Sonu Srinivas Gowda: ‘ಸೋನು ಬಾತ್​ ರೂಮ್​ ಯಾಕೆ ಹುಡುಕಲಿಲ್ಲ?’: ವೇದಿಕೆ ಮೇಲೆ ಸುದೀಪ್​ ಕೇಳಿದ್ರು ನೇರ ಪ್ರಶ್ನೆ

ಟ್ರೋಲ್​ಗಳಿಂದ ಫೇಮಸ್​ ಆದ ಸೋನು ಶ್ರೀನಿವಾಸ್​ ಗೌಡ (Sonu Srinivas Gowda) ಅವರು ಬಿಗ್​ ಬಾಸ್​ ಮನೆಯಲ್ಲಿ ಹೆಚ್ಚು ಹೈಲೈಟ್​ ಆಗುತ್ತಿದ್ದಾರೆ. ಅವರ ಬಗ್ಗೆ ಸೋಶಿಯಲ್​ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ಚರ್ಚೆ ನಡೆಯುತ್ತಿದೆ. ನೆಗೆಟಿವ್​ ಕಮೆಂಟ್​ಗಳನ್ನು ಎದುರಿಸಿ ಬಂದಿರುವ ಸೋನು ಗೌಡ ಅವರು ‘ಬಿಗ್​ ಬಾಸ್​ ಕನ್ನಡ ಒಟಿಟಿ’ (Bigg Boss Kannada OTT) ಶೋನಲ್ಲಿ ತಮ್ಮದೇ ರೀತಿಯಲ್ಲಿ ಗೇಮ್​ ಪ್ಲ್ಯಾನ್​ ಮಾಡುತ್ತಿದ್ದಾರೆ. ಎಲ್ಲರ ಜೊತೆಗೂ ಬೆರೆತು ಅವರು ಮುನ್ನಡೆಯುತ್ತಿದ್ದಾರೆ. ಮೊದಲ ವಾರ ಅವರಿಗೆ ವೀಕ್ಷಕರಿಂದ ಅಗತ್ಯ ವೋಟ್ಸ್​ ಬಂದಿದೆ. ಹಾಗಾಗಿ ಅವರು ಎಲಿಮಿನೇಷನ್​ನಿಂದ ಪಾರಾಗಿದ್ದಾರೆ. ವೀಕೆಂಡ್​ ಪಂಚಾಯಿತಿಯಲ್ಲಿ ಸೋನು ಶ್ರೀನಿವಾಸ್​ ಗೌಡ ಅವರನ್ನು ಕಿಚ್ಚ ಸುದೀಪ್​ (Kichcha Sudeep) ಮಾತನಾಡಿಸಿದ್ದಾರೆ.

ಇಷ್ಟು ವರ್ಷ ಟಿವಿಯಲ್ಲಿ ಬಿಗ್​ ಬಾಸ್​ ಪ್ರಸಾರ ಆಗುತ್ತಿತ್ತು. ಕನ್ನಡದಲ್ಲಿ ಇದೇ ಮೊದಲ ಬಾರಿಗೆ ಒಟಿಟಿಯಲ್ಲಿ ಬಿತ್ತರ ಆಗುತ್ತಿದೆ. ಈ ಒಟಿಟಿ ಶೋ ಆರು ವಾರಗಳ ಕಾಲ ಇರಲಿದೆ. ಹಾಗಾಗಿ ಒಂದೊಂದು ವಾರ ಕೂಡ ತುಂಬ ಮುಖ್ಯ. ಮೊದಲ ವಾರದಲ್ಲೇ ಪ್ರೇಕ್ಷಕರ ಮನ ಗೆಲ್ಲುವ ಸವಾಲು ಸ್ಪರ್ಧಿಗಳ ಮುಂದೆ ಇತ್ತು. ಆ ವಿಚಾರದಲ್ಲಿ ಸೋನು ಶ್ರೀನಿವಾಸ್​ ಗೌಡ ಗೆದ್ದಿದ್ದಾರೆ ಎನ್ನಬಹುದು. 16 ಸ್ಪರ್ಧಿಗಳ ಪೈಕಿ ಅವರು ಹೈಲೈಟ್​ ಆಗುತ್ತಿದ್ದಾರೆ.

