Salman Khan: ಟೈಗರ್​ ಶ್ರಾಫ್​ ಪ್ರೇಯಸಿ ದಿಶಾಗೆ ಸಲ್ಮಾನ್​ ಕಿಸ್​ ಮಾಡಿದ್ದು ನಿಜ; ಆದರೆ ಇಲ್ಲಿದೆ ಟ್ವಿಸ್ಟ್​

ಕೆಲವೇ ದಿನಗಳ ಹಿಂದೆ ನಟ ಸಲ್ಮಾನ್​ ಖಾನ್​ ಅಭಿನಯದ ‘ರಾಧೆ: ಯುವರ್​ ಮೋಸ್ಟ್​ ವಾಂಟೆಡ್​ ಭಾಯ್​’ ಸಿನಿಮಾದ ಟ್ರೇಲರ್​ ಬಿಡುಗಡೆ ಆಗಿತ್ತು. ಈ ಚಿತ್ರಕ್ಕೆ ಪ್ರಭುದೇವ ನಿರ್ದೇಶನ ಮಾಡಿದ್ದಾರೆ. ನಾಯಕಿಯಾಗಿ ದಿಶಾ ಪಠಾಣಿ ಕಾಣಿಸಿಕೊಂಡಿದ್ದಾರೆ. ಟ್ರೇಲರ್ ಬಿಡುಗಡೆ ಆದ ದಿನದಿಂದಲೂ ಸಲ್ಮಾನ್ ಖಾನ್​ ಮತ್ತು ದಿಶಾ ಪಠಾಣಿ ನಡುವಿನ ಕಿಸ್​ ವಿಚಾರ ಹೆಚ್ಚು ಚರ್ಚೆ ಆಗುತ್ತಿತ್ತು. ಸಲ್ಮಾನ್​ ಖಾನ್​ ಫ್ಯಾನ್​ ಪೇಜ್​ಗಳಲ್ಲಿ ಈ ಬಗ್ಗೆ ಹಲವು ಮೀಮ್​ಗಳು ಹರಿದಾಡುತ್ತಿದ್ದವು. ನಿಜಕ್ಕೂ ಸಲ್ಮಾನ್​ ಖಾನ್​ ಕಿಸ್​ ಮಾಡಿದ್ದಾರೆ ಎಂದು ಅನೇಕರು ನಂಬುತ್ತಲೇ ಇರಲಿಲ್ಲ. ಅದಕ್ಕೆಲ್ಲ ಸಲ್ಲು ಈಗ ಉತ್ತರ ನೀಡಿದ್ದಾರೆ.

ಅಷ್ಟಕ್ಕೂ ಸಲ್ಮಾನ್​ ಖಾನ್​ ಅವರು ದಿಶಾಗೆ ಕಿಸ್​ ಮಾಡಿದ್ದಾರೋ ಇಲ್ಲವೋ ಎಂಬುದು ಅಷ್ಟು ದೊಡ್ಡ ಮಟ್ಟದಲ್ಲಿ ಚರ್ಚೆ ಆಗಲು ಕಾರಣ ಇದೆ. ಇಷ್ಟು ವರ್ಷಗಳ ವೃತ್ತಿ ಜೀವನದಲ್ಲಿ ಸಲ್ಮಾನ್​ ಅವರು ‘ನೋ ಕಿಸ್​’ ಎಂಬ ನಿಯಮ ಪಾಲಿಸಿಕೊಂಡು ಬಂದಿದ್ದಾರೆ. ಯಾವುದೇ ನಟಿಗೂ ಅವರು ಸಿನಿಮಾದಲ್ಲಿ ಕಿಸ್​ ಮಾಡಿಲ್ಲ. ಹಾಗಾದರೆ ಅವರು ಈಗ ಯಾಕೆ ಆ ರೂಲ್ಸ್​ ಬ್ರೇಕ್​ ಮಾಡಿದರು ಎಂಬುದೇ ಎಲ್ಲರ ಪ್ರಶ್ನೆ ಆಗಿತ್ತು. ಈ ಬಗ್ಗೆ ಟೈಗರ್​ ಶ್ರಾಫ್​ ಪ್ರೇಯಸಿ ನಟಿ ದಿಶಾ ಪಠಾಣಿ ಏನೂ ಉತ್ತರ ನೀಡಿರಲಿಲ್ಲ. ಆದರೆ ಸ್ವತಃ ಸಲ್ಮಾನ್​ ಖಾನ್​ ಎಲ್ಲವನ್ನೂ ಬಾಯಿ ಬಿಟ್ಟಿದ್ದಾರೆ.

