ದಕ್ಷಿಣ ಭಾರತದ ಉಚ್ಚಾರಣೆ ಟೀಕೆಗಳಿಗೆ ನಟಿ ರಶ್ಮಿಕಾ ಮಂದಣ್ಣ ಖಡಕ್ ತಿರುಗೇಟು

ಬಾಲಿವುಡ್ ಚಲನಚಿತ್ರಗಳಲ್ಲಿ ತನ್ನ ದಕ್ಷಿಣ ಭಾರತದ ಮಾತಿನ ಶೈಲಿ ಹಾಗೂ ಉಚ್ಚಾರಣೆಯ ಕುರಿತು ನಿರಂತರವಾಗಿ ಕೇಳಿಬರುತ್ತಿರುವ ಟೀಕೆಗಳಿಗೆ ಜನಪ್ರಿಯ ನಟಿ ರಶ್ಮಿಕಾ ಮಂದಣ್ಣ ಅವರು ಅತ್ಯಂತ ದಿಟ್ಟವಾಗಿ ಉತ್ತರಿಸಿದ್ದಾರೆ. ಖ್ಯಾತ ನಿರೂಪಕ ಕರಣ್ ಜೋಹರ್ ಅವರ ಜನಪ್ರಿಯ ಟಾಕ್ ಶೋನಲ್ಲಿ ಪತಿ ವಿಜಯ್ ದೇವರಕೊಂಡ ಜೊತೆ ಅತಿಥಿಯಾಗಿ ಭಾಗವಹಿಸಿದ್ದ ಅವರು ಈ ಕುರಿತು ಮುಕ್ತವಾಗಿ ಮಾತನಾಡಿದ್ದಾರೆ.

‘ನಾನು ಎಂದಿಗೂ ನನ್ನ ವೃತ್ತಿಜೀವನಕ್ಕೆ ಯಾವುದೇ ಮಿತಿಗಳನ್ನು ಹಾಕಿಕೊಳ್ಳಲು ಬಯಸಲಿಲ್ಲ. ಎಲ್ಲಾ ಭಾಷೆಯ ಸಿನಿಮಾಗಳಲ್ಲಿ ನಟಿಸಬೇಕು ಎನ್ನುವುದು ನನ್ನ ಆಸೆಯಾಗಿತ್ತು. ಆರಂಭದಿಂದಲೂ ವಿವಿಧ ರೀತಿಯ ವಿಭಿನ್ನ ಪಾತ್ರಗಳನ್ನು ಆಯ್ಕೆ ಮಾಡಿಕೊಳ್ಳುವ ನಿರ್ಧಾರ ಮಾಡಿದ್ದೆ. ‘ಅನಿಮಲ್’ ಮತ್ತು ‘ದಿ ಗರ್ಲ್‌ಫ್ರೆಂಡ್’ ಚಿತ್ರಗಳಂತಹ ಭಿನ್ನ ಕಥೆಗಳಲ್ಲಿ ನಟಿಸುವುದು ನನಗೆ ಅಪಾರ ತೃಪ್ತಿ ನೀಡಿದೆ’ ಎಂದಿದ್ದಾರೆ ಅವರು.

‘ದಕ್ಷಿಣ ಭಾರತದ ಮೂಲದವಳಾದ ಕಾರಣ ನನ್ನ ಮಾತಿನಲ್ಲಿ ಆ ಪ್ರಾದೇಶಿಕ ಶೈಲಿ ಇರುವುದು ಸಹಜವಾಗಿದೆ. ಅದನ್ನು ಹೊರತುಪಡಿಸಿ ಬೇರೆ ರೀತಿಯ ನಿರೀಕ್ಷೆ ಇಟ್ಟುಕೊಳ್ಳುವುದು ಸಂಪೂರ್ಣವಾಗಿ ಅವೈಜ್ಞಾನಿಕವಾಗಿದೆ. ‘ಅನಿಮಲ್’, ‘ಕಾಕ್ಟೈಲ್ 2’ ಹಾಗೂ ‘ಛಾವಾ’ ಚಿತ್ರಗಳಲ್ಲಿ ನನ್ನ ಉಚ್ಚಾರಣೆಯ ಬಗ್ಗೆ ಬಂದ ಟೀಕೆಗಳನ್ನು ನಾನು ಗಂಭೀರವಾಗಿ ಪರಿಗಣಿಸಿಲ್ಲ’ ಎಂದಿದ್ದಾರೆ ರಶ್ಮಿಕಾ.

ಪ್ರತಿ ಸಿನಿಮಾದಲ್ಲಿಯೂ ನಾನೇ ಸ್ವತಃ ಧ್ವನಿ ನೀಡಿ ಡಬ್ಬಿಂಗ್ ಮಾಡಲು ಹೆಚ್ಚಿನ ಶ್ರಮ ವಹಿಸುತ್ತೇನೆ. ಒಂದು ವೇಳೆ ನಿರ್ದೇಶಕರಿಗೆ ಬೇರೆಯವರ ಧ್ವನಿ ಸೂಕ್ತವೆನಿಸಿದರೆ ಆ ಸ್ವಾತಂತ್ರ್ಯವನ್ನು ನಾನು ಅವರಿಗೆ ನೀಡುತ್ತೇನೆ. ಆದರೆ ನನ್ನ ಯಾವೊಬ್ಬ ನಿರ್ದೇಶಕರೂ ಸಹ ಬೇರೆ ಡಬ್ಬಿಂಗ್ ಕಲಾವಿದರ ಬಳಿ ಕೆಲಸ ಮಾಡಿಸಲು ಬಯಸಲಿಲ್ಲ’ ಎಂದಿದ್ದಾರೆ ಅವರು.

ಇದನ್ನೂ ಓದಿ: ಬೇಡ ಅನಿಸಿದ್ರೆ ಧೈರ್ಯವಾಗಿ ಹೇಳಿ; ಜಾನ್ವಿ ಕಪೂರ್ ಪಾತ್ರದ ಬಗ್ಗೆ ವಿಜಯ್-ರಶ್ಮಿಕಾ ಮಾತು

ನನ್ನ ಸ್ವಂತ ಧ್ವನಿಯಲ್ಲಿಯೇ ಎಲ್ಲ ಭಾಷೆಗಳಿಗೂ ಡಬ್ಬಿಂಗ್ ಮಾಡುವುದು ನನಗೆ ತಂದಿರುವ ಹೆಮ್ಮೆಯ ವಿಷಯವಾಗಿದೆ. ಇದರ ಹಿಂದೆ ಕಠಿಣ ಪರಿಶ್ರಮ ಮತ್ತು ದೊಡ್ಡ ಪ್ರಯತ್ನ ಅಡಗಿದೆ. ಸವಾಲುಗಳನ್ನು ಸ್ವೀಕರಿಸಿ ಯಶಸ್ಸು ಸಾಧಿಸುವುದೇ ನಿಜವಾದ ಕಲಾವಿದೆಯ ಲಕ್ಷಣವಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.