ಬಿಗ್​ ಬಾಸ್​ ಮನೆಗೆ ಕಾಲಿಟ್ಟ ಮೊದಲ ದಿನವೇ ಸೋನು ಶ್ರೀನಿವಾಸ್​ ಗೌಡ ಅವರು ಬಾತ್​ ರೂಮ್​ ಹುಡುಕುವಲ್ಲಿ ವಿಫಲರಾಗಿದ್ದರು. ಈ ವಿಚಾರವನ್ನು ಮೊದಲ ವಾರದ ಪಂಚಾಯಿತಿಯಲ್ಲಿ ಸುದೀಪ್​ ನೆನಪಿಸಿದ್ದಾರೆ. ‘ಸೋನು ಗೌಡ ಅವರೇ ನೀವು ಬಾತ್​ ರೂಮ್​ಗೆ ಹೋಗಬೇಕು ಎಂದು ಒದ್ದಾಡ್ತಾ ಇದ್ರಿ. ಆದರೆ ಬಾತ್ ರೂಮ್​ ಎಲ್ಲಿದೆ ಅಂತ ಹುಡುಕಲಿಲ್ಲವಲ್ಲ ನೀವು’ ಎಂದು ಸುದೀಪ್​ ಪ್ರಶ್ನಿಸಿದರು. ‘ಈ ಮನೆಯಲ್ಲಿ ಬಾತ್​ ರೂಮ್​ ಇಲ್ಲವೇನೋ ಅಂದುಕೊಂಡೆ’ ಎಂದು ಉತ್ತರಿಸಿ ನಕ್ಕಿದ್ದಾರೆ ಸೋನು.

ಗಂಟಲು ನೋವಿಗೆ ಸೋನು ಶ್ರೀನಿವಾಸ್​ ಗೌಡ ಅವರು ಒಂದು ಔಷಧಿ ಹೇಳಿದ್ದರು. ಆ ವಿಚಾರವನ್ನು ಕೂಡ ಸುದೀಪ್​ ಪ್ರಸ್ತಾಪಿಸಿದ್ದಾರೆ. ‘ನೀವು ಹೊರಗಡೆ ಸಿಕ್ಕಾಪಟ್ಟೆ ನ್ಯೂಸ್​ನಲ್ಲಿ ಇದ್ದೀರಿ’ ಎಂದು ಅವರು ಹೇಳಿದರು. ‘ಯಾವ ರೀತಿ ಸರ್​’ ಎಂದು ಕುತೂಹಲದಿಂದ ಸೋನು ಕೇಳಿದರು. ‘ಟ್ರೋಲ್​ ಅಂತೂ ಅಲ್ಲ’ ಎಂದು ಕೇಳಿದಾಗ ಸೋನು ಮುಖದಲ್ಲಿ ನಗು ಅರಳಿತು. ‘ಗಂಟಲು ನೋವಿಗೆ ಹೊಸ ಔಷಧಿ ಕಂಡು ಹಿಡಿದಿದ್ದೀರಿ. ಈ ಔಷಧಿ ಕೇಳಿ ವೈದ್ಯಕೀಯ ಜಗತ್ತೇ ಶೇಕ್​ ಆಗಿದೆ’ ಎಂದು ಸುದೀಪ್​ ಕಾಲೆಳೆದರು.

‘ನಮ್ಮ ಮನೆಯಲ್ಲಿ ಗಂಟಲು ನೋವು ಬಂದರೆ ನಾಟಿ ಕೋಳಿ ಮೊಟ್ಟೆಗೆ ತುಂಬ ಉಪ್ಪು, ಖಾರ ಹಾಕಿ ಅದನ್ನು ಫ್ರೈ ಮಾಡಿ ಕೊಡ್ತಾರೆ’ ಎಂದು ಸೋನು ಹೇಳಿದ್ದು ಕೇಳಿ ಎಲ್ಲರೂ ನಕ್ಕಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.