ಮೇ 13ರಂದು ರಾಧೆ ಸಿನಿಮಾ ತೆರೆಕಾಣಲಿದೆ. ಅದಕ್ಕೂ ಮುನ್ನ ಪ್ರಚಾರದ ಸಲುವಾಗಿ ಚಿತ್ರದ ಮೇಕಿಂಗ್​ ವಿಡಿಯೋ ರಿಲೀಸ್​ ಮಾಡಲಾಗಿದೆ. ಅದರಲ್ಲಿ ಸಲ್ಮಾನ್​ ಖಾನ್​ ಅವರು ಕಿಸ್​ ಬಗ್ಗೆ ಮಾತನಾಡಿದ್ದಾರೆ. ‘ಈ ಸಿನಿಮಾದಲ್ಲಿ ಖಂಡಿತಾ ಕಿಸ್​ ಇದೆ. ಆದರೆ ದಿಶಾ ಪಠಾಣಿ ಜೊತೆ ಅಲ್ಲ. ಒಂದು ಟೇಪ್​ ಜೊತೆಗೆ’ ಎಂದು ಅವರು ಟ್ವಿಸ್ಟ್​ ನೀಡಿದ್ದಾರೆ. ಅಂದರೆ, ದಿಶಾ ಪಠಾಣಿ ತುಟಿಗೆ ಟೇಪ್​ ಅಂಟಿಸಿ, ಅದರ ಮೇಲೆ ಸಲ್ಮಾನ್​ ಕಿಸ್​ ಮಾಡಿದ್ದಾರೆ. ಆ ಮೂಲಕ ಅವರು ಅವರು ತಮ್ಮ ‘ನೋ ಕಿಸ್​’ ಪಾಲಿಸಿಯನ್ನು ಕಾಪಾಡಿಕೊಂಡಿದ್ದಾರೆ.

ಈ ದೃಶ್ಯ ಸಿನಿಮಾದಲ್ಲಿ ಹೇಗೆ ಮೂಡಿಬಂದಿದೆ ಎಂಬುದನ್ನು ತಿಳಿದುಕೊಳ್ಳಲು ಅಭಿಮಾನಿಗಳು ಕಾದಿದ್ದಾರೆ. ಚಿತ್ರಮಂದಿರ ತೆರೆಯಲು ಅನುಮತಿ ಇರುವ ನಗರಗಳಲ್ಲಿ ಈ ಚಿತ್ರ ನೇರವಾಗಿ ಬಿಡುಗಡೆ ಆಗಲಿದೆ. ಜೊತೆಗೆ ಏಕಕಾಲದಲ್ಲಿ ಓಟಿಟಿ ಮತ್ತು ಡಿ2ಎಚ್​ ಸೇವೆಗಳ ಮೂಲಗಳೂ ವೀಕ್ಷಣೆಗೆ ಲಭ್ಯ ಆಗಲಿದೆ. ಸಿನಿಮಾ ಬಿಡುಗಡೆಯಲ್ಲಿ ಬಾಲಿವುಡ್ ಇದೇ ಮೊದಲ ಬಾರಿಗೆ ಇಂಥ ಮಾರ್ಗ ಅನುಸರಿಸುತ್ತಿದೆ. ಚಿತ್ರದಲ್ಲಿ ಹಿರಿಯ ನಟ ಜಾಕಿ ಶ್ರಾಫ್​, ರಣದೀಪ್​ ಹೂಡಾ ಮುಂತಾದವರು ಪ್ರಮುಖ ಪಾತ್ರ ಮಾಡಿದ್ದಾರೆ.

ಇದನ್ನೂ ಓದಿ:

ಒಂದೇ ಒಂದು ಹಾಡು ನೋಡಿ ಅಲ್ಲು ಅರ್ಜುನ್​ ಪ್ರತಿಭೆಗೆ ಸಲಾಂ ಎಂದ ಸಲ್ಮಾನ್​ ಖಾನ್​

ಲಾಕ್​ಡೌನ್​ನಲ್ಲೂ ಮನೆಯಿಂದ ಹೊರಬಂದ ಸಲ್ಮಾನ್​ ಖಾನ್;​ ಆದ್ರೂ ಇದು ಮೆಚ್ಚುವ ಕೆಲಸ