‘ನನಗೆ ಹಾವು ಕಡಿದಿದೆ’; ವೈದ್ಯರ ಬಳಿ ಅಳಲು ತೋಡಿಕೊಂಡ ಸೌಂದರ್ಯಾ ಶೆಟ್ಟಿ

ಬಿಗ್ ಬಾಸ್ ಮನೆಯಲ್ಲಿ ದಿನದಿಂದ ದಿನಕ್ಕೆ ಹೈ ಡ್ರಾಮಾ ಹೆಚ್ಚುತ್ತಿದ್ದು, ಸ್ಪರ್ಧಿಗಳು ತಮ್ಮ ವಿಭಿನ್ನ ವರ್ತನೆ ಹಾಗೂ ಮನರಂಜನೆಯಿಂದ ಪ್ರೇಕ್ಷಕರ ಗಮನ ಸೆಳೆಯುತ್ತಿದ್ದಾರೆ. ಅದರಲ್ಲೂ ಸ್ಪರ್ಧಿ ಸೌಂದರ್ಯಾ ಶೆಟ್ಟಿ ಅವರು ತಮ್ಮ ಆಟದ ಮೂಲಕ ಸಖತ್ ಮೈಲೇಜ್ ಪಡೆದುಕೊಳ್ಳುತ್ತಿದ್ದಾರೆ. ಬಿಗ್ ಬಾಸ್ ಮನೆಯ ಪ್ರತಿಯೊಂದು ಸನ್ನಿವೇಶವನ್ನೂ ತಮ್ಮ ಪರವಾಗಿ ಬಳಸಿಕೊಳ್ಳುತ್ತಿರುವ ಅವರು, ತಮ್ಮ ಚುರುಕಾದ ಆಟದಿಂದ ಎಲ್ಲರಲ್ಲೂ ಕುತೂಹಲ ಮೂಡಿಸಿದ್ದಾರೆ.

ಇತ್ತೀಚಿನ ಸಂಚಿಕೆಯಲ್ಲಿ ನಡೆದ ಟಾಸ್ಕ್ ಒಂದರ ವೇಳೆ ಬಿಗ್ ಬಾಸ್ ಮನೆಯಲ್ಲಿ ಅಚ್ಚರಿಯ ಘಟನೆಯೊಂದು ನಡೆದಿದೆ. ಟಾಸ್ಕ್ ಆಡುವ ಭರದಲ್ಲಿ ಸೌಂದರ್ಯಾ ಅವರ ಮುಖಕ್ಕೆ ಸ್ಪರ್ಧಿ ಗಾನವಿ ಅವರ ಹಲ್ಲು ತಾಗಿದೆಯಂತೆ. ಇದರಿಂದ ಸ್ವಲ್ಪ ಆತಂಕಗೊಂಡ ಸೌಂದರ್ಯಾ, ‘ನನ್ನ ಮುಖಕ್ಕೆ ಏನೂ ಆಗಬಾರದು’ ಎಂದು ಗಾಬರಿಯಿಂದ ಕಾಳಜಿ ವ್ಯಕ್ತಪಡಿಸಿದ್ದಾರೆ.

ಬಿಗ್ ಬಾಸ್ ಮನೆಯಲ್ಲಿ ಕೆಲವರು ಗಾನವಿಯನ್ನು ಎರಡು ನಾಲಿಗೆ ಹೊಂದಿದ್ದಾರೆ ಎಂಬ ಕಾರಣಕ್ಕೆ ‘ಹಾವು’ ಎಂದು ಕರೆಯುವುದುಂಟು. ಹೀಗಾಗಿ ಗಾನವಿ ಹಲ್ಲು ತಾಗಿದೆ ಎಂಬ ಕಾರಣಕ್ಕೆ ಸೌಂದರ್ಯಾ ತಮಗೆ ಹಾವು ಕಡಿದಿದೆ ಎಂದು ವೈದ್ಯರ ಬಳಿ ಅಳಲು ತೋಡಿಕೊಂಡಿದ್ದಾರೆ.

ಸೌಂದರ್ಯಾ ಅವರ ಈ ಮಾತುಗಳನ್ನು ಕೇಳಿ ಅಲ್ಲಿಗೆ ಬಂದ ವೈದ್ಯರು ಕೂಡ ಒಂದು ಕ್ಷಣ ಶಾಕ್ ಆಗಿದ್ದಾರೆ. ಗಂಭೀರ ಪರಿಸ್ಥಿತಿ ಇರಬಹುದು ಎಂದುಕೊಂಡು ಬಂದ ವೈದ್ಯರಿಗೆ, ಇದು ಬಿಗ್ ಬಾಸ್ ಮನೆಯ ಟಾಸ್ಕ್ ಹಾಗೂ ಸ್ಪರ್ಧಿಗಳ ನಡುವಿನ ಚೇಷ್ಟೆ ಎಂಬುದು ತಿಳಿದು ಅಚ್ಚರಿಯಾಗಿದೆ. ವೈದ್ಯರ ಮುಂದೆಯೂ ಸೌಂದರ್ಯಾ ಈ ರೀತಿಯ ನಾಟಕೀಯವಾಗಿ ಅಳಲು ತೋಡಿಕೊಂಡಿರುವುದು ನಗೆಯುಕ್ಕಿಸಿದೆ.

ಇದನ್ನೂ ಓದಿ: ಬಿಗ್ ಬಾಸ್ ಕನ್ನಡ: ಮಂಜನ ಎಂಟ್ರಿ ಬಳಿಕ ಮನೆಯಲ್ಲಿ ಮತ್ತೆ ಮಾತಿನ ಚಕಮಕಿ

ಒಟ್ಟಾರೆಯಾಗಿ ಬಿಗ್ ಬಾಸ್ ಮನೆಯ ಈ ಸಣ್ಣಪುಟ್ಟ ಘಟನೆಗಳನ್ನೂ ಸಹ ತಮ್ಮ ಆಟಕ್ಕೆ ಪೂರಕವಾಗಿ ಬಳಸಿಕೊಳ್ಳುತ್ತಿರುವ ಸೌಂದರ್ಯಾ ಶೆಟ್ಟಿ, ಸಖತ್ ಮೈಲೇಜ್ ಪಡೆದುಕೊಳ್ಳುತ್ತಿದ್ದಾರೆ. ವೀಕ್ಷಕರ ಮನಸ್ಸಿನಲ್ಲಿ ತಮ್ಮ ಸ್ಥಾನವನ್ನು ಗಟ್ಟಿಗೊಳಿಸುತ್ತಿರುವ ಅವರ ಈ ಮನರಂಜನಾತ್ಮಕ ಆಟವು ಸದ್ಯ ಬಿಗ್ ಬಾಸ್ ಮನೆಯಲ್ಲಿ ಹಾಟ್ ಟಾಪಿಕ್ ಆಗಿ ಬದಲಾಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.