆಲೆ 1 ಕೋಟಿ ರೂಪಾಯಿ
‘ಟೊಯೊಟಾ ವೆಲ್ಫೈರ್’ ಕಾರು 2492 ಸಿಸಿ ಇಂಜಿನ್ ಹೊಂದಿದೆ. ಪ್ರತಿ ಲೀಟರ್ ಪೆಟ್ರೋಲ್ಗೆ 16 ಕಿ.ಮೀ ಮೈಲೇಜ್ ನೀಡುತ್ತದೆ. ಏಳು ಸೀಟರ್ ಕಾರು ಇದಾಗಿದ್ದು, ಅತ್ಯಂತ ಐಷಾರಾಮಿ ಸೌಲಭ್ಯಗಳನ್ನು ಒಳಗೊಂಡಿದೆ. 0-100 ಕಿ.ಮೀ ವೇಗವನ್ನು 8 ಸೆಕೆಂಡ್ನಲ್ಲಿ ಈ ಕಾರು ತಲುಪುತ್ತದೆ. ಇದಲ್ಲದೇ ರೋಲ್ಸ್ ರಾಯ್ಸ್, ಟೊಯೊಟಾ ಲ್ಯಾಂಡ್ ಕ್ರೂಸರ್ ಮುಂತಾದ ಕಾರುಗಳು ಕೂಡ ಜಿರಂಜೀವಿ ಅವರ ಕಲೆಕ್ಷನ್ನಲ್ಲಿ ಇವೆ.
ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 2:29 pm, Thu, 13 April 23