‘ನಾನು ಸಖತ್ ಆಗಿ ಕಬಡ್ಡಿ ಆಡ್ತೀನಿ’ ಎಂದು ಬಿಗ್ ಬಾಸ್ ಮನೆಯಲ್ಲಿ ಗಾಯ ಮಾಡಿಕೊಂಡ ಸೋನು ಶ್ರೀನಿವಾಸ್ ಗೌಡ

ಸೋನು ಶ್ರೀನಿವಾಸ್ ಗೌಡ (Sonu Srinivas Gowda) ಅವರು ಬಿಗ್ ಬಾಸ್ ಒಟಿಟಿ ಮೊದಲ ಸೀಸನ್​ನಲ್ಲಿ ಗಮನ ಸೆಳೆಯುತ್ತಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲಿ ಸಾಕಷ್ಟು ಟ್ರೋಲ್ ಆಗಿದ್ದ ಸೋನು ಶ್ರೀನಿವಾಸ್​ ಗೌಡ ಅವರು ಈಗ ಬಿಗ್ ಬಾಸ್ ಮನೆಯಲ್ಲಿ ಟಾಸ್ಕ್ ಮೂಲಕ ಗಮನ ಸೆಳೆಯುತ್ತಿದ್ದಾರೆ. ಈಗ ದೊಡ್ಮನೆಯಲ್ಲಿ ಅವರು ಪೆಟ್ಟು ಮಾಡಿಕೊಂಡಿದ್ದಾರೆ. ಟಾಸ್ಕ್​ ಇಲ್ಲದೆ ಇದ್ದಾಗ ಸೋನು ಪೆಟ್ಟು ಮಾಡಿಕೊಂಡರು ಅನ್ನೋದು ಅಚ್ಚರಿಯ ವಿಚಾರ!

ಬಿಗ್ ಬಾಸ್ ಮನೆಯಲ್ಲಿ ಎರಡು ಟೀಂ ಮಾಡಲಾಗಿದೆ. ಒಂದು ಟೀಂಗೆ ನಂದು ಕ್ಯಾಪ್ಟನ್ ಆದರೆ ಮತ್ತೊಂದು ಟೀಂಗೆ, ಸೋಮಣ್ಣ ನಾಯಕ. ಪ್ರತಿ ಟೀಂಗೆ ಒಂದು ಟಾಸ್ಕ್ ನೀಡಲಾಗಿತ್ತು. ಈ ಟಾಸ್ಕ್​ನ ಅನ್ವಯ ಒಂದು ಟೀಂನಿಂದ ಇಬ್ಬರು ಆಟಕ್ಕೆ ಇಳಿಯಬೇಕು. ಇಲ್ಲಿ ಇಬ್ಬರ ಕಣ್ಣಿಗೂ ಬಟ್ಟೆ ಕಟ್ಟಿರಲಾಗುತ್ತದೆ. ಒಬ್ಬರು ಅಲ್ಲಿಟ್ಟ ತಿಂಡಿ ತಿನ್ನಬೇಕು. ಆ ತಿಂಡಿ ಹೇಗಿದೆ ಎಂಬುದನ್ನು ರುಚಿಯ ಆಧಾರದ ಮೇಲೆ ವಿವರಿಸಬೇಕು. ಎದುರಿದ್ದವರು ಅದು ಯಾವ ತಿಂಡಿ ಎಂದು ಹೇಳಬೇಕು. ಈ ಆಟದಲ್ಲಿ ನಂದು ತಂಡದವರು ಗೆದ್ದರು.

ನಂದು ಟೀಂನಲ್ಲಿ ಸೋನು ಕೂಡ ಇದ್ದರು. ಅವರು ಆಟ ಆಡಿಲ್ಲ. ಆದರೂ ತಂಡ ಗೆದ್ದಿದೆ. ‘ಸೋನು ಆಟ ಆಡಿಲ್ಲ. ಆದರೂ ಅವರ ತಂಡ ಗೆದ್ದಿದೆ. ಅವರು ಲಕ್ಕಿ ಚಾರ್ಮ್​’ ಎಂದರು ಸೋಮಣ್ಣ. ಈ ಮಾತನ್ನು ಕೇಳಿ ಸೋನುಗೆ ಸಖತ್ ಖುಷಿ ಆಗಿದೆ. ಅವರು ಹಿರಿಹಿರಿ ಹಿಗ್ಗಿದ್ದಾರೆ.

ಇದನ್ನೂ ಓದಿ: ರಾತ್ರಿ 2.15ಕ್ಕೆ ಸೋನು ಗೌಡ ಜತೆ ಮಾತಾಡಲು ಬಂದ ರಾಕೇಶ್; ವೈರಲ್​ ಹುಡುಗಿಯ ಪ್ರತಿಕ್ರಿಯೆ ಹೇಗಿತ್ತು?​

‘ಬಿಗ್ ಬಾಸ್​ನಲ್ಲಿ ಕಬ್ಬಡ್ಡಿ ಆಡುವ ಟಾಸ್ಕ್​ ನೀಡಬೇಕಿತ್ತು’ ಎಂದು ಸೋಮಣ್ಣ ಹೇಳಿದರು. ‘ನಾನು ಕಬಡ್ಡಿನ ಸಖತ್ ಆಗಿ ಆಡ್ತೀನಿ’ ಎಂದರು ಸೋನು. ಸೋಮಣ್ಣ ಅವರು ನಾನು ಕೂಡ ಕಬಡ್ಡಿ ಚೆನ್ನಾಗಿ ಆಡ್ತೀನಿ ಎಂದರು.  ಸೋಮಣ್ಣ ಹಾಗೂ ಸೋನು ಇಬ್ಬರೂ ಮನೆಯಲ್ಲೇ ಕಬಡಿ ಆಡೋಕೆ ಶುರು ಮಾಡಿದರು. ಈ ವೇಳೆ ಸೋನು  ಕೈ ಗಾಜಿ​​ಗೆ ಹೊಡೆದಿದೆ. ಈ ಸಂದರ್ಭದಲ್ಲಿ ಅವರ ಕೈಗೆ ಗಾಯ ಆಗಿದೆ. ನಂತರ ಅವರ ಕೈಗೆ ಹೊಲಿಗೆ ಹಾಕಲಾಗಿದೆ. ದೊಡ್ಡ ಗಾಯ ಆಗಿದ್ದರಿಂದ ಸೋನು ತೀವ್ರ ನೋವು ಅನುಭವಿಸಿದ್ದಾರೆ. ಬ್ಯಾಂಡೇಜ್ ಹಾಕಿಕೊಂಡೇ ಟಾಸ್ಕ್​ ಪೂರ್ತಿ ಮಾಡಿದ್ದಾರೆ.